Mozo-sipas kasqaykipi Jehová Diosta serviy

“Qaqa hina sayaspa yachasqaykikunata umaykiman churay.” (2 TIM. 3:14.)

1. ¿Imaynatam Jehová Dios qawan mozo-sipaskunapa servisqankuta?

JEHOVÁ DIOSPAQQA ancha valorniyoqmi mozo-sipaskunapa servisqankuqa, chaymantam salmos qellqaq kaynata nirqa: “Sumaqllaña kasqayki punchawpim kikinkumanta hamusunki. Achikyaq sulla hinam akllasqayki mozokuna hamusunki”, nispa. (Sal. 110:3.) Arí, Jehová Diosqa chaninchanmi serviqnin mozo-sipaskunataqa.

2. ¿Imata ruranankupaqmi runakuna kallpanchanku mozo-sipaskunata?

² Congregacionpi kaq mozo-sipas, ¿Jehová Diosman qokurqankiñachu? Achkam chay rurayta mana atinkuchu, allin llamkayniyoq runakuna, profesorkuna, ayllunku hinaspa amistadninkupas kay pachapi kaqkunata maskanankupaq kallpanchaptinku. Jehová Dios serviyta mozo-sipaskuna akllaptinkuqa, hawapi runakunaqa manam allintachu qawanku. Ichaqa, Jehová Diosta serviq mozo-sipaskunaqa allin kawsakuytam akllarunku (Sal. 27:4). Hinaptinqa qawasunchikyá kay kimsa tapukuykunamanta: ¿Imanasqataq Jehová Diosta servinayki? ¿Imataq yanapasunki vidaykita Diosman qosqaykiman hina kawsakunaykipaq, hukkuna imata niptinkupas otaq ruraptinkupas? ¿Imakunatam haypayta atiwaq Dios servisqaykipi?

Cristianoqa Jehová Diostam servinan

3. ¿Imaynam kananchik Jehová Diospa unanchasqankunata qawaspa?

³ ¿Imanasqataq Jehová Diosta servinayki? Imanasqa servinaykimantam, Apocalipsis 4:11 nin: “Señor Diosllayku, qamllam kanki tukuy atipayniyoq adorana hinaspa yupaychana Diosqa. Qanmi unancharqanki tukuy ima kaqkunataqa. Munaynikiman hina unanchaptikim kachkan tukuy imakunaqa”, nispa. Arí, Jehová Diosmi tukuy imakunata Unancharqa. ¡Mayna sumaqmi allpaqa! Paymi unancharqa sachakunata, waytakunata, animalkunata, lamar qochakunata, orqokunata, paqchaq yakukunata hinaspa hukkunatapas. Jehová Diosmanta rimaspanmi salmos qellqaq nirqa: “Unanchasqaykikunawanmi huntarun kay pachaqa”, nispa (Sal. 104:24). ¡Maynatam agradecekunanchik Jehová Diosta, paymi ancha kuyakuyninpi qowarqanchik cuerpota hinaspa yuyaytapas kay Allpapi tukuy imaymana kaqwan kusikunanchikpaq! ¿Manachu chayna sumaq unanchasqa kasqanchik kallpanchawananchik servinanchikpaq?

4, 5. Diospa rurasqankunamanta, ¿ima rikusqankunam Josueyta kallpancharqa Jehová Diospi confiananpaq?

⁴ Chaymantapas, Josueypa nisqanpim rikunchik Jehová Diosta imanasqa servinamanta, paymi manaraq wañukuchkaspan Diospa llaqtanta kaynata nirqa: ‘Chaynaqa yachaychikyá tukuy sonqoykichikwan chaynataq tukuy vidaykichikwan yupaychasqanchik Tayta Diospa tukuy allin prometesqankunataqa cumplinmi’, nispa. ¿Imanasqataq chaynata nirqa? (Jos. 23:14.)

⁵ Josueyqa Egiptopi warmallaraq kachkaspanqa, yacharqañachá israelitakunaman Jehová Dios sumaq allpa qonanmantaqa (Gen. 12:7; 50:24, 25; Exo. 3:8). Chaynataq yuyayniyoq kaspanmi rikurqa, Jehová Dios promesankunata imayna cumpliy qallarisqanta, Egiptopa contranpim chunka castigokunata qorqa hinaspa israelitakunata librarqa. Chaymantapas Josueyqa Puka lamar qochatam israelitakunawan chimparqa, hinaspam  rikurqa faraontawan tropankunata yaku millpurusqanta. Chaynataq, Sinai lawpi “mana yakupa kasqan manchakuypaq hatun chunniqninta” israelitakunapa risqanku tiempopipas, Josueyqa rikurqam Jehová Dios ima necesitasqanku qosqanta, chaypiqa manam pipas wañurqachu mikuymanta nitaq yakumantapas (Deu. 8:3-5, 14-16; Jos. 24:5-7). Chaynallataqmi rikurqa israelitakuna Canaan lawpi atiysapa nacionkunata vencespanku, Prometesqa Allpaman yaykunankupaq Diospa yanapasqantapas (Jos. 10:14, 42).

6. ¿Imataq yanapasunki Jehová Dios serviyta munanaykipaq?

⁶ Josueyqa yacharqam Jehová Dios prometekusqan cumplisqantaqa. Chaymi nirqa: “Ñoqam ichaqa familiaykunapiwan Tayta Diosllata adorasaqku”, nispa (Jos. 24:15). Qampas mozo-sipas, Diospa promesan cumplisqankunapi hinaspa cumplinanpaq kaqkunapi piensaspayki, ¿Josuey hinachu serviyta munanki?

7. ¿Imanasqataq ancha allin bautizakuyqa?

⁷ Diospa unanchasqankunata qawasqaykim hinaspa cumplikusqan promesankunapi yuyaymanasqaykim, kallpanchasunayki Jehová Diosman qokuspa bautizakunaykipaq. Kayqa ancha allinmi Jehová Diosta servinapaqqa, chaytam qawachirqa ejemplo qowaqninchik Jesucristo. Mesias hina manaraq Diospa munayninta rurachkaspanmi, Bautizaq Juanman rirqa bautizananpaq. ¿Imanasqa? Paymi nin: “Hanaq pachamantaqa hamurqani manam munasqallayta ruranaypaqchu aswanqa kachamuwaqniypa munasqanta ruranaypaqmi”, nispa. (Juan 6:38.) Chaynaqa, Taytanpa munayninta rurananpaqmi Jesusqa bautizakurqa (Mat. 3:13-17).

8. ¿Imanasqataq Timoteo tantearqa Dios serviyta, hinaspa imatam qampas ruranayki?

⁸ Qawasun Timoteomanta, paypas mozom karqa, ichaqa watakuna pasaptinmi Jehová Diosmanta chaskirqa achka sapaqchasqa llamkaykunata. ¿Imanasqataq akllakurqa Jehová Dios serviyta? Bibliam niwanchik ‘yachasqankunata umanman churasqanta’ (2 Tim. 3:14). Sichu qampas Bibliata estudiarunkiña hinaspa convencesqaña kachkanki yachachikuyninkuna cheqap kasqanmanta, hinaspaqa Timoteo hinam tarikunki. Kunanmi tiempo kachkan tanteakunaykipaq. ¿Imanasqataq mana rimankichu tayta-mamaykiwan ima ruray munasqaykimanta? Paykunapas chaynataq congregacionpi ancianokunapas yanapasunkim bautizakunaykipaq imakuna ruranaykimanta (leey Hechos 8:12).

9. ¿Imaynatam wakin runakuna qawasunki bautizakuruptiki?

⁹ Bautizakuspaykim allinta qallarinki cheqap Dios serviytaqa. Hinaspam kayna premiokunata chaskinki: kunan tiempopim kusikuyta tarinki Diospa munaynin rurasqaykimanta, hamuq tiempopiñataq wiñaypaq kawsakuyta (Heb. 12:2, 3). Chaymantapas, Dios serviq aylluykikunatam kusichinki hinaspa congregacionpi amistadnikikunatapas. Astawanqa Jehová Diospa sonqontam kusichinki bautizakuspaykiqa (leey Proverbios 23:15). Hukkunaqa manapaschá entiendenqakuchu Jehová Dios servinaykipaq bautizakusqaykimantaqa hinaspa ichapas piensanqaku mana allin tantearusqaykita, chaynataq contraykipipas churakunmanku. Chayna kaptinpas atiwaqmi chay sasachakuykunata atipaytaqa.

 Contraykipi churakuptinku otaq mana allintam tantearunki niptinku

10, 11. a) ¿Imatam tapusunkiman bautizakusqaykimanta? b) ¿Imaynatam Jesusta qatipakuspa kutichiwaq iñisqaykimanta tapusuptiki?

¹⁰ Jehová Dios servinaykipaq tantearusqaykitaqa manapaschá entiendenqakuchu estudiaqmasikikuna, vecinoykikuna hinaspa aylluykikunapas. Ichapas tapusunki imanasqa bautizakusqaykimanta hinaspa imapi iñisqaykimantapas. ¿Imaynatam kutichiwaq? Puntataqa segurom kanayki piensasqaykimanta hinaspa sientesqaykimantapas. Iñisqaykimanta imayna rimanaykipaqqa Jesucristota qatipakuy.

¹¹ Judiokunapa religionninkupi punta apaqkuna kawsarimuymanta Jesusta tapuptinkum, payqa kutichirqa Diospa palabranpi mana reparasqanku yachachikuyta rimarispan (Exo. 3:6; Mat. 22:23, 31-33). Huk kutipiñataq, Jesusta Diospa leynin yachachiq runa tapurqa mayqan kamachikuy ancha allin kasqanmanta, payñataq Diospa palabranpa nisqanman hina kutichirqa, chaymi kay runaqa agradecekurqa (Lev.19:18; Deu. 6:5; Mar. 12:28-34). Jesuspa imayna rimasqanwan hinaspa Diospa qellqanta servichikusqanwanmi ‘Jesusrayku runakuna rakinakururqaku’, manataqmi contranpi kaqkunapas presochayta atirqakuchu (Juan 7:32-46). ¿Imaynatam Jesuspa ejemplonta qatipakuwaq pipas iñisqaykimanta tapusuptiki? Bibliata servichikuspayki kutichiy, ‘chaytaqa ruray humillakuspa hinaspa respetowan’ (1 Ped. 3:15). Tapukusqanta mana yachaspaykiqa, reqsikuy mana yachasqaykita hinaspa chay tapukusqanmanta maskanaykipaq niykuy. Chaymanta estudiay Índice de las publicaciones Watch Tower otaq CD-ROM Watchtower Library nisqata servichikuspa. Allinta preparakuspaykiqa ‘yachankichá sapakamaman imayna allin contestayta’ (Col. 4:6).

12. ¿Imanasqataq mana hukmanyanaykichu qatikachasqa kaspa?

¹² Runaqa manachá imakuna creesqallaykimantachu nitaq Diosta servisqallaykimantachu tapusunki. Yuyariy, kay pachataqa Satanasmi controlachkan (leey 1 Juan 5:19). Hinaptinqa manam suyachwanchu lliw runakuna rurasqanchikta allin qawanankuta otaq allintam rurarunki niwananchiktapas. Yaqapaschá contraykipi pipas churakunqa. Ichapas qanmanta sapa kuti ‘mana allintaña rimanqaku’ (1 Ped. 4:4). Ichaqa yuyariy, manam qamllachu chaykunata pasanki. Jesucristopas qatikachasqam karqa. Chaynallataqmi apostol Pedrotapas pasarqa, chaymi kaynata qellqarqa: “Kuyasqay wawqe-panillaykuna, sasachakuykuna hamusuptikichikqa amayá hukmanyaychikchu ima mana allinpas kanman hinaqa. Aswanqa Cristopa ñakariqmasin kasqaykichikraykuyá kusikuychik”, nispa (1 Ped. 4:12, 13).

13. ¿Imanasqataq cristianokunaqa kusisqa kanmanku qatikachasqa kaspankupas?

¹³ Cristiano kasqaykirayku qatikachasqa otaq harkakuy kasqanqa kusikunaykipaqmi. ¿Imanasqa? Runakunapa chaskisqan kaspaykiqa Satanaspa munasqanman hina kawsasqaykitam qawachiwaq, manam Diospa munasqanman hina kawsasqaykitachu. Jesusmi nirqa: “Llapallan runakuna qamkunamanta allinllata rimaptinqa ¡imaynaraq kankichik! chayna alabasuqnikichikpa abuelonkunapas chayna allinllatañam rimaqku Diosmanta willakuq tukuqkunamanta”, nispa (Luc.  6:26). Qatikachasqa kasqaykiqa qawachinmi, Satanaswan kay pachapi runankunapas Dios servisqaykirayku cheqnisusqaykita (leey Mateo 5:11, 12). ‘Cristorayku insultasuptikiqa’ kusikunaykim (1 Ped. 4:14).

14. ¿Ima allinkunatam pipas tarinman qatikachasqa kaspa Jehová Diosman hapipakuspaqa?

¹⁴ Tawa allinkunatam tarinki qatikachasqa otaq harkakuy kaptinpas Jehová Diosta kasukuspaykiqa. Puntataqa qawachinkim, Diosman hinaspa Churinman hapipakusqaykita. Chaynataq, qaqa hina iñiynikipi takyasqaykim wawqe-paninchikkunata kallpanchan. Chaymantapas, Jehová Diosta mana reqsiq runakunam kasukusqaykita qawaspanku yupaychayta munanqaku (leey Filipenses 1:12-14). Chaynataq, sasachakuyta aguantanaykipaq Jehová Diospa yanapakuyninta qawasqaykiman hinam, Dios kuyasqaykipas yapakunqa.

“Punku hinam kicharayachkan” Diosmanta aswan willakunaykipaq

15. ¿Imataq ‘punku hina kicharayarqa’ apostol Pablopaq?

¹⁵ Apostol Pablom Efeso llaqtapi predicasqanmanta kaynata qellqarqa: “Punku hinam kicharayachkan Señormanta aswan masta willakunaypaq”, nispa (1 Cor. 16:8, 9). Arí, astawanmi atinman karqa chay llaqtapi predicayta hinaspa runakuna yachachiytapas. Chaynata ruraspanmi apostol Pabloqa achka runakunata yanaparqa Jehová Diosta reqsispanku yupaychanankupaq.

16. ¿Imapaqmi 1919 watapi ungidokunapaq Jesucristo ‘punkuta kichaykapurqa’?

¹⁶ Jesucristom 1919 watapi, hanaq pachaman riy suyaqkunapaq ‘punkuta kichaykapurqa’ (Apo. 3:8). Paykunam chay punkunta yaykurqaku otaq Diosmanta predicaspa, yachachiyta astawan qallaykurqaku chay watamanta. ¿Imakunatam chayna rurasqankuwan hayparqaku? Diospa munaychakuyninmanta willakuymi Allpapa cantonkamaña chayarun, chaymi yaqa qanchis millon runakuna mosoq pachapi wiñaypaq kawsakuyta suyachkanku.

17. ¿Imakuna ruranaykipaqmi ‘punku hina kicharayachkan’?

¹⁷ Jehová Diosta serviqkunapaqqa hinallam ‘punku hina kicharayachkan’ Diosmanta astawan willanankupaq. Kasukuqkunaqa astawan predicaspankum kusisqa tarikunku. ¿Imatam ninki qam cristiano mozo-sipas? ¿Maynatam chaninchanki ‘Diospa allin noticianpi’ runakuna iñinanpaq yanapayta? (Mar. 1:14, 15.) ¿Piensarqankichu precursor auxiliar otaq regular hina serviyta? Chaymantapas, atiwaqmi llamkayta huñunakunapaq Salonkuna ruraypi, Betel wasipi serviyta otaq misionero kaytapas. Satanaspa munaychakusqan tiempom tukuruchkanña, hinaptinqa ancha allinmi Diosta servispa chay ruraykunapi yanapakuyqa. ¿Qam yanapakunkichu predicaypi llamkay kachkaptinraq?

‘Yachaychik Diospa allin kasqanta’

18, 19. a) ¿Imataq Davidta yanaparqa Jehová Diosta tukuy sonqowan serviy munananpaq? b) ¿Imaynatam yachanchik Dios servisqanmanta David haykapipas mana ñakakusqanta?

¹⁸ Salmos qellqaq Davidmi Diospa nisqanman hina kaynata qellqarqa: “Pruebaspataq yachaykuychik Diospa allin kasqantapas”, nispa (Sal. 34:8). Ñawpa tiempopi Israel kamachiq Davidtam, warmallaraq kaspa ovejata michichkaptin Jehová Dios librarqa purun animalkunamanta. Yanaparqataqmi Goliat sutiyoq runawan peleaptin, hinaspa librarqam achka sasachakuykunamantapas (1 Sam. 17:32-51; Sal. 18, qallariyninpi kaqta). Diospa ancha  kuyakuyninmi Davidta kallpancharqa kaynata qellqananpaq: ‘Yupaychasqay Dios Taytalláy, achka-achkallañam milagrokuna rurasqaykiqa. Achka-achkallañam favorniykupi tanteasqaykiqa’, nispa (Sal. 40:5).

¹⁹ Davidqa anchatam Jehová Diosta kuyarqa chaynataq tukuy sonqonwan hinaspa yuyayninwanpas serviyta munarqa (leey Salmo 40:8-10). Payqa manam haykapipas ñakakurqachu tukuy vidanpi Dios servisqanmantaqa. Paypaqqa Diosta yupaychaspa kawsakuymi ancha valorniyoq karqa hinaspa kusikuytapas tarichirqa. Yuyaqña kaspanmi Davidqa kaynata nirqa: “Qamllam kanki warma kasqaymanta ñoqapa suyanayqa. Qamllam kanki warma kasqaymanta ñoqapa confiakunayqa. Diosnilláy, yuyaqña kaptiyqa [. . .], soqo umaña kaptiyqa amayá qonqarullawaychu”, nispa (Sal. 71:5, 18). Mana ancha kallpayoqña kachkaptinpas, Jehová Dioswan amistadnin chaynataq paypi confianzanmi astawan kallpanchasqa karqa.

20. ¿Imanasqataq Diosta servispa kawsakuyqa ancha allin?

²⁰ Josueypa, Davidpa hinaspa Timoteopa vidankum qawachiwanchik, Jehová Diosta servispa kawsakuy allin kasqanmanta. Kay pachapi imapas kaqkunataqa manam tupachiyta atinchikmanchu wiñaypaq kaqkunawanqa, kay wiñaypaq kaqkunataqa tarinqaku “tukuy sonqonkuwan chaynataq tukuy vidaykuwan” Diosta serviqkunallam (Jos. 22:5). Jehová Diosman oracionpi manaraq qokuspaykiqa, tapukuy: “¿Imataq harkawan Jehová Diospa testigon kanaypaq?”, nispa. Bautizasqa kaspaykiqa, ¿munawaqchu astawan kusisqa kayta? Hinaptinqa, Jehová Diosta astawan serviy hinaspa espiritualpipas puntariy. Qatiqnin estudiopim yachanki apostol Pablopa ejemplonta qatipakuspa imayna ruranaykimanta.

¿Imatam niwaq?

• ¿Ima iskay razonmi kanman Diosta servinapaq?

• ¿Imam Timoteota yanaparqa Diosta servinanpaq?

• ¿Imanasqataq iñiynikipi allinta takyanayki qatikachasqa kaspaykipas?

• ¿Imakunatam haypayta atiwaq Diosta servispayki?

[Kay yachachikuypa tapukuyninkuna]

[22 kaq paginapi dibujo]

Jehová Diosta servispaqa allintam kawsakunki

[23 kaq paginapi dibujo]

¿Atiwaqchu iñiynikimanta tapusuptiki kutichiyta?