Infierno ima kasqanmanta yachayqa Diosmanmi asuykachiwanchik

INFIERNO nina rawraq kasqanta yachachiqkunaqa, Jehová Diostam mana allin Dios kasqanta hina qawachichkanku chaynataq sumaq kayninkunatapas yanqachachkanku. Bibliaqa ninmá mana allin ruraq runakunata Dios chinkachinanmanta (2 Tesalonicenses 1:6-9). Ichaqa manam ñakarichiq Dios kaspanchu chaytaqa ruranqa.

Jehová Diosqa manam vengakuqchu nitaq ñakarichikuq Dioschu. Paymi nin: “Ñoqaqa manapunim munanichu mana allin ruraq runapa wañunantaqa”, nispa (Ezequiel 18:23). Sichum huchallikuqkuna wañunankuta Dios mana munaspanqa, ¿imaynamá kusikunqa infiernopi wiñaypaq ñakarichispanqa?

Diospa sumaq kayninkunamantaqa kuyakuyninmi sutillata qawakun (1 Juan 4:8). Chaynamá “Tayta Diosqa ancha allinmi llapallanpaqpas. Llakipayarikunmi llapallan rurasqankunamantapas” (Salmo 145:9). Payqa munan tukuy sonqonchikwan kuyanallanchiktam (Mateo 22:35-38).

¿Infiernota manchakuspachu icha Diosta kuyaspachu?

Rawrachkaq ninapi almakuna ñakarisqankuta creeqkunaqa Diostam qawanku manchakunapaq Diosta hina. Kayna manchakuyninkuqa manam tupanchu Dios imayna kasqanta kuyaqkunapa manchakusqankuwanqa. Diosta manchakuyqa manam daño ruraq runata manchakuy hinachu, aswanqa Diosta mana piñachinapaq tukuy sonqomanta respetaspa kasukuymi. Chaymi Salmo 111:10 nin: ‘Yachayniyoq kanapaqqa Tayta Diostam manchakuna, yuyayniyoqmi kayna kawsakuqkunaqa’, nispa (La Nueva Biblia Latinoamérica, 1992).

Qawasunchikyá imaynatam yanaparqa infiernomanta cheqap yachasqan Kathleen sutiyoq Drogakuq warmita. Payqa fiestakunallapiña, maqanakuypi hinaspa huchapakuyllapiña puriqmi karqa, hinaspam kikintapas mana allinpaqña hapikurqa. Watachayoq warmachanta qawaspan kayna piensasqantam pay willakun: “Kay rurasqaymantam rawrachkaq ninapi rupasaq”, nispa. Achka kutipim droga saqeyta munarqa ichaqa manam atirqachu. Paymi nin: “Allin runa kaytam munarqani ichaqa vidaypas runakunapa vidankupas mana allinllañam rikchakuwarqa. Manam cambiayta atirqanichu”, nispa.

Chaymantam Jehová Diospa testigonkunata reqsirurqa. Paymi nin: “Bibliawanmi  allintapuni yachachiwarqaku nina rawraq infierno mana kasqanta. ¡Ninapi mana rupanayta yacharuspaymi kusisqa sientikurqani!”, nispa. Yachachirqakutaqmi kay Pachapi runakuna mana sasachakuspa wiñaypaq kawsakunankumantapas (Salmo 37:10, 11, 29; Lucas 23:43). Nirqataqmi: “Paraisopi wiñaypaq kawsanaypaqmi chayraq suyakuyniy karqa”, nispa.

Kathleen sutiyoq warmiqa manchakusqan infierno mana kasqanta yacharuspan, ¿drogakuq kasqanta saqerurqachu? Paymi nin: “Sapa kuti drogakuyta munaspaymi Jehová Diospa yanapakuyninta mañakurqani mana drogakunaypaq. Yuyarirqanitaqmi chay vicioykunaqa Diosta mana gustasqanta, chaymi llakichiytaqa mana munarqanichu. Payqa contestamuwaqpunim mañakusqaytaqa”, nispa (2 Corintios 7:1). Diosta piñarachiyta mana munaspanmi Kathleenqa drogakuyta saqerurqa.

Diospa kamachisqanta kasukunapaqqa manam infiernota manchakuychu kallpanchawananchik aswanqa Diosta kuyasqanchikmi. Chaynata ruraspanchikqa wiñaypaqmi kusisqa kawsakusunchik. Salmos qellqaqmi nirqa: ¡Mayna kusisqam Jehová Diosta llapallan manchakuqkunaqa!, paypa munasqanman hina kawsaqkunaqa!, nispa (Salmo 128:1, Reina-Valera, 1960).

[9 kaq paginapi dibujokuna hinaspa recuadro]

¿PIKUNATAQ INFIERNOMANTA LIBRASQA KANQAKU?

Wakin Bibliakunaqa pantachinmi griego rimaypi guéenna hinaspa háides palabrakunata “infierno” nispa tikraspanku. Bibliapi guéena nispaqa rimachkan manaña kawsarimuspa wiñaypaq wañuymantam. Háides (castellanopi Hades) nisqapi tarikuqkunam ichaqa wañuymanta kawsarimunqaku.

Chaymi Jesus wañukuspan kawsarimusqanmanta apostol Pedro kaynata nirqa: ‘Cuerponqa manapunim infiernopiqa saqesqachu karqa’, nispa (Hechos 2:27, 31, 32; Salmo 16:10 La Sagrada Biblia, de Guillermo Jünemann). Kay textopi infierno nisqanqa griego rimaypi háides nisqamanta tikrasqam kachkan. Chaynaqa, Jesusqa manam nina rawrachkaq infiernopichu karqa aswanqa Hades nisqapim, kayqa llapallan wañuqkunapa sepulturanmi. Ichaqa manamá payllatachu Diosqa libranqa, Hades nisqamantaqa libranqataqmi hukkunatapas.

Hamuq tiempopi kawsarimuymanta rimaspanmi Biblia kaynata nin: ‘Qomurqataqmi wañuypas chaynataq infiernopas chaypi kaq wañusqakunata’, nispa (Apocalipsis [Revelación] 20:13, 14, Reina-Valera, 1909). Chaynaqa Diospa yuyayninpi kaqkuna kawsarimuptinmi infiernopiqa manaña pipas kanqachu (Juan 5:28, 29; Hechos 24:15). ¡Ima sumaq suyakuymi kayqa! Ancha kuyakuq Jehová Diosmi wañuqkunata kawsarichimunqa kaqllamanta tupananchikpaq.