¿Imatam rurawaq wiñay kawsayta chaskinaykipaq?
¿Imatam rurawaq wiñay kawsayta chaskinaykipaq?
“Runaqa ¿haykatataq paganman vidanta salvananpaq?” (MAT. 16:26.)
1. ¿Imanasqataq Jesusqa mana kasurqachu Pedropa nisqanta?
APOSTOL Pedroqa manam creeyta atirqachu. Kuyasqan Yachachiqnin Jesucristom ‘mana imatapas pakaspan’ willarqaña ñakarispan wañunanmanta. Pedrom ichaqa allinninpaq munaspan kaynata nirqa: “Diospas amayá munachunchu chaykuna pasasunaykitaqa”, nispa. Chaymi Jesusqa Pedrota qepanchaspan qatiqninkunata qawarirqa, paykunapas yaqapaschá Pedro hina piensachkarqaku. Hinaspam Pedrota nirqa: ‘¡Satanas, asuy ñawpaqniymanta! Piensasqaykiqa manam Diospa piensasqan hinachu aswanqa runakunallapam’, nispa (Mar. 8:32, 33; Mat. 16:21-23).
2. ¿Imatam Jesus munan qatiqninkuna ruranankuta?
2 Imanasqa chayna nisqanmanta Pedro entiendenanpaqqa, yaqapaschá Jesuspa qatiqninpi nisqan yanaparqa. Jesusmi “discipulonkunatawan runakunata qayaykuspan” nirqa: “Pipas qatiwayta munaspaqa amaña kikillanpaq kawsaspayá ñakaristinpas qatiwachun. Pipas vidallan cuidakuqqa wiñaypaqmi pierderunqa. Pipas ñoqarayku otaq Diosmanta allin noticiarayku wañuspanqa wiñaypaqmi salvakunqa”, nispa (Mar. 8:34, 35). Jesucristoqa vidanta qonanpaqña kasqanraykum, payqa munarqa qatiqninkunapas Diosta servinankupaq vidanku qonankuta. Chaynata ruraspankum chaskinmanku karqa hatun bendicionkunata (leey Mateo 16:27).
3. a) ¿Ima tapuykunatam Jesusqa rurarqa? b) Iskay kaq tapuyta Jesus ruraptin, ¿imatam ichapas uyariqninkunaqa yuyarinmanku karqa?
3 Jesusmi hina chay kutillapi iskay allin tapuykunata rurarqa: “Runaqa ¿imatataq horqokunman lliw kay pachapi kaqkunata ganaruspan vidantañataq pierderuspaqa? Runaqa ¿haykatataq paganman vidanta salvananpaq?”, nispa (Mar. 8:36, 37). Jesuspa qallariyninpi tapusqanmantaqa yaqapaschá hukkunaqa kaynata ninmanku: imatapas tarinapaq kallpanchakuchkaspa wañuyqa yanqapaqmi kanman, imapas kapuwaqninchikkunaqa kawsaptillanchikmi serviwanchik nispa. Qatiqninpi Jesuspa iskay kaq tapusqanpiñataq nirqa: “Runaqa ¿haykatataq paganman vidanta salvananpaq?” nispa, chayta uyariqkunañataq ichapas yuyarirqaku Jobpa tiemponpi Satanaspa kayna nisqanta: “Vidanraykum runaqa; tukuy ima kapuqnintapas qonman” (Job 2:4). Jehová Diosta mana yupaychaq achka runakunam Satanaspa nisqanman hina piensanmanku, paykunaqa imatapas ruranmankum Diospa kamachikuyninta mana kasukuspapas hinalla kawsanankupaq. Ichaqa manam chaynatachu cristianokunaqa piensanchik.
4. ¿Imanasqataq cristianokunapaqqa ancha allin Jesucristopa tapusqankuna?
4 Jesusqa kay Pachamanqa hamurqa manam hampiwananchikpaqchu, qollqeta qowananchikpaqchu, nitaq kunan tiempopi unay kawsakuyta qowananchikpaqchu. Payqa hamurqa mosoq pachapi wiñay kawsayta haypanapaqmi, kayqa imamantapas ancha valorniyoqmi (Juan 3:16). Chaynaqa, Jesuspa punta tapusqanta leeq cristianoqa yaqapaschá kaynata entienden: “¿Imapaqtaq kanman lliw kay pachapi kaqkunata ganaruspa, wiñaypaq kawsakuy suyakuyninta chinkarachiptinqa?”. Arí, yanqapaqmá kanman (1 Juan 2:15-17). Jesuspa iskay kaq tapusqanmantaqa kaynatam tapukuchwan: “¿Imakunatam rurayman mosoq pachapi wiñay kawsayta haypanaypaq?”, nispa. Kaytaqa qawachisunmi imayna kawsasqanchikwan hinaspa suyakuyninchik imayna kasqanwanpas (tupachiy Juan 12:25 nisqanwan).
5. ¿Imatam rurananchik wiñay kawsayta chaskinapaq?
5 Chaywanpas, Jesusqa manamá kaywanqa nirqachu wiñay kawsayta kikillanchikpa kallpanchikwan haypanamantaqa. Yachananchikmi kunan tiempopi pisi tiempolla kawsasqanchikpas Diospa regalon kasqanta. Manam pipas rantinmanchu wiñaypaq kawsaytaqa nitaq rurasqanwanqa tarinmanchu. Wiñaypaq kawsaytaqa tarisun Jesucristopi hinaspa Jehová Diospi iñispallam, Diosqa ‘maskaqninkunataqa favorecenmi’ (Gal. 2:16; Heb. 11:6). Iñisqanchiktaqa rurasqanchikwanmi qawachinanchik, ‘iñisqanchikqa manam valenmanchu allinkunata mana ruraptinchikqa’ (Sant. 2:26). Hinaptinqa Jesuspa tapusqankunapi yuyaymanaspaqa, piensarisun Diosta serviyninchikpi imakuna rurananchikmanta, chaynapi iñiyninchik hinalla kasqanta qawachinapaq.
‘Manam Cristopas kikillantaqa agradakurqachu’
6. ¿Ima ruraytaq Jesuspa vidanpiqa ancha allin karqa?
6 Jesusqa kay pachapi kaqkunawan engañachikunanmantaqa, Diospa munasqallantam rurarqa hinaspa manataqmi munarqachu kay pachapi tukuy imayoq kaytapas. Aswanmi anchata kallpanchakurqa, hinaspa tukuy tiempopim Diosta kasukurqa. Kikinpa munasqallanta rurananmantaqa Diospa munasqantam haykapipas rurarqa (Juan 8:29). ¿Imakunatawanmi Jesus rurarqa Taytanta kusichinanpaq?
7, 8. a) ¿Imatam Jesus rurarqa runakunarayku, hinaspa ima bendiciontam chaskirqa? b) ¿Ima tapukuytam rurakunanchik?
7 Qatiqninkunatam Jesus kaynata nirqa: “Diosmanta Hamuq Runapas manam servichikunaypaqchu hamurqani aswanqa servinaypaqmi hinaspa achka runakunapa rantinpi wañunaypaqmi”, nispa (Mat. 20:28). Yachamusqanchikman hina, Jesus wañukunanmanta qatiqninkunaman willaptinmi, apostol Pedroqa nirqa llakipayakunanmanta. Jesusmi ichaqa chayna nisqantaqa mana kasurqachu. Payqa vidantam qoyta munarqa runakunarayku. Kayna rurasqanqa manam yanqapaqchu karqa: Jehová Diosmi kawsarichirqa hinaspam hatuncharqa alleq lawninman churaykuspan (Hech. 2:32, 33). ¡Mayna allin ejemplom Jesusqa llapallanchikpaq!
8 Apostol Pablom Roma nacionpi cristianokunata yuyarichirqa ‘Cristopas kikillanta [mana] agradakusqanmanta’ hinaspam nirqa rurasqanta qatipakunankupaq (Rom. 15:1-3). ¿Ñoqanchikpas munachwanchu apostol Pablopa nisqanta kasukuyta hinaspa Jesus hina imakunatapas saqeyta?
Jehová Diosqa munanmi allinnin kaqta qonanchikta
9. ¿Imatam cristianoqa cheqaptapuni ruran Diosman qokuspanqa?
9 Israelitakunaman qosqan Leypim, huk kamachikuy karqa hebreo kaq sirvientekuna qanchis wata servisqankupi otaq Jubileo sutiyoq wata chayaramuptin libre kanankupaq. Ichaqa patronninta kuyasqanrayku hinaspa servisqanwan kusisqa kaspanqa manam lloqsinmankuchu karqa, aswanmi wañunankama qepakunmanku karqa (leey Deuteronomio 15:12, 16, 17). Chaymanmi rikchakun Diosman qokuyninchikpas. Ñoqanchikpas munasqallanchikta ruranamantaqa, Diospa munasqanta ruranapaqmi tantearunchik. Chaynatam qawachinchik Jehová Diosta ancha kuyasqanchikta hinaspa wiñaypaq serviy munasqanchiktapas.
10. ¿Imanasqataq ninchik Jehová Dios dueñonchik kasqanta, hinaspa kaymanta yachasqanchik imaynatam yanapawananchik piensasqanchikpi hinaspa kawsayninchikpipas?
10 Sichu qam Jehová Diospa testigonkunawan Bibliata estudianki, chaynataq predicankiña hinaspa huñunakuyninkumanpas richkankiña, hinaptinqa allinmi chayna rurasqaykiqa. Munanikum Jehová Diosman qokunaykita hinaspa Etiopia nacionniyoq runa hina kayna ninaykita: ‘¿Imaraqtaq faltawan bautizakunaypaq?’, nispa (Hech. 8:35, 36). Chaynata ruraptikiqa, apostol Pablopa qellqasqan cristianokunapa hinam Dioswan amistadniki kayna kanqa: “Qamkunaqa manam kikikichikpañachu kankichik. Diosmi rantiwarqanchik preciowan”, nispa (1 Cor. 6:19, 20). Jehová Diosman qokuptinchikqa paymi dueñonchikpi rikurirun, suyakuyninchik hanaq pachapi otaq kay pachapi kaptinpas. Chaymi kikillanchikpaq munasqanchikkunataqa qepanchananchik hinaspa ‘runapa sirvientenqa kananchikchu’ (1 Cor. 7:23). Arí, mayna kusikunapaqmi Jehová Diosta tukuy sonqowan serviyqa hinaspa paywan yanapachikuypas.
11. ¿Imatam cristianokunaqa sacrificiota hina Diosman qonanchik? Kaytaqa rimarimuy ñawpaq tiempopi sacrificiota imayna qosqankuman hina.
11 Apostol Pablom iñiqmasinkunata kaynata nirqa: “Cuerpoykichiktaqa Diosmanyá qoychik kawsachkaq ofrendata hina hinaspayá payllapaqña kawsaychik agradowan chaskisunaykichikpaq”, nispa (Rom. 12:1). Kay palabrakunaqa yaqapaschá judio cristianokunataqa piensarichirqa, manaraq cristiano kachkaspanku Diosta yupaychaspa ofrenda qosqankumanta. Paykunaqa yacharqakum Leypa nisqanman hina altarpi kañanankupaq animalkunaqa allinnin kananmanta. Mana allinninkunata qoptinkuqa manam allinchu kanman karqa (Mal. 1:8, 13). Chaynallataqmi cuerponchikta “kawsachkaq ofrendata hina” Diosman qoptinchikpas. Jehová Diosmanqa allin kaqtam qonanchik, manam munasqanchikta ruraruspa puchuqllantañachu. Diosman qokuspanchikqa, paymanmi qorqanchik tukuy vidanchikta, kallpanchikta, kapuqninchikta hinaspa ima ruray atisqanchiktapas (Col. 3:23). Chaynaqa, ¿imaynatam cristianokunaqa chayta ruranchik?
Yachaywan tiemponchikta servichikusun
12, 13. ¿Imaynatam Jehová Diosman allinnin kaqta qochwan?
12 Jehová Diosmanmi allinnin kaqta qosunchik, tiemponchikta yachaywan servichikuspa (leey Efesios 5:15, 16). Chaypaqqa allintam tiemponchikta controlananchik. Kay pachapi mana allin ruraq runakuna hinaspa pantaq kasqanchikmi tanqawanchik kusirikuykunallapi piensanapaq otaq kikillanchikpaq imatapas ruranapaq. Arí “kay pachapiqa tukuy imam tiempoyoqlla”, kanmi tiempo samanapaq chaynataq llamkanapaqpas, kaymi yanapawanchik mantienekunapaq hinaspa Bibliapa niwasqanchikkunata cumplinapaqpas (Ecl. 3:1). Chaymi cristianokunaqa tiemponchikta yachaywan hinaspa allinta controlaspa servichikunanchik.
13 Atenas llaqtaman apostol Pablo watukuspanmi qawarqa, chaypi ‘llaqtayoq runakuna chaynataq chaypi kaq forastero runakunapas mosoq yachaykunata uyarispanku rimayllapi ocupakusqankuta’ (Hech. 17:21). Kunanpas runakunaqa chaynam tiemponkuta usuchinku, televisionta qawaspa, televisionpi kaq pukllaykunapi, Internetpi hinaspa hukkunapipas. Sapa kutim kusirikunapaq kaqkunaqa rikurimuchkan, kaykunam tiemponchikta suwawanchikman. Mana cuidakuspaqa, Diosta hinalla servinapaq imakuna rurananchiktam saqeruchwan. Chaynataq piensayta qallaykuchwan Diosta servinapaq mana tiempoyoq kasqanchikta, imamantapas ancha “allin” rurayqa Diosta serviymi (Fili. 1:9, 10).
14. ¿Ima allin tapukuykunatam rurakunanchik?
14 Jehová Diosta serviqkunaqa kaynatam tapukunanku: “¿Tiempochakunichu Bibliata sapa punchaw leenaypaq, yuyaymananaypaq hinaspa orakunaypaqpas?” (Sal. 77:12; 119:97; 1 Tes. 5:17). “¿Preparakunichu huñunakuykunapaq hinaspa rimasqaywan kallpanchanichu huñunakuypi kaqkunata?”, nispa (Sal. 122:1; Heb. 2:12). Bibliam nin apostol Pablowan Bernabey ‘unayta quedakuspanku [. . .] mana manchakuspa Diospa kuyakuyninmanta willakusqankuta’ (Hech. 14:3). ¿Qampas atiwaqchu astawan predicayta, ichapas precursor kaspa? (Leey Hebreos 13:15.)
15. ¿Imaynatam ancianokuna tiemponkuta yachaywan servichikunku?
15 Apostol Pablom Bernabeywan Antioquia lawpi congregacionta watukuspanku, “iñiqkunawan unay tiempo yacharqaku” paykunata kallpanchanankupaq (Hech. 14:28). Chaynallataqmi ancianokunapas tiempochakunku iñiqmasinkuta kallpanchanankupaq. Predicaqpas lloqsinkum, chaymantapas kallpanchakunkum iñiqmasinkunata kuyakuywan yanapanankupaq, iñiyninkupi chiriaruqkunata maskanankupaq, onqoqkunata yanapanankupaq hinaspa congregacionpi ima rurayninkunatapas atiendenankupaq. Bautizasqa kaspaykiqa kaynata tapukuy: “Atinaypaq hina kaptinqa, ¿atiymanchu congregacionpi ima llamkaykuna chaskiytapas? ¿Imatam rurachkani chayta haypanaypaq?”, nispa.
16. ¿Imakunata ruraspam iñiqmasinchikkunata “yanapasun”?
16 Achka iñiqmasinchikkunam yanapanakunku desgraciakuna kaptin otaq runakuna sasachakuykunata rikurichiptin. Ejemplopaq, Betel wasipim kan huk paninchik 60 masnin watayoq, paymi vacacionninta achka kutikunapi servichikun karu sitiokunaman rispa hukkunata yanapananpaq. ¿Imataq yanaparqa chayta rurananpaq? Paymi nin: “Manam tukuy ima ruraqchu kani, ichaqa anchatam kusikurqani ima niwasqankuta ruraspay. Anchatam kallpanchawarqa tukuy imankuna chinkaruptinpas iñiqmasiykunapa iñiyninku qaqa hina kasqanqa”, nispa. Chaymantapas enteron pachapim kan Gal. 6:10).
yanapakuq wawqe-paninchikkuna, paykunam Salonkunata hinaspa Asambleakuna apakunanpaq wasikunata ruraypi yanapakunku. Sonqonchikmanta chaynata ruraspam, “aswan llapanmanta llalliriqtaqa iñiqmasinchikkunata” yanapachkanchik (“Sapa punchawmi ñoqaqa qamkunawan kasaq”
17. ¿Imatam rurawaq wiñay kawsayta chaskinaykipaq?
17 Diosmanta karunchasqa runakunaqa ñam puchukachisqaña kanqa. Haykapi chay pasakunanta mana yachaspapas, yachanchikmi ‘manaña tiempo kasqanta’ hinaspa ‘kay pachapi qawasqanchikkunapas tukurunanta’ (leey 1 Corintios 7:29-31). Chaymi ñoqanchikpaqqa ancha allin Jesuspa kayna tapusqanqa: “Runaqa ¿haykatataq paganman vidanta salvananpaq?”. Arí, Jehová Diospa tukuy ima niwasqanchik kasukuytaqa munanchikmi, chaynapi ‘wiñay kawsayta haypanapaq’ (1 Tim. 6:19). Chaypaqqa ancha allinmi Jesusta hinalla qatinapaq, chaynataq Diospa Munaychakuyninta puntata maskanapaq Jesucristopa kamachisqanta kasukuyqa (Mat. 6:31-33; 24:13).
18. ¿Imamantam seguro kananchik, hinaspa imanasqa?
18 Ichaqa manamá facilchu Jesusta qatikuyqa. Wakinkuqa Jesuspa nisqanman hinam, qatisqankurayku wañuchisqa karqaku. Chayna kaptinpas, Jesustam qatipakunchik hinaspa manam kikillanchiktaqa llakipayakunchikchu. Aswanmi tukuy sonqonchikmanta confianchik, hanaq pachaman riq qatiqninkunata Jesuspa kayna nisqanpi: “Sapa punchawmi ñoqaqa qamkunawan kasaq kay pacha puchukanankama” (Mat. 28:20). Chaynaqa atisqanchikman hinayá tiemponchikta hinaspa ima ruray yachasqanchiktapas servichikusun Diosta servinapaq. Chaynatam qawachisun hatu-hatun ñakariy kaptin Jehová Diospa waqaychayninpi confiasqanchikta, otaq wañukuptinchik mosoq pachapi kawsarimunapaq confiasqanchiktapas (Heb. 6:10). Chaynatamá qawachisun vidanchikta ancha chaninchasqanchikta.
¿Yuyachkankichu?
• ¿Imaynatam Diosta hinaspa runakunata serviy munasqanta Jesusqa qawachirqa?
• ¿Imanasqataq kikillanchikpaqqa mana kawsanachu, hinaspa imata ruraspam chayta qawachinchik?
• Israelitakunapa sacrificio qosqankuta Jehová Dios chaskinanpaqqa, ¿imaynam kanan karqa, hinaspa imatam chaymanta yachanchik?
• ¿Imakunata ruraspam tiemponchikta allinta servichikunchikman?
[Kay yachachikuypa tapukuyninkuna]
[26 kaq paginapi dibujo]
Jesusqa Taytanpa munasqantam haykapipas rurarqa
[28 kaq paginapi dibujo]
Tukuy sonqomanta kasukuq israelitakunaqa allinnin kaqtam qorqaku
[29 kaq paginapi dibujokuna]
Jehová Diosqa munanmi tiemponchikta allinta servichikunapaq