¿Imataq pasawanchik wañukuptinchik?

“Lliw runakunapa almanqa mana wañuqmi [. . .]. Rawrachkaq ninapim wiñaypaq ñakarichkanku, chaymanta librakuytaqa manam atinkuchu.” (Alejandría llaqtayoq religioso Clemente sutiyoq runam chaynata nirqa)

CLEMENTE runa hina piensaqkunam creenku infiernoqa ñakarina sitio kasqanta chaynataq runapa alman mana wañusqantapas. ¿Chaynatachu Bibliaqa yachachin? Qawasunchikyá qatiqnin tapukuykunata Biblia imayna contestasqanta.

¿Adanqa mana wañuq almayoqchu karqa? Catolicokunapa Biblianmi nin: ‘Diosmi runata rurarqa ñutu allpamanta, senqanman kawsachiq samayta pukuykuptinmi runaqa kawsaq almaña karurqa’, nispa (Génesis 2:7, La Santa Biblia, de Juan Straubinger). Kaypiqa manam ninchu Adanman almata qosqanmantaqa.

¿Imataq Adanta pasarqa huchallikusqan qepata? Adantaqa manam infiernopi ñakarinanpaqchu Diosqa castigarqa. Qawasunchik imatam nin Biblia: ‘Allpaman kutiykunaykikamam sinchita llamkaspa mikunaykita tarinki. Allpamanta horqosqam kanki. Allpallam kanki, allpallamantaqmi tikrakunki’, nispa (Genesis 3:19). Kaypiqa manam ninchu Adan wañukuptin alman kawsasqantaqa. Aswanqa Adan wañukuptinqa manañam imanpas kawsarqañachu.

¿Kanmanchu mana wañuq almayoq runa? Diosmi willakuq Ezequielta nirqa: ‘huchallikuq almaqa wañunqam’, nispa (Ezequiel 18:4, Biblia Americana San Jerónimo). Apostol Pablopas kaynatam qellqarqa: “Huk runallawan [Adanwan] kay pachapi huchallikuy qallariruptinmi chayrayku wañuypas rikurirurqa chaymi lliw runakuna huchallikuspanchik wañunchik”, nispa (Romanos 5:12). Chaymi huchallikuq kasqanchikrayku lliw almakunaqa wañunchik.

Wañuqkunaqa, ¿imatapas sientenkuchu otaq yachankuchu? Bibliam nin: “Wañunanmantam yachanku kawsaqkunaqa. Manam imatapas yachanchu wañuqkunaqa”, nispa (Eclesiastes 9:5). Chaymantapas nintaqmi runakunaqa “wañuruspankum allpayarun. Chay punchawllapitaqmi tanteasqankupas chinkarun”, nispa (Salmo 146:4). Chaynaqa, wañuqkuna ‘mana imatapas yachaptinkuqa’ hinaspa ‘tanteasqankupas chinkaruptinqa’, ¿imaynamá infiernopi ñakarisqankutaqa sientenmanku?

Jesusqa manam haykapipas yachachirqachu wañuqkuna imatapas sientesqankutaqa, aswanqa wañuytam tupachirqa puñuywan (Juan 11:11-14). Chayna kaptinpas wakinqa ninkum infiernopi rawrachkaq ninamanta chaynataq huchallikuqkuna chayman wischusqa kanankumantam Jesusqa yachachirqa nispa. Chaynaqa yachasunchikyá imatapunim Jesusqa infiernomanta yachachirqa.