Jehová Diosqa qawawanchik waqaychawananchikpaqmi

“[Jehová] Diosqa qawamuchkanmi llapallan kay pachapi pasaqkunata chaynapi paypa qayllanpi allin sonqoyoqkunaman atiyninta qawachinanpaq.” (2 CRO. 16:9.)

1. ¿Imanasqataq Jehová Diosqa imayna kasqanchikta qawawanchik?

JEHOVÁ DIOSQA mana pantaq Taytanchikmi. Payqa yachanmi ‘ima munasqanchikta chaynataq tanteasqanchiktapas’ (1 Cro. 28:9). Chaymi qawamuwanchik, ichaqa manam pantasqallanchikta yachananpaqchu (Sal. 11:4; 130:3). Aswanmi kaytaqa ruran kuyawaspanchik hinaspa paywan amistadninchikta waqaychananpaq otaq wiñay kawsayta haypanapaq mana imawanpas harkachikunanchikta munaspan (Sal. 25:8-10, 12, 13).

2. ¿Pikunata yanapananpaqmi Jehová Diosqa atiyninta servichikun?

² Jehová Diosqa tukuy atiyniyoqmi hinaspa imatapas rikunmi, chayraykum tukuy sonqomanta kasukuqkunapa mañakusqankuta uyarin hinaspa kallpanchantaq sasachakuyninkunapipas. Kaynatam 2 Cronicas 16:9 nin: “Tayta Diosqa qawamuchkanmi llapallan kay pachapi pasaqkunata chaynapi paypa qayllanpi allin sonqoyoqkunaman atiyninta qawachinanpaq”, nispa. Jehová Diosqa atiynintam servichikun tukuy sonqonkuwan serviqninkunata yanapananpaq, ichaqa llullakuqkunapaq hinaspa iskay uyakunapaqqa manam chaynachu (Jos. 7:1, 20, 21, 25; Pro. 1:23-33).

Dioswan purisun

3, 4. ¿Ima ninanmi Dioswan puriyqa, hinaspa Bibliapi ima ejemplokunam qawachiwanchik chayna kasqanta?

³ Achka runakunam mana creenkuchu Dioswan runakuna purinantaqa, ichaqa chay rurananchiktam payqa munan. Ñawpaq tiempopim Enoc hinaspa Noeypas Dioswan purirqaku (Gen. 5:24; 6:9). Moisesqa ‘mana rikuna Diosta qawachkanmanpas hinam kallpanchakurqa’ (Heb. 11:27). Rey Davidpas humillakuspanmi Dioswan purirqa, chaymi kaynata nirqa: “Siemprem yuyallasaq Diosniytaqa. Alleq lawnillaypim kachkan payqa. Manam urmasaqchu ñoqallayqa”, nispa (Sal. 16:8).

⁴ Cheqaptamá, Jehová Dioswanqa manam puriytaqa atinchikmanchu makinmanta hapipakuykuspaqa. Hinaptinqa, ¿imaynatam paywan puriyta atichwan? Salmos libropim Asaf kaynata qellqarqa: “Ichaqa chaywanpas ñoqawanraqmi kachkanki. Ichaqa chaywanpas alleq makiymantam hapiwachkanki. Allinta consejawaspaykim qamqa pusawachkanki”, nispa (Sal. 73:23, 24). Huk rimaypiqa Jehová Dioswanmi purinchik paypa consejonkunata kasukuspa, chaytam tarinchik Bibliapi hinaspa ‘allin yuyayniyoq confianza sirvientepa’ qowasqanchikpipas (Mat. 24:45; 2 Tim. 3:16).

5. ¿Imapaqmi Jehová Diosqa qawamun kasukuq serviqninkunata? ¿Imaynatam Jehová Diosta qawananchik?

⁵ Taytanchik Jehová Diosqa paywan puriqkunata kuyasqanraykum: waqaychananpaq hinaspa yachachinanpaqpas qawamun. Paymi nin: “Ñoqam entiendechisqayki qamtaqariki. Ñoqam yachachillasqayki kawsakuytaqa. Ñoqam qawariykullaspay consejasqayki”, nispa (Sal. 32:8). Hinaptinqa kaynata tapukusunchik: “¿Purichkanichu Jehová Dioswan makinmanta hapipakuspa hina? ¿Kasukunichu nisqankunata hinaspa yuyarinichu imayna kasqayta qawamusqanta? Qawamusqanmanta yachasqay, ¿yanapawanchu imayna piensasqaypi, rimasqaypi hinaspa rurasqaykunapipas? Huchallikuruspay, ¿Jehová Diosta karupi tarikuqta chaynataq mana yanapakuqta hinatachu qawani, icha churin wanakuptin kuyakuywan chaskiykuq Taytata hinatachu?” (Sal. 51:17).

6. ¿Imakunatam astawan Jehová Diosqa yachan tayta-mamakunapa yachasqankumantaqa?

⁶ Jehová Diosqa yanapawanchikmanmi manaraq  pantachkaptinchikpas. Ejemplopaq, ichapas payqa qawanman engañakuq sonqonchikpa mana allin munaykuna qallaykusqanta (Jer. 17:9). Chayna kaptinqa, tayta-mamanchikmantapas aswan utqaymanmi yanapawanchikman, payqa runakunapa sonqonpi imayna kasqantawan imayna piensasqantam qawachkan (Sal. 11:4; 139:4; Jer. 17:10). Qawasunchik imaynatam Baructa yanaparqa, payqa Jeremiaspa yanapaqnin hinaspa amigonmi karqa.

Barucpaqqa cheqap taytan hinam karqa

7, 8. a) ¿Pitaq karqa Baruc, hinaspa imakuna munaytam qallaykurqa? b) ¿Imaynatam kuyakuq tayta hina Jehová Diosqa Barucpi interesakurqa?

⁷ Barucqa Jeremiaspa nisqankunata qellqaqmi karqa, yanaparqataqmi Juda lawpi kaqkunaman Diospa piñakuyninmanta willaypipas (Jer. 1:18, 19). Ichaqa tiempopa risqanman hinam kikinpaq “admirakuypaq kaqkunata” maskayta qallaykurqa. Payqa yaqapaschá reqsisqa ayllumanta karqa, chaymi qallaykurqa kikinpaq imakunatapas munayta otaq apu kayta. Imayna kaptinpas, Jehová Diosmi qawarqa mana allinkuna munasqanta, chaymi yanapananpaq utqayllaman tantearurqa. Jeremiasta servichikuspanmi kaynata nirqa: “Qanmi nichkanki: ¡Ay imañataq kay ñoqapa suerteyqa [“vidayqa”, NM]! Nanayniymanmi llakikuytaraq Tayta Dios yapaykuwan. Mana pipapas consuelasqan waqaytam amiruniña nispa”. Hinaptinmi Jehová Dios nirqa: “¿Kikikipaqchum maskachkanki admirakuypaq kaqkunata? Chaykunataqa amañayá maskaychu”, nispa (Jer. 45:1-5).

⁸ Baructa Jehová Dios imam kaqta nispanpas, manam paywanqa piñakurqachu aswanqa kuyakuq tayta hinam interesakurqa. Yacharqataqmi imakunata munaq kaptinpas allin sonqoyoq kasqanta. Chaymantapas yacharqam Jerusalenwan Juda llaqtakunapa puchukaynin hichpallapiña kasqanta, chaymi mana munarqachu chay sasa tiempopi urmananta. Chaymi cuentata qokunanpaq yuyarichirqa ‘llapallan runakunaman desgracia kachamunanmanta’, nirqataqmi allinta ruraptin hinalla kawsananmantapas (Jer. 45:5). Huk rimaypiqa kaynatam nirqa: “Cuentatayá qokuy Baruc. Yuyariyá, ñam Juda llaqtata hinaspa Jerusalen llaqtatapas puchukachisaqña. Ñoqatayá kasuway hinaspam hinalla kawsanki. Ñoqam waqaychasqayki”, nispa. Kayna nisqanqa sonqonmanchá chayarurqa, chaymi imayna piensasqanta cambiarurqa chaynapim Jerusalen puchukachisqa kaptin payqa mana wañurqachu, chayqa pasakurqa 17 watakuna pasaruptinmi.

9. ¿Imaynatam kay parrafopa tapukuyninkunata kutichiwaq?

⁹ Kay yachasqanchikpi yuyaymanasun qatiqnin tapuykunata hinaspa textokunata servichikuspa. Baructa Jehová Dios imayna yanapasqanmanta  piensaspa, ¿imatam Diosmanta yachanchik hinaspa serviqninkunawan imayna kasqanmantapas? (Leey Hebreos 12:9.) Sasa tiempokunapi kawsasqanchikrayku, ¿imatam yachanchik Barucman consejo qosqanmanta hinaspa imayna kasukusqanmantapas? Jeremiasta qatipakuspa, ¿imaynatam ancianokunapas iñiqmasinkupi Jehová Dios hina interesakunmanku? (Leey Galatas 6:1.)

Taytanpa kuyakuq kasqantam Churinpas qatipakurqa

10. ¿Imataq Jesucristota yanapan congregacionpi Uma kasqanwan allinta cumplinanpaq?

¹⁰ Kay Pachaman Jesus manaraq hamuchkaptinmi, Jehová Diosqa profetankunawan hinaspa tukuy sonqomanta serviqninkunawan llaqtan kuyasqanta qawachirqa. Kunanñataqmi chayta ruran Jesucristowan, paymi congregacionpa Uman (Efe. 1:22, 23). Chaymi Apocalipsis libropi Jesusta tupachin ‘qanchis ñawiyoq’ carnerowan, “chay ñawinkunaqa tukuy kay pachaman kachasqa Diospa qanchis espiritunkunam” (Apo. 5:6). Kaywanqa niwachkanchikmi Diospa espiritun Jesuspi astawan kasqanta hinaspa mana pantaspa imatapas tanteay atisqanta. Taytan hinam allintapuni yachan sonqonchikpi ima kasqanta.

11. ¿Ima hinataq congregacionpaq señorninchik Jesucristo, hinaspa imaynatam qawachin Taytan hina kasqanta?

¹¹ Señorninchik Jesucristoqa, Jehová Dios hinam kuyakuywan qawawanchik, ichaqa manam wateqaq hinachu. Payqa sutichasqataqmi “Wiña-wiñaypaq Taytawan”, kaymi yuyarichiwanchik paypi iñiq runakunaman wiñay kawsayta qospan imakuna rurananmanta (Isa. 9:6). Chaynataqmi, congregacionpa Uman kasqanrayku iñiqmasinchikkunata kallpanchan hinaspa consuelanpas, kaytaqa ruranmanmi experienciayoq cristianokunawan chaynataq ancianokunawanpas (1 Tes. 5:14; 2 Tim. 4:1, 2).

12. a) ¿Imatam Jesusmanta qawachin Asia Menor lawpi kaq 7 congregacionkunaman cartakuna qellqasqan? b) ¿Imaynatam congregacionpi ancianokuna qawachinku Jesucristopa imayna kasqanta?

¹² Jesucristopa ancha kuyawasqanchikmi qawakun, Asia Menor lawpi qanchis congregacionkunaman carta apachisqanpi (Apo. 2:1–3:22). Chay qellqasqankunapim qawachirqa sapa congregacionkunapi imakuna pasasqanmanta yachasqanta hinaspa qatiqninkunapi ancha interesakusqantapas. Kayqa astawanmi qawakun kunan tiempopi, Apocalipsis libropa chay nisqankuna ‘Señorpa punchawninpi’ cumplikusqanrayku (Apo. 1:10). * Señorninchik Jesucristoqa sapa kutim kuyakuyninta qawachiwanchik congregacionpi ancianokunawan. Paymi ancianokunata kallpanchan congregacionpi necesitaqkunata consuelananpaq hinaspa consejota qonanpaqpas (Efe. 4:8; Hech. 20:28; leey Isaias 32:1, 2). ¿Qawanchikchu ancianokuna  yanapawaptinchik sapakamata Jesucristo kuyawasqanchikta?

Necesitasqanchik tiempopim yanapawanchik

13-15. ¿Imaynakunatam Jehová Diosqa contestawanchikman mañakusqanchikta? Rimarimuy ejemplokunawan.

¹³ Wakinpiqa Jehová Diostam mañakunchik yanapawananchikpaq hinaspam chayta chaskinchik congregacionpi anciano watukuwaptinchik (Sant. 5:14-16). Wakinpiñataq chay yanapakuytaqa chaskinchik huñunakuypi discursota uyarispanchik otaq mayqen qellqanchikkunapipas. Kaynatam Jehová Diosqa qawachiwanchik mañakusqanchik uyarisqanta. Ejemplopaq qawasunchik. Huk cristianam asuykurqa huñunakuypi discurso qoq ancianoman, paytam chay semanakunallapi mana allinta rurarurqaku. Sasachakuyninmanta rimananmantaqa, Bibliapa nisqanman hina yachachisqanmantam agradecekurqa hinaspa ancha kallpanchasqa tarikusqanmantapas. ¡Ancha kusisqam tarikurqa huñunakuyman risqanmanta!

¹⁴ Qawasunchik huk ejemplotawan Diosta mañakuy imayna yanapakusqanmanta. Kimsa qarikunam carcelpi tarikurqaku, chaypim Diosmanta yacharurqaku hinaspam manaraq bautizasqa kaspankupas predicaqña karqaku. Carcelpi presokuna mana allinta rurarusqankuraykum, chaypi kamachiqkuna manaña qorqakuchu presokunapa allinninpaq kaqkunata. Chaymi presokunaqa tantearurqaku desayuno qosqanku platokunata paqarinnintinta mana qonankupaq. Hinaptinmi kimsanku allinta tanteananku karqa: wakin presokuna hina hatarispankuqa Romanos 13:1 Jehová Diospa kamachisqantachá mana kasukunmankuchu karqa, otaq presomasinkuna hina mana ruraptinkuqa paykunachá imatapas rurarunmanku karqa.

¹⁵ Kimsanku mana kuska kasqankuraykum mana rimanakurqakuchu, chaymi Diosman orakuspa yachayninta mañakurqaku. Paqarinnintintam yacharurqaku: desayunota mana chaskinankupaq kimsanku chaynalla tantearusqankumanta. Chaynapim platokunata apanankupaq guardiakuna hamuptinku, paykunaqa mana imatapas qonankuchu karqa. ‘Mañakuykunata uyariq’ Jehová Dios paykunapa hichpallanpi kasqanta yachasqankuwanmi anchata kusikurqaku (Sal. 65:2).

Hamuq tiempota qaway confianzawan

16. ¿Imaynatam predicasqanchik qawachin allin sonqoyoq runakunapi Jehová Dios interesakusqanta?

¹⁶ Predicasqanchikpas qawachinmi allin sonqoyoq runakuna maypiña kawsaptinkupas Jehová Diospa interesakusqanta (Gen. 18:25). Chaypaqqa angelninkunatam servichikun, chaynapi serviqninkunata yanapaptin allin runakunata tarinankupaq llaqtankupi manaraq predicasqa kaptinpas (Apo. 14:6, 7). Punta pachak watapipas huk angelmi kamachirqa Felipeta, Etiopia nacionpi kamachikuq runawan tupananpaq hinaspa Diospa Palabranmanta yachachinanpaq. ¿Imapim tukurqa? Kay kamachikuq runaqa, Felipepa willasqanta entienderuspanmi bautizakururqa (Juan 10:14; Hech. 8:26-39). *

17. ¿Imanasqataq mana llumpaytaqa llakikunanchikchu hamuq tiempomanta?

¹⁷ Kay pachapi mana allin ruraq runakunapa chinkachisqa kananku asuykamuptinqa, ‘ñakariykunaqa’ hinallam kanqa (Mat. 24:8). Yaqapaschá llamkay mana ancha tarikuptin achka tiempota llamkana kanqa; otaq mikuykunapa precion wicharinqa, mikuykuna mana ancha kaptin, precion mana hina kaqlla kaptin chaynataq llumpayta rupaptin otaq chiriptinpas. Imaña kaptinpas, Dios servisqanchikta puntapi churaspa hinaspa ‘ñawinchik allinta qawakuptinqa’, otaq Diosllata servinapaq piensaspaqa manam llakikunanchikchu. Yachanchikmi Diospa kuyawasqanchikta hinaspa waqaychawananchiktapas (Mat. 6:22-34). Chaypaqqa, allinmi kanman Jeremiasta Jehová Dios imayna cuidasqanmanta yuyariyqa, kaymi pasakurqa 607 watapi Babilonia nacion Jerusalenta manaraq purmachichkaptin.

18. Babilonia nacionniyoq runakuna Jerusalenta puchukachinanpaq muyuriruptinku, ¿imaynatam Jehová Dios qawachirqa Jeremias kuyasqanta?

 ¹⁸ Babilonia llaqtayoq runakuna Jerusalenta puchukachinankupaq muyuriruptinkum, Jeremiasqa preso karqa Guardiakunapa Pationpi. ¿Imaynatam mikuyta tarinman karqa? Mana presochasqa kaspanqa kikinmá maskanman karqa mikunanta, ichaqa presochasqa kasqanraykum presochaqninkuna yaqa llapanku cheqnichkaspankupas mikuyta qorqaku. Jeremiasqa Jehová Diospim confiarqa manam runakunapichu, Paymi prometerqa cuidananpaq. ¿Cumplirqachu Jehová Diosqa prometesqanta? Arí cumplirqam, paymi runakunawan ‘tantata sapa punchaw apachimuspan’ yanaparqa, kaytam rurarqa “llaqtapi tanta tukurunankama” (Jer. 37:21). Jeremiasqa; Baruc, Ebed-melec hinaspa tukuy sonqonkumanta serviqkuna hinam kawsarqa: muchuy, onqoy hinaspa wañuy tiempokuna kaptinpas (Jer. 38:2; 39:15-18).

19. ¿Imamantam seguro kananchik hamuq tiempopi piensaspaqa?

¹⁹ Arí, Jehová Diosqa ‘cuidachkanmi allin ruraq runakunataqa. Payqa uyarinmi mañakusqankutapas’ (1 Ped. 3:12). ¿Kusikunkichu Diosninchikpa sapa kuti qawapayasusqaykimanta? ¿Yaqachum seguro sientekunki waqaychasunaykipaq Jehová Dios qawamususqaykita yachaspayki? Chayna kaptinqa, amayá haykapipas saqeychu paywan puriytaqa hamuq tiempo imayna kaptinpas. Segurom kanayki, Jehová Diosqa kuyakuq tayta hinam qawamun tukuy sonqonmanta serviqninkunataqa (Sal. 32:8; leey Isaias 41:13).

[Willakuykuna]

¿Imatam niwaq?

• ¿Imaynatam qawachisun ‘Diospa agradonpaq kawsasqanchikta’?

• ¿Imaynatam Jehová Dios qawachirqa Baruc kuyasqanta?

• Congregacionpa Uman kaspa, ¿imaynatam Jesucristo qawachin Taytanpa sumaq kayninkunata?

• ¿Imakunata ruraspam kay sasa tiempokunapi qawachinchik Jehová Diospi confiasqanchikta?

[Kay yachachikuypa tapukuyninkuna]

[13 kaq paginapi dibujokuna]

Jehová Diosqa Jeremiaswanmi waqaycharqa Baructa; kunanñataqmi ancianokunawan waqaychan serviqninkunata

[14 kaq paginapi dibujo]

¿Imaynatam Jehová Diosqa yanapawanchikman astawan necesitasqanchikpi?