Jehová Diosqa kuyakuywanmi cuidan yuyaq serviqninkunataqa

“Diosqa justom. Payqa llamkasqaykichiktaqa manam qonqanqachu, manataqmi qonqanqachu pay kuyasqaykichiktapas.” (HEB. 6:10.)

1, 2. a) Respetanapaq yuyaq wawqe-paninchikkunata qawaspanchik, ¿pikunapim ichapas piensanchik? b) ¿Imaynatam Jehová Dios qawan yuyaq cristianokunata?

RESPETANAPAQ yuyaq wawqe-paninchikkunata qawaspanchikqa, yaqapaschá Daniel libropa nisqanman hina Jehová Diospi piensanchik. Danielmi kaynata qellqarqa: “Revelacionpi qawachkaptillaymi reypa tiyanankuna churasqa karqa. Hinaptinmi huknin tiyanapi wiñaypaq Kawsakuq tiyaykurqa. Paypaqa pachanpas kasqa riti hina ruyaq-ruyaqmi. Paypaqa chukchanpas kasqa taqsasqa millma hina ruyaq-ruyaqmi”, nispa (Dan. 7:9).

² Mana teñisqa millmaqa yaqa llapanpiqa ruyaqmi, chayna ruyaqwanmi Danielqa tupachirqa Diospa chukchanta. Chukchan ruyaq kasqan hinaspa “wiñaypaq Kawsakuq” nispa sutichakusqanmi, qawachiwanchik Jehová Dios achka watakuna kawsasqanta chaynataq ancha yachayniyoq kasqantapas. Kaymi yachachiwanchik ancha respetanapaq kasqanta. Hinaptinqa, ¿imaynatam Jehová Dios qawan yuyaq serviqninkunata? Bibliam nin: “Kawsayninpi allinta ruraspa machuyaruq runapaqqa umanpi sumaq corona hinam soqonkunaqa”, nispa (Pro. 16:31). Arí, Jehová Diospaqqa sumaqllañam kanku payta kasukustin yuyaqyaruq cristianokunaqa. Qampas, ¿chaynatachu qawanki?

¿Imanasqataq ancha kuyasqa kanku?

3. ¿Imanasqataq anchata kuyanchik yuyaq wawqe-paninchikkunata?

³ Yuyaq cristianokunapim tarikunku, Jehová Diospa Llaqtanpi Punta Apaqkuna, congregacionta watukuq ancianokuna otaq mozo kayninkupi chayna llamkaqkuna, precursorkuna hinaspa congregacionpi tukuy sonqonkuwan llamkaq wawqe-paninchikkunapas. Reqsinkipaschá achka wataña kusikuywan predicaq huknin wawqe-paninchikta hinaspa rurasqanwan mozo-sipaskunata kallpanchaqta. Wakinkuqa congregacionpim achka llamkayniyoq karqaku hinaspa predicasqankurayku qatikachasqapas karqaku. Jehová Dios hinaspa ‘allin yuyayniyoq confianza sirvientem’ anchata agradecekunku yuyaq wawqe-paninchikkunata, Diospaq llamkasqankumantawan hinalla kunankama llamkasqankumantapas (Mat. 24:45).

4. ¿Imanasqataq yuyaq wawqe-paninchikkunata respetananchik hinaspa paykunapaq orakunanchik?

⁴ Paykunataqa kuyananchikmi hinaspa respetananchiktaqmi. Moisespa chaskisqan Leypa nisqanman hinaqa, yuyaqkunata respetayqa tupanmi Dios respetaywan (Lev. 19:32). Hinaptinqa amayá qonqasunchu paykunapaq orakuyta, hinaspa kuyakuywan Diospaq llamkasqankumanta agradecekuytapas. Apostol Pabloqa mañakurqam lliw iñiqmasinkunapaq, mozokunapaq chaynataq yuyaqkunapaqpas (leey 1 Tesalonicenses 1:2, 3).

5. ¿Imanasqataq anchata yachachwan yuyaq wawqe-paninchikkunamanta?

⁵ Congregacionpi kaqkunaqa paykunamantam anchata yachachwan, experienciayoq hinaspa achka wataña Bibliata estudiaspanku yachayniyoq kasqankurayku. Kay wawqe-paninchikkunaqa qepa wiñaykunamanmi ima yachasqankumanta kusikuywan yachachinku, paykunaqa yacharunkuñam pacienciayoq  hinaspa entiendeq kaytapas (Sal. 71:18). Mozo-sipaskunaqa uku-uku pozomanta yakuta horqochkankumanpas hinam kallpanchakunanku paykunapa yachayninta astawan yachanankupaq (Pro. 20:5).

6. ¿Imatam rurachwan yuyaq wawqe-paninchikkuna valorasqanchikta yachanankupaq?

⁶ Jehová Dios hina valorasqanchikta yuyaq wawqe-paninchikkuna yachanankupaq, ¿imatam rurachwan? Nichwanmi Dios servisqankumanta kuyasqanchikta, hinaspa ima consejawasqanchikpas allinninchikpaq kasqanta. Chaymantapas consejawasqanchiktam kasukuna, chaynapim qawachisun rimasqanchik sonqomanta kasqanta. Chaynatam paykunapas mozo-sipas kasqankupi rurarqaku. Yuyaq wawqe-paninchikkuna consejaptinkum paykunapas chayta chanincharqaku hinaspa vidankupi yanapachikurqakupas. *

Kuyasqanchikta imayna qawachinamanta

7. ¿Pikunataq puntata obligasqa kachkanku yuyaqkunata atiendenankupaq?

⁷ Yuyaqkunataqa familiankum puntata atiendenanku, chaynatam Jehová Dios nin (leey 1 Timoteo 5:4, 8). Payqa munanmi ayllunku deberninkuwan cumplinankuta hinaspa yuyaq ayllunkuta Jehová Dios hina valoranankutapas. Kay ayllukunaqa atiendesqankumantam chaskinqaku Jehová Diospa yanapayninta hinaspa bendicionnintapas. *

8. ¿Imanasqataq congregacionpi kaqkunaqa yanapananku yuyaq cristianokunata?

⁸ Jehová Diosqa munantaqmi congregacionpi kaqkunapas yuyaqkunata yanapanankuta, aswanqa ayllunku mana iñiq kaptin otaq mana yanapayta munaptinkupas (1 Tim. 5:3, 5, 9, 10). Chaynatam congregacionpi kaqkuna qawachinku huk sonqolla, sientinakuq hinaspa llakipayakuq kasqankuta (1 Ped. 3:8). Pablom huk rikchanachiywan kay sientinakuyta allintapuni tupachirqa kaynata nispan: “Cuerpopa parten ñakariptinqa wakinkunapas ñakarintaqmi”, nispa (1 Cor. 12:26). Yuyaqkunata yanapayqa tupantaqmi apostol Pablopa kayna nisqanwan: “Ima sasachakuykunapipas yanapanakuychikyá, chaynata ruraspayá Jesucristopa kamachikuyninkunata cumpliychik”, nispa (Gal. 6:2).

9. ¿Imakunawanmi sasachakunku yuyaq iñiqmasinchikkuna?

⁹ ¿Imakunawanmi ‘sasachakunku’ yuyaq wawqe-paninchikkuna? Wakinkuqa chayllam pisipanku hinaspa imakunawanpas llumpaytam sasachakunku, ejemplopaq: hampichikuq risqankuwan, wasinku pichasqankuwan otaq yanukusqankuwanpas. Yuyaqkunataqa manañam llumpaytaqa mikunayanchu nitaq yakunayanpaschu, chaymi wakinkuqa manaña allintaqa mikunkuchu nitaq yakutapas tomankuchu. Chaynallataqmi pasanman Diosmanta yachasqankuwanpas. Achka wawqe-paninchikkunam manaña allinta qawakuptinku otaq manaña allinta uyariptinku sasachakunku leenankupaq hinaspa huñunakuykunapi uyarinankupaqpas. Huñunakuyman rinankupaq allichakuyllapas pisipachinmanmi. ¿Imata ruraspam yanapachwan?

Imaynatam yanapachwan

10. ¿Imatam congregacionpi ancianokuna ruranku yuyaq iñiqmasinchikkuna atiendesqa kanankupaq?

¹⁰ Achka congregacionkunam allinta cuidanku yuyaq iñiqmasinchikkunata. Rantipuq rinku, wasinta pichapunku hinaspa mikuytapas yanupunku. Chaymantapas yanapanku estudiananpaq, huñunakuyman rinanpaq hinaspa sapa kuti predicananpaqpas. Chaynataq pusanku may rinanmanpas. Wasinkumanta mana lloqsiyta atiptinkuñataqmi, huñunakuypi yachachikuykunata grabapunku otaq arreglota ruranku telefonontakama huñunakuyta uyarinankupaq. Ancianokunapas kallpanchakunkum congregacionpi yuyaqkunapa ima necesitasqankuta atiendenankupaq. *

11. Willamuy yuyaq iñiqmasinchikta huk ayllu imayna yanapasqanmanta.

 ¹¹ Chaymantapas llapallanchikmi atichwan yuyaq iñiqmasinchikkunaman kikinchikmanta imatapas qoykuyta. Ejemplopaq qawasun. Huk yuyaq iñiqmasinchikpa señoranmi wañukurqa, chaymi manaña atirqachu pagayta yachasqan wasinmanta pisi qollqellataña chaskisqanrayku. Paywan señoranmi Bibliamanta estudiota qorqaku huk aylluman hinaspa iskay sipas warmankunamanpas. Kay ayllupi kaqkunam imayna tarikusqanta qawaykuspanku wasinman aparurqaku, hinaspa qorqaku iskay cuartokunata. Paymi ayllunku hinaña karqa, hinaspam chunka pichqayoq wata paykunawan allinta kawsarqaku. Sipaskunapas paypa iñiyninmanta hinaspa experiencianmantam allinta yacharqaku, paytañataq allinta yanaparqa sipaskunapa kusisqa kasqanku. Wawqenchikqa 89 watanpi wañukunankamam paykunawan kawsarqa. Kay ayllum Jehová Diosta anchata agradecekun wasinpi kaqkunata paywan yanapasqanmanta. Paykunaqa hatun premiotam chaskirunkuña iñiqmasinta yanapasqankurayku (Mat. 10:42). *

12. ¿Imaynatam qawachichwan yuyaq iñiqmasinchikkuna kuyasqanchikta?

¹² Ichapas kay ayllu hinaqa mana atisunchu iñiqmasinchikkuna atiendeytaqa, ichaqa atinchikmanmi huñunakuyman apayta otaq paykunawan kuska predicaytapas. Mana chayqa wasinchikmanmi pusachwan otaq maytapas puririq rispanchikpas. Onqosqa kaptinku otaq wasinkumanta mana lloqsiyta atiptinkuqa yuyarisun watukunapaq. Imayna kaptinkupas, amayá haykapipas qonqasunchu yuyaq kasqankuman hina respetayta. Allintaraq tanteaptinkuqa respetasunchikyá paykunapaq imatapas tanteaspanchikqa. Yuyaq kaspa manaña allinta tanteayta atispankupas, musyankum pikuna respetasqankuta otaq mana respetasqankutapas.

Jehová Diosqa manam qonqanqachu rurasqankutaqa

13. ¿Imanasqataq yachananchik yuyaq iñiqmasinchikkunapa imayna sientikusqankuta?

¹³ Yachananchikmi yuyaq iñiqmasinchikkuna wakinpi imayna sientikusqankutaqa. Wakin kutipiqa llakisqam tarikunku mozo kasqankupi  rurasqankuta hina manaña rurayta atispanku. Ejemplopaq, pichqa chunka wata masnintaña Jehová Diosta serviq huk cristianam, llumpayta onqosqanrayku sasachakurqa huñunakuyman rinanpaq. Huk kutipim precursora kaspan achka rurasqanta yuyarispan waqayta qallaykurqa. Kurkuykuspanmi waqastin kaynata nirqa: “Kunanqa manañam atiniñachu ima ruraytapas”, nispa.

14. ¿Imaynatam Salmos libro kallpanchan yuyaq cristianokunata?

¹⁴ Qam yuyaqña kaspaykiqa, ¿haykapipas chaynata sientikurqankichu? ¿Wakinpiqa piensankichu Jehová Dios saqerususqaykita? Yaqapaschá Davidpas chaynata sientekurqa yuyaq kasqanpi, chaymi Jehová Diosta kaynata mañakurqa: “Ñoqallay machuyaruptiyqa amayá wischurullawaychu. Kallpallay tukuruptinqa amayá saqerullawaychu. Diosnilláy, yuyaqña kaptiyqa [. . .], soqo umaña kaptiyqa amayá qonqarullawaychu”, nispa (Sal. 71:9, 18). Arí, Davidtaqa Jehová Diosqa manam saqenmanchu karqa, manataqmi qamtapas saqesunkichu. Huk kutipiñataq Davidqa qawachirqa Diospa yanapakuyninpi tukuy sonqonwan confiasqanta (leey Salmo 68:19). Segurom kawaq, Jehová Diosta kasukuptikiqa sapa punchawmi yanapasunki.

15. ¿Imatam yuyaq cristianokuna ruranmanku kikinkumanta allinta piensanankupaq?

¹⁵ Jehová Diosqa manam qonqanqachu rurasqaykita chaynataq payta hatunchanaykipaq kunan rurasqaykitapas. “Diosqa justom. Payqa llamkasqaykichiktaqa manam qonqanqachu, manataqmi qonqanqachu pay kuyasqaykichiktapas” (Heb. 6:10). Chaynaqa kallpanchakuy kikikimanta mana allin piensaykunata saqenaykipaq. Ama piensaychu Jehová Diospaq mana servisqaykitaqa. Aswanqa allin kaqkunapi piensariy, ejemplopaq piensay bendicionkuna chaskisqaykipi hinaspa ima suyakuyniyoq kasqaykipipas. Cristianokunapaqqa kapuwanchikmi mana tupachiy atina sumaq suyakuyninchik, chaytaqa kikin Jehová Diosmi prometewanchik (Jer. 29:11, 12; Hech. 17:31; 1 Tim. 6:19). Yuyaymanay Jehová Diospa qosusqayki suyakuypi, kallpanchakuy mozo-sipas hina piensanaykipaq chaynataq ama qonqaychu congregacionpaq ancha allin kasqaykita. *

16. ¿Imataq yuyaq cristianota piensarachirqa congregacionpi anciano kasqanta saqerunanpaq, hinaspa imanasqam chayna piensasqanta cambiarurqa?

¹⁶ Qawasun Juan sutiyoq cristianomanta, payqa congregacionpi ancianom hinaspa 80 watayoq kaspanpas sapa punchawmi Sara sutiyoq señoranta cuidanan onqosqanrayku. * Achka cristianakunam Juanta yanapanku señoranta cuidaspanku, chaymi payqa huñunakuyman rin hinaspa predicaqpas lloqsin. Ichaqa huk punchawmi chayna tarikusqanwan hukmanyaruspan piensarqa congregacionpi anciano kasqanta saqerunanpaq. Weqenpas suturisqam kaynata nirqa: “¿Imapaqñataq congregacionpi ancianoqa hinalla kayman? Manañataq congregacionpiqa anchataqa yanapakunichu”, nispa. Wakin ancianokunam kallpancharqaku allinta piensananpaq, nirqakutaqmi asllataña ruraptinpas congregacionpi necesitasqankuta. Chayna nisqankuwan kallpanchakuspanmi, Juanqa tantearurqa congregacionpi hinalla anciano kananpaq.

Diospaqqa ancha valorniyoqmi yuyaq iñiqmasinchikkunaqa

17. ¿Imatam Biblia prometen yuyaq cristianokunaman?

¹⁷ Bibliaqa sutillatam qawachin yuyaq cristianokuna  sasachakuyniyoq kaspankupas, atinmankum Diospaq hinalla allin llamkayta. Salmos qellqaqmi nirqa: “Tayta Diospa templonpi plantasqa hinam kachkan. [. . .] Machuyaruspanpas ruruyoqmi kanqa. Chay sachaqa hatu-hatun rapisapallañam kanqa”, nispa (Sal. 92:13, 14). Apostol Pablopas nirqam: ‘Manam hukmanyanikuchu, cuerpoyku machuyaptinpas’, nispa (leey 2 Corintios 4:16-18).

18. ¿Imanasqataq yanapanata necesitanku yuyaq cristianokuna hinaspa paykunata cuidaqkunapas?

¹⁸ Arí, yuyaq cristianokunaqa sacha hinam hinalla rurunmanku, chayna kasqantam qawachin kunan tiempopi achka ejemplokuna. Paykunapaqqa ayllunku yanapaptinpas sasam yuyaq kasqankupi onqosqa kasqankuqa. Chaynataq atiendeqkunapas hukmanyarunmankum pisiparuspanku. Chaymi congregacionqa obligasqa kachkan yuyaq cristianokunata hinaspa cuidaqkunatapas kuyasqankuta qawachinankupaq (Gal. 6:10). Manam ninchikchu: “Mikumuy hinaspa qonikamuy” nispallachu, aswanmi atisqanchikkunawan yanapanchik (Sant. 2:15-17).

19. ¿Imamantam seguro kanmanku yuyaq cristianokuna hamuq tiempomanta piensaspanku?

¹⁹ Yaqapaschá yuyaq kasqanqa Dios servisqanta sasachanqa, ichaqa Jehová Diospa kuyasqanqa manam pisiyanchu watakunaña pasaptinpas. Payqa anchatam kuyan kayna kasukuq serviqninkunataqa hinaspa manam haykapipas saqenqachu (Sal. 37:28; Isa. 46:4). Payqa yanapanqam chaynataq sapa punchawmi pusanqa yuyaq kasqanpi (Sal. 48:14).

[Willakuykuna]

¿Imatam niwaq?

• ¿Imanasqam ancha kuyasqa kanku yuyaq cristianokuna?

• ¿Imaynatam kuyakuyninchikta qawachichwan yuyaq iñiqmasinchikkunaman?

• ¿Imataq yanapanqa yuyaq cristianokunata kikinkumanta allinta piensanankupaq?

[Kay yachachikuypa tapukuyninkuna]

[23 kaq paginapi dibujo]

Congregacionpi kaqkunaqa anchatam kuyanku yuyaq wawqe-paninchikkunataqa