‘Diablopa contranpiyá’ Jesus hina sayaychik

“Diablopa contranpi qaqa hina sayaychik, chaynapim [. . .] qamkunamanta ayqekunqa.” (SANT. 4:7.)

1. Kay Pachaman hamuptin, ¿ima pasananmantam Jesus yacharqa, hinaspa imapim tukurqa?

JESUCRISTOQA yacharqam kay Pachaman hamuptin paypa contranpi Diablo churakunanmanta. Yacharqataqmi culebraman otaq Satanasman Eden huertapi Jehová Diospa kayna nisqantapas: “¡Warmitawan [otaq Jehová Diospa hanaq pachapi llaqtanwan] qamtam cheqninachisqayki, cheqninachisaqtaqmi miraynikitawan miraynintapas! Mirayninmi [otaq Jesucristom] umaykita chamchasunki, qamñataqmi talonninpi kachunki”, nispa (Gen. 3:14, 15; Apo. 12:9). Jesusta kay Pachapi wañurachiptinkum talonninpi kachusqa hina karqa. Ichaqa manam wiñaypaqchu karqa, Jehová Diosmi kawsarichirqa hanaq pachaman rinanpaq. Satanaspam ichaqa uman chamchasqa kanqa, chaynapi wiñaypaq chinkachisqa kananpaq (leey Hechos 2:31, 32 hinaspa Hebreos 2:14).

2. ¿Imanasqataq Jehová Diosqa seguropuni karqa Diablo pruebakunata churaptin Jesus aguantananmanta?

² Jehová Diosqa segurom karqa, Jesucristota Diablo kay Allpapi tentaptin aguantananmanta hinaspa imaman hamusqanta cumplinanmantapas. ¿Imanasqataq Jehová Diosqa seguro karqa? Paymi Jesusta achka wata ñawpaqtaraq unancharqa, chaymi allintapuni reqsirqa. Yacharqam, ‘Payta ruraysiq maestroqa’ hinaspa piwi churinqa kasukuq kasqantapas (Pro. 8:22-31; Col. 1:15). Chaymi seguro karqa, kay pachaman Jesusta kachamuptin, wañunankama Satanas pruebaman churaptinpas aguantananmanta (Juan 3:16).

 Jehová Diosqa waqaychanmi serviqninkunata

3. ¿Imaynatam Diablo qawan Jehová Diospa serviqninkunata?

³ Jesusmi nirqa ‘kay pachapi kamachikuqqa’ Diablo kasqanmanta, hinaspam qatiqninkunata nirqa pay hina qatikachasqa kanankuta (Juan 12:31; 15:20). Chaymi Satanaspa munaychakusqan runakunaqa cheqninku cristianokunata, Jehová Diosta serviptinku hinaspa allin noticiamanta willakuptinku (Mat. 24:9; 1 Juan 5:19). Astawanmi cheqnin kay pachapi puchuq ungidokunata, paykunam hanaq pachamanta Jesucristowan kamachimunqaku. Chaynallataqmi cheqnin Jehová Diospa millonninpi testigonkunata, paykunaqa suyankum kay Pacha sumaqllaña kaptin wiñaypaq kawsakuyta. Bibliam kaynata nin: ‘Enemigoykichik Diabloqa yarqasqa leon hinam muyuriqnikichikpi purichkan pitapas millpurunanpaq’, nispa (1 Ped. 5:8).

4. ¿Imataq qawachiwanchik Diospa llaqtanpa contranpi Diablo churakuptin atipasqanchikta?

⁴ Jehová Diospa kunan tiempopi llaqtanqa paypa yanapayninwanmi Diablopa contranpi churakusqanta atiparqa. Ejemplopaq qawasun. Kay pachak wata pasaqpim, mana llakipayakuspa kamachiqkunamanta wakinkuqa Diospa llaqtanta chinkarachiyta munarqaku. Chayna rurasqankuqa yanqapaqmi karqa, kunanqa pachak waranqa masnin congregacionkunapim yaqa qanchis millon Testigokunaña kachkanchik. ¿Imataq pasarun qatikachawaqninchik kamachiqkunawanqa? Ñoqanchik chinkananchikmantaqa paykunam chinkarunku.

5. ¿Imaynatam kunan tiempopi cumplikun Isaias 54:17 nisqan?

⁵ Jehová Diosmi Israel llaqtanta kaynata nirqa: “Manam pipas contraykipi atirqachu [. . .] wañuchisunaykipaq arma rurayta. Juzgadopi llapallan acusaqnikikunam juiciopi vencesqa kanqa. Ñoqa Tayta Diosmi kaynata nini: Serviqniykunapa herencianqa chaynam kanqa. Chaynam ñoqapa salvasqaykunaqa kanqa”, nispa (Isa. 54:11, 17). Kay ‘tukupay tiempokunapim’, Diosta serviqkunaqa rikunku kay willakuypa cumplikusqanta (2 Tim. 3:1-5, 13). Ichaqa, hinallam aguantasun Satanaspa contranchikpi churakusqantaqa, kaytaqa rurasun Jehová Dios yanapawananchikmanta hinaspa Satanas ima rurasqanwanpas mana chinkarachiwananchikmanta seguro kaspanchik (Sal. 118:6, 7).

6. Daniel sutiyoq libropa nisqanman hina, ¿imam pasanqa Satanaspa munaychakusqanwan?

⁶ Chayaykamuchkanñam mana allin ruraykunapa puchukayninqa chaynataq Satanaspa munaychakusqanpa chinkachisqa kananpas. Danielmi Diospa yanapayninwan kaynata qellqarqa: “Chay hamuq reykuna [kunan tiempo gobiernokuna] gobiernachkaptinmi Hanaq Pacha Dios hatarichinqa mana tuñichiy atina gobiernota [hanaq pachapi], chay gobiernoqa huk runamanqa manam qosqachu kanqa wiñaypaqpas. Aswanqa chay gobiernom llapallan wakin gobiernokunata ñutupaspan chinkachinqa hinaptinmi chay puchuruq gobiernollaña takyanqa wiña-wiñaypaq”, nispa (Dan. 2:44). Bibliapa kayna nisqan cumplikuptinqa, manañam Satanaspas nitaq pantaq runakunapas kay Pachataqa kamachinqakuñachu. Wiñaypaqmi chinkanqa Diablopa makinpi mana allin kaqkuna, hinaptinmi Diospa Gobiernonña enteron Pachapi munaychakunqa (leey 2 Pedro 3:7, 13).

7. ¿Imaynatam yachanchik Diablota vencey atisqanchikmanta?

⁷ Arí, puchukay punchaw chayaramuptinqa Jehová Diospa llaqtanqa hinallam kanqa, hinallataqmi paypas favorecenqa (leey Salmo 125:1, 2). Ichaqa, ¿imatam nichwan sapakamamanta? Bibliapa nisqanman hinaqa, Jesus hinam atichwan Satanasta venceytaqa. Jesucristomanta apostol Juanpa chaskisqan willakuyman hinaqa, kay pachapi kawsakuy suyaq ‘achkallaña runakunam’ mana wañunqakuchu mana allin ruraykuna chinkachisqa kaptin, paykunapa contranpi Satanas kachkaptinpas. Paykunam kaynata ninqaku: “Salvacionninchikqa tiyananpi tiyaq Diosninchikmantam hinaspa Carneromantam [otaq Jesucristomantam]”, nispa (Apo. 7:9-14). Bibliaqa ninmi ungidokunawan ‘sapaq ovejakunapas’ otaq kay pachapi kawsakuy suyaqkunapas Satanasta vencenankumanta (Juan 10:16; Apo. 12:10, 11). Chaypaqqa kallpanchakunankum hinaspa Diostam mañakunanku Diablomanta librananpaq (Mat. 6:13).

 Ejemplonchik Jesucristoqa, vencerqam Diablota

8. ¿Imaynatam Diabloqa Jesusta chunniqpi puntata tentarqa, hinaspa imata nispanmi Jesusqa contestarqa?

⁸ Jesusqa vencerqam payta urmachinanpaq Diablopa tukuy imaymana rurasqantaqa. Chunniqpi Jesus tarikuchkaptinmi, Satanasqa achka tentacionkunata churarqa Jehová Diosta mana kasukunanpaq. Puntataqa, Jesuspa 40 tuta-punchaw mana mikusqa kasqantam servichikurqa. Nirqam: “Diospa Churin kaspaykiqa kay rumikunatayá kamachiy tantayarunanpaq”, nispa. Jesusmi ichaqa mana munarqachu Diospa atiynin qosqanta munasqanman hina servichikuytaqa, chaymi nirqa: “Bibliam nin: ‘Runaqa kawsanqa manam mikuyllawanchu aswanqa Diospa llapa rimasqankunawanmi’”, nispa (Mat. 4:1-4; Deu. 8:3).

9. ¿Imanasqataq kallpanchakunanchik imapas munasqanchikta Diablo servichikuspa mana huchallichiwananchikpaq?

⁹ Kunan tiempopim Diabloqa servichikun Dios serviqkunapa imapas munasqankuta. Ejemplopaq, runakunapa rurasqankuman hina huchapakuytam munachiwanchik, chaymi anchata kallpanchakunanchik chayman mana wichinanchikpaq. Bibliam kaymanta sutillata nin: “¿Manachu yachankichik Diospa munaychakusqanmanqa mana allin ruraqkunaqa mana yaykunanta? Amayá pantaychikchu, Diospa munaychakusqanmanqa manam yaykunqachu huchapakuypi puriqkunapas, taytacha-mamacha adoraqkunapas, casado kachkaspa hukwan kakuqkunapas nitaq qarimasinwan kaqkunapas”, nispa (1 Cor. 6:9, 10). Arí, manam mosoq pachamanqa yaykunqakuchu huchapakuqkunawan vidankupi mana cambiay munaqkunapas.

10. Mateo 4:5, 6 nisqanman hina, ¿imayna tentasqanwanñataq Satanasqa munarqa Jesus pantarachiyta?

¹⁰ Bibliaqa willawanchiktaqmi chunniqpi yapatawan Jesus tentasqa kasqanmanta, ninmi: ‘Hinaptinmi Diablo pusarurqa Jerusalen chuya llaqtaman hinaspam templopa hawanpi sayaykachispan nirqa: Diospa Churin kaspaykiqa kaymantayá pawaykuy. Bibliam nin: “Qamraykum Dios kamachinqa angelninkunata. Paykunam hapisunki rumiman chakikita mana takarunaykipaq”’, nispa (Mat. 4:5, 6). Satanaspa nisqanta Jesus ruraspanqa, atinmanchá karqa akllasqa Mesias kasqanta qawachiyta. Ichaqa chaynata ruraspanqa hatunchakuspa mana allin rurasqantachá qawachinman karqa, Diospa favornintapas chinkarachinmanmi karqa. Jesusmi ichaqa huktawan qawachirqa Taytan kasukuq kasqanta, chaymi Diospa Palabranpa nisqanman hina kaynata nirqa: “ Bibliapiqa nichkantaqmi: ‘Amam pruebamanqa churankichu Señor Diosnikitaqa’”, nispa (Mat. 4:7; Deu. 6:16).

11. ¿Imakunata ruranapaqmi Satanasqa munachiwanchikman, hinaspa imapim tukunman chaykunata ruraptinchikqa?

¹¹ Kunan tiempopipas Satanasqa tentawanchikmanmi  Jehová Diosta qepancharunapaq. ¿Imaynata? Ichapas munachiwanchikman runakunapa chaskisqan kanapaq. Chaypaqqa, munachiwanchikmanmi mana iñiq runakuna hina pachakunapaq, allichakunapaq otaq mana allinniraq kaqkunapi kusirikunapaqpas. Bibliapa nisqanta mana kasukuspa kay pachapi kaqkunata qatipakuspanchikqa, ¿suyanchikmanchu mana allin tanteasqanchikrayku imapas pasawananchikmanta Jehová Dios librawananchikta? Manachá suyanchikmanchu angelninkunawan waqaychawananchiktaqa. Betsabeywan huchallikusqanmanta rey David wanakuruptinpas, Jehová Diosqa manam harkarqachu huchallikusqanrayku sasachakuymantaqa (2 Sam. 12:9-12). Chaynaqa, amayá kay pachapi kaqkunata kuyaspaqa Jehová Diosta piñachisunchu (leey Santiago 4:4 hinaspa 1 Juan 2:15-17).

12. Mateo 4:8, 9 nisqanman hina, ¿Jesus imayna tentasqa kasqanmantam willan hinaspa imatam payqa rurarqa?

¹² Kimsa kaq tentasqanpiñataqmi, Satanasqa Jesusta munachirqa runakunata kamachinanpaq atiyniyoq kayta. Chaymi qawachirqa kay pachapi llapallan nacionkunata chaynataq sumaq kaynintapas, hinaspam nirqa: “Tukuy kaykunatam qosqayki qonqorakuykuspa adorawaptikiqa”, nispa (Mat. 4:8, 9). Kayta ruraspanmi Diabloqa qawachirqa, Jehová Dios hina yupaychasqa kay munasqanta hinaspa Jesusta huchallichiy munasqantapas. Kay munasqanmi Jehová Diosmanta qallariymantaraq karuncharachirqa, chaynataq mana allinpi hinaspa kikillanpaq munaqpi rikurirachirqa (Sant. 1:14, 15). Jesusmi ichaqa Taytanta tukuy sonqonmanta kasukuyta munarqa. Chaymi nirqa: “Pasaway kaymanta Satanas, Bibliam nin: ‘Señor Diosllaykitam adoranki, payllatataqmi servinkipas’”, nispa. Kaqllamantam Jesusqa Diablopa contranpi qaqa hina sayarqa, manapunim payqa munarqachu Satanaspa makinpi kaqkunataqa. ¡Manachá haykapipas yupaychanmanchu karqa Dios qepanchaqtaqa! (Mat. 4:10; Deu. 6:13; 10:20.)

Diablopa contranpi sayaychik, chaynapim qamkunamanta ayqekunqa

13, 14. a) Diablo kay pachapi llapallan gobiernokunata Jesusman qawachispanqa, ¿imatam cheqaptapuni munachichkarqa? b) ¿Imaynatam Satanasqa sonqonchikta qachacharuyta munan?

¹³ Diablo kay pachapi gobiernokunata Jesusman qawachispanqa, munachichkarqam runakunapa mana tarisqan atiyniyoq kananpaq. Satanasqa munarqam Jesus chaykunata qawaspan lliw kamachiqkunamanta aswan atiyniyoq kayta munapayananpaq. Kunanqa manam gobiernokunataqa munachiwanchikchu, ichaqa sonqonchiktam qachacharuyta munan qawasqanchikwan, uyarisqanchikwan hinaspa piensasqanchikwanpas.

¹⁴ Diablopa makinpim kachkan kay pachapi kaqkunaqa, chaymi runakunapa leesqan, qawasqan hinaspa uyarisqankupas huchapakuyllamantaña chaynataq maqanakuyllamantaña kachkan. Chaymantapas, televisionwan, radiowan otaq imakunawanpas munachiwanchikmi mana necesitasqanchikta rantinapaq. Chaynatam Diabloqa munachiwanchik kay pachapi kaqkunata maskanapaq. Ichaqa Diospa cheqnisqan kaqkunata mana leespa, mana qawaspa chaynataq mana uyarispaqa, nichkanchikmi “pasaway kaymanta Satanas” nispa. Kay pachapi kaqkunata qepanchaspam Jesuspa ejemplonta qatipakuchkanchik. Chaymantapas, kay pachapi mana allinkunamanta karunchakusqanchiktam qawachinchik Jehová Diospa testigon hinaspa Jesucristopa qatiqnin kasqanchikta llamkasqanchikpi, escuelapi, ayllunchikpi hinaspa vecinonchikkunawanpas mana manchakuywan reqsichikuspa (leey Marcos 8:38).

15. ¿Imanasqataq sapa punchaw rikchan-rikchanlla kananchik?

¹⁵ Kay kimsa kutikunapi mana pantarachiyta atispanmi ‘Jesusta Diabloqa saqerurqa’ (Mat. 4:11). Ichaqa manam wiñaypaqchu, Bibliam kaynata nin: ‘Chaykunawan tentaruspanmi Diablo asurikurqa huk punchawkama’, nispa (Luc. 4:13). Ima tentacionman mana wichiykuspapas, hinallam Jehová Diospa yanapakuynintaqa maskananchik. Amayá qonqasunchu,  Satanasqa munasqan tiempopim hinalla tentawasunchik manam suyasqanchik tiempopichu. Chaymi rikchan-rikchanlla hinaspa pruebakunata aguantanapaq listo kananchik, kallpanchakunanchiktaqmi Jehová Diosta hinalla servinapaqpas.

16. ¿Imatam Jehová Diosqa qowanchikman, hinaspa imanasqam mañakunanchik?

¹⁶ Satanaspa tentawasqanchikta aguantanapaqqa, mana iskayrayaspam Jehová Diosta mañakunanchik chuya espiritunta qowananchikpaq, chayqa paypa kallpanmi. Diospa espiritunwanmi kikillanchikpa kallpanchikwan mana ruray atisqanchikkunata rurayta atisun. Jesusmi qatiqninkunata prometerqa Jehová Dios chuya espiritunta qonanmanta, nirqam: ‘Qamkunaqa mana allin runakuna kachkaspam churikichikmanqa allin kaqkunata qonkichik ¿chaychu mañakuqkunamanqa hanaq pachapi kaq Taytaykichik mana qosunkichikman chuya espiritunta?’, nispa (Luc. 11:13). Amayá haykapipas saqesunchu Jehová Dios chuya espiritunta qowananchikpaq mañakuytaqa, chaynapim kallpanchasqa kasunchik Diablopa contranpi qaqa hina sayananchikpaq hinaspa atipananchikpaqpas. Satanaspa toqllanman mana wichiykunapaq Diosta sapa kuti mañakuspapas, espiritualpi qowasqanchik armakunawanmi churakunanchik (Efe. 6:11-18).

17. ¿Imataq Jesusta yanaparqa Diablopa contranpi kananpaq?

¹⁷ Diablopa contranpi churakunanpaq Jesusta imapiwan yanapasqanmantam Bibliaqa willawanchik, kaymi ñoqanchiktapas yanapawanchikman, ninmi: “Paymi ancha kusikuyniyoq kananta yachaspan cruzpi [“qerupi”, NM] ñakarirqa penqaytapas qepanchakuykuspa hinaspam Diospa tiyananpa alleq lawninpi tiyaykurqa”, nispa (Heb. 12:2). Ñoqanchikpas Jesus hinam kusikusun, Jehová Diospa llapallan kamachiq kasqanta respetaspa, sutinta hatunchaspa chaynataq wiñaypaq kawsakuy suyakuyninchikta mana qonqaspa. Mayna kusisqachá tarikusunchik; kay pachamanta Satanaswan qatiqninkunapas chinkaruptin, hinaspa Bibliapa kayna nisqanpas cumplikuptin: “[Llampu sonqokunam] ichaqariki dueñoyanqa allpatapas. Paykunaqa kusikuywanmi hawkayaypi kawsanqapas” (Sal. 37:11). Chaynaqa, Jesuspa ejemplonta qatipakuspayá Diablopa contranpi tukuy kallpanchikwan qaqa hina sayasunchik (leey Santiago 4:7, 8).

¿Ima niwaqtaq?

• ¿Imakunam qawachiwanchik llaqtanta Jehová Dios waqaychasqanmanta?

• ¿Imanasqam ninchikman Jesusqa allintapunim Satanaspa contranpi churakurqa nispa?

• ¿Imaynatam ñoqanchikpas Satanaspa contranpi churakuchwan?

[Kay yachachikuypa tapukuyninkuna]

[27 kaq paginapi dibujo]

Kay pachapi kaqkunata kuyaruspaqa, Diospa enemigonmi rikuriruchwan

[29 kaq paginapi dibujo]

Kay pachapi llapallan gobiernokunata Satanas munachiptinmi, Jesusqa mana munarqachu