Tayta-mamakuna warmaykichikta yachachiychik

¿Imatataq yachachwan Joseypa envidioso wawqenkunamanta?

¿YACHANKICHU imataq envidianakuyqa? ¿Piñakurqan­kichu piwanpas allin ru­rasqanmanta, sumaq kasqanmanta, allin yachayniyoq kasqanmanta nis­qankurayku? *... Chaynaqa sientekunchik pimantapas envidiakuspanchikmi.

Sichum tayta-mamakuna hukkaq churi-wawallanta masta kuyaptinqa churipuram envidianakunmanku. Bibliam willawanchik chayna sasachakuypi kaq familiamanta. Qawasunchikyá imam pasarqa hinaspa yachasunchik imapim yanapawanchikman.

Jacobpa llapan 12 churinkunamanta sullka kaqpa mayorninmi Joseyqa karqa, paytam wawqenkuna envidiakurqaku. ¿Yachankichu imanasqa?... Llapan churinkunamantapas taytan astawan kuyasqanraykum. Paytaqa kuyarqa “machuyayninpiña” kuyasqan señoran Raquelwan punta churin kaptinmi. Chaymi rurachipurqa suma-sumaq pachantapas.

Bibliam willawanchik Joseyta “aswan masta” taytanku kuyasqanta yacharuspanku wawqenkuna cheqniyta qallaykusqankumanta. Aswanraqmi cheqnirqaku mosqokusqanpi wawqenkuna chaynataq taytanpas paypa ñawpaqninpi qon­qorakusqankuta willakuptin. Chayta uyarispankum ‘wawqenkunaqa envidiakurqaku’, taytanpas qaqchaparqataqmi mosqoynin willakusqanmanta (Genesis 37:1-11).

Joseyqa 17 watanpiña kachkaptinmi wawqenkunaqa taytanpa ovejankunata hinaspa cabrankunata karupi michichkarqaku. Hinaptinmi taytanqa wawqenkunata qawaramunanpaq kacharqa. ¿Yachankichu imatataq piensarurqaku Joseyta rikuruspanku?. .. ¡Wañuchiytam! Ichaqa chay ruranankutam Judawan Rubenqa mana munarqakuchu.

Egipto lawman negociantekuna chayninta riptinmi Juda nirqa: “Rantikurusunchik”, nispa. Chaynatamá rurarqaku. Hinaspam chivatochata wañurachispanku yawarninwan Joseypa suma-sumaq pachanta chapururqaku. Taytanman chayta qawaykachiptinkum qaparirqa: “Ima purun animalchiki paytaqa mikurun”, nispa (Genesis 37:12-36).

Tiempopa risqanman hinam Egipto nacionpi rey faraonpa favorecesqan karqa. Chaynaqa karqa faraonpa mosqoyninkuna ima nisqanta willananpaq Dios yanapaptinmi. Punta mosqoyninpim rikurqa qanchis sumaq wira vacakunata, qepantañataqmi qanchis tullu vacakunata. Huknin mosqoyninpiñataqmi rikurqa qanchis sumaqllaña espigakunata qepantañataqmi qanchis mana valeq espigakunata. Joseymi nirqa: qanchis watam kanqa sumaqllaña cosecha chaypa qepantañataqmi kanqa qanchis wata muchuy, nispa. Chay willasqanmantam faraonqa kikin Joseyta nombrarqa chay allin tiempokunapi kawsayta huñunanpaq.

Chaymantam qanchis wata muchuy chayaramurqa hinaptinmi Joseypa familianpaqqa manaña mikunanku karqañachu. Chaymi Jacobqa Joseypa chunka wawqenkunata kacharqa Egiptomanta mikuyta rantimunankupaq. Ichaqa manam Joseytaqa reqsirqakuchu qayllanpi kachkaspankupas. Hinaptinmi pi kasqanta mana willakuspallan wawqenkunata pruebaman churarqa mana allin rurasqankumanta wanakusqankuta yachananpaq. Wanakusqankuta qawaspanmi Joseyqa pi kasqanta willakurqa hinaspam abrazaykurqa. ¡Maynatachá llapallanku kusikurqaku! (Genesis 40-45 capitulokunata.)

Kaymanta yachasqanchik, ¿imatam yachachiwanchik envidianakuymanta?... Envidiakuyqa mana allin ruraykunamanmi tanqawanchikman. Hinaspapas ¡wawqenchikpa contranpipas mana allinkunatam rurarunchikman! Leesunchik Hechos 5:17, 18 hinaspa Hechos 7:54-59. Runakuna envidiakuspanku, ¿imatataq rurarqaku Jesuspa qatiqninkunata?... ¿Musyankichu imanasqataq mana envidianakunanchikchu?...

Joseyqa 110 watankamam kawsakurqa, karqam churinkuna, willkankuna hinaspa willkankunapa churinkunapas. Hinaptinqa yachachirqachá kuyanakuspa mana envidianakunankupaq (Genesis 50:22, 23, 26).

[Willakuy]

Tapukuykuna:

○ ¿Yachankichu imataq envidianakuyqa?

○ Joseypa wawqenkuna, ¿imatataq rurarqaku envidiakuspanku?

○ ¿Imanasqataq Joseyqa pampachaykurqa?

○ ¿Imatataq kaymanta yacharunki?