Jehová Diospa kamachiq kasqanta respetasunchik

“Diosta kuyaspanchikqa kamachikuyninkunatapas kasukunchikmi, kamachikuyninkunaqa manam llumpay sasachu.” (1 JUAN 5:3.)

1, 2. a) ¿Imanasqataq kunan tiempopi yaqa lliw runakuna kamachiqkunata mana kasukuyta munankuchu? b) Pedropa nisqanman hina, ¿cheqaptachu munasqallankuta ruranku kamachiqkunata mana kasukuqkuna?

KUNAN tiemponchikpi runakunaqa manam kasukuyta munankuchu kamachiqkunataqa. Sapa kutim kayna nisqankuta uyarinchik: “Ñoqaqa munasqaytam rurakuni, manam pipas ima ruranaytaqa niwanmanchu”, nispa. Ichaqa, ¿cheqapchu chayna kanmanku? Manam. Yaqa llapallankum ‘runakunapa imayna kunan tiempopi kawsasqankuta qatipakunku’ (Rom. 12:2). Munasqankuta ruranankumantaqa, apostol Pedropa nisqanman hinam ‘mana allin [ruraykunapa] sirvienten kanku’ (2 Ped. 2:19). ‘Kay pachapi mana allin rurayllapiñam kawsanku hinaspa mana rikuy atina munaychakuq [Satanaspa] kamachisqantam kasukunku’ (Efe. 2:2).

² Librokunata qellqaq huk runam hatunchakuspan kaynata nirqa: “Ñoqaqa manam saqekunichu tayta-mamaypas, sacerdotepas [. . .] nitaq Bibliapas ima ruranayta niwanantaqa”, nispa. Arí, wakin kamachiqkunaqa manam allintachu ruranku, chaymi mana kasukunapaq hina kanku. Ichaqa, ¿chayraykuchu kamachiqkunata mana kasukuna? Sichu periodicopi qawasunchik imakunapas pasasqanta, cuentatam qokusun chayna piensay mana allin kasqanmanta. Llakikunapaqmi, yaqa llapallan runakunam necesitasqanku tiempopi yanapakuytaqa mana chaskiyta munankuchu.

Kamachiqkunata imayna qawayninchik

3. ¿Imaynatam punta cristianokuna qawachirqaku autoridadkunapa tukuy ima kamachisqanku mana kasukusqankuta?

³ Kamachiqkunata huk runakunapa imayna  qawasqankuqa manam chaynallachu cristianokunapa qawasqankuwanqa. Chaywanqa manamá nichkanchikchu tukuy ima kamachiwasqanchikta kasukunamantachu. Wakinpiqa manam kasukunchikchu hukkunapa niwasqanchiktaqa. Chaynatam rurarqaku punta cristianokunapas. Ejemplopaq, sacerdotekunapa jefen hinaspa wakin kamachiqkunapas apostolkunata amaña predicanankupaq niptinkum, paykunaqa mana kasukurqakuchu. Paykunapaqqa ancha allinmi karqa Diosta kasukuy runakuna kasukunankumantaqa (leey Hechos 5:27-29).

4. ¿Ima ejemplokunam qawachiwanchik hukkunapa kamachisqanta Dios serviqkuna mana kasukusqankuta?

⁴ Jesuspa tiemponmanta ñawpaqtapas Diosta serviqkunaqa achkam chaynata rurarqaku. Moisesmi reypa warmi ‘churinpa wawanwan sutichasqa kayta mana munarqachu. [. . .] Payqa Diospa runankunawan kuska ñakariytam akllakurqa’, ‘rey piñakunan’ kachkaptinpas (Heb. 11:24, 25, 27). Joseyqa qepancharqam Potifar sutiyoq runapa warmin huchapakunanpaq munachisqanta, chay warmi contranpi hatarinanta yachachkaspanpas (Gen. 39:7-9). Chaynataqmi Danielpas ‘tukuy sonqonwan tantearurqa reypa mikuynin qosqankuta mana mikunanpaq’, Babilonia palaciopi serviqkunapa jefen mana munachkaptinpas (Dan. 1:8-14). Kaykunam qawachiwanchik ñawpaq tiempopipas, Dios serviqkunaqa kallpanchakurqakum allinkunata ruranankupaq ñakarinanku kaptinpas. Paykunaqa manamá kasukurqakuchu mana allin kamachisqankuta paykunapa favorninta tarinankuraykuqa, ñoqanchikpas chaynatamá rurananchik.

5. Diosta mana serviq runakunamantaqa, ¿imaynatam cristianokuna qawanku kamachiqkunata?

⁵ Chaynaqa, Diosta serviqkunaqa manamá mana kasukuq kaspachu chaytaqa ruranchik. Manataqmi huk runakuna hina, kamachiqkunapa contranpi kaspachu. Chaynataqa ruranchik, runakuna kasukuymantaqa Jehová Diosta puntata kasukuyta munaspanchikmi. Runakunapa kamachisqan Diospa kamachisqanpa contranpi churakuptinqa, yachanchikmi ima rurananchikta. Apostolkuna hinam, puntataqa Diosta kasukunchik runakunamantaqa.

6. ¿Imanasqataq allinninchikpaq Diospa kamachisqanta haykapipas kasukuy?

⁶ ¿Imataq yanapawanchik Diosta kasukunapaq? Proverbios 3:5, 6 nisqanta kasukuymi, chaypim nin: “Tayta Diosllapiyá confiakuy tukuy sonqoykiwanqa. Amayá confiakuychu kikikipa entiendesqallaykipiqa. Tukuy kawsasqaykipiyá yuyariy Tayta Diosta. Paymi munasqanman hina kawsachisunki”, nispa. Segurom kanchik ima ruranapaq Diospa niwasqanchik haykapipas allinninchikpaq kasqanta (leey Deuteronomio 10:12, 13). Jehová Diosmi Israel llaqtata nirqa: “Allinnikipaq yachachiqnikim kani. Imaynam kawsanaykipaq yachachiqnikim kani. Amalaya kamachisqaykunata entiendewaq karqa, hinaptinqa hawkayaynikim mayu hinaraq kanman karqa. Allin ruraynikim lamar qochapi olakuna hinaraq kanman karqa”, nispa (Isa. 48:17, 18). Cristianokunaqa chay nisqanpim confianchik, hinaspa yachanchiktaqmi Diosta kasukuy allinninchikpaq kasqantapas.

7. ¿Imatam rurananchik Bibliapa kamachisqanta lliwta mana entiendespanchikpas?

⁷ Cristianokunaqa yachanchikmi Dios kamachiwaqninchik kasqanta, hinaspam Palabranpi nisqanta kasukunchik llapanta mana entiendechkaspapas. Chayna kasqanchikqa manam yanqakunapi iñisqanchiktachu qawachin, aswanmi qawachin Jehová Diospi confiasqanchikta. Chaymantapas, kasukuspanchikmi kuyasqanchikta qawachinchik, apostol Juanmi kaynata qellqarqa: “Diosta kuyaspanchikqa kamachikuyninkunatapas kasukunchikmi”, nispa (1 Juan 5:3). Kachkantaqmi kasukuq kanapaq huk yanapakuypas.

Entiendeq kasqanchikta astawan kallpanchasun

8. ¿Imaynatam yanapawanchik ‘entiendeq kasqanchik’ Diospa kamachisqanta kasukunapaq?

⁸ Bibliaqa niwanchikmi ‘entiendeq kaspanchik allin kaqtapas hinaspa mana allin kaqtapas reqsinapaq’ (Heb. 5:14). Hinaptinqa, manam Diospa kamachisqantaqa mana piensaspachu kasukunchik, aswanqa “allin kaqtapas  hinaspa mana allin kaqtapas” reqsispam. Munanchiktaqmi Diospa kamachisqankunata entiendeytapas, chaynapi salmista hina kaynata ninapaq: “Sonqollaypim waqaychani qampa yachachisqaykita”, nispa (Sal. 40:8).

9. ¿Imaynatam conciencianchikta yachachisun Diospa munasqanman hina kananpaq, hinaspa imanasqam ancha allin chay rurayninchik?

⁹ Salmos qellqaq hina Diospa kamachisqanta chaninchanapaqqa, Biblia leesqanchikpim yuyaymanananchik. Ejemplopaq, Jehová Diospa ima munasqanmanta yachaspanchikqa, kaynatam tapukuchwan: “¿Imanasqataq allinpuni kay kamachisqan? ¿Imanasqataq allinniypaq kanman kasukuyqa? ¿Imaynatam ñakarinku mana kasukuqkuna?”, nispa. Chaynatam Diospa kamachisqanman hina conciencianchikta yachachisun, hinaspa paypa munasqanman hina tanteasunpas. Chaynataqmi Jehová Diospa ‘munasqanta entiendesun’ kasukunanchikpaq (Efe. 5:17). Ichaqa, chay rurayqa manam facilchu. ¿Imanasqa?

Diospa kamachiq kasqantam Satanas chinkachiyta munan

10. ¿Imaynatam Satanas yanqacharuyta munan Jehová Dios kamachiq kasqanta?

¹⁰ Satanasqa munasqallanta ruraq kaspanmi, unay tiempoña Diospa kamachiq kasqanta yanqacharuyta munan, chayna kasqanqa runakunapipas rikukunmi. Ejemplopaq piensasun, casado vidapaq Jehová Diospa arreglo rurasqanwan ima pasasqanta. Kunan tiempopiqa manam llapankuchu respetanku, chaymi achka runakuna mana casarakuspa uywanakunku, chaynataq casado vidankumanta rakinakunankupaq imatapas ruranku. Yaqapaschá paykunaqa piensanku televisionpi reqsisqa huk warmipa nisqanman hina, paymi nirqa: “Manam pipas atinmanchu hukllawan kaytaqa. Manam pitapas reqsinichu mana engañaqtaqa otaq mana engañayta munaspa kawsaqtaqa”, nispa. Achka kutipi rakinakusqanta yuyarispanmi, televisionpi ancha reqsisqa huk runapas kaynata nirqa: “Manam yachanichu wañunakama hukllawan kawsakuyqa runakunapaq kasqanta”, nispa. Llapanchikmi kaynata tapukunanchik: “¿Kasukunichu casado vidaypi Jehová Diospa kamachiwasqanta? ¿Icha mana iñiyniyoq runakuna hinachu casado vidamanta piensachkani?”, nispa.

11, 12. a) ¿Imanasqataq wakin mozo-sipaskunapaq sasa kanman Diosta kasukuyninku? b) Huk experienciata willay, Jehová Diospa nisqankunata mana kasukuy mana allinpi tukusqanmanta.

¹¹ Diosta serviq mozo-sipas kaspaykiqa yuyariy, Satanasmi munachkan mana allinkuna ruranaykita. Payqa manam munanchu Jehová Dios kasukunaykitaqa. Chaymi servichikun ‘jovenkunapa munapayasqankunata’ hinaspa huk mozo-sipaskunatapas Diospa kamachisqankunata kasukuy sasa kasqanta piensachisunaykipaq (2 Tim. 2:22). Amayá chaywanqa engañachikuychu. Aswanqa musyakuy Diospa kamachisqan allinnikipaq kasqanta. Ejemplopaq, Bibliaqa ninmi: ‘Amayá huchapakuychikchu’, nispa (1 Cor. 6:18). Tapukuy: “¿Imanasqataq allinniypaq kay kamachikuy? ¿Imaynatam yanapawanqa kasukuptiyqa?”, nispa. Icha pitapas reqsinki mana kasukusqanrayku llumpay ñakariqta. Otaq congregacionmanta qarqosqañapas kachkanku. ¿Aswan kusisqachu paykuna kachkanku? ¿Diosta servispa kawsasqankumanta aswan allintachu kawsachkanku? ¿Yaqachu kusikuyta tarirunku Jehová Dios serviqkunapa mana tarisqankuta? (Leey Isaias 65:14.)

¹² Qawasun Sharon sutiyoq cristianapa qellqasqanta:  “Jehová Diostam mana kasukurqanichu chaymi sida onqoywan hapirachikurqani. Sapa kutim yuyarini achka watakuna tukuy sonqoymanta payta servispay ancha kusisqa tarikusqaymanta”, nispa. Sharonqa reqsikurqam Diospa kamachisqankunata mana kasukuyqa mana allin kasqanta hinaspa astawan chaninchananmantapas. Arí, Jehová Diospa kamachisqankunaqa waqaychawanchikmi. Sharonqa kay qellqasqanmanta yaqa iskay killallamantam wañukurqa. Kay pasasqanmi qawachin, Satanasqa manam ima allintapas qonmanchu kay pachapi mana allinkunawan hukllawakuqmanqa. Payqa Evaman prometesqanman hinam tukuy imata prometen, ichaqa manam cumplinchu “llullakuqkunapa taytan kasqanrayku” (Juan 8:44). Hinaptinqa, allinninchikpaqmi Jehová Diospa kamachisqanta kasukuyninchikqa.

Amayá munasqallanchikman hinaqa kawsasunchu

13. ¿Imanasqataq munasqallanchiktaqa mana ruranachu?

¹³ Jehová Diospa kamachisqanta kasukunapaqqa, manam munasqallanchikman hinachu kawsananchik. Hatuntukuq kay munasqanchikmi piensachiwanchikman pipa yanapakuynintapas mana necesitasqanchikta. Ichapas Diospa llaqtanpi punta apaqkunapa niwasqanchikta mana kasukuchwanchu. Ichaqa yuyarisun Jehová Diosmi yachachiwanchik allin yuyayniyoq confianza sirvientewan (Mat. 24:45-47). Chaymi llapallanchik yachananchik llaqtanta kunan tiempopi paykunawan cuidasqanta. Kasukuq apostolkuna hinayá kasunchik. Wakin qatiqninkuna piñakuruspanku Jesusta saqeruptinkum, apostolninkunata kaynata tapurqa: “¿Qamkunapas pasakuytachu munankichik?”, nispa. Hinaptinmi Simon Pedroñataq nirqa: “Señor ¿pimantaq riymanku? Qampa rimasqaykiqa wiñay kawsay qokuqmi”, nispa (Juan 6:66-68).

14, 15. ¿Imanasqam kasukunanchik Bibliapa niwasqanchikkunata?

¹⁴ Jehová Dios kamachiq kasqanta respetaspaqa, kasukusunmi Bibliapa niwasqanchikkunata. Ejemplopaq, allin yuyayniyoq confianza sirvientem sapa kuti niwanchik rikchan-rikchan kaspa ‘cuidakunanchikpaq’ (1 Tes. 5:6). Kay niwasqanchikqa ancha allinmi kay tukupay tiempopi ‘kikillankupaq munaq’ hinaspa ‘qollqella kuyaq’ runakunapa kasqanpi (2 Tim. 3:1, 2). ¿Ñoqanchikpas paykuna hina rikurirunchikmanchu? Arí, sichu imapas haypay munasqanchikkuna Dios serviyninchikwan mana tupanqachu, hinaptinqa ichapas qollqellapiña piensayta qallaykuchwan otaq iñiyninchikpas hukmanyayta qallaykunman (Luc. 12:16-21). Chaynaqa aswan allinmi Bibliapa nisqankunata kasukuyqa hinaspa manam ruranachu kikillankupaq munaq runakunapa rurasqankutaqa (1 Juan 2:16).

¹⁵ Allin yuyayniyoq confianza sirvientem yachachiwanchik congregacionpi ancianokunawan. Bibliam niwanchik: “Pusasuqnikichik runakunata kasukuspayá paykunaman sujetakuychik. Paykunaqa almaykichikmantam cuentallikuchkanku hinaspam Diosman cuentata qonqaku. Kasukuptikichikqa mana llakikuspam kusisqalla pusasunkichik, mana chayqa manam allinnikichikpaqchu kanman”, nispa (Heb. 13:17). ¿Kaywanqa nichkanchu ancianokuna mana pantaq kasqankuta? Manam. Paykunapas pantankum, Diosmi astawan chaytaqa yachan. Chayna kaptinkupas paykuna kasukunanchiktam munan. Pantaq kaptinkupas ancianokunata kasukuspanchikqa, qawachichkanchikmi Jehová Dios kasukusqanchikta.

 Mayna allinmi humilde kayqa

16. ¿Imaynatam qawachinchik Jesucristo congregacionpa Uman kasqanta respetasqanchikta?

¹⁶ Manam haykapipas qonqananchikchu congregacionpi Jesucristo Uma kasqantaqa (Col. 1:18). Chaymi humillakuspa ancianokunata kasukunchik hinaspa anchata respetanchik (1 Tes. 5:12, 13). Chaynataqmi ancianokunapas kasukusqankuta qawachinku Bibliapa nisqanman hina congregacionta yachachispanku. Bibliapa nisqanman hinam, piensasqankuta yachachinankumantaqa ‘Bibliapi qellqasqaman hinalla yachachinku’ (1 Cor. 4:6).

17. ¿Imanasqam mana allinchu kanman hatunchakuyqa?

¹⁷ Llapallanchikmi cristianokunaqa cuidakunanchik mana hatunchakunapaq (Pro. 25:27). Chayna hatunchakuymanmi wichiykurqa Juanpa reqsisqan huk cristiano. Juanmi qellqarqa: “Diotrefesmi mana caso-preciotapas churanchu iñiqkunapa cabecillan kayta munaruspan. Chaymi rispayqa payta qaqchasaq contraykupi imaymana rimasqanmanta”, nispa (3 Juan 9, 10). Kaymi yachachiwanchik imapipas hatunchakuy ñoqanchikpi kaptinqa chaylla chinkachinamanta. Bibliam niwanchik: “Runaqa alto tukuq rikuriruspanmi chinkarun. Runaqa orgulloso rikuriruspanmi wichirun”, nispa. Jehová Dios kamachiq kasqanta respetaqkunaqa manam hatunchakunankuchu, mana chayqa humillasqam kanqaku (Pro. 11:2; 16:18).

18. ¿Imataq yanapawasun Jehová Dios kamachiq kasqanta respetanapaq?

¹⁸ Amayá runakunapa munasqallankuman hinaqa rurasunchu, aswanqa kallpanchakusun Diospa kamachisqanta kasukunapaq. Sapa kuti yuyaymanasun Jehová Dios servisqanchikpi. Paypa llaqtanpi kasqanchikmi qawachin chuya espiritunwan llaqtanman pusamuwasqanchikta (Juan 6:44). Chaynaqa, amayá haykapipas yanqallata hinaqa qawasunchu Dioswan amistadninchiktaqa. Amayá tukuy vidanchikpiqa munasqallanchikman hinaqa kawsasunchu, aswanqa kallpanchakusun Jehová Diospa kamachiq kasqanta respetanapaq.

¿Yuyachkankichu?

• ¿Imataq Jehová Diospa kamachiq kasqanta respetayqa?

• ¿Imaynatam ‘entiendeq kasqanchik’ yanapawanchik Diospa kamachiq kasqanta respetanapaq?

• ¿Imaynatam Satanas yanqacharuyta munan Diospa kamachiq kasqanta?

• ¿Imanasqataq humilde kananchik Jehová Diospa kamachiq kasqanta respetanapaq?

[Kay yachachikuypa tapukuyninkuna]

[24 kaq paginapi dibujo]

“Runakunamanta puntataqa Diostam kasukuna”

[26 kaq paginapi dibujo]

Diospa kamachisqankunata kasukuyqa haykapipas allinmi