Aslla runakunam millonninpi runakunata gobiernanqa

APOSTOLKUNAPA tiemponmantaraqmi allin sonqoyoq runakunata Diosqa akllayta qallaykurqa churinkuna hinaña kanankupaq. Dioswan sapaq amistadninku qallarisqankutam Bibliaqa tupachin mosoqmanta nacesqankuwan, chaynapi hanaq pachamanta gobiernamunankupaq (2 Timoteo 2:12). Gobiernamunankupaqqa puntatam wañunanku, hinaspam hanaq pachapi kawsarinanku (Romanos 6:3-5). Hinaspañam Jesuswan kuska ‘kay pachata gobiernamunqaku’ (Apocalipsis 5:10; 11:15).

Bibliapa nisqanman hinaqa manam mosoqmanta naceq otaq hanaq pachaman riq cristianokunallachu wiñaypaqqa salvasqa kanqaku. Bibliaqa qallariyninmanta tukuyninkamam willawanchik kay Pachapi millonninpi runakunapas salvasqa kanankumanta. Apostol Juanmi mosoqmanta naceq cristianokunaman qellqaspan nirqa: ‘[Jesusmi huchanchikrayku Diospa] piñakuyninta amachananpaq wañurqa, manataqmi ñoqallanchikpaqchu [otaq aslla runakunallapaqchu] aswanqa kay pachapi llapallan  runakunapaqwanmi [otaq millonninpi runakunapaq]’, nispa (1 Juan 2:2).

Apostol Pablopas nirqataqmi: “Diospa [. . .] unanchasqankunapas [millonninpi runakuna] sinchillataña munaspankum suyachkanku churinkunata [aslla runakunata] Dios reqsichinanta”, nispa (Romanos 8:19-21). ¿Imatam nichkarqaku kay iskaynin apostolkunaqa? Nichkarqakum mosoqmanta naceqkuna hanaq pachaman rispanku gobiernamunankumanta, paykunamá achka bendicionkunata apamunqaku kay Pachapi millonninpi runakunaman. Chaymi Jesusqa qatiqninkunata kaynata mañakunankupaq nirqa: “Munaychakusqayki hamuchun. Munasqaykiyá rurasqa kachun kay pachapipas hanaq pachapi hina”, nispa (Mateo 6:10).

Jesucristo manaraq Allpaman hamuchkaptin ñawpaq qellqakunapim Jehová Diosqa rimarqaña runakuna iskay suyakuyniyoq kanankumanta hinaspa salvasqa kanankumantapas. Kaynatam Abraham serviqninman prometerqa: ‘Kay pachapi lliw runakunam [millonninpi runakuna] miraynikiwan [aslla runakunawan] bendecisqa kanqa’, nispa (Genesis 22:18). Kaypi nisqanman hinaqa lliw runakunam Abrahampa ‘mirayninwan’ bendecisqa kananku karqa.

Ichaqa, ¿pitaq kanman chay ‘mirayqa’? Jesucristowan hinaspa mosoqmanta naceq otaq churinkunapaqña Diospa akllasqan runakunam. Apostol Pablom paykunamanta nin: ‘Jesucristopaña kaspaqa, Abrahampa mirayninmi [. . .] kankichik’, nispa (Galatas 3:16, 29). Hinaptinqa, ¿ima bendicionkunatam lliw runakuna kay ‘miraynintakama’ chaskinqaku? Diospa favornintam haypanqaku hinaspam kay Pachapi sumaqllaña huertapi wiña-wiñaypaq kawsanqaku. Davidmi kaynata nirqaña: “Allin ruraq runakunam allpataqa dueñoyanqaku. Paykunaqa chaypimiki wiñaypaqraq kawsakunqaku”, nispa (Salmo 37:29; Isaias 45:18; Apocalipsis 21:1-5).

Arí, as runakunalla hanaq pachamanta gobiernamuptinkupas, millonninpi runakunam kay Pachapiqa wiñaypaq kawsanqaku. Sonqoykumantapunim munaniku qampas chaynataq familiaykipas Diospa Gobiernonpi sumaq bendicionkunata chaskinaykichikta.

[12 kaq paginapi dibujo]

Mana yupay atina runakunam kay Pachapi wiñaypaq kawsanqaku. ¿Chaypichu ñoqanchikpas kasun?