Diosqa unanchasqankunapim qawachin yachayniyoq kasqanta

‘Purun animalkunamantapas mastaraq yachachiwaqninchikmi Diosqa [. . .] alton pawaq animalkunamantapas mastaraq yuyay qowaqninchikmi Diosqa.’ (JOB 35:11.)

PAWAQ animalkunaqa admirakuypaq rurasqam kachkanku. Ejemplopaq, Avionkunata ruraqkunam envidianku alton pawaqkuna admirakuypaq qonqayllata muyuspanku pawasqankuta, wakin pawaqkunaqa waranqantin leguaskunata viajaspan lamar qochapa hawanta rispa may risqanmanpas chayankupuni.

Chaymantapas Unanchaqnin yachayniyoq kasqantam qawachinku admirakuypaq imayna qayanakusqankuwan. Kaykunamanta astawan yachasunchik.

Puruyoq animalkunapa qayanakusqanku

Wakin puruyoqkunaqa runtumanta manaraq lloqsimuchkaspam ña qayanakunkuña. Ejemplopaq, yutuman rikchakuq codornizmanta. Chinanmi sapa punchaw runtuspa yaqa pusaq runtuta runtun. Sichum runtusqanman hina runtupi sulluchakuna wiñaspankuqa sapa pusaq punchawchá toqyamunqaku. Chayna kaptinqa manach mamanqa atinmanchu atiendeyta chiwchinkuna runtumanta sapa punchaw toqyamuptin nitaq oqllaytapas atinmanchu manaraq toqyaqkunata. Ichaqa pusaq punchawmantam llapan chiwchinkuna soqta horallapi runtumanta toqyanku. ¿Imaynataq chayqa kanman? Kaymanta estudiaqkunam ninku, chay codorniz sutiyoq sulluchakunaqa runtu ukullamantaraqmi musyanakunkuña, hinaptinsi sapakama yachankuña huk punchawllapi runtumanta llapallanku toqyamunankupaq.

Puruyoq alton pawaqkunamantam wakinqa orqon kaqkunalla takin, orqonta maskaq chinankuna payman hamunanpaq otaq yachanan sitiota señalananpaqpas. Puruyoq tukuy clase animalkunaqa sapakamam huk clasetakama takin, chaynata takiptinkum chinankupas pim kastanpi orqo kasqanta reqsin.

Puruyoq animalkunaqa tutamantawan tardeykuqtam sumaqta takinku wayra chaynataq bullapas manaña llumpay kaptin. Paykunamanta estudiaqkunam yacharunku, chawpi punchawpi takinankumantaqa tutamantapiwan tardeykuqtas iskay chunka mastaraq takisqankuqa aswan allin.

Orqonkuna siempre takiptinpas chinankupas achka clasetam waqan, chayna takisqanku otaq waqasqankuqa manam yanqapaqchu. Ejemplopaq, pichinchurruchakunaman rikchakuq pinzon sutiyoqkunam isqon claseta waqanku. Chaymi alton pawaq animalkunamanta peligropi kaspanqa huk clasetam waqan, pampamanta imapas peligropi tarichiptinqa huk clasetataqmi waqanpas.

 Admirakuypaqmi imayna unanchawasqanchikqa

Puruyoq animalkunapa kawsasqankupiqa admirakuypaqmi sutilla Diospa yachayninqa. Ichaqa imayna qayanakusqankuqa manam igualanchu runakunapa kawsasqankuwanqa. Job 35:11 nin ‘Alton pawaq animalkunamantapas aswan yuyayniyoqtaraqmi’ Diosqa unanchawarqanchik nispa. Runakunallam sasa yachay pensamientokunataqa entiendespa willanakunchik otaq makinchikwanpas señaschanakunchik.

Tukuy clase animalkunamantaqa wawakunam yachachisqapas hina mayna sasa rimaykunatapas yacharunkupacha. American Scientist nisqa digital revistam nin: “Uña warmachakunapas tayta-maman mana yachachiptinpas sapakamam imaynatapas yachay-yachan rimananpaq; mana rimay atiq uña warmachakunapas wasinkupi pipas mana señasta yachachiptinqa kikinmi makichanwan rimay-riman”.

Diospa regalo qowasqanchikmi siminchikwan otaq makinchikwan señasta ruraspa ima sientesqanchikta otaq ima piensasqanchiktapas willakuyqa. Ichaqa aswan sumaqraqmi taytanchik Jehová Diosman oracionpi asuykuyqa. Jehová Diospunimá invitawanchik payman oracionpi asuykunapaq. Chaymi Palabranqa niwanchik: “Amayá imamantapas afanakuychikchu, aswanqa orakuspaykichikyá lliwta Diosman willaychik hinaspayá payman graciasta qoychik” nispa (Filipenses 4:6).

Jehová Diosqa munanmi sasachakuykunapi kaspanchik Palabranpi consejonkunawan yanapachikunanchikta. Manam chayllachu, payqa yanapawasunmi Palabranpi consejonkunawan imayna servichikunapaq. Bibliapi Santiago sutiyoq librota qellqaqpas ninmi: “Mayqannikichikpapas yachaynikichik pisilla kaptinqa Diostayá mañakuychik, payllam qosunkichik. Lliw mañakuqninkunamanqa mana piñakuspam chaninninpi qoykun” nispa (Santiago 1:5).

¿Imaynatataq kaykunamanta yachasqaykiqa yanapasunki?

¿Imaynataq sientekunki puruyoq animalkunapa sumaq takisqanta otaq uña warmachapa chayllaraq rimasqanta uyarispayki? ¿Musyankichu Jehová Diosqa unanchasqankunapi yachayniyoq kasqanta?

Imayna unanchasqa kasqanchikpi piensaspanmi rey Davidqa sonqonmanta Diosta alabarqa: ‘Mana entiendey atina rurawasqaykimantam graciasta qoyki. Admirakuypaq rurawasqaykimantam graciasta qoyki. Admirakuypaqmi chay rurasqaykikunaqa. Sumaqtam yachani chaykunataqa’ nispa (Salmo 139:14). Diospa yachaynin tukuy ima unanchasqanpi sutilla kasqanta agradecekuspaqa, astawanchá paypi suyakuyniki kallpanchasqa kanqa consejonkunawan vidaykipi yanapasqa kanaykipaq.

[4 kaq paginapi suti rikuylla kaq willakuy]

Uyariyta atispa rimanakuyqa Diospa regalonmi

[3 kaq paginapi reqsikusqanchikmanta]

©Dayton Wild/Visuals Unlimited