Jesusqa allin ejemplom hatikunapaq

¿MUNANKICHU allin runa kayta hinaspa kusisqa kawsakuytapas? Chayna kanapaqmi apostol Pedro kaynata niwanchik: “Cristopas ñoqanchikraykum ñakarirqa chaynapi paypa ejemplonta qatinanchikpaq”, nispa (1 Pedro 2:21). Chaynaqa, Jesusmanta hinaspa admirakunapaq vidanmantaqa achkatam yachachwan. Chay yachasqanchikkunata kasukuspanchikqa allin runa hinaspam kusisqa kasunchik. Hinaspaqa, Jesuspa suma-sumaq kayninkunamantayá yachasunchik chaynataq paypa ejemplonta imayna qatipakunapaq piensasunchik.

Allin tanteaq hinaspa allin entiendeqmi karqa. Jesuspunim nirqa, ‘manam kapuwanchu maypi puñuykunaypas’ nispa, chayna kaptinpas manam llakisqachu kawsarqa (Mateo 8:20). Bibliaqa willawanchikmi hatun convidokunaman risqanmanta (Lucas 5:29). Casamientopi yakuta vinoyachisqan punta kaq milagro rurasqanmi qawachin runakunamanta mana karunchakusqanta (Juan 2:1-11). Chayna kaptinpas, payqa nirqam: ‘Kachamuwaqniypa munasqanta ruraymi hinaspa kamachiwasqantapas tukuymi’ ancha allinqa nispa (Juan 4:34).

□ “Ñoqanchikpas tapukuchwanmi. ¿Imatataq puntapi churachkani munasqaykunatachu icha Diospa munaynin ruraytachu?”

Kuyakuqmi karqa. Bibliaqa Jesusmantam willawanchik kuyakuqllaña kasqanta. Payqa manam piñakurqachu sasachakuyninkuta willaspa runakuna asuykuptinkuqa nitaq sasachakunanpaq hina tapuptinkupas. Huk kutipim 12 wataña onqoq warmi achka runakunapa chawpinpi Jesusta qawaspan asuykurqa llachpaykuspalla sanoyaruyta piensaspan. Chay warmipa rurasqanta hukkuna mana allinta qawaptinkupas Jesusqa manamá piñakurqachu. Aswanmi Jesusqa nirqa “mamáy, iñisqaykiraykum allinyarunki”, nispa (Marcos 5:25-34). Warmachakunapas mana manchakuspam paymanqa asuykuqku (Marcos 10:13-16). Discipulonkunata confianzawan Jesus rimapayaptinmi paykunapas hawka tarikuqku (Marcos 6:30-32).

□ Lliwmi tapukunanchik kaynata: “¿Asuykamuwanankupaq hinachu kani?”

Llakipayakuqmi karqa. Jesusqa sonqomantam sienterqa runakunapa ñakariyninta chaymi tukuyta ruraq yanapananpaq. Chaymi Lazaro wañukuptin panin Mariapa waqasqanta qawaspan Jesus “sonqonpi sinchita llakikurqa” hinaspam “waqarqa”. Apostol Juanpa willasqanman hinam Jesusqa sutillata Lazarotawan familianta kuyarqa chaymi waqarqa. ¡Maynatachá kuyarqa kawsarichinanpaqqa! (Juan 11:33-44.)

Huk kutipipas leprawan onqoq runam Jesusta ruegakurqa: “Señorlláy, munaspaykiqa allinyaykachillawayá”, nispa.  ¿Imanirqataq Jesusqa? Llapchaykuspanmi nirqa: “Arí, munanim, allinyayña”, nispa (Mateo 8:2, 3). Jesusqa manamá Bibliapa nisqanta cumplinallanpaqchu runakunataqa hampirqa aswanqa ñakarisqankumanta yanapayta munaspanmi. Kayna yachachisqanman hinam imatapas rurarqa: “Runamasikichik qamkunapaq allin kaqkuna rurananta munaspaqa qamkunapas paykunapaqyá allin kaqkunata ruraychik” (Lucas 6:31).

□ ¿Imanichwantaq ñoqanchikmantaqa? ¿Rurasqanchikkuna qawachinchu llakipayakuq kasqanchikta?

Entiendekuqmi karqa. Mana pantaq runa kaspanpas manam hatunchakurqachu nitaqmi mana allinta tanteaspachu imatapas rurarqa. Huk kutipim fariseo runa Jesusta convidarqa wasinpi mikuykamunanpaq, chaypim ‘huchasapa warmi Jesuspa chakinta weqenwan mayllarqa’. Payqa manamá harkakurqachu, fariseo runam ichaqa chay warmita qaqchaparurqa. Warmipa iñisqanta Jesus musyaspanmi nirqa: “Iñiynikim salvarusunki, hawkaña pasakuy”, nispa. Jesuspa chayna kasqanchá chay warmita yanaparqa vidanta cambiananpaq (Lucas 7:37-50).

□ ¿Imatataq ñoqanchikmanta nichwan, runamasinchik alabaykuqchu icha contrankupi rimaqchu kanchik?

Mana pimanpas sayapakuspa respetakuqmi karqa. Bibliapi Jesusmanta willakuq tawa librokunapim ninku Jesusqa discipulon Juantaqa familian otaq pay hina sumaq kayniyoq kasqanraykuchá anchata kuyarqa, nispa. * Chayna kaptinpas, Jesusqa manamá wakin discipulonkunamantaqa astawanchu favorecerqa (Juan 13:23). Diospa gobiernonpi allin favorecesqa kanankupaq Juanwan Jacobo Jesusta mañakuptinkum pay nirqa: “Alleq lawniypi otaq ichoq lawniypi tiyaykuyqa manam ñoqallamantachu”, nispa (Marcos 10:35-40).

Chaymantapas respetowanmi pitapas qawaq. Payqa manam hukkuna hinachu karqa. Wakin runakuna warmikunata mana valeqta hina qawaptinkupas, payqa respetarqam. Chaytam qawachirqa Cristo kasqanta manaraq pipas yachachkaptin huk warmiman willasqanpi. Respetowanmi rimapayarqa chay Samaria law warmita, chay law runakunatam judiokunaqa cheqniqku hinaspam mana rimayllapas rimaykuqkuchu (Juan 4:7-26). Chaymantapas Jesus kawsarispanqa warmikunamanmi puntata rikuriykurqa (Mateo 28:9, 10).

 □ Huk castayoq, huk nacionniyoq, huk rimayniyoq runakunawan hinaspa warmikunawan otaq qarikunawanpas, ¿Jesus hinachu respetakuq hinaspa mana sayapakuq kanchik?

Familianwan debernintaqa allintam cumplirqa. Yaqapaschá Jesus mozollaraq kachkaptin uywaqnin taytan Joseyqa wañukurqa. Chayna kaptinqa paychiki mamantawan wawqe-paninkunata mantienerqa carpintero hina llamkaspa (Marcos 6:3). Wañuchkaspanñapas mamanmantaqa preocupakurqam chaymi kuyasqan discipulonta nirqa mamanta cuidananpaq (Juan 19:26, 27).

□ ¿Jesus hinachu ñoqanchikpas familianchikmanta preocupakunchik?

Allin amistadmi karqa. ¿Imanasqataq Jesusqa allin amistad karqa? Amistadninkuna sapa kuti pantaptinkupas paykunamantaqa manam karunchakurqachu. Wakin kutikunapipas Jesuspa munasqanman hinaqa manam rurayta atirqakuchu. Chayna kaptinpas paykunapa sumaq kayninkunapi reparaspanmi amistadnintaqa qawachirqa, manam pantasqallankutachu qawarqa (Marcos 9:33-35; Lucas 22:24-27). Manataqmi munasqanman hina ruranankupaqchu kamachirqa aswanqa kallpancharqam piensasqankuman hina rimarinankupaq (Mateo 16:13-15).

Jesusqa tukuy sonqonmantam paykunataqa kuyarqa (Juan 13:1). Chaymi nirqa: “Hatu-hatun kuyakuyniyoqqa amistadninkunapa rantinpi wañuqmi”, nispa (Juan 15:13). ¿Pipas amistadninkunarayku vidanta qonmanchu?

□ Tapukusunchik: “¿Imaynataq ñoqaqa kani? ¿Imatataq rurani pipas sientichiwaptin?”

Mana manchakuq runam karqa. Runakunam Jesustaqa dibujanku mana valorniyoqta hina, ichaqa qarinchakuq runam payqa karqa. Iskay kutikamam qarqorqa templopi rantikuqkunata (Marcos 11:15-17; Juan 2:14-17). Chaymantapas Jesusta presochanankupaq achka runakuna maskaptinkupas mana manchakuspam payqa nirqa: “Ñoqam kani”, nispa. Qatiqninkunata amparananpaqpas nirqam: “Ñoqata maskawaspaykichikqa paykunataqa dejaychikyá pasakunankupaq”, nispa (Juan 18:4-9). Chaymi Jesusta maqaptinkupas hawkalla kasqanta qawaspan kikin Pilato admirasqa nirqa: “¡Kayqayá kay runaqa!”, nispa (Juan 19:4, 5).

□ ¿Ñoqanchikqa imatataq rurachwan? ¿Imapas kaptin mana iskayrayaspachu valorchakuspa ruranchik?

Jesuspa kay sumaq kayninkunamanta yachasqanchikkunam qawachiwanchik allin ejemplo qatikunanchikpaq kasqanta. Hinaptinqa Jesuspa ejemplonta qatikuspanchikqa allin runa hinaspa kusisqam kawsakusunchik. Chaymi apostol Pedro kallpanchawanchik Jesuspa ejemplonta qatikunanchikpaq. Chaynaqa, ¿kallpanchakuchkanchikchu Jesuspa ejemplonta qatikuypi?

Salvawaqninchikmi

Jesusqa manam vidanchikpi ejemplollanchikchu. Paypunim nirqa: “Ñoqam kani ñan, cheqap kaqpas chaynataq kawsay qokuqpas. Taytaymanqa manam pipas chayanmanchu mana ñoqawanqa”, nispa (Juan 14:6). Diosmanta cheqapta yachachiwaspanchikqa Diosman imayna asuykunamantapas yachachiwarqanchikmi. Jesus rantinchikpi wañusqanraykum Diosman sonqo serviqninkunaqa wiñay kawsayta haypanku (Juan 3:16).

¿Imaynataq chayqa kanman? Kay Allpa pachaman hamusqanmantam Jesus  nirqa: “Diosmanta Hamuq Runapas manam servichikunaypaqchu hamurqani aswanqa servinaypaqmi hinaspa achka runakunapa rantinpi wañunaypaqmi”, nispa (Mateo 20:28). Chaymi Jesusqa rantinchikpi wañusqanwan kusisqa wiñaypaq kawsananchikpaq suyakuyta qowarqanchik. Chaynaqa, ¿imatataq rurananchik? Jesuspunim niwarqanchik: “Chay wiñay kawsayniyoqqa kanku sapallan cheqap Dios kasqaykita reqsiqkunam hinaspa kachamusqayki Jesucristota reqsiqkunam”, nispa (Juan 17:3).

Chaynaqa, Jesusmanta yachaspanchik, ejemplonta qatikuspanchik hinaspa ñoqanchikrayku wañukusqanpipas iñispanchikqa wiñaypaq kawsananchikpaqchá allinta rurachkanchik. Chaymi kay revista leeqkunata kallpanchaniku Bibliata estudianankupaq hinaspa yachasqankuta Jesus hina kasukunankupaqpas. *

Jesuspa sumaq ejemplonmi yachachiwanchik imayna kawsananchikpaq. Chaymantapas, wañuyninmi huchamantawan wañuymanta librawanchik (Romanos 6:23). Manachayqa llakisqa hinaspa mana suyakuyniyoqchá kachwan. Hinaptinqa, Jesucristopa ejemplonta qatikunanchikpaqqa amayá sasachakuykunawanqa harkachikusunchu.

[Willakuykuna]

[6 kaq paginapi dibujokuna hinaspa recuadro]

▪ Mana pimanpas sayapakuspa respetakuqmi karqa

▪ Wañunankamam allin amigo kasqanta qawachirqa

▪ Mana manchakuq runam karqa

¿Kallpanchakuchkanchikchu Jesuspa ejemplonta qatikunanchikpaq?

[4 kaq paginapi dibujokuna]

Jesusqa allin tanteaqmi . . .

kuyakuqmi . . .

llakipayakuqmi karqa