Hamuq tiempopi kawsakuy imayna kananmanta

HAMUQ tiempopi imayna kananchikmanta hinaspa kay Allpa pacha imayna kananmantam apostol Pedro kaynata nirqa: “Ñoqanchikmi ichaqa suyachkanchik Diospa prometewasqanchik mosoq cielokunatawan mosoq allpata, chaypim ichaqa tukuy imapas allin arregloman hina rurasqa kanqa”, nispa (2 Pedro 3:13). Willakuq Isaiasqa ñawpaqmantaraqmi rimarqaña mosoq cielomantawan mosoq allpamanta (Isaias 65:17; 66:22). Chay willakuymanta  Pedro rimaspanqa qawachichkarqam hamuq tiempopi astawan cumplikunanta.

Yaqa 96 kaq watapim apostol Juan revelacionninpi qawarqa Diospa Gobiernonpi bendicionkuna kananmanta, chaytam tupachirqa ‘mosoq allpawan’ (Apocalipsis 21:1-4). Chay Gobierno kay allpata manaraq kamachichkaptinmi Jesuspa hinaspa apostol Pablopa nisqankunaqa cumplikuchkanña. Hinaptinqa pisi tiempollañam kachkan chay mosoq allpapi kawsananchikpaq. Chaynaqa, ¿imaynataq kanqa chay tiempopi kawsakuyqa? Qawasunchikyá Isaias libro ima niwasqanchikta.

Mosoq allpapi kawsakuy imayna kananmanta

Lliw runakunam hawkallaña kawsanqaku hinaspam Diosta yupaychanqaku. “Paykunaqa espadankutapas rejakunamanñam tikrarunqaku. Paykunaqa lanzankutapas rutunakunamanñam tikrarunqaku. Manañam nacionpurapas peleanqakuñachu. Guerrapaqpas manañam yachanqakuñachu.” (Isaias 2:2-4.)

Animalkunapas, runakunapas hawkañam kawsakunqaku. “Hinaptinqa atoqwan malta carnerom hawkaña kawsanqa. Uturunguwan uña cabram kuskaña waqtapanqaku. Leonwan malta toropas kuskañam wiñanqaku. Warmachapa pusasqanñam chaykunaqa kanqaku. Vacawan ukumarim kuskankuña pastota mikunqaku. Chaykunapa wawankunapas kuskañam waqtapanqaku. Leonkunapas bueyes hinam pajataña mikunqaku. [. . .] Sapaqchasqay enteron orqopiqa manañam pipas mana allintaqa ruranqachu. Sapaqchasqay enteron orqopiqa manañam pipas dañanqachu. Imaynam yaku pasaypaqta tapaykun lamar qochata, chaynam enteron kay pachapi runakunapas reqsiwanqaku ñoqa Tayta Diosta.” (Isaias 11:6-9.)

Kawsaykunam achkallaña kanqa. ‘Llapallan Kamachiq Tayta Diosqa Sion Moqopim [. . .] llapallan nacionkunapaq hatun convidota ruranqa. Miskillaña mikuykunatawan unay watayoq vinotam convidanqa. Miskillaña mikuykunatawan suma-sumaq vinotam convidanqa.’ (Isaias 25:6.)

Manañam wañuyqa kanqañachu. “Tayta Diosmi wiñaypaq chinkachinqa wañuyta. Señor Diosmi pichanqa llapallan waqaqkunapa weqenta. Paymi horqonqa runankunapa kay pachapi penqaypi kasqanta. Chaynatam nirqa Tayta Dios.” (Isaias 25:8.)

Wañuqkunam kawsarimunqaku. “Dios Taytalláy, wañuqnikikunam kawsarimunqa. Llaqtamasiykunapa ayankunam hatarimunqa. Allpapa ukunpi kaqkuna qaparimuychik. Hatarimuspa kusikuyllawanña qaparimuychik [. . .]. Wañuqkunam allpamanta hatarimunqa nacemuchkaq hina.” (Isaias 26:19.)

Jesucristom allin kaqta ruranqa. “Manam qawasqallanman hinachu pitapas juzganqa. Manam uyarisqanman hinallachu pitapas sentencianqa. Wakchakunatam derechonkuman hina allinta arreglanqa. Kay pachapi  humildekunatam Diospa munasqanman hina defiendenqa.” (Isaias 11:3, 4.)

Ñawsakuna hinaspa mana uyariqkunam sanoyanqaku. “Ñawsakunam qawarikunqa [. . .] mana uyariqkunam uyarikunqa.” (Isaias 35:5.)

Chaki allpakunam sumaqllaña kanqa. “Chunniq sitiom kusikunqa. Chaki allpam anchata kusikunqa. Purun waytakuna hinam waytanqa. Waytaruspam anchata kusikunqa. Kusikuymantam qaparinqa.” (Isaias 35:1, 2.)

‘Mosoq allpam’ kanqa. “Ñoqam unanchasaq mosoq cielokunata [hanaq pachamanta Diospa gobiernon]. Ñoqam unanchasaq mosoq allpata [mosoq pachapi kawsaq allin runakuna]. Punta kaqkunaqa kanqa qonqasqañam chaynataq mana pipapas yuyarisqanñam. Anchata kusikuychik ñoqapa unanchasqaywan. Wiñaypaq kusikuychik ñoqapa unanchasqaywan [. . .]. [Chaypi kawsaqkunaqa] wasikunatam hatarichinqaku hinaspam chaypi yachanqaku. Uvas huertakunatam plantanqaku hinaspam rurunta mikunqaku. Wasikunatam hatarichinqaku ichaqa manam sapaq runakuna yachananpaqñachu. Uvas huertakunatam plantanqaku ichaqa manam sapaq runakuna rurun mikunanpaqñachu. Sachakuna hinam runaykunaqa una-unay watakunata kawsanqa. Akllakusqaykunaqa llamkasqankunapa ruruntam horqonqa. Llamkanqakupas manañam yanqapaqchu. Churinkupas manañam nacenqaku desgraciapaqchu. Paykunaqa Tayta Diospa bendecisqan miraykunam. Mirayninkunapas Tayta Diospa bendecisqan runakunam. Manaraqpas mañakamuwachkaptinkum paykunata ñoqa contestasaq. Manaraqpas rimayta tukuchkaptinkum paykunata ñoqa uyarisaq.” “Ñoqa Tayta Diosmi nini: Mosoqyachisqay cielokunam qayllaypi takyanqa. Mosoqyachisqay kay pacham qayllaypi takyanqa. Chaynatam qayllaypi takyanqa miraynikichikkuna. Chaynatam qayllaypi takyanqa sutikichikkuna.” (Isaias 65:17-25; 66:22.)

Hamuq tiempomanta Bibliapa nisqankuna

Hamuq tiempo sumaqllaña kananmantaqa manam Isaias librollachu willakun. Aswanqa Bibliapi lliw librokunam willakuchkan Diospa Gobiernonpi Jesucristo kamachiptin imakuna kananmanta. * ¿Munawaqchu chay mosoq allpapi kawsakuyta? Bibliaqa yachachiwanchikmi hamuq tiempopaq Diospa munayninmanta, hinaspa chaypi kawsanaykipaq ima ruranaykitapas. Munaptikiqa Jehová Diospa testigonkunam yachachisunkiman.

[Willakuy]

[8 kaq paginapi dibujo]

Runakunaqa kikinkupurapas hinaspa animalkunawanpas hawkañam kawsanqaku

[9 kaq paginapi dibujo]

Wañuqkunam kawsarimunqaku

[10 kaq paginapi dibujo]

Kay Pachaqa paraisom kanqa