Salvawasunñam Diospa Munaychakuyninqa

“Munaychakusqayki hamuchun. Munasqaykiyá rurasqa kachun kay pachapipas hanaq pachapi hina.” (MAT. 6:10.)

1. ¿Imamanta Jesuspa yachachisqanmi ancha valorniyoq karqa?

ORQOPI Jesus yachachispanmi, qatiqninkunata qawachirqa imayna mañakunankumanta, chay mañakuypim ancha valorniyoq yachachikuyta nirqa: “Munaychakusqayki hamuchun. Munasqaykiyá rurasqa kachun kay pachapipas hanaq pachapi hina”, nispa (Mat. 6:9-13). “Jesusmi discipulonkunapiwan llaqtakunapi chaynataq llaqtachakunapipas Diospa munaychakunanmanta willakustin purirqa” (Luc. 8:1). Hinaspapas kaynatam kamachirqa: “Puntataqa maskaychik Diospa munaychakusqantawan paypa munasqan allin ruraytayá”, nispa (Mat. 6:33). Kay yachachikuyta estudiaspa, piensarisun predicacionpi imayna servichikunapaq. Ejemplopaq, qatiqnin tapukuykunata imaynatam kutichichwan: ¿Mayna allintaq Diospa Munaychakuyninmanta willakuyqa? ¿Imanasqataq runakuna necesitan salvasqa kayta? ¿Imaynatam Diospa Munaychakusqan salvawasunchik?

2. ¿Mayna allintaq Diospa Gobiernonmanta willakuyqa?

² Jesusmi nirqa: “Diospa munaychakusqanmanta kay allin noticiam willakusqa kanqa enterollan kay pachapi chaynapi llapallan nacionpi runakuna yachananpaq, chayñam kay tiempoqa tukunqa”, nispa (Mat. 24:14). Diospa Munaychakusqanmanta willakuymi imamantapas ancha valorniyoqqa. Chayraykum, Jehová Diospa yaqa qanchis millon testigonkuna enteron pachapi predicachkanku Diospa Gobiernon hanaq pachapi kamachiy qallaykusqanmanta, paykunam huñunakunku pachak waranqa masnin congregacionkunapi. Kayqa sumaq willakuymi, kay gobiernowanmi Diosninchikqa kay pachapi llapallan runakunata munaychakunqa. Chay Gobierno kamachiptinmi, Jehová Diospa munaynin hanaq pachapi hina kay Pachapipas rurasqa kanqa.

3, 4. ¿Imataq pasanqa kay Pachapi Diospa munaynin rurakuptin?

³ ¿Imatam Jehová Dios runakunapaq ruranqa kay Pachapi munaynin rurakuptin? ‘Pichanqam paykunapa weqenta, manañam kanqachu wañuypas, [. . .] waqaypas nitaq nanaypas.’ (Apo. 21:4.) Manañam pipas huchayoq hinaspa pantaq kasqanraykuqa onqonqachu nitaq wañunqachu. Diospa yuyayninpi kaq wañukuqkunaqa kawsarimuspankum atinqaku wiñaypaq kawsakuyta, Bibliam kaynata nin: ‘Allin runakunatawan mana allin runakunatam hamuq punchawpi Dios kawsarichimunqa’, nispa (Hech.  24:15). Manam kanqañachu guerrakuna, onqoykuna hinaspa yarqaypas, kay pachapas sumaqllaña huertamanmi tikrakunqa. Purun animalkunapas hawkañam kawsanqaku runakunawan hinaspa uywa animalkunawanpas (Sal. 46:9; 72:16; Isa. 11:6-9; 33:24; Luc. 23:43, NM).

⁴ Kayna sumaq kawsakuyta suyasqanchikraykum, mana yanqachu Diospa Gobiernon ukupi imayna kawsakuy kananmanta Bibliapa kayna niwasqanchik: “[Llampu sonqoyoqkunam] dueñoyanqa allpatapas. Paykunaqa kusikuywanmi hawkayaypi kawsanqapas”, nispa. Ichaqa, ¿imataq pasanqa mana allin ruraq runakunata? Bibliam nin: “Mana allin ruraqkunaqa chayllapunim kanqañachu”, nispa. Jehová Diospi suyaqkunallam kay ‘allpataqa dueñoyanqaku’ (Sal. 37:9-11).

5. ¿Imatam Diospa Gobiernon chinkachinqa?

⁵ Ichaqa, kaykuna pasakunanpaqqa chinkananmi gobiernokuna, pantay religionkuna hinaspa qollqella maskanankupaq ima ruraykunapas. Chaykunatam Diospa Gobiernon chinkachinqa. Danielmi nirqa: “Chay hamuq reykuna gobiernachkaptinmi [kunan gobiernokuna] Hanaq Pacha Dios hatarichinqa mana tuñichiy atina gobiernota [hanaq pachapi], chay gobiernoqa huk runamanqa manam qosqachu kanqa wiñaypaqpas. Aswanqa chay gobiernom llapallan wakin gobiernokunata ñutupaspan chinkachinqa hinaptinmi chay puchuruq gobiernollaña takyanqa wiña-wiñaypaq” nispa (Dan. 2:44). Hinaptinmi ‘mosoq cielokuna’ (hanaq pachamanta Diospa Gobiernon) kamachinqa “mosoq allpata” (mosoq pachapi kawsaq allin runakunata) chaypim “tukuy imapas allin arregloman hina rurasqa kanqa” (2 Ped. 3:13).

Kunan tiempom necesitanchik salvasqa kayta

6. ¿Imatam Biblia nin kay pachapi mana allin ruraykunamanta?

⁶ Satanas hinaspa Adanwan Eva Diospa contranpi churakuruspanku, kikinkuña imam allin otaq mana allin kaqtapas tanteayta munasqankuwanmi, runakunata ñakariyman churarurqaku. Chaymanta waranqa soqta pachak wata pasaytam, Noeypa tiemponpi ‘kay pachapi runakunaqa llumpay mana allin rurayllapiña karqaku chaynataq [. . .] lliw yuyayninkupas sapa punchawmi mana allinllaña karqa’ (Gen. 6:5). Waranqa kimsa pachak wata pasaytapas sasachakuyqa llumpayllañam karqa, chaymi Salomon kaynata qellqarqa: ‘Kunankama kawsaqkunamantapas allinqa wañukuqkunam. Kay pachapi mana allin runata manaraq rikusqankuraykum, wañuqkunamantapas [. . .] kawsaqkunamantapas aswan allinqa manaraq nacemuqkunam’, nispa (Ecl. 4:2, 3). Chay tiempomanta kimsa waranqa wataña pasaruptinpas, mana allinkunaqa hinallam kachkan.

7. ¿Imanasqataq kunan tiempopi astawan necesitanchik Dios librawananchikta?

⁷ Arí, mana allinkunaqa waranqantin watakunañam kachkan, chaymi kunan necesitanchik Diospa Gobiernon librawananchikta. Manam haykapipas runakunaqa kay pachak watakunapi hinaqa sasachakuypi kawsarqakuchu, kunanqa astawanraqmi yapakuchkan. Ejemplopaq, Instituto Worldwatch niqmi kaynata willakun: “Punta cristianokunapa tiemponmanta 1899 watakama guerrakunapi wañuq runakunamantaqa, kunan [1900-2000 watakunapi] guerrakunam kimsa chaynatawan runakunata wañuchirqa”,  nispa. Chaynataq 1914 watamantam pachak millon masnin runakuna guerrakunapi wañurqaku. Chaymantapas huk libropa nisqanman hinaqa, enteron pachapi iskay kaq hatun guerrapim yaqa soqta chunka millon runakuna wañururqaku. Kunanñataq achka nacionkunapa bombas nucleares nisqanku kaptin, atinmanku kay Pachapi yaqa lliw runakuna chinkarachiyta. Chaynataq, kunan tiempopi runakuna yachayninkuman hina hampikunata hinaspa tukuy imata ruraptinkupas, huk watallapim pichqa millon wawakuna yarqaymanta wañunku (qawariy ¿Imatapunim Bibliaqa Yachachin?, nisqa libropa 9 yachachikuyninta).

8. ¿Imatam qawachin runakunapa waranqantin watakunaña kamachisqanku?

⁸ Runakunaqa manam atinkuchu mana allinkunata chinkachiytaqa. Gobiernokunapas, religionkunapas chaynataq hukkunapas manam yanapayta atinkuchu runakuna hawkalla, kusisqa hinaspa mana onqospa kawsanankupaq. Sasachakuykunata allichanankumantaqa, astawanmi rikurirachinku. Runakunapa waranqantin watakunaña kamachisqankum qawachin Bibliapa kayna nisqan cheqap kasqanta: ‘Runakunaqa manam kikillanmantaqa kawsanmanchu’ (Jer. 10:23). Arí, runakunaqa runamasintam munaychakun “ñakarichinanpaq” (Ecl. 8:9). Chaymi, “kunankama Diospa tukuy ima unanchasqankuna ñakarichkan” (Rom. 8:22).

9. Yachasqanchikman hina, ¿imam pasanan karqa ‘tukupay tiempopi’?

⁹ Bibliam willarqaña kunan tiemponchikpaq kaynata: ‘Tukupay tiempokunaqa sasallañam kanqa’, nispa. Runakuna kamachiptinku imayna kawsakuy kananmanta willaspanmi, Bibliaqa kaynata nirqa: “Mana allin runakunawan engañaq runakunam ichaqa aswan mana allinmanraq chayanqaku”, nispa (leey 2 Timoteo 3:1-5, 13). Cristianokunaqa manam admirakunchikchu chayna pasasqanwanqa, yachanchikmi ‘kay pachapi mana allin kaqkuna Diablopa makinpi kasqanta’ (1 Juan 5:19). Ichaqa kusikunchikmi Jehová Dios chayllaña kay sasachakuykunamanta librawananchikta yachaspa.

Salvawananchikpaq promesanqa segurom

10. ¿Imanasqataq ninchik salvawananchikpaq Diospa prometesqallan seguro kasqanta?

¹⁰ Predicaspaykiqa entiendechiy salvawananchikpaq Diospa prometesqallan seguro kasqanmanta. Payqa munanmi hinaspa atiyniyoqmi serviqninkunata ima sasachakuymantapas salvananpaq (Hech. 4:24, 31; Apo. 4:11). Segurom kachwan llaqtanta salvananmanta hinaspa prometesqankunata cumplinanmantapas, paymi nirqa: “Cheqaptapunipas ñoqapa piensasqayman hinam kanqa”, nispa. Diospa rimasqanqa “manam yanqachu kanqa” (leey Isaias 14:24, 25; 55:10, 11).

11, 12. ¿Imatam Jehová Dios prometen serviqninkunaman?

¹¹ Mana allin runakunata Jehová Dios castigananpaq willaspanqa, serviqninkunatam librananpaq prometen. Juicionmanta willananpaq Jeremiasta kamachispanmi nirqa: ‘Amam manchakunkichu  pitapas. Qanwanmi kachkani libranaypaq’, nispa (Jer. 1:8). Chaynataq, Sodoma hinaspa Gomorra llaqtakunata manaraq puchukachichkaspanmi, iskay angelkunata kamachirqa Lotta hinaspa aylluntapas horqonankupaq. Hinaspam chay llaqtakunaman “Tayta Dios cielomanta azufretawan ninata parachimurqa” (Gen. 19:15, 24, 25).

¹² Jehová Dios mana allin runakunata enteron pachapi castigaspanpas, libranmi serviqninkunata. Sinchi parawan ñawpa tiempopi mana allin runakunata chinkachispanmi, Jehová Diosqa “Noeytawan qanchis runakunallata salvarqa” (2 Ped. 2:5). Mana allin runakunata Jehová Dios kunan tiempopi puchukachispanqa, allin runakunatam kaqllamanta libranqa. Chaymi Palabran kaynata niwanchik: “Kay pachapi llapallan humillakuqkuna, qamkunaqa Tayta Diostayá maskaychik [. . .]. Qamkunaqa allin rurayllatañayá munaychik. Ama hatunchakuspa kawsakuytayá munaychik. Icharaqpas Tayta Diospa piñakuynin punchawpi pakaykusqa kawaqchik”, nispa (Sof. 2:3). Juicionta enteron pachaman apamuptinmi, ‘mana allin ruraqkunaqa kay pachamanta chinkachisqa kanqaku’. Ichaqa Diosta kasukuqkunam ‘kay pachapiqa yachanqaku’ (Pro. 2:21, 22).

13. ¿Imaynatam Jehová Dios libranqa wañukuq serviqninkunata?

¹³ Achkañam Diosta serviqkunaqa wañukunku, wakinmi onqoywan, qatikachasqa kaspanku otaq imakunawanpas (Mat. 24:9). ¿Imam pasanqa paykunawan? Paykunapas librasqam kanqaku. ¿Imaynata? Yachamusqanchikman hinam, ‘allin runakunataqa [. . .] Diosmi kawsarichimunqa’ (Hech. 24:15). ¡Mayna kusikunapaqmi chayqa! Manam imapas Jehová Diostaqa harkanmanchu serviqninkunata librananmantaqa.

Allin ruraq gobierno

14. ¿Imanasqataq seguro kanchik Diospa Munaychakuynin allin gobierno kasqanmanta?

¹⁴ Predicaspaykiqa willay Jehová Diospa Munaychakuyninqa allin gobierno kasqanmanta, chay gobiernoqa Diospa sumaq kayninkunatam qawachin, allin rurayninta hinaspa kuyakuynintapas (Deu. 32:4; 1 Juan 4:8). Chay Gobiernontam qoykun Jesucristoman kay Pachata kamachinanpaq. Chaymantapas kamachirqam, 144.000 akllasqa cristianokuna Jesucristowan kuska hanaq pachamanta kamachimunankupaq (Apo. 14:1-5).

15. ¿Imanasqataq mana chaynallachu Diospa Gobiernon runakunapa gobiernonwan?

¹⁵ Jesuspa chaynataq 144.000 akllasqa runakunapa kamachisqanqa manam pantaq runakunapa kamachisqan hinachu kanqa. Kay pachapi achka kamachiqkunam runakunata ñakarichirqaku hinaspa guerrakunamanpas aparqaku, chaymi millonnintin runakuna wañurqaku. Chayraykum Bibliaqa niwanchik runakunapi mana confianapaq, ‘paykunaqa manam salvawachwanchu’ (Sal. 146:3). Jesucristom ichaqa kuyakuywan kamachinqa, paymi nirqa: “Hamuychik ñoqaman llapallan pisipasqakuna hinaspa qepichkaq hina ñakariqkuna, ñoqam samachisqaykichik. Llasawaqniy yugoyta apaspayá ñoqamanta yachaychik, ñoqaqa kani llampu sonqo humillakuqmi, chaynata ruraspaqa tarinkichikmi samayta. Yugoyqa facil apayllam, qepiypas sampallataqmi”, nispa (Mat. 11:28-30).

Tukurunqañam “tukupay tiempokunaqa”

16. ‘Tukupay tiempokuna’, ¿imaynatam tukunqa?

¹⁶ Kay pachapi mana allin kaqkunaqa, 1914 watamantam tukuyninpiña hinaspa ‘puchukananpaqña’ kachkan (Mat. 24:3). Jesuspa willakusqanman hina ‘llumpa-llumpay ñakariy punchawqa’ hichpallapiñam kachkan (leey Mateo 24:21). Mana haykapipas pasakusqanman hinam kanqa, chaypim lliw mana allin ruraqkuna chinkachisqa kanqaku. Ichaqa, ¿imaynatam qallarinqa hinaspa imaynatam tukunqapas?

17. ¿Imatam Biblia nin hatu-hatun ñakariy imayna qallarinanmanta?

¹⁷ Hatu-hatun ñakariy punchawqa qonqaymantam qallarinqa. Arí, Jehová Diospa punchawninqa hamunqa, runakuna “hawkañam, seguroñam kachkanchik” nichkaptinkum (leey 1 Tesalonicenses 5:2, 3). Hinaptinqa hatu-hatun ñakariy punchawqa qallarinqa nacionkuna  llumpay sasachakuyninkuta allicharunankupaqña piensachkaptinkum. “Hatun Babilonia” otaq lliw pantay religionkunam, qonqayllamanta puchukachisqa kanqaku. Chaymi kamachiqkuna hinaspa huk runakunapas admirasqa kanqaku lliw pantay religionkuna puchukachisqa kaptin (Apo. 17:1-6, 18; 18:9, 10, 15, 16, 19).

18. ¿Imatam Jehová Dios ruranqa llaqtanpa contranpi Satanas hatariptin?

¹⁸ Chaymantañataqmi, ‘señalkuna kanqa intipi, killapi hinaspa lucerokunapipas’, ‘hinaptinmi Diosmanta Hamuq Runapa señalnin puyupi rikuriykamunqa’. Chaykuna pasakuptinmi ‘kallpanchakuspa qawarikusun, librasqa kayninchik hichpallapiña’ kasqanrayku (Luc. 21:25-28; Mat. 24:29, 30). Gog otaq Satanasmi lliw runankunawan Diospa llaqtanpa contranpi hatarinqa. Hinaptinqa, ¿imatam Jehová Dios ruranqa chay pasakuptin? Paymi nin: “Ñawi ruruy tuksiruqmanmi rikchakun qamkunata imanarusuqnikichikpas”, nispa (Zac. 2:8). Jehová Diosmi serviqninkunata chaylla salvanqa. Diospa llaqtanta Satanaspa chinkachiy munasqanqa yanqapaqmi kanqa (Eze. 38:9, 18).

19. ¿Imanasqam seguro kachwan Jesuswan angelkuna Satanaspa runankunata puchukachinanmanta?

¹⁹ Nacionkunapa contranpi Dios hatariptinmi, paykuna yachanqaku ‘[Jehová] Dios kasqanta’ (Eze. 36:23). Diosmi kamachinqa Jesucristota hinaspa paypa kamachisqan wara-waranqantin angelkunatapas, Satanaspa lliw runankunata puchukachinanpaq (Apo. 19:11-19). Yuyarisunchik chullalla angelmi huk tutapi “wañurachirqa pachak pusaq chunkan pichqayoq waranqa runakunata”. Chaynallataqmi hatu-hatun ñakariy punchaw Armagedonpi tukuptin, Diospa angelninkunaqa mana sasachakuspa Satanaspa runankunata chinkachinqa (2 Rey. 19:35; Apo. 16:14, 16). Hinaptinmi Satanaswan demoniokuna waranqa wata presochasqa kanqaku, chaymantam Diosqa chinkachinqa (Apo. 20:1-3).

20. ¿Imatam Jehová Dios ruranqa Gobiernonwan?

²⁰ Chaynapim hanaq pachapi hinaspa kay Pachapipas mana allin ruraykunaqa manaña kanqañachu, hinaptinmi allin runakunaqa kay pachapi wiñaypaq kawsanqaku. Chaymantapas Jehová Diosmi qawachinqa serviqninkuna Libraq kasqanta (Sal. 145:20). Gobiernonwantaqmi llapallan kamachiq kasqanta rikuchinqa, sutinta hatunchanqa hinaspa Allpapaq ima munasqantapas ruranqa. Llapallanchikmi kusisqa kay allin noticiamanta willakunanchik, hinaspam ‘wiñay kawsakuypaq’ kaqkunata Diospa Gobiernon librawananchikmanta entiendenankupaq yanapananchik (Hech. 13:48).

¿Yuyachkankichu?

• ¿Imaynatam Jesus qawachirqa Diospa Gobiernon ancha valorniyoq kasqanta?

• ¿Imanasqam kunan astawan necesitanchik Dios salvawananchikta?

• ¿Imakuna pasanantam suyanchikman hatu-hatun ñakariy tiempopi?

• ¿Imaynatam Jehová Dios qawachinqa Librawaqninchik kasqanta?

[Kay yachachikuypa tapukuyninkuna]

[16 hinaspa 17 kaq paginakunapi dibujokuna]

Diospa Palabranqa willarqañam kunan tiemponchikpi enteron pachapi predicacion apakunanmanta

[18 kaq paginapi dibujo]

Noeytawan ayllunta librasqanman hinam, Jehová Diosqa ñoqanchiktapas librawasunchik

[20 kaq paginapi dibujo]

Jehová “Diosmi pichanqa paykunapa weqenta, manañam kanqachu wañuypas” (Apo. 21:4)