Kunanmi akllakunanchik imayna kananchikta

“Diosmi runata unancharqa. Kikinman rikchakuqtam rurarqa. Qaritawan warmitam unancharqa.” (Genesis 1:27.)

BIBLIAPA qallariyninpi kay reqsisqa rimayqa qawachinmi ‘tiempollanpi sumaqllataña’ Diospa rurasqanmanta: paykunam karqaku Adanwan Eva, mana huchayoq runakuna (Eclesiastes 3:11). Paykunatam Dios nirqa: “Wawa-churiyoqyá kaychik, kay pachamanyá huntaychik, munaychakuychikyá lamar qocha challwakunapi, munaychakuychikyá alton pawaq animalkunapi. Munaychakuychikyá allpapa hawanpi, llapallan qasqonpa puriq animalkunapi”, nispa (Genesis 1:28).

Kaynata nispanmi Diosqa qawachichkarqa runakunapaq ima munasqanta: munarqam wawa-churiyoq kanankuta hinaspa kay pachata cuidaspanku sumaq huertaman tikranankuta. Diosqa manam nirqachu haykapikama kawsanankuta nitaq haykapi wañunankutapas. Aswanmi nirqa sumaqllataña kawsakunankupaq. Allinta akllakuspa Diospa kamachikuyninta kasukuspankuqa, wiñaypaqmi  kusisqalla hinaspa hawkalla kawsakunmanku karqa.

Kunanmi ichaqa llapallanchik yuyaqyaspa wañunchik. Diosta serviq Jobmi nirqa: “Runapa vidanqa pisi tiempollapaqmi” hinaspa “llumpay amirunallapaqmi”, nispa (Job 14:1). ¿Imanasqataq chayna vidanchik?

Bibliam nin: “Huk runallawan kay pachapi huchallikuy qallariruptinmi chayrayku wañuypas rikurirurqa chaymi lliw runakuna huchallikuspanchik wañunchik”, nispa (Romanos 5:12). Chay runam Adan karqa, paymi Diospa kamachikuyninta kikinmanta mana kasukurqachu (Genesis 2:17). Chayna mana kasukusqanwanmi sumaqllaña huertapi wiñay kawsakuyta chinkarachirqa. Manam chayllachu, aswanmi mirayninkunamanpas huchatawan wañuyta saqerurqa. Ichaqa, ¿chaynachu wiñaypaq kananku karqa?

Munayninta Dios ruraptin

Tiempopa risqanman hinam Diosqa salmos libro qellqaqta nirqa: “Allin ruraq runakunam allpataqa dueñoyanqaku. Paykunaqa chaypimiki wiñaypaqraq kawsakunqaku”, nispa (Salmo 37:29). Arí, Diosninchikqa cumplinqamá qallariyninpi runakunapaq munasqantaqa, Bibliam nin: “Diosmi pichanqa paykunapa weqenta, manañam kanqachu wañuypas [. . .], waqaypas nitaq nanaypas. Ñawpaq kaqkunaqa pasarunñam”, nispa. Nirqataqmi: ‘Ñoqam mosoqyachisaq tukuy imata’, nispa (Apocalipsis 21:4, 5).

Arí, imapaqpas tiempo kasqanraykum, kaynata tapukuchwan: “¿Haykapitaq runakunapaq Diospa munasqanqa rurakunqa?”, nispa. Kay revistata ruraq, Jehová Diospa testigonkunam ‘tukupay tiempopi’ kawsasqanchikmanta hinaspa Dios ‘tukuy imata mosoqyachinanpaq’ tiempo hichpallapiña kasqanmanta runakunaman yachachinankupaq kallpanchakunku (2 Timoteo 3:1). Chaymi kallpanchaykiku Bibliata estudiaspa hamuq tiempopaq Diospa munasqanmanta yachanaykipaq. Bibliam kaynata niwanchik: “Tarinaykichikpaq kachkaptillanraqyá Tayta Diosta maskaychik. Hichpaykichikpi kachkaptillanraqyá Tayta Diosta qayakuychik”, nispa (Isaias 55:6). Yuyariy, wiñay kawsayqa qanmantam kanqa manam destinomantachu. Hinaptinqa, vidayki imayna kanantaqa qanmi akllakuwaq.

[7 kaq paginapi suti rikuylla kaq willakuy]

‘Ñoqam mosoqyachisaq tukuy imata’