Imaynatataq atipachwan llumpay llakikuyta

‘Llapallan churinkunam asuykurqaku consuelanankupaq ichaqa paymi consuelanankuta mana munaspan nirqa: —Ñoqaqa churiymantaqa llakikusaq wañunaykamam —nispa. Chaynata nispanmi waqallarqa.’ (GENESIS 37:35.)

DIOSTA serviq Jacob sutiyoq runam churinmanta llumpay llakisqa tarikurqa, chaymi nirqa churiypa wañusqanmantaqa llakikusaqmi wañunaykama nispa. Chaynapaschá qampas tarikuwaq familiayki wañukuptinqa llumpay llakisqa, Diospi iñiyniki pisiyaruptinchu ¿chaynataqa llakikuwaq? Manachá.

Piensariy: Dios serviq Jacobmantam Biblia niwanchik ancha iñiyniyoq kasqanta. Chaynam karqaku abuelon Abrahanwan taytan Isaacpas chaymi Jacobqa reqsichikun iñiyniyoq kasqanwan (Hebreos 11:8, 9, 13). Chaymi huk tuta yaqa achikyanankama huk angelwan aysakachanakurqa Diospa bendicionninta chaskinankama (Genesis 32:24-30). Kaywanmi Jacobqa qawachiwanchik iñiyniyoq kasqanta. ¿Imatam kay yachachiwanchik? Iñiyniyoq kachkaspapas kuyasqa ayllunchik wañukuptinqa llumpaytam llakikunchik. Llumpay llakisqa tarikuyqa manam penqakunapaqchu.

¿Imaynataq kanchik pininchikpas wañukuptin?

Kuyasqa ayllunchikpa wañukusqanqa imaymanatam llakichiwanchik, sonqonchikpim astawanraqqa. Piensarisun; Leonardo 14 watanpi kachkaptinmi taytan wañukurqa sonqo nanay onqoywan qonqayllamanta. Manach haykapipas qonqanmanchu taytan wañukusqanmanta tian willasqantaqa. Manamá creerqachu. Taytanta pampaptinkupas paypaqqa karqa manapas wañunmanchu hinam. Soqta killamantañam taytanmanta waqarqa. Piensaqraqmi llamkasqanmanta taytan kutimunanta. Yaqa huk watamantañam taytanpa wañukusqanta creerqa. Hinaspam llumpayta llakikurqa taytanmanta. Sapakuti wasinman chayaspa taytan manaña kasqanta qawaspanmi waqayta qallaykuq. ¡Maynataraq llakikurqa!

Leonardo hinam sientekuchwan pininchikpas wañukuptinqa. Maynataña llakikuspapas tiempopa risqanpim allinyachwan. Imaynam cuerponchikpi herida sanoyan killapi otaq unay watapipas chaynam llakikuyninchikpas kanman.

Ninkum pininchikmantapas llakikusqanchikqa hawkayachiwanchikmi hinaspam yanapawanchik chay sucedesqanman hinaña kawsanapaq. Kuyasqa ayllunchik wañukuptinqa manaña llumpayta llakikuspam vida pasayta yachananchik. Llakikuyqa allinmi, kaywanmi qawachinchik imayna sientekusqanchikta. Ichaqa manam lliwchu hina kaqllata llakikunchik. Llakikusqanchik pakaymi ichaqa sasachawanchik yuyayninchikpi, sentimientonchikpi hinaspa cuerponchikpipas. Hinaptinqa, ¿imaynatataq willakuwaq llakikusqaykita? Kayna sasachakuykunata atipananchikpaqmi Biblia yanapawanchik.

Imaynatataq atipachwan llakinchikta

Willakuspankum runakunaqa allinta sientekunku. Ñawpa tiempopi Diosta serviq Job sutiyoq runam chunkantin churinkuna wañukuptin nirqa: “Vidaytam amiruniña ñoqaqa. Mana upallaykuspam willakusaq ñoqaqa. Llumpay llaki sonqoyoqmi rimarisaq ñoqaqa”, nispa (Job 1:2, 18, 19; 10:1). Jobqa manañam llakikusqanwan ñakariyta munarqachu. Chaynaqa, ¿imatataq rurarqa? Payqa yacharqam willakuspanqa allin sientekunanta.

Paulom, maman wañukusqan qepata nirqa: “Llakiymanta willakusqaymi yanapawarqa”, nispa. Amistadninchikman llakikuyninchikmanta willakuyqa yanapawanchikmanmi (Proverbios 17:17). Maman wañukuptinmi Yone sutiyoq paninchikpas iñiqmasinchikkunata valekurqa sapakuti watukunankupaq. Chaymi nin: “Willakusqaywanmi hawkayayta tarirqani”, nispa. Pay hinam ñoqanchikpas llakinchikmanta entiendewaqninchikman willakuspaqa hawkayayta tarichwan.

Qellqaspa willakusqanchikpas yanapawanchikmanmi. Hukkunaqa manam willakuyta atinkuchu chaymi qellqaspankuña llakinkumanta  willakunku. Piensariy, Saul hinaspa Jonatan wañukuptinkum Diosta serviq rey David llumpay llakisqa tarikuspan qellqarqa llaki takita. Chay aya taki qellqasqanqa Bibliapim iskay kaq Samuel libropi qellqakurqa (2 Samuel 1:17-27).

Waqaypas yanapawanchikmantaqmi. Bibliam nin: ‘Kay pachapiqa tukuy imapas tiempoyoqllam. [. . .] Kanmi waqanapaq tiempopas’, nispa (Eclesiastes 3:1, 4). Arí, pininchikpas wañukuptinqa waqanchikmi. Llakinchikmanta waqaytaqa manam penqakunanchikchu. Bibliapim tarinchik ñawpa tiempopi Diosman sonqo runakunapa llaki vidankumanta waqasqankuta (Genesis 23:2; 2 Samuel 1:11, 12). ‘Jesuspas waqarqam’ amigon Lazaro wañukuptin pamparusqanku qepata (Juan 11:33, 35).

Kusisqaraq, llakisqaraq tarikuspanchikpas pacienciakuspam llaki vidanchiktaqa atipachwan. Waqayqa manam penqakunapaqchu. Jehová Dios serviqkunapas ayllunku wañukuptinqa waqasqankuwanmi hawkayayta tarinku.

Diosman asuykuy

Bibliam niwanchik: “Diosman asuykuptikichikqa paypas asuykusunkichikmi”, nispa (Santiago 4:8). Asuykuchwanmi oracionnintakama. Manam chayqa yanqapaqchu. Bibliam niwanchik: “Huchanmanta llakiq runapa hichpallanpim sayaykun. Huchayoqpas wanakuptinqa Tayta Diosmi salvaykun”, nispa (Salmo 34:18). Chaymantapas niwanchiktaqmi: “[Jehová] Diosmanyá qoykuy preocupasqa kasqaykitaqa. [. . .], manam wiñaypaqchu saqenqa urmasqataqa”, nispa (Salmo 55:22). Chaypiyá yuyaymanay. Yachasqanchikman hinam runakunataqa amistadninkuwan llakinkumanta rimasqanku yanaparqa allin sientekunankupaq. Chaynaqa, ¿manachum astawan llakipayawaqninchik Diosman sentimientonchikta willakuchwan? (2 Tesalonicenses 2:16, 17.)

Rimasqanchik Paulom nin: “Llumpayta llakiy inturuwaptinmi Diosta qonqoranpa mañakurqani yanapawananpaq”, nispa. Paytaqa Diosta mañakuyninmi hawkayachirqa, chaynam qampas ‘llakipayakuq Taytanchikta’ mañakuwaq, Payqa yanapasunkim (2 Corintios 1:3, 4; Romanos 12:12).

 Kawsarimuymanta suyakuy

Jesusmi nirqa: “Ñoqam kani kawsarichiqpas chaynataq kawsay qokuqpas. Pipas ñoqaman iñiqqa wañuspapas kawsarimunqam”, nispa (Juan 11:25). Bibliam yachachin wañuqkuna kawsarimunanmanta. * Jesucristom kay Pachapi kachkaspan qawachirqa wañusqakunata kawsarichinanpaq atiyniyoq kasqanta. Huk kutipim kawsarichirqa 12 watayoq warmi warmachata. Maynatachá tayta-mamanqa kusikurqaku. Chaymi “admirakuspanku sasasasata creerqaku” (Marcos 5:42). Hanaq pachamanta Jesucristo Gobiernamuspanmi mana yupay atina runakunata kawsarichinqa kay Pachapi hawka kawsanankupaq (Hechos 24:15; 2 Pedro 3:13). ¡Maynatachá kusikusunchik, wañuqkuna kawsarimuspanku kuyasqan ayllunkuwan tupaykuptinkuqa!

Claudete iñiqmasinchikpa wawan Renatom avión wichiykuptin wañukurqa, payqa suyachkanmi wawan kawsarimunanta. Chaymi refrigeradoranpa punkunpi Renatopa retratonta churarurqa hinaspam sapakuti qawaspan niq: “Kawsarimuypim tupasunchik”, nispa. Leonardopas Diospa prometesqanman hinam taytan kawsarimunanta suyachkan. Cheqaptamá kawsarimuyta suyakuyqa pipaqpas ancha kusikuy. Chaynatamá qampaqpas munaniku.

[Willakuy]

[6 kaq paginapi dibujo hinaspa recuadro]

‘Llakipayawaqninchik Dios’

“Alabasunchikyá Señor Jesucristopa Taytan Diosninchikta, payqa llakipayakuq Taytam hinaspa sinchi kallpanchaqninchik Diosmi.” (2 Corintios 1:3.)

Ima sasachakuyninchiktapas atipananchikpaq yanapaqninchik Dios kasqantam kay textoqa qawachiwanchik. Yanapawanchikmanmi iñiqmasinchik amistadninchikwan otaq familianchikwanpas.

Leonardom yuyarin, taytan wañukuptin yanapaqnin experienciata. Wasinman chayaruspanmi taytan manaña suyasqanta qawaykuspan llakimanta waqayta qallaykurqa. Chaymantam parqueman pasaspan bancapi tiyaykurqa. Weqe ñawintinmi Diosta ruegakurqa yanapananpaq. Chaymi hichpallanpi carro sayaruptin Leonardo rikururqa chay carro manejaqqa iñiqmasin kasqanta, payqa rantikunanpaq wasikunaman imapas apasqanpim calleta pantarusqa. Iñiqmasinwan tupaykusqallanmi Leonardotaqa anchata kusichirqa.

Huk runam warmin wañukuptin llumpay llakisqa karqa. Llumpay hukmanyasqa kaspanmi llumpayta waqaspan Diospa yanapakuyninta mañakurqa. Mañakuyta manaraq tukuchkaptinmi teléfono waqaramurqa. Hinaptinmi warmi willkan kasqa. Paymi nin: “Willkaywan huk ratochallapas parlaykusqaymi anchata kallpanchawarqa. Telefonowan qayamuwasqanqa qawachiwarqam mañakusqayta Dios contestamuwasqanta”, nispa.

 [5 kaq paginapi dibujo hinaspa recuadro]

¿Kallpanchachwanchu llakipi kaqkunata?

“[Diosmi] kallpanchawanchik tukuy sasachakuyninchikpi chaynapi ñoqanchikpas sasachakuypi kaqkunata Diospa kallpanchawasqanchikman hina kallpanchananchikpaq.” (2 Corintios 1:4.)

Kay textopa nisqanmi achkaq cristianokunapi cumplikun. Familianku wañukuptin consuelo chaskisqankum kallpanchan runamasinkunatapas consuelanankupaq.

Piensarisun; Claudete sutiyoq cristianam Bibliamanta yachachinanpaq vecinankunata sapa kuti watukuq. Qari wawan manaraq wañukuchkaptinmi leucemia nisqa onqoywan wañukuqpa mamanman watukuq. Chay warmiqa Claudete cristiana watukuptinqa chaskirqam ichaqa llakinta mana entiendesqantam piensarqa. Claudetepa qari wawan wañukuptinmi chay warmiqa watukurqa hinallaraqchu Diosninpi iñisqanta yachananpaq. Claudetepa iñiyninmanta admirakuspanmi paywan Biblia estudiayta qallaykurqa chaymi kunanqa Diospa Palabranpi achka consuelota tarin.

Taytan wañukuptinmi Leonardo sutiyoq iñiqmasinchik señaswan rimayta yachananpaq tanteakurqa, hinaspam señaswan rimaqkunata Bibliamanta yachachispan hawkayayta tarirqa. Chaymi nin: “Señaswan rimaqkunaman Diosmanta yachachinaypaq tanteakusqaymi yanapawarqa. Chayta ruranaypaqqa tiempochakuspaymi kallpanchakurqani chaymi Bibliata estudiachisqay bautizakuruptin astawan kusikurqani. Chayllaraqmi taytay wañukusqanmantapacha kusisqa sientekurqani”, nispa (Hechos 20:35).

[4 hinaspa 5 kaq paginakunapi dibujo]

Jesusqa prometerqam Paypi iñiqkunata kawsarichinanpaq