Congregacionman utqaylla kutimunankupaq yanapay

“¿Pimantaq riymanku? Qampa rimasqaykiqa wiñay kawsay qokuqmi.” (JUAN 6:68.)

1. ¿Imatam Pedro nirqa Jesuspa qatiqninkunamanta achka saqeruptinku?

HUK kutipim, Jesuspa qatiqninkuna huknin yachachisqanta mana chaskiyta munaspanku achka saqerurqaku. Chaymi Jesusqa apostolninkunata nirqa: “¿Qamkunapas pasakuytachu munankichik?”, nispa. Hinaptinmi Pedroñataq nirqa: “Señor ¿pimantaq riymanku? Qampa rimasqaykiqa wiñay kawsay qokuqmi”,  nispa (Juan 6:51-69). Arí, manam pimanpas rinankupaqqa karqachu, judiokunapa religionninkupipas manañam ‘wiñay kawsay qokuq’ yachachikuyqa karqañachu. Kunan tiempopipas, manam cheqap yachachikuyqa tarikunchu enteron pachapi pantasqa religionkunapiqa. Hinaptinqa, congregacionmanta karunchakuruspa Diospa favorninta kaqllamanta chaskiy munaqkunaqa, ‘rikcharinankuñam’ chaynapi congregacionman kutimunankupaq (Rom. 13:11).

2. ¿Imatam rurananchik hatun hucha rurarusqanmanta yacharuspaqa?

² Jehová Diosqa interesakurqam chinkaruq ovejakuna hina Israel casta runakunapiqa (leey Ezequiel 34:15, 16). Chaynataqmi ancianokunapas congregacionmanta karunchakuqkunapi interesakuspanku yanapananku. Chaymi wakinpiqa iñiyninpi chiriyaruq cristianowan Bibliamanta huk qellqata estudianankupaq mayqen wawqe-paninchikkunatapas ninku. Ichaqa, ¿imatam wawqe-paninchikqa ruranan chay iñiqmasinchik hatun hucha rurarusqanmanta yacharuspanqa? Kallpanchananmi ancianokunaman willananpaq, piensasqanman hina yanapananmantaqa. Mana willaptinqa kikinñam ancianokunaman willanan, paykunallam chaykunata atiendenankupaq churasqa kachkanku (Lev. 5:1; Gal. 6:1).

3. Jesuspa willasqanpi, ¿imaynam tarikurqa michiq runa chinkasqa ovejanta tariruspan?

³ Qayna estudiopim yacharqanchik 100 ovejayoq runamanta Jesus rikchanachispa willasqanta. Huknin ovejan chinkaruptinmi, michiq runaqa 99 ovejankunata saqeruspan maskaq rirqa. ¡Anchatamá kusikurqa tariruspan! (Luc. 15:4-7.) Chaynamá ñoqanchikpas tarikunchik iñiyninpi chiriyaruq cristiano kaqllamanta congregacionman kutimuptin. Yaqapaschá ancianokuna hinaspa wakin wawqe-paninchikkunapas yanaparqaku kutimunanpaq, paykunam munarqaku Diospa yanapayninta hinaspa bendicionnintapas kaqlla chaskinanta (Deu. 33:27; Sal. 91:14; Pro. 10:22). ¿Imatam rurawaq iñiyninpi chiriyaruq cristianota yanapanaykipaq?

4. ¿Imatam yachanchik Galatas 6:2, 5 nisqanmanta?

⁴ Congregacionmanta karunchakuqta kaqllamanta kutimunanpaq kallpanchanapaqqa, yuyarichichwanmi Jehová Diospa kuyasqanmanta hinaspa ruray atisqallanchikta mañawasqanchikmantapas. Payqa munanmi Biblia leenanchikta, huñunakuykunaman rinanchikta hinaspa Munaychakuyninmanta predicananchiktapas. Ichapas Galatas 6:2, 5 nisqanta leepuspa nichwan sasachakuyninchikpi yanapanakuy atisqanchikmanta, ichaqa yuyarichinanchikmi  ‘sapakama Diosman cuentata qonanchikmanta’, manam pipas ñoqanchikmantaqa Diosta servinmanchu.

¿Hukmanyarunkuchu ‘kay pachapi imapas kaqkunapi afanakuspa’?

5, 6. a) ¿Imanasqataq allinta uyarinanchik congregacionmanta karunchakuruqkunata? b) ¿Imaynatam yanapawaq karunchakusqanku mana allinninkupaq kasqanmanta cuentata qokunankupaq?

⁵ Congregacionmanta karunchakuq cristiano rimayta munaptinqa, ancianoqa otaq watukuq cristianoqa allintam uyarinan, chaynatam allinta yanapanqa. Piensariy kaypi, qanmi anciano kaspayki watukuwaq huk aylluta, paykunam ‘kay pachapi imapas kaqkunapi afanakusqankurayku’ unayña huñunakunkuñachu (Luc. 21:34). Ichapas qollqemanta otaq ayllunta mantienenankupaq sasachakusqankurayku pisi-pisimanta karunchakururqaku. Sichu nisunkiman, ‘sasachakuyniykutaraq allicharusaqku’ nispa, hinaptinqa ichapas niwaq karunchakuspankuqa mana allichanankumanta (leey Proverbios 18:1). Allinllatam kaynata tapuwaq: “¿Aswan kusisqachu tarikunkichik huñunakuyman mana hamusqaykichikmanta? ¿Aswan allinchu tarikunkichik casado vidaykichikpi? ¿Hinallachu Jehová Diospi confiaqkunapa hina kusikuynikichik kachkan?”, nispa (Neh. 8:10).

⁶ Kayna tapukuykunam yanapanman karunchakurusqanku tiempomanta, espiritualpi hinaspa vidankupipas hukmanyasqa kasqankumanta cuentata qokunankupaq (Mat. 5:3; Heb. 10:24, 25). Ichapas musyakunqaku mana predicasqankurayku mana ancha kusisqa tarikusqankumanta (Mat. 28:19, 20). Chaynaqa, ¿imatam ruranmanku?

7. ¿Imatam nichwan congregacionmanta karunchakuruqkunata?

⁷ Jesusmi kaynata nirqa: ‘Allintayá qawakuychik, yanqañataqmi viciokunapi, machakuykunapi hinaspa kay pachapi imapas kaqkunapi afanakuwaqchik [. . .]. Listolla kaspayá tukuy tiempopi Diosta mañakuychik tukuy kaykuna hamuqmanta lluptinaykichikpaq’, nispa (Luc. 21:34-36). Congregacionmanta karunchakuruspanku kutimuyta munaptinkuqa, nichwanmi Jehová Diospa chuya espiritunta mañakunankupaq, kallpanchachwantaqmi mañakusqankuman hina ruranankupaqpas (Luc. 11:13).

¿Pipas urmarachirqachu?

8, 9. ¿Imaynatam huk anciano yanapanman iñiqmasinchikpa pantasqanwan urmaruqta?

⁸ Pantaq kasqanchikraykum wakinpiqa imapas rurasqanchikwan iñiqmasinchikta hukmanyachichwan, chaymi wakinqa Diospa llaqtanmanta karunchakurunman. Hukkunañataqmi urmarunku congregacionpi respetasqa cristiano, Bibliapa nisqanman hina imatapas mana ruraptin. Paykunata huk anciano watukuspanqa, ichapas qawachinman Diosmanta hinaspa llaqtanmanta chayrayku karunchakuyqa yanqa kasqanta, Jehová Diosqa manam huchayoqchu pipas urmasqanmantaqa. ¿Manachu aswan allin kanman Payta hinalla serviyqa? Payqa “tukuy kay pachapa Jueznin” kaspanmi, chay sasachakuymantaqa yachan hinaspam tanteasqanman hina allichanqa (Gen. 18:25; Col. 3:23-25). Pipas purichkaspan urmaruspanqa, manam kuchparayasqachu qeparun, aswanqa chayllam hatarin ¿aw?

⁹ Ancianoqa ninmanmi, wakin cristianokunapas iñiyninkupi urmaruspankum tiempopa risqanman hina cuentata qokunku yanqamanta kasqanta nispa. Yaqapaschá urmachiqnin sasachakuyqa manaña kanñachu. Wakinkum ichaqa piñakurunku corregisqa kasqankuwan. Chayna kaptinqa, Diosta mañakusqanku hinaspa yuyaymanasqankum yanapanman yanqamanta piñakurusqankuta hinaspa corregisqa kasqanku allinninkupaq kasqanta reqsikunankupaq (Sal. 119:165; Heb. 12:5-13).

 ¿Bibliapa yachachisqanwanchu mana acuerdopi karqaku?

10, 11. ¿Imata nispam yanapachwan Bibliapa yachachisqanwan mana acuerdopi kaqkunata?

¹⁰ Kantaqmi Bibliapa yachachisqanwan mana acuerdopi kaspan congregacionmanta karunchakuqkunapas. Ñawpaq tiempopim, Egipto nacionmanta librasqa israelitakunaqa qonqarurqaku paykunapaq Jehová Diospa rurasqanta, ‘manam suyarqakupaschu’ consejo qonantapas (Sal. 106:13). Karunchakuqtaqa yuyarichichwanmi espiritualpi sumaq mikuyta “allin yuyayniyoq confianza sirviente” qowasqanchikmanta (Mat. 24:45). Chayraykum paypas cheqapta Jehová Diosmanta yacharurqa. Hinaptinqa, ¿manachu aswan allin kanman maypi cheqap yachasqanman kutimuyqa? (2 Juan 4.)

¹¹ Congregacionmanta karunchakuqta yanapaq ancianoqa, willanmanmi Jesuspa qatiqninkunapas paypa yachachisqanta mana chaskispanku saqerusqankumanta (Juan 6:53, 66). Jesusmanta hinaspa payman sonqo qatiqninkunamanta karunchakuptinkum, iñiyninku hinaspa kusikuyninkupas manaña karqachu. ¿Ima nichwantaq kunan tiempomanta? ¿Huk lawpi tarirunkuchu congregacionmanta karunchakuqkuna Diospa llaqtanpi hina allin yachachikuyta? Manam, huk lawpiqa manamá cheqap yachachikuyqa kanchu.

¿Hatun huchatachu rurarurqaku?

12, 13. ¿Imaynatam yanapachwan iñiyninpi chiriyaruq iñiqmasinchik hatun huchata ruraruptin?

¹² Wakin cristianokunam hatun huchata rurarusqankurayku manaña huñunakunkuñachu nitaq predicankuñachu. Chaymi congregacionman kutimuyta manchakunku, ancianokunaman huchankumanta willakuptinku congregacionmanta qarqosqa kanankuta piensaspanku. Ichaqa huchata manaña ruraptinkuqa chaynataq sonqomantapuni wanakuruptinkuqa, manam congregacionmantaqa qarqosqachu kanqaku (2 Cor. 7:10, 11). Aswanmi allin chaskisqa kanqaku, ancianokunapas necesitasqankuman hinam yanapanqaku.

¹³ Congregacionmanta karunchakuq iñiqmasinchikta watukunaykipaq ancianokuna nisuptikiqa, ¿imatam rurawaq hatun hucha rurarusqanmanta willasuptiki? Yachamusqanchikman hinaqa, manam qamchu piensasqaykiman hina yanapanayki. Aswanqa kallpanchay ancianokunawan rimananpaq. Mana willayta munaptinqa, qanmi Bibliapa nisqanman hina ruranayki (leey Levitico 5:1). Chaynata ruraspaykim qawachinki Jehová Diospa sutin hinaspa congregacionpas allin kananta munasqaykita. Ancianokunam  yachanku congregacionman kutimuy munaqkunata hinaspa Diospa munaynin ruray munaqkunata imayna yanapaytaqa. Arí, wakinpiqa yaqapaschá corregisqa kanqaku, ichaqa kuyakuywanmi chaytaqa ruranqaku (Heb. 12:7-11). Diospa contranpi iñiqmasinchik huchallikurusqanta reqsikuspan, chay huchatapas manaña ruraptinqa chaynataq sonqomanta wanakuruspanqa, manam iskayrayananchu ancianokuna yanapananmanta chaynataq Jehová Dios pampachananmantapas (Isa. 1:18; 55:7; Sant. 5:13-16).

Chinkasqa churi kutimusqanmanta

14. Rimariykamuy chinkasqa churi kutimusqanmanta.

¹⁴ Congregacionmanta karunchakuruqta yanapaspaqa, Lucas 15:11-24 nisqanpi chinkasqa churi kutimusqanmanta willakuytam servichikuchwan. Chaypim Jesus willawanchik huk mozomanta, paymi mana allin kawsayman qokuruspan herencianta yanqakunapi tukururqa. Tiempopa risqanman hinam imayna kawsasqanwan hukmanyarurqa. Llakisqallaña hinaspa yarqaymanta kaspanmi wasinman kutinanpaq tantearurqa. Taytanñataqmi karutaraq hamuchkaqta rikuykuspan, ancha kusisqallaña taripaykunanpaq kallpaspa rirqa hinaspam abrazaykuspan muchaykurqa. Kay rikchanachiyqa yaqapaschá congregacionmanta karunchakuruq cristianota kutimunanpaq yanapanman. Kay pachapi tukuy mana allinkunapa puchukaynin hichpallapiña kasqanraykum, “wasinman” otaq congregacionman chaylla kutimunan.

15. ¿Imanasqataq wakin cristianokuna congregacionmanta karunchakunku?

¹⁵ Congregacionmanta karunchakuqkunaqa wakinpiqa manam rikchanachiypi chinkasqa churi hinachu karunchakunku, aswanmi pisi-pisimanta karunchakunku imaynam ovejapas pastota qatipaspa wakinninmanta rakikuq hina. Wakinñataq kay pachapi imapas kaqkunapi afanasqa kaspanku, Jehová Dioswan amistadninkuta chinkarachinku. Hukkunañataqmi huk cristianopa pantarusqanwan otaq Bibliapa yachachisqanwan mana acuerdopi kaspanku karunchakunku. Chaymantapas hukkunaqa hatun huchata ruraruspankum karunchakurunku. Kaypi yachasqanchikkunata kasukuspaqa, atisunmi congregacionmanta karunchakuqkunata tiempo kachkaptinraq kutimunankupaq yanapayta.

“¡Wawallay, kay wasikipiyá allin chaskisqa kay!”

16-18. a) ¿Imaynatam huk anciano yanaparqa unay wataña congregacionmanta karunchakuruqta? b) ¿Imanasqataq iñiyninpi chiriyarurqa? ¿Imataq yanaparqa kutimunanpaq? ¿Imaynatam wawqe-paninchikkuna chaskiykurqa?

¹⁶ Huk ancianom kaynata nin: “Congregacionpi lliw ancianokunam kallpanchakuniku iñiyninkupi chiriyaruqkunata watukunaykupaq. Bibliamanta yachachisqay huk wawqenchikmi 25 wataña congregacionmanta karunchakururqa. Paymi hatun sasachakuykunapi tarikurqa, chaymi nirqani Bibliapa yachachisqan imayna yanapananmanta. Tiempopa risqanman hinam huñunakuykunaman hamuyta qallaykurqa, munarqataqmi Bibliata kaqllamanta estudiaytapas chaynapi kallpanchakuspan kutimunanpaq”, nispa.

¹⁷ ¿Imanasqataq payqa iñiyninpi chiriyarurqa? Paymi nin: “Kay pachapi imapas kaqkunapi afanakuspaymi Jehová Dioswan amistadniyta saqerurqani. Tiempopa risqanman hinam Biblia estudiayta, predicayta hinaspa huñunakuykunaman riytapas saqerurqani. Mana musyakuspallaymi congregacionmanta karunchakurusqani. Kuyakuywan ancianopa interesakusqanmi kallpanchawarqa congregacionman kutimunaypaq”, nispa. Kay iñiqmasinchikmi sasachakuyninta allichayta qallaykurqa kaqllamanta Bibliata estudiaspan. Nirqam:  “Hukmanyasqam tarikurqani, manam ñoqapi karqachu Jehová Diospa chaynataq llaqtanpa kuyakuynin nitaq yanapakuyninpas”, nispa.

¹⁸ ¿Imaynatam wawqe-paninchikkuna chaskiykurqa? Paymi nirqa: “Jesuspa rikchanachisqanpi kutimuq churi hinam sientekurqani. Kimsa chunka wataña Jehová Diosta hinalla serviq huk cristianam kaynata niwarqa: ‘¡Wawallay, kay wasikipiyá allin chaskisqa kay!’, nispa. Kayna niwasqanmi allintapuni sientechiwarqa. Arí, cheqap wasiymá karqa. Anchatam agradecekuni ancianotawan wawqe-paninchikkunatapas kuyakuyninkumanta, pacienciakusqankumanta hinaspa ñoqapi interesakusqankumantapas. Jehová Diostawan wawqe-panikunata ancianopa kuyasqanmi yanapawarqa congregacionman kutimunaypaq”, nispa.

Congregacionman chaylla kutimunankupaq kallpanchay

19, 20. a) ¿Imaynatam kallpanchawaq iñiyninkupi chiriyaruqkunata congregacionman chaylla kutimunankupaq? b) ¿Imaynatam willawaq imapas ruray atisqallanchikta Dios mañawasqanchikmanta?

¹⁹ Tukupay punchawkunapim kawsanchik, hichpamuchkanñam mana allinkunapa puchukayninpas. Chayraykum iñiyninpi chiriyaruqkunata huñunakuykunaman chaylla hamunankupaq kallpanchananchik. Willariy imaynam Satanasqa kallpanchakuchkan Dioswan amistadninkuta chinkarachinanpaq hinaspa congregacionmanta karunchakuspa hawkalla kanankuta piensanankutapas. Yuyarichiytaq Jesuspa qatiqnin kaspallanku ima sasachakuypi tarikuspankupas hawkayayta tarinankuta (leey Mateo 11:28-30).

²⁰ Chaymantapas, imapas atisqallanchikta Dios mañawasqanchikmanta entiendenankupaq yanapay. Jesuspa wañukunan punchaw hichpamuchkaptinmi, Lazaropa panin Maria achka qollqepa chanin miski asnaq aceiteta payman tallirqa. Chay rurasqanmanta wakin runakuna mana allinta rimaptinkum, Jesusqa kaynata nirqa: “Upallaychik [. . .]. Kay warmiqa tukuy atisqantam rurarun”, nispa (Mar. 14:6-8). Huk kutipiñataq wakcha viudamanta allinta rimarqa, paymi iskay qollqechakunata atisqanman hina templopi churarqa (Luc. 21:1-4). Yaqa llapallanchikmi atinchik huñunakuykunaman riyta hinaspa Diospa Munaychakuyninmanta willakuytapas. Chaynallataqmi Jehová Diospa yanapakuyninwanqa, iñiyninkupi chiriyaruqkunapas chaykuna ruraytaqa atinqaku.

21, 22. ¿Imamantam seguro kanmanku congregacionman kutimuqkunaqa?

²¹ Congregacionmanta karunchakuruq iñiqmasinchik kutimuyta manchakuptinqa, yuyarichiwaqmi Jesuspa rikchanachisqanpi chinkasqa churi kutimuptin kusikuywan chaskisqankumanta. Kunan tiempopipas anchatam kusikunku congregacionman pipas kutimuptin. Kallpanchay Diosman asuykunanpaq hinaspa Diablopa contranpi churakunanpaqpas (Sant. 4:7, 8).

²² Congregacionman kutimuy munaqkunaqa allin chaskisqam kanqaku (Lam. 3:40). Diosta servispankuqa ancha kusisqamá tarikurqaku. Kaqllamanta servinankupaq kutimuspankuqa, achka bendicionkunatam chaskinqaku.

¿Imatam niwaq?

• ¿Imaynatam imawanpas urmaruspa iñiyninkupi chiriyaruqkunata yanapachwan?

• ¿Imata nispam yanapawaq Bibliapa yachachisqanwan mana acuerdopi kaspan congregacionmanta karunchakuruqta?

• ¿Imaynatam yanapawaq congregacionman kutimunanpaq manaraq tanteaqta?

[Kay yachachikuypa tapukuyninkuna]

[16 kaq paginapi dibujo]

Iñiyninpi chiriyaruq wawqe-paninchik rimaptinqa allinta uyariy

[18 kaq paginapi dibujo]

Chinkasqa churi kutimusqanmanta Jesuspa rikchanachisqanmi, wakin iñiqmasinchikkunata yanapanman Diospa llaqtanman kutimunankupaq