¿Pipas yachanmanchu hamuq tiempopi imakuna pasananta?

“Ñoqallam Diosqa kani [. . .]. Hamuq tiempokunapi sucedenanmantam willakuni. Manaraq sucedeqkunatam ñawpaqmantapuni willakuni” (Isaias 46:9, 10).

KUNAN tiemponchikpiqa manam imapas allinchu. Chayraykum autoridadkunata, nacionkunapa kapuqninkunata, hinaspa runakunapa imayna kawsasqankuta estudiaqkuna pasaq tiempokunawan kay tiemponchikta tupachispanku yachayta munanku ima pasananmanta. Wakin runakunañataqmi imayna kanankumanta yachayta munaspanku lucerokunata qawaspa adivinaqkunaman otaq layqakunamanpas rinku. Ichaqa engañasqam kanku. Hinaptinqa, ¿manachu yachayta atichwan imam pasanqa kay pachata, familianchikta hinaspa kikinchikwanpas? ¿Kanmanchu pipas hamuq tiempokunamanta yachaq?

Qallariypi texto leesqanchikpim yachamurqanchik tukuy atiyniyoq Jehová Dioslla hamuq tiempokunapi ima sucedenanmanta yachasqanta. Isaiaswanmi Diosqa willachirqa Israel runakuna Babiloniamanta librasqa kaspanku Jerusalen llaqtatawan templota kaqlla hatarichinankumanta. ¿Imakunam pasanan karqa chay willakuykuna cumplikunanpaq? Yaqa iskay pachak wata ñawpaqtaraqmi Isaiasqa nirqaña Babilonia llaqtata Ciro sutiyoq runa munaychakunanmanta. Nirqataqmi llaqtata harkaq Eufrates mayuta huklawman rakinanmantapas. Chaymantapas nirqam llaqtapa punkunkuna kicharayasqa kananmanta, chaynapi Ciro mana sasachakuspan munaychakunanpaq (Isaias 44:24–45:7).

Runaqa Dios hinaqa manam yachanmanchu hamuq tiempokunamantaqa. Rey Salomonmi nirqa: “Hamuq punchawkunapi ruranaykimantaqa amayá alabakuychu. Paqarin punchaw imapas sucedenanmantaqa manam yachankichu”, nispa (Proverbios 27:1). Kunanpas runaqa manam yachanmanchu vidanpi imakuna sucedenantaqa. Ichaqa, ¿imanasqataq Diosqa yachanman? Tukuy ima unanchasqanta chaynataq runakuna imayna kasqanta allintapuni reqsisqanraykum. Chaymi munaspanqa ñawpaqmantaraq ninman runa imayna kananmanta chaynataq llaqtapi runakuna imayna kanankumantapas. Chaymantapas ima asuntotapas munasqanman hinam ruranman. Payqa ‘serviqninkunapa rimasqantam cumplichin. Kachasqankunapa consejasqantam allinta qespichin’ (Isaias 44:26). Jehová Diosllam chaytaqa ruranman.

Jesuspa nacesqanmanta yaqa qanchis pachak wata ñawpaqtaraqmi Isaiasqa willakurqaña Cristo rikurimunanmanta. Ichaqa yaqa kimsa pachak wata qepamantaraqmi wakin estudioso runakuna Isaiaspa qellqasqanta mana allinpaqñachu hapirqaku. Nirqakum Cristomanta willakuykunaqa  qellqasqa karqa cumplikusqan qepatañam nispa. ¿Ciertochu chay nisqanku? 1947 watapim Mar muerto nisqa lamar qochapa hichpan machaypi ñawpaq qellqakunata tarirqaku, tarirqakutaqmi Isaias libropa copiantapas. Chaykunamanta estudiaqkunapa nisqanman hinaqa chay copia tarisqankuqa Jesus nacenanpaq pachak wata masninraq faltachkaptin rurasqam kasqa. Chaynaqa, hamuq tiempopi imakuna pasananmantaqa Bibliallam willakun.

Bibliata qellqaqkuna nitaq Isaiaspas hamuq tiempopi imakuna pasanantaqa manam kikillankumantaqa willakuyta atinmankuchu karqa. “Aswanqa Chuya Espiritupa guiasqanman hinam Diosmanta rimarqaku” (2 Pedro 1:21). Qatiqnin yachachikuypim qawasunchik Isaiaspa nisqanman hina Jesuspa vidanmanta. Yachasunchiktaqmi Jesuspa chaynataq hatiqninkunapa nisqankuman hina kay tiempopi hinaspa hamuq tiempopi imakuna pasananmantapas.