Diosmi “paykunataqa wiñachin”
Diosmi “paykunataqa wiñachin”
‘Chaynaqa tarpuqpas, parqoqpas manam imapaschu aswanqa Diosllam [. . .] wiñachin.’ (1 COR. 3:7.)
1. ¿Ima ruraypitaq ‘Diospa llamkaqmasin’ kanchik?
APOSTOL Pablom nirqa huk suma-sumaq llamkaypi lliw cristianokuna yanapakuy atisqanchikmanta, chayqa: ‘Diospa llamkaqmasin’ kaymi (leey 1 Corintios 3:5-9). ¿Imapitaq Diospa llamkaqmasin kanchik? Payta servinankupaq runakunata yachachiypi. Apostol Pablom kay llamkayta tupachin muhu tarpuqwan chaynataq parqoqwan, hinaspam yuyarichiwanchik chay muhuta Dioslla wiñachisqanta. Hinaptinqa, Jehová Diospa yanapakuynintam necesitanchik paypaq llamkasqanchik allinpi tukunanpaqqa.
2. Diosninchik runakunata espiritualpi wiñachiptinqa, ¿imaynatam qawananchik Diosmanta yachachiyninchikta?
2 Chayna piensayninchikmi yanapawanchik humilde kanapaq hinaspa runakunaman yachachispa mana hatunchakunapaqpas. Predicanapaq chaynataq yachachinapaq anchata kallpanchakuptinchikpas, pipas bautizakuruptinqa Jehová Diosmi hatunchasqa kanan. ¿Imanasqa? Imataña ruraptinchikpas, manam allintaqa entiendenchikchu Diosta servinankupaq runakuna imayna espiritualpi wiñasqantaqa, hinaspa manataqmi atinchikmanchu controlaytapas. Rey Salomonmi allintapuni nirqa imaynam ñoqanchikqa ‘mana yachankichu tukuy ima ruraq Diospa rurasqankunataqa’ (Ecl. 11:5).
3. ¿Imapim rikchakun muhu tarpuy, Diosta servinankupaq runakunata yanapaywan?
3 Runamasinchik imayna espiritualpi wiñasqanta mana allinta entiendespapas, manam chaywanqa hukmanyanchikchu. Aswanmi yachayta munanchik imayna wiñasqanta. Salomonmi kaynata nirqa: ‘Tutapaymanta muhuykita tarpuy. Ama pisipaspayki chisinkuytapas tarpuy. Manam yachankichu maypi tarpusqayki wiñamunanta. Manataqmi yachankichu iskayninku igualla wiñamunanta’, nispa (Ecl. 11:6). Chakrapi tarpuqqa manam yachanchu tarpusqan muhu maypim wiñanantaqa, muhu wiñananpaqqa manam tarpusqallanmantachu. Chaynallataqmi pasan Diosta servinankupaq runakunata yanapaypipas, Marcos libropa 4 kaq capitulonpim Jesuspa iskay rikchanachiywan rimasqan chayna kasqanta qawachiwanchik. Qawasunchikyá imakunatam kaykunamanta yachachwan.
Manam chaynallachu allpakunaqa
4, 5. Pisi rimayllapi willamuy muhu tarpuqwan rikchanachispa Jesuspa rimasqanmanta.
4 Marcos 4:1-9 nisqanpim, Jesucristo riman huk runa muhuta maqchispan tarpusqanmanta, muhukunaqa manam kaqlla allpallamanchu wichirqa. Chaypim nin: “Huk runam rirqa tarpukuq. Muhuta maqchiptinmi wakin wichirqa ñanman hinaptinmi kullkukuna mikururqa. Wakinñataqmi wichiykurqa mana ancha allpayoq ranraman hinaptinmi chay muhu chaylla wiñaramurqa as allpallapi kasqanrayku. Inti rupamuptinñataqmi mana sumaq sapichakusqa kasqanrayku chakirurqa. Wakin muhuñataqmi wichiykurqa kichka-kichka ukuman hinaptinmi kichkakuna wiñaruspa muhu wiñaqta eqoyarachirqa chaymi manaña rururqachu. Wakinñataqmi allin allpaman wichiykurqa chaymi wiñamuspan rururqa, wakinmi huk muhullamanta rururqa kimsa chunkata, wakinñataq soqta chunkata, wakinñataq pachakta”, nispa.
5 Ñawpaq tiempopiqa chakrapi tarpuq runakunaqa, qawan pachanpi otaq wayqapi muhuta apaspankum maqchispa tarpurqaku. Chaymi muhupa maypipas wichisqanqa mana tarpuqmantachu, aswanmi maqchisqa kasqanrayku imayna allpamanpas wichin.
6. ¿Imaynatam Jesus explicarqa muhu tarpuq rikchanachiymanta?
6 Kay rikchanachiyta entiendeyqa manam sasachu, kikin Jesusmi Marcos 4:14-20 ima ninanmanta kaynata yachachirqa: “Chay tarpuq runaqa Diospa palabran willakuqmi. Wakin runakunaqa rikchakun ñanman muhu wichiqmanmi. Diospa palabranta uyariruptinkum Satanas chaylla hamuruspan horqorun sonqonpi tarpusqa Diospa palabranta. Wakin runakunañataqmi rikchakun ranraman wichiykuq muhuman, Diospa palabranta uyarispankum kusisqallaña chaskinku, aswanqa mana sapichasqa kasqanraykum mana unaytachu kawsanku. Ñakarispa hinaspa Diospa palabranrayku cheqnisqa kasqankuwan hukmanyaruspam chaylla urmarunku. Wakin runakunañataqmi rikchakun kichka-kichka ukuman wichiykuq muhuman, paykunam Diospa palabranta uyarinku, aswanqa kay pachapi kaqkunamanta sinchita preocupakuspam kusikuyta tarinku llapa kapuqninkunallapi, engañasqa kaspankum aswan-aswanraq imakunatapas munanku. Tukuy kaykuna runapa sonqonman yaykuruptinmi Diospa palabranqa mana yanapanñachu. Wakin runakunam ichaqa allin allpaman muhu wichiq hina, Diospa palabranta uyarispankum kasukunku hinaspam allin cosecha qoq hina kanku, wakinmi chulla granollamanta kimsa chunka ruruq hina, wakinñataqmi soqta chunka ruruq hina, wakinñataqmi pachak ruruq hina”, nispa.
7. ¿Imawanmi tupan muhuqa hinaspa tukuy rikchaq allpapas?
7 Jesusqa manam nirqachu tukuy rikchaq muhukunatam tarpurqa nispachu. Aswanmi nirqa chay muhukuna mana chayna allpallaman wichisqanta, chaymi llapallanqa mana chaynallatachu wiñanku. Qallariyninpi rimasqan allpaqa llumpay sarutiasqam, qatiqninñataqmi mana ancha allpayoq, hukninñataq kichka-kichkallaña, tukuyninpi rimasqanñataq allin ruruchiq allpa (Luc. 8:8). ¿Imawantaq tupan muhumanta rimasqan? Diospa Munaychakusqanmanta Bibliapi tarikuq willakuywanmi (Mat. 13:19). ¿Imawantaq tupan tukuy rikchaq allpaqa? Runakunapa sonqonkumanta imayna chaskisqankuwanmi (leey Lucas 8:12, 15).
8. a) ¿Pikunamanmi rikchakun muhu tarpuq runaqa? b) ¿Imanasqataq mana llapallan runakunachu kasukunku Diospa Gobiernonmanta willakuyta?
8 ¿Pikunawanmi tupanman muhu tarpuq runaqa? Diospa Munaychakusqanmanta willakuqkunamanmi. Apostol Pablo hina chaynataq Apolos hinam paykunaqa tarpunku hinaspa parqonkupas, ichaqa maynataña kallpanchakuptinkupas manam chaynallatachu runakunaqa espiritualpi wiñanku. ¿Imanasqa? Diosmanta willakuyta mana tukuy sonqonkumanta uyarisqankurayku. Rikchanachiypi Jesuspa rimasqan tarpuq runamanta yuyarisunchik, payqa manam controlayta atinchu imayna muhu wiñasqantaqa. Kayta yachaymi lliw cristianokunata kallpanchawanchik, astawanraqmi achka wataña serviqkunataqa, paykunam hinalla predicachkanku runakuna mana uyariyta munaptinkupas. * ¿Imanasqam kayqa hawkayachinman paykunata?
9. ¿Ima cheqap consuelo qoqtam yachachirqaku apostol Pablo hinaspa Jesucristopas?
9 Manam plantapa imayna wiñasqanpichu rikukun tarpuqpa tukuy sonqonwan llamkasqanqa. Chayna kasqanmantam apostol Pablo kaynata nirqa: “Llamkasqaykumantaqa Diosmi pagapuwanqaku sapakamaman”, nispa (1 Cor. 3:8). Pimanpas llamkasqanmantam pagotaqa qonqa manam wiñasqanmantachu. Chayna kasqantam Jesucristopas qawachirqa qatiqninkuna predicasqankumanta kutimuptinku. Paykunaqa llumpay kusisqam kachkarqaku, Jesuspa sutinta rimaptinku demoniokuna kasukusqankumanta. Chaywan kusikunankupaq kaptinpas, Jesusqa kaynatam nirqa: ‘Amayá kusikuychikchu demoniokuna kasususqaykichikmantaqa aswanqa hanaq pachapi sutikichik qellqasqa kasqanmantayá’, nispa (Luc. 10:17-20). Ichapas Diospa Palabranta willakuqqa manapas atinchu bautizakunanpaq pitapas yanapayta, kayqa manam qawachinmanchu qellakuspa llamkasqanta otaq mana tukuy sonqonmanta rurasqantaqa. Predicacionta uyarispa Diosta servinankupaqqa imayna sonqonkupi kasqankumantam. Diosmi wiñachin sonqonkupi muhu tarpusqataqa.
Diospa palabran uyarisqankuta imayna qawanankumanta
10. ¿Imamantam kanman pipas allin allpaman otaq mana allin allpamanpas rikchakuq kananpaq?
10 ¿Imatam nichwan Diospa palabran uyariqkunamanta? ¿Yachakunñachu uyarinankuta otaq mana uyarinankutapas? Manam. Paykunam akllakunanku allin allpa hina kanankupaq otaq manapas. Runakuna sonqonkupi imayna kasqankuqa cambianmanmi allinpaq otaq mana allinpaqpas (Rom. 6:17). Rikchanachiywan rimaspanmi Jesus kaynata nirqa: ‘Satanasmi chaylla hamuruspan horqorun sonqonpi tarpusqa Diospa palabranta’, nispa. Chayqa manam pasananchu. Santiago 4:7 versiculopim kallpanchan cristianokunata Diablopa contranpi kanankupaq, chaynapim paykunamanta karunchakunqa. Jesusqa nirqam kusikuywan uyarisqankumanta, ichaqa ‘mana sapichasqa kasqanrayku’ pisi tiempollapi urmasqankumanta. Diospa Palabranqa kallpanchanmi Dios serviy munaqkunata ‘allin sapichasqa’ kanankupaq, chaynapi ‘mayna anchoyoq, mayna largoyoq, mayna uku-uku [kasqanta] hinaspa mayna hatun’ kasqanmanta yachanankupaq, chaynataq imawanpas mana tupachiy atina Cristopa kuyakuyninta yachanankupaqpas (Efe. 3:17-19; Col. 2:6, 7).
11. ¿Imatam rurananchik kay pachapi kaqkunapi preocupakuy hinaspa qollqe kuyaypas Diospa palabran kasukuyta mana saqechiwananchikpaq?
11 Jesusqa nirqataqmi wakinkuqa Diospa palabranta uyarichkaspankupas, ‘kay pachapi kaqkunapi sinchita preocupakuspa’ chaynataq apu kayta munasqankuwan engañachikuspa mana kasukusqankumanta (1 Tim. 6:9, 10). ¿Imaynatam uyarisqankuta kasukunmanku? Apostol Pablom kaynata nirqa: “Amayá apuyaytaqa kuyaychikchu ichaqa kapusuqnikichikwanyá contentakuychik. Diosmi nirqa: —Manapunim dejasqaykichu nitaqmi saqesqaykichu —nispa” (Heb. 13:5).
12. ¿Imanasqataq allin allpaman wichiq muhuman rikchakuq runakunaqa mana chaynallatachu predicanku?
12 Tukuyninpiñataq Jesus nirqa, allin allpapi tarpusqañataq chulla granollamanta kimsa chunkata, soqta chunkata hinaspa pachakta hina rurusqanmanta. Wakinkuqa Diospa palabranta allin sonqonkuwan uyarispankum kasukunku. Ichaqa, rurusqankuqa otaq predicasqankuqa sapakamapa imayna tarikusqankumantam. Ejemplopaq, wakin iñiqmasinchikmi achkanpi predicaytaqa mana atinkuchu onqoq kaspanku otaq yuyaq kaspankupas (tupachiy Marcos 12:43, 44 nisqanwan). Chayrayku mana anchata yanapakuspankupas, Jehová Diospa wiñachisqanta qawaspankum ichaqa anchallataña kusikunku (leey Salmo 126:5, 6).
Punchaw llamkaq hinaspa tutan puñuq tarpuqmanta
13, 14. a) Pisillapi rimarimuy punchaw llamkaq hinaspa tutan puñuq tarpuqwan rikchanachiymanta. b) ¿Imawanmi tupachisqa kachkan chakrapi tarpuq, hinaspa muhupas?
13 Marcos 4:26-29 tarinchik tarpuqwan rikchanachispa Jesuspa kayna nisqanta: ‘Diospa munaychakusqanqa kaynam: Huk runam chakrapi tarpusqanmanta samakuq ripukun [puñunanpaq]. Chaymi punchawkuna pasaptin. Chay tarpusqan muhuñataq wiñamun, tarpuqmi ichaqa mana yachanchu imayna wiñasqanta, chaytaqa allpam kikillanmanta wiñachimun. Ñawin puntata wiñamuspanmi hatunyaspan espigamun. Chaymi poqoruptinñataq rutunaña, chaynataqa rurana cosecha chayaramusqanraykum’, nispa.
14 ¿Pim kanman muhu tarpuq runaqa? Wakin cristiano tukuqkunam kaymanta rimaspanku ninku Jesucristo kasqanta. Ichaqa manamá nichwanchu Jesus puñusqanmantaqa, nitaq muhu imayna wiñasqanmanta mana yachasqanmantapas. Payqa allintam yachan muhupa imayna wiñasqantaqa. Kay muhu tarpuqqa, ñawpaq rikchanachiypi hinam tupan Diospa Munaychakuyninmanta willakuqkunaman, paykunam tarpuchkankumanpas hina Diosmanta kusikuywan willakunku. Muhuñataqmi tupan Diospa palabranmanta willakusqankuwan. *
15, 16. Tarpuqmanta Jesucristo rimaspam, ¿ima cheqap yachachikuytam nirqa plantapa wiñasqanmanta hinaspa runakunapa espiritualpi wiñasqanmantapas?
15 Jesuspa nisqanman hinaqa, muhu tarpuq runam “chakrapi tarpusqanmanta” puñunanpaq ripukun. Chayna nisqanwanqa manamá nichkarqachu qella kasqantaqa, aswanmi nichkarqa runakunapa sapa punchaw rurasqankuta, punchaw llamkaspa tutan puñusqankuta. Chaykamaqa “chay tarpusqan muhuñataqmi wiñamun” hatun kanankama. Jesusmi kaynatawan nin: ‘Tarpuqmi ichaqa mana yachanchu imayna wiñasqanta’, nispa. Kaypiqa nichkanmi ‘allpa kikillanmanta wiñachimusqanta’. *
16 ¿Imatam yachachiyta munarqa Jesus kay rikchanachiywan? Kaypiqa astawanmi rimachkan plantapa allillamanta wiñasqanta. ‘Chaytaqa allpam kikillanmanta wiñachimun, ñawin puntata wiñaspanmi hatunyaspan espigamun.’ (Mar. 4:28.) Plantaqa allillamantam wiñan. Manam pipas atinmanchu utqayman wiñarachiytaqa. Chaynallataqmi runakunapa espiritualpi wiñasqankupas. Wiñay kawsaypaq kaq runakunaqa allillamantam espiritualpi puntarinku, cheqap yachasqanku sonqonkupi wiñananpaq Jehová Diospa yanapasqanman hina (Hech. 13:48; Heb. 6:1).
17. ¿Pikunataq kusikunku pipas bautizakuruptin?
17 Rikchanachiypa nisqanman hinam, muhu “poqoruptinñataq” tarpuqqa cosechan. ¿Imaynanpim cosechan? Yachasqanchikman hinaqa, Diosmi runapa sonqonpi wiñachin Gobiernonmanta cheqap yachasqankunata. Hinaptinmi tiempopa risqanman hina Diosta kuyasqan kallpanchan, Jehová Diosman vidanta entregananpaq hinaspa bautizakunanpaqpas. Qari kaspanqa, ñawparisqanman hinam congregacion ukupi achka llamkaykunata chaskin. Pipas cristianoña kaptinqa, muhu tarpuqpas chaynataq imallapipas tarpuqta yanapaq huk cristianokunapas kusikunkum (leey Juan 4:36-38). “Chaymi kusikunqa tarpuqpas chaynataq rutuqpas”.
Rikchanachiykunapa yachachiwasqanchik
18, 19. a) ¿Imaynatam kallpancharusunki Jesuspa kay iskay rikchanachiywan yachachisqan? b) ¿Imatam qatiqnin estudiopi yachasunchik?
18 ¿Imatam yacharunchik, Marcos 4 capitulopi tarikuq iskay rikchanachiykunamanta? Allintam yacharunchik ima llamkay rurananchikmanta: Diospa Gobiernonmantam tarpuchkaq hina predicananchik. Amayá imawanpas predicanamantaqa harkachikusunchu, nitaq ima sasachakuyña kanan kaptinpas (Ecl. 11:4). Chaymantapas yacharqanchikmi Diosninchikpa llamkaqmasin kasqanchikmanta. Jehová Diosmi pitapas espiritualpi wiñachin, hinaspa bendecin kallpanchakusqanchikta chaynataq willasqanchik uyariqkunatapas. Yacharunchiktaqmi espiritualpi wiñananpaq pitapas mana obliganamanta, chaynataq runakuna mana uyariptinku otaq espiritualpi mana wiñaptinku mana hukmanyasqa kanamantapas. Hinaptinqa, runakunaman Diosmanta yachachisqanchik allinpi tukunanpaqqa paytam kasukunanchik hinaspa cumplinanchiktaqmi ‘kay allin noticia [. . .] enterollan kay pachapi’ willananchikwanpas (Mat. 24:14).
19 ¿Imatawanmi Jesus yachachiwarqanchik runakuna espiritualpi wiñasqankumanta hinaspa Diospa Gobiernonpaq llamkaymanta? Kay tapukuymi contestasqa kanqa Jesuspa rimasqan wakin rikchanachiykunapi. Qatiqnin estudiopim wakinmanta yachasunchik.
[Willakuykuna]
^ par. 8 Ejemplopaq qawariy, Lindal sutiyoq wawqenchikpa Islandia nacionpi predicasqanmanta (2005 watapi lloqsimuq Anuario de los testigos de Jehová nisqapa, 210-211 paginankunapi), chaynataq mana chaylla uyarichkaptinkupas Irlanda nacionpi tukuy sonqonkuwan Dios serviqkunapa rurasqankumantapas (1988 watapi lloqsimuq Anuario de los testigos de Jehová nisqapa, 82-99 paginankunapi).
^ par. 14 Pasaq watakunapiqa kay revistapi muhuwan rikchanachispaqa tupachirqam sumaq kayniyoq kanapaq kallpanchakuyta. Ichaqa yuyarinanchikmi imaynam kay muhuqa manam tikrakunchu mana allinmanqa nitaq ismusqatapas rurunchu. Aswanmi wiñamuspan hatunyan poqosqa kanankama (qawariy 1980 watapi 1 de noviembre La Atalaya revistapa 17-19 paginankunapi).
^ par. 15 “Kikillanmanta” niq rimayqa, griego rimaypiqa iskay hawaqllapim tarikun; kay textopi hinaspa Hechos 12:10 nisqanpipas, chaypim nin fierromanta punku “kikillanmanta” kichakusqanta.
¿Yuyachkankichu?
• ¿Imapim rikchakun muhu tarpuypi llamkaywan Diospa Gobiernonmanta predicay?
• ¿Imata ruraspam qawachinchik Jehová Diosta tukuy sonqowan kasukusqanchikta?
• Jesuspa nisqanman hina, ¿imapitaq rikchakun muhupa wiñasqan runakunapa espiritualpi wiñasqankuwan?
• ¿Imanasqataq tarpuqwan cosechaqpas kusikunku?
[Kay yachachikuypa tapukuyninkuna]
[18 kaq paginapi dibujokuna]
¿Imanasqataq Diospa Gobiernonmanta predicaqkunata Jesus tupachirqa muhu tarpuqwan?
[21 kaq paginapi dibujokuna]
Sumaq allpaman rikchakuq runakunaqa kusikuywanmi Diospa Gobiernonmanta atisqankuman hina willakunku
[23 kaq paginapi dibujokuna]
Diosmi paykunataqa wiñachin