Hechos libropi allin kaq yachachikuyninkunamanta
Jehová Diospa Palabranqa kawsachkanmi
Hechos libropi allin kaq yachachikuyninkunamanta
HECHOS libroqa allintapunim willakun cristiana congregacion imayna qallarisqanmanta chaynataq iñiqkuna yapakusqanmantapas. Lucasmi qellqarqa kay librotaqa, willawanchikmi Cristopi iñiqkuna yaqa iskay chunka pusaqniyoq wata predicasqankumanta, 33 watamanta 61 watakama.
Punta kaq partenpiqa willakun apostol Pedropa predicasqanmantam, tukupay partenpiñataq apostol Pablopa predicasqanmanta. Qellqasqanpi ‘ñoqayku’ nisqawanmi Lucasqa qawachichkarqa wakinpiqa iñiqmasinkunawan kuska kasqanta. Kay libropa willakusqanta yachaspanchikqa Diospa Palabranta hinaspa chuya espirituntam astawan chaninchasunchik (Hebreos 4:12). Chaymantapas yanapawasunmi Diosta serviypi astawan kallpanchakunapaq hinaspa Gobiernonpi suyakuyninchik qaqa hina kananpaqpas.
‘DIOSPA MUNAYCHAKUSQANMAN YAYKUNAPAQ LLAVEKUNATA’ PEDRO SERVICHIKUSQANMANTA
Chuya Espirituta chaskiruspankum apostolkunaqa mana manchakuspa Diosmanta willakurqaku. Punta kaq llavetam Pedroqa servichikurqa ‘kasukuq’ judiokuna hinaspa judiokunapa religionninman tikrakuqkuna Diospa Munaychakusqanman yaykunankupaq (Mateo 16:19; Hechos 2:5, 41). Llumpay qatikachasqa kasqankuraykum Jesucristopa qatiqninkunaqa cheqerurqaku hinaspam tukuy hinastinpi Diosmanta willakurqaku.
Samaria lawpi runakuna Diosmanta yachayta munasqankuta Jerusalen llaqtapi apostolkuna yacharuspankum Pedrotawan Juanta kacharqaku. Iskay kaq llavetam Pedroqa servichikurqa Samaria llaqtayoq runakuna Diospa Munaychakuyninman yaykunankupaq (Hechos 8:14-17). Jesucristopa kawsarimusqanmanta yaqa huk wata pasaytam Tarso llaqtayoq Saulo Jesucristopi iñirqa. Kimsa kaq llavetañataqmi Pedroqa 36 watapi servichikurqa huklaw nacionmanta runakuna Diospa chuya espiritunta chaskinankupaq (Hechos 10:45).
Bibliapi wakin textokunamanta tapusqankuta contestasqanku:
2:44-47; 4:34, 35. ¿Imanasqataq iñiqkuna kapuqninkuta rantikurqaku hinaspa rantikusqanku qollqeta rakirqaku? Jerusalen llaqtapi wakin iñiqkunaqa karu llaqtamantam karqaku, Jerusalenpi qepanankupaqmi qollqenku mana ayparqachu. Ichaqa Jerusalenpim qepayta munarqaku iñisqankumanta astawan yachanankupaq hinaspa predicanankupaqpas. Paykunata yanapanankupaqmi wakin iñiqkuna kapuqninkuta rantikurqaku necesitaqkunaman qonankupaq.
4:13. ¿Pedrowan Juanqa analfabetochu karqaku? Manam. ‘Mana ancha educacionniyoq kasqankutaqa’ nirqaku Diospa leyninmanta yachanankupaq Judiokunapa escuelanman mana risqankuraykum.
5:34-39. Cortepi Lucas mana kachkaspanqa ¿imaynatataq yacharqa cortepi kaqkunaman Gamalielpa nisqantaqa? Kimsa razonkunapaschá kanman: 1) Gamalielpa yachachisqan Pablopaschá Lucasman willarqa; 2) Cristianokuna favoreceq cortepi kaq Nicodemopaschá willarqa; 3) Diospa espiritunpa yanapayninwanpaschá Lucasqa yacharurqa.
7:59. ¿Jesustachu Estebanqa mañakurqa? Manam. Jehová Diosllatam yupaychananchik chaynataq mañakunanchikpas (Lucas 4:8; 6:12). Estebanqa Jehová Diostam sapakutilla Jesuspa sutinpi mañakurqa (Juan 15:16). Payqa revelacionninpim ‘qawarqa Diospa alleq lawninpi Diosmanta Hamuq Runa sayachkaqta’ (Hechos 7:56). Jesus wañuqkunata kawsarichinanpaq atiy chaskisqanta yachaspam Estebanqa Jesusta rimapayarqa wañuptin kawsarichinanpaq, ichaqa chaywanqa manam mañakuchkarqachu (Juan 5:27-29).
Imatam yachachwan:
1:8. Jehová Diospa testigonkunaqa allpantinpi predicaytaqa manam atinmankuchu Dios chuya espiritunwan mana yanapaptinqa.
4:36–5: 11. Chipre llaqtayoq Joseytam suticharqaku Bernabeywan, chay ninanqa “sonqo tiyachiq” ninanmi. Kuyakuq, allin runa hinaspa yanapakuq kasqanraykupaschá apostolkunaqa chaynata suticharqaku. Pay hinam kananchikqa, manam Ananiaswan Safira hinachu, llullakuq, iskay uya hinaspa engañakuq.
9:23-25. Predicananchikrayku enemigonchikkunamanta ayqekuyqa manam manchati kaychu.
9:28-30. Vidanchik otaq Dioswan amistadninchik peligropi tarikuptinqa allintam tanteananchik maypi hinaspa imay horata predicananchikpaq.
9:31. Manaraq qatikachasqa kachkaspam iñiyninchikta masyachinanchik Bibliata estudiaspa hinaspa yuyaymanaspa. Kay rurasqanchikmi yanapawasunchik Jehová Diosta kasukunapaq hinaspa allin predicaq kananchikpaqpas.
DIOS SERVIYPI PABLO KALLPANCHAKUSQANMANTA
Bernabeywan Saulo Antioquia llaqtapi “huk wataña” predicachkaptinkum, 44 watapi Diosmanta willakuq Agabo chayaruspan ‘hatun yarqay kananmanta’ willakurqa, nisqanman hinam iskay wata pasayta cumplikurqa (Hechos 11:26-28). Jerusalenpi “yanapakuyninkuta tukuruspankum” Bernabewan Sauloqa Antioquia llaqtaman kutirirqaku (Hechos 12:25). Saulopa Cristopi iñisqan 12 wata pasaruptinmi 47 watapi Bernabeywan Sauloqa chuya espiritupa guiasqanman hina llaqtakunaman predicanankupaq kachasqa karqaku (Hechos 13:1-4). 48 watapim Antioquiaman kutimurqaku chaypim iñiqkuna “Dios favorecenanpaq” mañapurqaku (Hechos 14:26).
Isqon killa qepatañataqmi Pabloqa (Saulo) compañaqninpaq Silasta akllarqa hinaspam llaqtakunapi predicananpaq iskay kaq viajenta qallarirqa (Hechos 15:40). Chaymantam Timoteowan Lucaspas Pablowan viajarqaku. Lucasmi Filipos llaqtapi qeparqa, Pabloñataqmi Atenasman hinaspa Corinto llaqtaman viajarqa, chaypim reqsirqa Aquilawan Priscilata hinaspam qeparqa wata parten (Hechos 18:11). 52 wata qallariytam Pabloqa Timoteotawan Silasta Corinto llaqtapi saqerqa, chaymantam Priscilawan hinaspa Aquilawan pasarqaku Siria lawman (Hechos 18:18). Priscilawan Aquilaqa Efeso llaqtakamam compañarqaku chaymantam Pabloqa sapallanña viajarqa.
Siria nacionpa Antioquia llaqtanpi kasqanmantam 52 watapi Pabloqa 3 kaq viajenta qallarirqa (Hechos 18:23). Efeso llaqtapim ‘Diospa palabranta tukuy hinastinpi willakurqaku’ (Hechos 19:20). Chaypim yaqa kimsa wata Pabloqa qeparqa (Hechos 20:31). 56 watapim Pentecostes fiestapi Jerusalenpi tarikurqa. Presochasqanku qepatam mana manchakuspan autoridadkunaman predicarqa. Roma llaqtapim 2 wata wasinpi presochasqa karqa (c. 59-61), chayna kaptinpas kallpanchakurqam Diospa Munaychakuyninmanta hinaspa “Señor Jesucristomanta” willakunanpaq (Hechos 28:30, 31).
Bibliapi wakin textokunamanta tapusqankuta contestasqanku:
14:8-13. ¿Imanasqataq Listra llaqtapi runakuna ‘Bernabeyta Jupiterwan suticharqaku, Pablotañataq Mercuriowan’? Romanokunapa creenciankuman hinaqa Jupitermi taytachanku karqa, Mercurioñataq reqsisqa karqa allin rimaq kasqanwan. Chaymi willakusqanrayku Pablota suticharqaku Mercuriowan, Bernabeytañataq Jupiterwan.
16:6, 7. ¿Imanasqataq Pablotawan predicaqmasinkunata chuya espiritu harkarqa Asia hinaspa Bitinia lawpi predicanankuta? Chay lawkunapiqa manam karqachu Diospa achka serviqninkuna chaymi chuya espirituqa guiarqa Diosmanta yachay munaqkunapa kasqanku lawman.
18:12-17. ¿Imanasqataq prefecto Galionqa mana imatapas rurarqachu Sostenes runata maqaptinku? Payqa piensarqapaschá Pablopa contranpi chaqwa ruraqkunapa umalliqnin kasqanrayku maqasqankuta. Chayna pasasqanmi allinpi tukurqa, Sostenesqa Jesuspa qatiqninñam karqa. Chaymanta qepatam Pabloqa ‘iñiqmasinchikmi’ nispa nirqa (1 Corintios 1:1).
18:18. ¿Ima promesatataq Pablo rurarqa? Wakin yachaysapa runakunam ninku Diosta serviypi rakisqa kananpaq prometekusqanmanta (Numeros 6:1-21). Bibliaqa manam willawanchikchu ima promesa Pablo rurasqanmantaqa nitaq haykapi rurasqanmantapas manataqmi willawanchikchu promesanta haykapi cumplisqanmantapas. Imayna kaptinpas promesa rurasqanqa manam huchachu karqa.
Imatam yachachwan:
12:5-11. Iñiqmasinchikkunapaqmi mañakunanchik.
12:21-23; 14:14-18. Herodesqa Diosta hina adorachikuytam allinpaq hapirqa. Bernabeywan Pablom ichaqa adorachikuyta mana munarqakuchu. Jehová Diosta servisqanchikpi allinkuna rurasqanchikmantaqa manamá hatunchakunanchikchu.
14: 5-7. Allin tanteoyoq kaymi yanapawasunchik Diosta hinalla servinanchikpaq (Mateo 10:23).
14:22. Diosta serviqkunaqa yachankum sasachakuykunawan ñakarinankuta. Diostaqa manam qepanchankuchu chaykunamanta librakunankupaqqa (2 Timoteo 3:12).
16:1, 2. Mozo-sipas cristianokunaqa Diosta serviypim kallpanchakunanku, mañakunankutaqmi yanapakuyninta chaynapi Diospa agradonpaq hina kawsanankupaq.
16: 3. Bibliapa nisqanman hinam tukuy imata rurananchik Diosmanta allin noticiata runakuna chaskinankupaq (1 Corintios 9:19-23).
20:20, 21. Diosta servisqanchikpi wasin-wasin predicayqa allin ruraymi.
20:24; 21:13. Diosman sonqo kayqa vidanchikmantapas aswan allinmi.
21:21-26. Allin consejokunataqa chaskikunanchikmi.
25:8-12. Cristianokunaqa nacionkunapi yanapakuq Leykunatam valechikunanku Diosmanta ‘allin noticiata willakunankupaq’ (Filipenses 1:7).
26:24, 25. ‘Cheqapmantam rimananchik’ ‘mana iñiq runakuna’ yanqapaq hapiptinkupas (1 Corintios 2:14).
[8 kaq paginapi dibujo]
¿Haykapim Pedro servichikurqa ‘Diospa munaychakusqanman yaykunapaq llavekunata’?
[9 kaq paginapi dibujo]
Allpantinpi predicaytaqa manam atikunmanchu Dios chuya espiritunwan mana yanapaptinqa