Diosman asuykuychik

Allin ruraykunatam Jehová Diosqa kuyan

Hebreos 10:26-31

¿HAYKAQLLAPAS mana allin ruraykunawan pipas ñakarichisurqankichu? Pipaqpas chaynapi tarikuyqa manamá facilchu kanman aswanraqmi chay runa huchanmanta mana wanakuptin otaq mana castigasqa kaptinqa. Aswanraqmi nanawanchik confiasqanchik runa chaynata rurawaptinchikqa. Chaynapi tarikuspaqqa yaqachá kaynata tapukunchik: “¿Imanasqataq Diosqa kaykuna pasananta saqen?”. * Jehová Diosqa cheqninmi mana allin ruraykunataqa. Bibliaqa willawanchikmi huchankumanta mana wanakuqkunata Dios castigananta. Chaytam apostol Pablo Hebreos 10:26-31 nisqanpi qellqarqa, chaymantayá yachasunchik.

Kaynatam Pablo qallarin: “Salvakunanchikta yachachkaspaña huchapiraq kawsaptinchikqa manañam hucharayku huk ofrendaqa kanñachu”, nispa (26 versiculo). ¿Imanasqataq chayna ruraqkunaqa mana pampachanapaq hina kanku? Huchallikuytapuni munasqankuraykum. Chaymantapas, mana penqakuspañam huchallikuypi kawsanku, chaytaqa ruranku manamá pantaq runa kasqankuraykullachu, aswanqa chay runakunapa sonqonpi huchallikuyllaña munaychakuptinmi. Chaymantañataqmi Diospa cheqap yachachikuyninta “yachachkaspaña” huchallikusqankurayku, paykunaqa ima ruranankuta yachachkaspankum mana kasukuyta munankuchu.

Ichaqa, ¿imatataq Diosqa piensan chay mana wanakuq huchallikuqkunamanta? Pabloqa ninmi, ‘manañam huchankurayku huk ofrendaqa kanñachu’ nispa. Cristopa wañusqanqa pantaq runa kasqanchikrayku huchallikusqallanchikmantam librawanchik (1 Juan 2:1, 2). Chaymi, pipas huchallikuspa mana wanakuqqa manam valorachkanchu Diospa churin ñoqanchikrayku wañukusqanta. Chayna runatam Jehová Diosqa qawan ‘Churinta sarutyaspan [. . .] yawarninta despreciachkaqta’ hina (29 versiculo). Chayna rurasqankum qawachin Jesusta hinaspa yawarnintapas mana valorniyoqta hina hapispa despreciasqankuta. Cheqapmá chayna mana agradecekuq runakunaqa manam Cristopa wañusqanwanqa yanapachikunmanchu.

Hinaptinqa, ¿imapitaq chayna runakunaqa tukunqa? Jehová Diosmi prometen: “Mana allin ruraqkunataqa kikiypunim castigasaq”, nispa (30 versiculo). Pipas runamasinpa contranpi huchallikuqkunaqa kaytam yuyarinanku: Diosmantaqa manam pipas burlakunmanchu nitaq mana allin rurasqanmantaqa mana castigasqaqa qepanmanchu. Chaymi achka runakuna mana allin rurasqankumanta ñakarinku (Galatas 6:7). Sichum kunan tiempo wakin runakuna mana ñakarispankupas Diospa castiganan punchawpim cuentata qonqaku (Proverbios 2:21, 22). Manataqmi qonqanachu Pablopa kayna nisqanta: “¡Mayna mancharikuypaqmi kawsachkaq Diospa makinman wichiykuyqa!” (31 versiculo).

Kaykama yachamusqanchikman hina, Jehová Diosqa juzganqapunim yachachkaspanku huchallikuqkunataqa. ¡Maynatamá kaymanta yachayqa consuelawanchik!, aswanraqmi mana allin ruraq runakunapa huchankurayku ñakariqkunataqa. Jehová Diospim confianchik, payqa mana allin ruraq runakunataqa tiempollanpim chinkachinqa.

[Willakuy]