Amparakuy mana allin espiritukunamanta

JAMES sutiyoq runam wiñarqa Malaita llaqtapi; chayqa kachkan islas Salomón nisqa nacionpim. Warma kasqanmantapacham espiritukunata mañakunanpaq yachachisqa karqa, hinaspam rarafono nisqata rurarqa; kayqa espiritukunata qayakunapaq costumbrekunam. Paymi willakun: “Manam haykapipas runakunata daño rurananpaqqa chay espiritukunata qayakuytaqa piensarqanichu, manataqmi chay costumbrekunata mana ruraspayqa hawkataqchu karqani”, nispa.

Huk law llaqtakunapi hinam kay Salomón islapi yachaq runakunapas piensanku espiritukuna runakunata daño rurasqankuta chaynataq yanapasqankutapas. Chaypi yachaq runakunaqa manam chay espiritukunataqa manchakunkuchu, aswanmi kuyanku, yanapakuq kasqankuta piensaspanku.

Espiritukuna yanapasqankupi piensasqankutam qawachinku tukuy ima costumbre rurasqankupi. Jamespa llaqtanpim korokoro nisqa pawaq animalpa waqasqanta uyariruspanku, warmikunaqa wawankuta utqaylla wasinkuman apaykunku. Chay animalpa waqasqanta uyarispankum piensanku pipas wañunanta.

Chaymantapas mana allin espiritukunamanta waqaychakunankupaqmi yuraq rumita wasinku punkupi churanku. Jamespas chayna costumbrekunataqa ruraqmi. Llamkayninpipas mikuyninpa puchuntam bolsapi huñuq, chaynapi layqa ruraqpas chaykunawan mana daño rurananpaq.

Kayna costumbrekunaqa yaqapaschá llaqtaykipiqa mana kanchu. Chayna kaptinpas, James hinapaschá allinnikipaq kasqanta piensaspayki espiritukunamanta cuidakunaykipaq ima costumbrekunatapas rurachkanki.

Bibliapa nisqanpi iñispaykiqa, kay tapukuykunamantachá yachayta munanki: 1) ¿Imaynatataq mana allin espiritukunaqa dañota rurawachwan? 2) ¿Cheqaptapunichu costumbrekuna rurayqa waqaychawachwan mana allin espiritukunamanta? ¿Icha, astawanchu espiritukunawan munaychachikuchwan? 3) ¿Maypitaq allin yanapakuyta tarichwan espiritukunamanta waqaychakunapaq?

 Imaynatam dañota rurawachwan mana allin espiritukuna

Bibliapa nisqanman hinaqa mana allin espiritukunaqa manam wañuqkunapa almanchu. Ninmi: “Wañunanmantam yachanku kawsaqkunaqa. Manam imatapas yachanchu wañuqkunaqa”, nispa (Eclesiastes 9:5). Kay mana allin espiritukunaqa Diosta mana kasukuq angelkunam, paykunam Satanasman hukllawakurunku runakunata engañanankupaq (Apocalipsis 12:9).

Chaymi Bibliaqa niwanchik chay espiritukunamanta cuidakunanchikpaq. Efeso llaqtapi cristianokunamanmi apostol Pablo kaynata nirqa: ‘Manam peleachkankichikqa aychayoq tulluyoq runakunawanchu, aswanqa tutayaypi kamachikuqkunapa [. . .] contranpim, [. . .] altokunapi mana allin espiritukunapa contranpi’, nispa. Apostol Pedropas chay espiritukunapa kamachiqnin Satanas Diablotam tupachirqa muyuriqnikichikpi purichkaq yarqasqa leonwan (Efesios 6:12; 1 Pedro 5:8).

Hinaptinqa, ¿imaynatataq Satanasqa dañota rurawachwan? Engañawaspanchik hinaspa Jehová Diospa contranpi imatapas ruranapaq munachiwaspanchik. Chaymi Satanasmanta Bibliaqa niwanchik “tikrakunmi achkirichkaq angelman”, nispa (2 Corintios 11:14). Payqa allin espiritu tukuspanmi mana allinkunallata ruran. Runakunapa yuyaynintam tutayachin, paymantawan Diosmanta mana cheqapta yachanankupaq (2 Corintios 4:4). ¿Imaraykutaq chayta ruran?

Satanasqa kikillanpaq munaq kasqanraykum lliw runakuna payta servinankuta munan. Chaynallataqmi Diospa churin Jesucristotapas kay Allpapi kachkaptin tentarqa ‘qonqorakuspan adorananpaq’. Jesusmi ichaqa nirqa: “Pasaway kaymanta Satanas, Bibliam nin: ‘Señor Diosllaykitam adoranki, payllatataqmi servinkipas’”, nispa (Mateo 4:9, 10). Jesusqa manam imatapas rurarqachu Satanaspa makinpi churakunanpaqqa, mana chayqa Diospa contranpichá churakunman karqa.

Jehová Diostaqa manam ima espiritupas atipanmanchu, manataqmi saqenqachu serviqninkunatapas llumpay daño ruranantaqa (Salmo 83:18; Romanos 16:20). Chaymi Jehová Diosta kusichiyta munaspaqa Jesus hina rurananchik, manamá mana allinkunataqa rurananchikchu Satanaswan demonionkuna munaychakuwananchikpaqqa. Chaymi, espiritukunawan tupaq costumbrekunata reqsiyninchikqa ancha allin. Hinaptinqa, ¿imaynatam reqsichwan?

Imaynatam reqsichwan Diospa cheqnisqan costumbrekunata

Ñawpaq tiempopim israelitakunata Jehová Dios kamachirqa hichpanpi kaq llaqtakunapa costumbrenkuta mana qatipakunankupaq. Nirqam: “Amam qamkuna ukupiqa kanqachu adivinaqkuna [. . .] nitaq brujokunapas nitaq layqakunapas nitaq adivinota tapukuqkunapas nitaq mana allin espiritu tapukuqkunapas”, nispa. Hinaspam imanasqa chayna kasqanmanta nirqa: “Chaykuna ruraqtaqa Tayta Diosmi millakun”, nispa (Deuteronomio 18:10-12).

Chaymi ima costumbretapas manaraq rurachkaspa tapukunanchik: “¿Kay costumbreqa layqa ruraywan hinaspa pagapo ruraykunawanchu tupan? ¿Pitapas ivinkinankupaqchu chay costumbrekunata ruranku otaq waqaychakunmi nispachu servichikunku? ¿Kaykunata ruraspay mana allin espiritukunamanchu hapipakuchkayman icha Jehová Diosman hinaspa Jesucristomanchu?”, nispa (Romanos 14:11; Filipenses 2:9, 10).

Kayna costubrekunataqa manamá haykapipas rurananchikchu. Apostol Pablopa nisqanman hinam Diospa ‘mikunanmanta mikuchkaspaqa [manam] demoniokunapa mikunanmantaqa mikuchwanchu’. Nirqataqmi pipas Diosman chaynataq mana allin espiritukunaman hapipakuspaqa Jehová Diosta ‘piñachisqanta’ (1 Corintios 10:20-22). Jehová Diosqa munanmi payllata yupaychananchikta (Exodo 20:4, 5).

Chaymantapas tapukunanchikmi sichu chay costumbrekuna runakunata tanqan mana allinkunata ruranankupaq, huchapakunankupaq  hinaspa casado kachkaspa pierdekunankupaqpas. Kayna ruraykunatam wakin llaqtakunapi cheqninku, Diospas cheqnintaqmi (1 Corintios 6:9, 10). Ichaqa wakin llaqtakunapim otaq Pacífico lawpim mana imatapas ninkuchu warmi huchapakuruspan “layqaruwanmi” nispa niptinqa. *

Bibliam ichaqa niwanchik Diosman sapakama cuentata qonanchikmanta (Romanos 14:12; Galatas 6:7). Chayna kasqantam allintapuni qawachin punta kaq warmi, Eva. Paymi huchallikusqanta mana reqsikuspan Satanasman tumparqa. Nirqam: “Culebram engañaruwarqa chaymi mikururqani”, nispa. Chayna kaptinpas Diosqa cuentatam mañarqa (Genesis 3:13, 16, 19). Chaynam ñoqanchikmantapas cuentata mañawasunchik (Hebreos 4:13).

¿Imatam rurachwan?

Jehová Diospa kamachikuyninta kasukuyta munaspaqa chaynataq kusichiytapas munaspaqa chaykunamantam karunchakunanchik. Kayna rurasqankumantam allinta qawachiwanchik Efeso llaqtapi yachaq runakuna. Paykunam mana allin espiritukunamanta rimaq librokunata huñuykuspanku “llapallanpa ñawpaqninpi kañarqaku” (Hechos 19:19).

Manam chayllatachu rurarqakuqa, aswanmi ‘huñunakuspanku willakurqaku ñawpaq mana allin rurasqankumanta’ (Hechos 19:18). Arí, apostol Pablopa yachachisqan paykunapa sonqonman chayaruptinmi, espiritukunawan tupaq libronkunata kañarurqaku. Chaynata ruraspankum costumbrenkutapas saqerurqaku.

Achka runakunapaqmi costumbrenkuta saqeyqa sasa. Qallariypi rimamusqanchik James sutiyoq runam Jehová Diospa testigonkunawan Biblia estudiayta qallaykurqa. Yachasqanwan kusisqa tarikuspanpas hinallam rarafono costumbrenta rurarqa. Yachasqankunapi yuyaymanaspanmi, reqsikurqa Diospa promesankunapi iñispanpas, hinallaraq espiritukuna waqaychananpaq costumbrenkuna rurasqanta.

¿Imataq yanaparqa chayta saqenanpaq? Paymi nin: “Jehová Diostam mañakurqani waqaychawananpaq hinaspa paypi confianaypaq, chaynapim chay costumbrekunata saqerurqani”, nispa. ¿Sasachakuykunapichu chayrayku tarikurqa? Jamesmi nin: “Manam. Aswanmi Jehová Diospi confianzay yapakururqa hinaspam musyakururqani paywan amistadniy sumaqllaña kananta”, nispa. Qanchis watañam Jamesqa astawan predicaspa Bibliamanta runakunata yachachichkan.

¿Imanasqataq Jamespa rurasqanta mana qatipakunkichu? Llaqtaykipi costumbrekuna imayna kasqanta qawaspa tanteay, ‘Diospa munasqanman’ hinachu kachkan icha manachu (Romanos 12:1, 2). Diospa munasqanman hina mana kaptinqa, kallpanchakuy chay costumbrekunata saqenaykipaq. Ama qonqaychu, Jehová Diosqa ‘chaskisuspaykim’ waqaychasunki (2 Corintios 6:16-18). James hinam qampas Bibliapa nisqan cheqap kasqanta qawanki: “Mana tuñichiy atina torre hinam Tayta Diosqa. Allin ruraq runaqa paymanmi amparakunanpaq kallpaykunqa” (Proverbios 18:10).

[Willakuy]

[21 kaq paginapi dibujo]

“Korokoro“

[Reqsikunchikmi]

Dr. Bakshi Jehangir runapa horqosqanmi

[21 kaq paginapi dibujo]

Kay warmacham mikuyninpa puchunta hoqarichkan mana dañota ruranankupaq