Atiwaqchu casado vidaykipi ‘kimsa pata qaytu’ hina kayta

“Manam facillataqa tipirunmankuchu kimsa pata qaytutaqa.” (ECL. 4:12.)

1. ¿Pitaq qallariypi warmi-qarita casarachirqa?

PLANTAKUNATA hinaspa animalkunata unancharuspanmi Jehová Diosqa unancharqa Adan sutiyoq runata. Chaymanta qepatam llumpayta puñurachispan huknin costillanmanta yanapaqnin warmita rurarqa. Adan qawaykuspanmi kaynata nirqa: “Payqa tulluymanta hinaspa aychaymanta kaqmi”, nispa (Gen. 1:27; 2:18, 21-23). Allinpaq qawaspanmi Jehová Dios casarachirqa hinaspam bendecirqa (Gen. 1:28; 2:24).

2. ¿Imaynatam Satanas sasachanarachirqa Adantawan Evata?

² Diospa qallarichisqan casado vidaqa llakikuypaqmi tiempopa risqanpi yanqachakururqa. Satanaswan sutichasqa mana allin angelmi Eva sutiyoq warmita engañarurqa Jehová Diospa prohibisqan sachapa rurunta mikurunanpaq hinaptinmi Adanpas mikururqa. Chay mana kasukusqankuwanmi Diospa kamachikuyninpa contranpi churakurqaku (Gen. 3:1-7). Adantawan Evata, Jehová Dios cuentata mañaptinmi contestasqankuwan qawachirqaku casado vidankuta yanqacharusqankuta. Adanmi warminman tumparqa kaynata nispa: “Compañawananpaq kay warmi qowasqaykim qoykuwarqa chay sachapa rurunta hinaptinmi mikururqani”, nispa (Gen. 3:11-13).

3. ¿Ima pantasqa yachachikuykunatataq judiokuna yachachirqaku?

³ Chaymantapacham Satanasqa casado vidapi atipanakuyta qallarichirqa tukuy rikchaq toqllakunawan. Piensariy, ñawpa tiempopim religionpi umalliqkuna yachachiqku casado vidamanta Bibliapa contranpi yachachikuykunata. Judiokunapa religionninpi yachachiqkunam Diospa kamachikuyninta yanqacharqaku. Chaymi mikuyta kachiwan warminku puchqorachiptillanpas divorciakunankupaq qosakunata permitiqku. Ichaqa Jesusmi nirqa: “Huk qariwan mana pierdekuchkaptin yanqamanta warminta wischuspan hukwan casarakuqqa hukwan pierdekuy huchapim kachkan”, nispa (Mat. 19:9).

4. ¿Imayna toqllakunataq casado vidata sasachan?

⁴ Hinallamá Diabloqa munachkan casado vidata yanqacharuyta. Chayraykum wakinqa servinakunku, qaripura otaq warmipurapas casarakunku hinaspa divorciakuqkunapas facillatam papelninkutapas horqorunku (leey Hebreos 3:4). Chaynaqa, ¿imatataq rurachwan casado vidamanta mana allin piensaykunawan mana atipachikunapaq? Chaypaqqa qawasunchikyá casado vidapi kusisqa kawsakuqkunamanta.

Casado vidaykipi Jehová Diosta respetay

5. ¿Imaninantaq casado vidapi ‘kimsa pata qaytu’ hina ninanqa?

⁵ Casado vidapi kusisqa kawsanaykipaqqa anchatam Jehová Diosta respetanayki. Bibliam nin: “Manam facillataqa tipirunmankuchu kimsa pata qaytutaqa”, nispa (Ecl. 4:12). ‘Kimsa pata qaytu’ nispaqa casado vidamantam rimachkan, chaymi qosawan warmi hinaspa Jehová Diosqa kimsa pata kawpusqa qaytu hina hukllawasqa kanku, kawpuypi hinam casado vidaqa Jehová Diosman arwikuchkan. Jehová Diosta respetasqankum kallpanchan ima sasachakuyninkutapas atipanankupaq chaymi casado vidankupi kusisqa kawsanqaku.

6, 7. a) Cristianokunaqa, ¿imatataq ruranmanku casado vidankupi Jehová Dios yanapananpaq? b) Iñiqmasinchikqa, ¿qosanpa imayna kaynintataq admiran?

⁶ ¿Imatataq ruranmanku casarasqakunaqa casado vidanku kimsa pata qaytu kawpusqa hina kanankupaq? Rey Davidmi takirqa: “Diosnilláy, munachkanim munallasqaykiman hina  rurallayta. Diosnilláy, sonqollaypim waqaychani qampa yachachisqaykita”, nispa (Sal. 40:8). Jehová Diosta kuyasqanmi Davidta kallpancharqa tukuy sonqonwan servinanpaq, chaynallataqmi kallpanchan kay tiempopi iñiqmasinchikkunatapas. Chayraykum casarasqakunaqa Jehová Dioswan amistadninkuta astawan kallpanchananku kusisqa servinankupaq. Chaymantapas sapakamam yanapanakunanku Jehová Diosta astawan kuyanankupaq (Pro. 27:17).

⁷ Casarasqakunapa sonqonpi Jehová Diospa kamachikuynin kaptinqa sutillam kanqa casado vidankupi iñiyninku, suyakuyninku hinaspa kuyakuyninkupas, chaymi kallpanchanqa (1 Cor. 13:13). Pichqa chunka wataña casarasqa Sandra sutiyoq iñiqmasinchikmi nin: “Qosaymantaqa admirakuni allinniypaq yachachiwasqanmanta hinaspa ñoqamantapas astawan Jehová Diosta kuyasqantam”, nispa. Qosakuna, ¿chaynatachu qamkunamantapas warmikichik nin?

8. ¿Imatataq casarasqakunaqa rurananku allin ‘pagota’ hina chaskinankupaq?

⁸ ¿Puntapichu churanki Dioswan amistadnikita hinaspa servisqaykitapas? ¿Diosta servisqaykipi yanapasuqnikita hinachu qosaykita otaq warmikita qawanki? (Gen. 2:24.) Rey Salomonmi qellqarqa: ‘Chulla runalla kanamantaqa iskay runam aswan allinqa. Iskayninkum llamkasqankumanta [. . .] aswan masta pagonkuta chaskinqaku’, nispa. (Ecl. 4:9.) Casarasqakunaqa kuskankum kallpanchakunanku allin pagota chaskinankupaq. ¿Imataq chay pagoqa kanman? Jehová Diospa bendicionninwan warmi-qari kuyakuywan kuska kawsakuymi.

9. a) ¿Imakunatam qosaqa ruranan familianpaq? b) Colosenses 3:19 nisqanman hina, ¿imaynataq qosakunaqa kawsananku warminkuwan?

⁹ Casado vidapi Jehová Diosta respetaqqa kallpanchakunankum kamachisqanta kasukunankupaq. Qosam familianta mantieninan hinaspa Diosmantapas yachachinan (1 Tim. 5:8). Chaymantapas warminpa sentimientontam respetanan. Colosenses 3:19 nin: “Qosakuna, kuyaychik warmikichikta, amayá qaqchakachariychikchu”, nispa. Chaymi, “amayá qaqchakachariychikchu” nisqamantam, Biblia leeq huk runa nin kaynata: warmita nanay simiwan rimanamanta otaq maqanamanta, mana yanapanamanta, mana kuyanamanta, mana cuidanamanta, hinaspa mana mantienenamantam nichkan kaypiqa, nispa. Cristianokuna casado vidankupi chayna kawsayninkuqa manam allinchu. Kuyakuywan qosa warminta kamachiptinqa, warminpaqqa manam sasachu kanqa kasukuyninqa.

10. Diosta serviq casada warmiqa, ¿imaynatataq portakunan?

¹⁰ Jehová Diosta respetaq casarasqa warmikunapas casado vidankupim Diospa kamachikuyninkunata kasukunku. Apostol Pablom qellqarqa: “Señorninchikta hinayá warmikunapas qosaykichikta kasuychik. Qosaqa warmipa umanmi, chaynam Cristopas llapallan iñiqkunapa uman”, nispa (Efe. 5:22, 23). Satanasmi Evata engañarqa Diosmanta karunchakuspaqa aswan kusisqam kanki nispa. Kay tiemponchikpipas chayna karunchakuyqa kanmi wakin casado vidapi. Ichaqa, Diosta respetaq warmiqa qosan kuyakuywan kamachiptinqa kusisqam kasukun, Eva qosanta yanapananpaq Jehová Dios kamachisqantam yachan, Diospaqqa chay kamachisqanqa ancha valorniyoqmi karqa (Gen. 2:18). Diospa kamachisqanta kasukuq cristianaqa qosanpaqmi ‘sumaq corona hina’ (Pro. 12:4).

11. ¿Imataq yanaparqa iñiqmasinchikta casado vidanpi kusisqa kawsananpaq?

¹¹ Chaymantapas casarasqakunaqa Diosta respetanmanku kuskanku Bibliata estudiaspankum. Pichqa chunka pichqayoq wataña kasarasqa Gerald sutiyoq iñiqmasinchikmi nin: “Casado vidapi kusisqa kawsanapaqqa ancha allinmi Bibliata kuska leespa estudiayqa”, nispa. Chaymantapas ninmi: “Kuska imatapas rurayqa allinmi, aswanraqmi Diosta serviypiqa; kaymi warmi-qarita astawan kuskanchan hinaspa Jehová Dioswanpas”, nispa. Casado vidapi Bibliata kuska estudiayqa yanapanmi Diospa kamachikuyninta kasukunankupaq hinaspa iñiyninkupi ñawparinankupaqpas.

12, 13. a) ¿Imanasqataq allinpuni casarasqakuna kuskanku orakuyninku? b) ¿Ima ruraykunaraqtaq astawan yanapanman casado vidata?

¹² Kusisqa kawsaq casarasqakunaqa kuskankutaqmi  orakunkupas. Casado vidanpi necesitasqanman hina sonqonmanta qosa orakuptinqa warmi-qarim astawan kuskanchasqa kanqaku (Sal. 62:8). Casado vidapi sasachakuykuna kaptinqa, ¿manachu Diospa yanapakuyninta mañakuspaqa chaylla allicharuchwan? (Mat. 6:14, 15.) Allinmi kanman mañakusqankuman hina rurayninkuqa, ‘aguantanakuspa pampachanakuspa’ yanapanakuyninkupas (Col. 3:13). Orakuspanchikqa Diospi confiasqanchiktam qawachinchik. Rey Davidmi nirqa: “Llapallaykum qamllamanta suyaniku”, nispa (Sal. 145:15). Confianzawan Diosman orakuspaqa manam hukmanyasunchu, Payqa nanachikunmi ñoqanchikmanta (1 Ped. 5:7).

¹³ Chaymantapas Jehová Diosta casado vidankupi respetaqkunaqa salonpi huñunakuykunaman hinaspa predicaqpas kuskam rinanku. Huñunakuypi yachachikuykunawanmi casarasqakunaqa yachanku Diablopa toqllankunata imayna atipayta (Efe. 6:11). Kuskanku predicasqankum yanapanqa Dios serviyninkupi ‘qaqa hina sayanankupaq’ (1 Cor. 15:58).

Imatataq rurachwan sasachakuykuna kaptin

14. ¿Imakunataq sasachanman casado vidata?

¹⁴ Kay consejokunamantaqa ñam yacharqanchikña ichaqa allinmi kanman casarasqakuna kaymanta yuyariyninkuqa. Yanapasunkichikmanmi casado vidapi imapas sasachakuynikichikpi. Bibliaqa ninmi casado vidankupi Diosta serviqkunapas ‘kawsayninkupi sasachakuykunapi kanankumanta’ (1 Cor. 7:28). Chaynamá pantaq kayninchik, kay pachapi mana allin kaqkuna hinaspa Diablopa toqllankunapas sasachawachwanmi casado cristianokunataqa (2 Cor. 2:11). Ichaqa, Jehová Diospa yanapakuyninwanqa atipachwanmi ima sasachakuykunatapas. Atisunpunim. Yuyarisunchikyá Jobmanta. Paypaqa animalninkunam, serviqninkunam, churinkunam wañururqa, chaywanpas “Jobqa manam huchallikurqachu, manataqmi chaykunamantaqa Diosmanchu culparqa” (Job 1:13-22).

15. ¿Imanasqataq runakunaqa nanay simiwan rimanku, imatataq rurawaq qosayki otaq warmiki chaynata rimaykusuptikiqa?

¹⁵ Jobtam warmin kaynata nirqa: “¿Hinallaraqchu qamqa mana huchallikuq kachkanki?  ¡Diosta ñakaspaykiyá wañuy!”, nispa (Job 2:9). Sasachakuykunaqa mana yuyayniyoqta hinam rurachiwachwan. Salomonmi nirqa: “Yachayniyoq runa pitapas ñakarichispaqa sonso runa hinam rurachkan”, nispa (Ecl. 7:7). Sasachakuykunawan kaspa qosayki otaq warmiki nanay siminwan rimaykusuptikiqa pacienciakunaykim. Atipanakuyqa astawanchá sasachanman casado vidataqa (leey Salmo 37:8). Ama uyariypaschu hukmanyaspanku ‘mana controlakuspa [rimasqanku] palabrakunataqa’ (Job 6:3).

16. a) Mateo 7:1-5 Jesuspa nisqanta, ¿imaynatataq casado vidapi rurayman churachwan? b) ¿Imanasqataq qosaykipa otaq warmikipa allin kayninwan contentakunayki?

¹⁶ Casarasqakunaqa atinankupaq kaqllapim tanteananku. Qosaykipa otaq warmikipa mana allin genionta qawaspaykiqa: “Cambiarachisaqmi nispapaschá piensawaq”. Atiwaqpaschá kuyakuywan pacienciakuspaqa. Ichaqa yuyariyá; hukpa faltanta allin tukuspa mana qawanamanta Jesucristopa nisqanta, iñiqmasinpa ñawinpi “qopata” qawaspa manataq kikinpa ñawinpi ‘kaspitaqa’ qawakunchu nisqanmanta. Chaymantapas nirqam: “Amayá runamasikichiktaqa kamiychikchu chaynapi Dios mana juzgasunaykichikpaq”, nispa (leey Mateo 7:1-5). Kaywanqa manam hatun faltankuna aguantanamantachu nichkanchik. Yaqa tawa chunka wataña casarasqa Robert sutiyoq iñiqmasinchikmi nin: “Casarasqakunaqa rimanakunankum confianzawan hinaspapas ninakusqankuman hinam kasunakunanku”, nispa. Tanteaspa rurayqa allinmi. Chaymi, qosaykipa otaq warmikipa genion munasqaykipaq hina mana kaptinqa chaninchanaykim allin kayninta (Ecl. 9:9).

17, 18. Sasachakuykuna intuwaptinchikqa, ¿imaynatataq atipachwan?

¹⁷ Vidanchikpi imapas kaqkunam casado vidata sasachanman otaq kaykunapim kallpanchakunanchik, wawakuna uywaypi, familiapi mayqenninkupas onqoruptin, tayta-mamanku yuyaqyaruptin atiendeypi, wawa-churikuna karu llaqtaman pasakuptinku, congregacionpi ruraykunapipas.

¹⁸ ¿Imatataq rurawaq casado vidaykipi sasachakuykuna intusuptikiqa? (Pro. 24:10.) ¡Amayá llakikuychu! Satanasqa kusikunmi Diosmanta runakunata karunchaspa, ¡maynataraqchá kusikunqa casadokuna Dios servisqankuta saqeptinkuqa! Chaymi kallpanchakunayki casado vidaykipi mana tipikuq kimsa pata qaytu hina kanaykipaq. Jehová Diosta serviqkuna casado vidankupi ima sasachakuykunatapas atipasqankumantam Bibliapiqa tarinchik. Davidmi sonqonmanta Diosta kaynata mañakurqa: ‘Diosnilláy, ñoqallaytayá llakipayariykullaway. Runakunam [. . .] tukuy punchaw ñakarichiwachkan’, nispa (Sal. 56:1). ¿Sientikurqankichu David hina haykallapipas? Casado vidaykipi kaynataña sientikuspaykipas tariwaqmi kallpata David hina sasachakuynikita atipanaykipaq. Paymi nirqa: “[Jehová] Diosta maskaptiymi uyariwan ñoqallayta. Payqa libraykullawanmi tukuy manchakusqaymanta”, nispa (Sal. 34:4).

Diospa bendicionninkuna

19. ¿Imaynatataq atipachwan Diablopa imaymana toqllankunata?

¹⁹ Kay sasachakuy tiempopiqa warmi-qarim yanapanakuspa kallpanchanakunanku (1 Tes. 5:11). Satanasqa piensan Diosmanta imatapas chaskisqanchikraykulla servisqanchiktam. Satanasqa Diosmanta karunchakunanchikpaqmi imatañapas servichikun chaypaqmi casado vidanchikpipas sasachawanchik. Jehová Diospi confiakuspaqa atipasunmi Diablopa imaymana toqllankunatapas (Pro. 3:5, 6). Chaymi apostol Pablo qellqarqa: “Tukuy imataqa rurani [“Dios”, NM] kallpanchawaptillanmi”, nispa (Fili. 4:13).

20. ¿Imaynataq kawsanku casado vidankupi Jehová Diosta respetaqkunaqa?

 ²⁰ Warmi-qari casado vidankupi Diosta respetaspanqa achka bendicionkunatam chaskinqaku. Pichqa chunka hukniyoq wataña casarasqa Joel sutiyoq iñiqmasinchikmi nin: “Anchatam Jehová Diosta agradecekuni warmiywan hawka kawsakusqaykumanta, payqa vida pasaqmasiymi”, nispa. ¿Imaynatataq chaynata kawsakunku? Joelmi nin: “Kuyakuywan hinaspa pacienciawanmi respetanakuspa kawsakuniku”, nispa. Sasachakuy tiempopim kawsanchik chaymi casado vidanchikpiqa sasachakunchikpuni. Ichaqa atichwanmi casado vidanchikpi Jehová Dios respetayta hinaspa kamachikuyninkunatapas kasukuyta. Chayna kaptinqa casado vidanchikqa ‘kimsa pata qaytu’ hinam mana chaylla tipikuq kanqa (Ecl. 4:12).

¿Yuyachkankichu?

• ¿Imaninantaq casado vidapi Diosta respetayqa?

• Casarasqakuna sasachakuyninku kaptinqa, ¿imatataq ruranmanku?

• ¿Imaynatataq yachachwan casado vidanchikpi Diosta respetasqanchikta?

[Kay yachachikuypa tapukuyninkuna]

[20 kaq paginapi dibujo]

Warmi-qari kuskanku Jehová Diosta mañakusqankuqa yanapanmi sasachakuykunata atipanankupaq