Imaynatam wasin-wasin predicaypi sasachakuykunata atipachwan

“Diosninchikmi kallpanchawarqaku chaymi mana manchakuspa willarqaykiku Diosmanta allin noticiata, willarqaykikumá achkallaña runakuna contraykupi sayarichkaptinkupas.” (1 TES. 2:2.)

1. ¿Ima sasachakuykunatam pasarqa Jeremias, hinaspa imaynatam atiparqa?

JEREMIASQA ñoqanchik hina sienteqmi karqa. Nacionkunaman willakunanpaq Jehová Dios churaptinmi nirqa: “¡Ay Señor Diosnilláy, ancha warmaraqmi kallani! Manaraq rimaypas yachaqmi kallani”, nispa. Chayna kaspanpas Jehová Diospim confiarqa, chaymi llamkay qosqanta chaskirqa (Jer. 1:4-10). Tawa chunka wata mastaraqmi aguantarqa mana allin ruraq runakunapa mana uyariy munasqankuta, burlakusqankuta chaynataq maqasqankutapas (Jer. 20:1, 2). Wakinpiqa  willakusqantam saqeruyta munarqa, ichaqa kallpanchakuspanmi hinalla willakurqa yaqa llapallan judiokuna uyariyta mana munachkaptinkupas. Jeremiastaqa Diosmi yanaparqa mana ruray atisqanta rurananpaq (leey Jeremias 20:7-9).

2, 3. Jeremias hina, ¿ima sasachakuykunatam pasanku kunan tiempopi cristianokunapas?

² Achkam kunan tiempopipas Diosta serviqkunaqa Jeremias hina sientikunchik. Wasin-wasin predicananchikmanta yacharuspaqa, wakinninchikmi kaynata nirqanchik: “Manam chay ruraytaqa atillaymanchu”, nispa. Ichaqa, predicananchikpaq Diospa kamachisqanta yacharuspam, manchakuyta saqespa predicayta qallarirqanchik. Chaynataq, yaqa llapanchiktam hinalla predicananchikpaq imapas sasachawarqanchik. Arí, sasaniraqmi wasin-wasin predicanapaq qallariyqa hinaspa tukupay tiempokama hinalla predicaypas (Mat. 24:13).

³ Sichu unay tiempoña Jehová Diospa testigonkunawan estudiachkanki hinaspa huñunakuykunamanpas richkankiña, ¿manaraqchu wasin-wasin predicayta qallarinki? Otaq bautizasqaña kaspaykiqa, ¿sasachakunkichu predicanaykipaq mana imawanpas harkasqa kachkaspayki? Kunan tiempopim achkallaña cristianokuna mayqan nacionniyoq kaspankupas, wasin-wasin predicaypi sasachakuykunataqa atiparunku. Arí, Jehová Diospa yanapakuyninwanqa qampas atinkim.

Kallpanchakusunyá

4. ¿Imataq apostol Pablota yanaparqa valorwan predicananpaq?

⁴ Enteron pachapi Diosmanta willakuyqa paypa espiritunwanmi rurakuchkan, manam runakunapa yachayninwanchu nitaq kallpanwanchu (Zac. 4:6). Chaynatam nichwan ñoqanchikpa predicasqanchikmantapas (2 Cor. 4:7). Piensarisun apostol Pablopa pasasqanpi. Huk kutipim paytawan predicaqmasintapas runakuna maqaspa ñakarichiptinku, Pablo kaynata qellqarqa: “Filipos llaqtapi kamisqa ñakarichisqa kachkaptiykupas Diosninchikmi kallpanchawarqaku chaymi mana manchakuspa willarqaykiku Diosmanta allin noticiata, [. . .] runakuna contraykupi sayarichkaptinkupas”, nispa (1 Tes. 2:2; Hech. 16:22-24). Mana creenapaqpas hinam Diosmanta ganasllawanña willakuq Pablopas, wakinpiqa anchatam sasachakurqa predicananpaq. Ñoqanchik hinam, Jehová Diospa yanapayninta necesitarqa valorwan predicananpaq (leey Efesios 6:18-20). ¿Imaynatam ejemplonta qatipakuchwan?

5. ¿Imataq yanapawasun mana manchakuspa predicanapaq?

⁵ Valorwan predicanapaqqa yanapawasuntaqmi Diosta mañakuyninchikpas. Huk precursoram kaynata nirqa: “Diostam mañakuni runakunata confianzawan predicanaypaq, entiendechinaypaq hinaspa kusisqa predicanaypaqpas. Kayqa Jehová Diospa llamkayninmi, manam ñoqanchikpachu. Chaynaqa mana yanapawaptinchikqa manam imatapas rurayta atichwanchu”, nispa (1 Tes. 5:17). Llapanchikmi Diosta sapa kuti mañakunanchik chuya espiritunta qowaptinchik valorwan predicanapaq (Luc. 11:9-13).

6, 7. a) ¿Ima revelaciontam Ezequiel chaskirqa, hinaspa ima ninantaq? b) ¿Imatam yachachiwanchik chay revelacionqa?

⁶ Ezequiel sutiyoq libropas qawachiwanchikmi mana manchakuspa predicanapaq ima yanapawananchikta. Jehová Diosmi Ezequielman revelasqanpi qoykurqa wankusqa qellqata, chaypim kasqa  ‘aya takikuna, llakiwan hapichikuykuna hinaspa llaki waqaykunapas’, hinaspam kamachirqa chay qellqata mikunanpaq. Nirqam: “Runapa churin, saksanaykikamayá mikuy kay qosqay wankusqa librota”, nispa. ¿Imatam kaywan niyta munarqa? Chay willakuypa nisqantam Ezequielqa allinta entiendenan karqa. Ukunpi kachkanmanpas hinam sonqonpi kanan karqa. Paymi nirqa: “Mikuruptiymi simiypi karqa abejapa miskin hinaraq”, nispa. Abejapa miskinta mikuchkanmanpas hinam Ezequielpaqqa ancha kusikuy karqa Diosmanta willakuyqa. Mana uyariy munaq runakunaman willanan kachkaptinpas, paypaqqa sumaqllañam karqa Jehová Diosmanta willakuyqa chaynataq kamachisqankunata kasukuypas (leey Ezequiel 2:8–3:4, 7-9).

⁷ Kay revelacion chaskisqanmi kunan tiempopi cristianokunatapas allinta yachachiwanchik, ñoqanchikpas Diospa piñakuynin punchawmantam runakunaman willananchik mana uyariyta munachkaptinkupas. Diosmanta predicasqanchikta hinalla chaninchanapaqqa, Bibliatam sapa kuti estudiananchik. Wakin kutillapi otaq yanqallata estudiaspaqa, manam llapallantaqa entiendesunchu. ¿Atiwaqchu Bibliata sapa punchaw leeyta hinaspa estudiaytapas? ¿Kallpanchakuwaqchu leespa astawan yuyaymananaykipaq? (Sal. 1:2, 3.)

Imaynatam predicayta qallarichwan

8. ¿Imam yanaparqa wakin iñiqmasinchikkunata wasin-wasin predicasqankupi rimayta qallarinankupaq?

⁸ Achka iñiqmasinchikkunam sasachakunku wasin-wasin predicasqankupi rimayta qallarinankupaq. Huk lawkunapiqa aswan sasaniraqmá predicayqa. Ichaqa wakin iñiqmasinchikkunam confianzawan rimayta qallarinku pisi rimayllapi predicaspanku hinaspam huk tratadota qonku, recuadropa nisqanpi hina. Ichapas runakunaqa qellqanchikpa ima yachachisqanta otaq sumaqllaña dibujonkunatapas qawaspanku uyariyta munanmanku, kaymi yanapawasun imanasqa watukusqanchikta pisi rimayllapi explicanapaq hinaspa tapukuyta ruranapaqpas. Chaymantapas kimsa otaq tawa tratadokunatam qawachichwan hinaspam ninchikman mayqantapas akllakunanpaq. Arí, manam tratadokunata aypuyllachu nitaq llapan wasikunapi munachiyllachu, aswanmi runakunawan rimayta qallarinanchik Bibliamanta yachachinapaq.

9. ¿Imanasqataq preparakuyqa allinpuni?

⁹ Imaymanata predicaspanchikpas, allinta preparakuspam confianzawan hinaspa kusisqa wasin-wasin predicasunchik. Huk precursormi nirqa: “Astawanmi kusikuywan predicani allin preparasqa kaspay, kaymi kallpanchawan preparakusqayman hina predicanaypaq”, nispa. Huk precursorpas nirqataqmi: “Qellqanchikkunapa ima yachachisqanmanta allinta yachaspayqa, aswan kusikuywanmi yachachini”, nispa. Allinmi imayna rimananchikpaq preparakusqanchikta yuyariyqa, ichaqa wakin iñiqmasinchikkunatam astawan yanapan ensayasqanku. Chaynata ruraspankum Jehová Diosta allinta servinku (Col. 3:23; 2 Tim. 2:15).

10. Predicacionpi punta apaqkuna, ¿imatam ruranmanku predicanapaq huñunakuykuna allintapuni yanapawananchikpaq?

¹⁰ Predicanapaq huñunakusqanchikpi imayna rimanapaq yachachiwasqanchikmi,  yanapawanchik allinta hinaspa kusisqa predicanapaq. Bibliata sapa punchaw leenapaq folletonchik predicacionmanta rimaptinqa, leechwanmi hinaspa pisillapim rimachwan. Ichaqa, predicacionpi punta apaqmi tiempota allinta servichikuspa yachachinan otaq chay punchawpi imayna predicanankupaq facil rimaykunallawan huk demostracionta qawachinman. Chaynapim allin yanapasqa kanqaku predicanankupaq. Ancianokuna hinaspa predicacionpi punta apaqkuna allinta preparakuspankuqa, allintam yanapanqaku hinaspa tiempollapitaq tukunqakupas chay huñunakuyta (Rom. 12:8).

Uyariyqa allinpunim

11, 12. Ejemplokunata churaspa rimariy, ¿imanasqam runakunata llakipayaywan uyariyqa allinpuni kanman?

¹¹ Runamasinchikwan rimayta qallarinapaq chaynataq rimasqanchikwan sonqonman chayanapaqqa, manam preparakuyllachu astawanqa paykunapim interesakunanchik. Chaytam qawachinchik imayna uyarisqanchikwan. Congregacionkunata watukuq superintendentem  nirqa: “Pacienciawan ima nisqankuta uyariymi yanapawanchik predicasqanchikta runamasinchik uyarinankupaq, chaynatam kuyakuyninchiktapas qawachinchik”, nispa. Llakipayaspa uyariptinchikqa paykunapas yaqapaschá uyariwasunchik, kaymantam qatiqninpi qawasun.

¹² Francia nacionpim Saint-Étienne sutiyoq llaqtapi, Le Progrès nisqa periodico huk señorapa cartanmanta willakurqa, paypam kimsa killayoq wawachan wañukusqa. Cartasqanpim willarqa wawachanpa wañukusqan qepallanta, iskay runakuna wasinman watukusqankuta. Paymi nirqa: “Chayllam reqsirurqani Jehová Diospa testigonkuna kasqankuta. Hinaspam allinllata niyta munarqani mana uyariy munasqayta, ichaqa munachisqanku folletopi imanasqa ñakariykuna kasqanmanta rikuruspaymi wasiyman yaykuchirqani. Ichaqa yachachisqankuta yanqachayta munaspay. [. . .] Paykunaqa huk hora masnintam llakipayaywan uyariwarqaku. Paykuna kutikunankupaqña kachkaptinkuqa allinñam tarikurqani, chaymi nirqani kaqllamanta watukamuwanankupaq”, nispa (Rom. 12:15). Tiempopa risqanman hinam kay señoraqa Biblia estudiayta qallaykurqa. Cuentata qokusun, kay señoraqa astawanmi yuyarirqa imayna uyarisqankuta, manam ima nisqankutachu.

13. ¿Imaynatam predicachwan runakunapa ima llakichisqanman hina?

¹³ Runakunata llakipayaspa uyarispanchikqa, allintam yachasun ima necesitasqankuta chaynataq atisunmi allinta yachachiytapas Diospa Gobiernon paykunapaq imakuna rurananmanta. Yaqapaschá qawarqanki, allin yachachiqkunaqa runamasinkutam uyarinku (Pro. 20:5). Paykunaqa watukusqanku runakunapim sonqomanta interesakunku. Manam sutillantachu nitaq maypi yachasqallankutachu qellqanku, aswanqa ima yachay munasqankumanta hinaspa ima sasachasqanmantapas. Pipas llakinta willaptinqa, Bibliamanta yanapakuyta maskaspankum huk iskay punchawllamanta kutinku. Apostol Pablo hinam, runakunapa ima necesitasqankuman hina predicanku (leey 1 Corintios 9:19-23). Chayna interesakusqanchikmi runakunata yanapan Bibliamanta yachanankupaq, hinaspa qawachin Diosninchikpa ‘llakipayakuynintapas’ (Luc. 1:78).

Piensasun allin runakuna tarinamanta

14. ¿Imaynatam predicasqanchikpi qawachichwan Jehová Diospa sumaq kayninkunata?

¹⁴ Jehová Diosqa kuyawasqanchiktam qawachin imatapas akllakunapaq saqewaspanchik. Tukuy Atiyniyoq Dios kaspanpas manam pitapas obliganchu servinanpaqqa aswanmi kuyakuywan pitapas pusamun hinaspa bendicionnintapas qonmi tukuy ima qosqanmanta agradecekuqkunataqa (Rom. 2:4). Diospa serviqninkuna kasqanchikraykum, haykapipas preparasqa kananchik Diospa llakipayakuq kasqanta predicaspa qawachinanchikpaq (2 Cor. 5:20, 21; 6:3-6). Chaypaqqa, piensananchikmi predicasqanchik runakunamanta wakillanpas uyariwananchikta, chayna piensayqa manamá facilchu. ¿Imataq yanapawasun?

15. a) ¿Imatam Jesucristopa apostolninkuna rurananku karqa, predicasqankuta runakuna mana chaskiptinku? b) ¿Imatam rurachwan yachay munaqkunata tarinanchikpaq?

¹⁵ Jesusmi apostolninkunata nirqa pipas predicasqankuta mana chaskiptinqa  mana hukmanyanankupaq. Aswanqa kallpanchakunankum karqa uyariy munaqkunata maskanankupaq (leey Mateo 10:11-15). ¿Imaynatam ñoqanchikpas paykunata qatipakuchwan? Kallpanchakunanchikmi predicaspa runakunata tarinapaq. Ejemplopaq, huk iñiqmasinchikmi qori maskaq runawan tupachikuspan sapa kuti kaynata nin: “Kunan punchawqa tariramusaqchá huk-iskay qorillatapas”, nispa. Huk cristianoñataq kallpanchakun ‘yachay munaq runata sapa semana tarinanpaq, hinaspa iskay-kimsa punchawllamanta kaqlla kutispa qallariypi yachay munasqanta astawan yanapananpaq’. Wakin wawqe-paninchikkunañataqmi kallpanchakunku wasin-wasin predicaspa huk versiculollatapas leenankupaq. Qamqa, ¿imakuna ruranaykipaqtaq kallpanchakuwaq?

16. ¿Ima razonkunam kan hinalla predicananchikpaq?

¹⁶ Wasin-wasin predicasqanchikqa manam runakuna uyarinallanpaqchu. Arí, predicasqanchikqa yanapanmi allin sonqoyoq runakuna salvakunankupaq, ichaqa manam chayllapaqchu. Yanapawanchiktaqmi Jehová Dios kuyasqanchikta qawachinanchikpaq (1 Juan 5:3). Chaymantapas harkawanchikmi Diospa piñakuyninpi runakuna wañuptinku mana huchayoq kananchikpaq (Hech. 20:26, 27). Chaynataq yanapawanchikmi Diospa ‘juzganan hora chayamunanmanta’ runakunaman willananchikpaqpas (Apo. 14:6, 7). Ichaqa, astawanmi yanapawanchik Jehová Diospa sutinta enteron Pachapi hatunchanapaq (Sal. 113:3). Chaymi hinalla predicananchik runakuna uyariwaptinchikpas otaq manapas. Amayá qonqasunchu Jehová Diosqa anchatam chaninchan paymanta willanapaq kallpanchakusqanchiktaqa (Rom. 10:13-15).

17. ¿Imatam pisi tiempollapiña runakuna yachanqaku?

¹⁷ Yaqa llapallan runakunam predicasqanchikta mana uyariyta munankuchu, ichaqa hichpaykamuchkanñam mana uyariy munasqankumanta pesakuyninkuqa (Mat. 24:37-39). Jehová Diosmi Ezequielta nirqa piñakuynin punchaw chayaramuptin, mana kasukuq israelitakuna yachananku karqa ‘paykunapa chawpinpi [. . .] willakuq huk runa kasqanmanta’ (Eze. 2:5). Chaynallataqmi kunan tiempopipas Diospa piñakuynin chayaramuptin, mana kasukuq runakunaqa yachanqaku Jehová Diospa testigonkunalla cheqap willakuqkuna kasqankuta, chaynataq wasin-wasin predicasqanku Diosmanta kasqantapas. ¡Mayna kusikunapaqmi Jehová Diospa testigon kasqanchikqa hinaspa kay tukupay punchawkunapi paymanta willakusqanchikpas! Chaynaqa, hinallayá kallpanchakusun wasin-wasin predicasqanchikpi, Diospa yanapakuyninwan ima sasachakuytapas atipaspa.

¿Imatam niwaq?

• ¿Imaynatam kallpanchakuchwan predicanapaq?

• ¿Imataq yanapawasun wasin-wasin predicasqanchikpi rimayta qallarinapaq?

• ¿Imaynatam qawachinchik runakunapi cheqaptapuni interesakusqanchikta?

• ¿Imatam rurachwan predicasqanchikpi allin runakunata tarinamanta piensanapaq?

[Kay yachachikuypa tapukuyninkuna]

[15 kaq paginapi dibujo hinaspa recuadro]

Runamasinchikwan Bibliamanta rimanapaq yanapakuykuna

Rimayta qallarinapaq:

▪ Runamasinchikta saludaykuspa, chaymanta huk tratadota qoykuspam kaynata nichwan: “Watukamuchkaykim kay tratadopa sumaq yachachisqanmanta willaykuyta munaspay”.

▪ Otaq tratadota qoykuspa munawaqpas kayna niyta: “Ratullam watukamuchkarqayki, ¿imatam piensanki kay tratadopa nisqanmanta?”

Runamasinchik tratadota chaskiwaptinchik

▪ Tapuy tratadopa yachachisqanmanta ima piensasqanta.

▪ Atencionwan uyariy hinaspa imayna piensasqanmanta cuentata qokuy. Rimasqanmanta kallpanchay hinaspa piensay ima nisqankunapi.

Hinalla rimanapaq

▪ Huk versiculota otaq mastapas leespayki yachachiy. Rimariytaq imapas yachay munasqanman hina.

▪ Yachayta munaptinqa, huk qellqanchikta qoykuy hinaspa atikuptinqa qawachiy imayna estudianamanta. Huk punchaw kutinaykipaq niykuy.