Mana tayta-mamayoqkunapa taytan
Diosman asuykuychik
Mana tayta-mamayoqkunapa taytan
“DIOSQA mana piyniyoqkunapa taytanmi.” (Salmo 68:5.) ¡Mayna sumaqtam kay rimaykunaqa Jehová Diosmanta qawachiwanchik! Arí, Jehová Diosqa amparanmi mana favorecesqa kaqkunata, chaynallataqmi mana taytayoq otaq mana mamayoq kaqkunatapas. Chayna kasqantam qawachin israelitakunaman kamachikuy qosqanpi. Qawasunchik Exodo 22:22-24 nisqanta, chaypim Bibliaqa chayllaraq riman ‘mana taytayoqkunamanta’. *
Diosmi kamachirqa: ‘Amam [. . .] mana tayta-mamayoqtaqa ñakarichinki[chik]chu’, nispa (22 versiculopi). Kay palabrakunawanqa Diosqa manam israelitakunataqa niyllachu-nichkarqa llakipayakuq kanankupaqqa aswanqa kamachichkarqam. Tayta-maman wañukuptinmi warmachaqa wischusqa mana piyniyoq tarikuqku. Chaymi Diosqa kamachirqa mana ‘ñakarichinankupaq’, otaq wakin Bibliapi nisqanman hina mana “maqapanankupaq”. Qawasunchikyá Jehová Dios ima nisqanmanta.
Nirqam: “Ñakarichisqaykirayku pay mañakuwaptinqa uyarisaqpunim”, nispa (23 versiculopi). Kay textopiqa sapakamamanpas nichkanman hinam rimachkarqa. Kayna nisqanwanmi llapallan israelitakunata kamachichkarqa chay nisqanta kasukunankupaq. Arí, Jehová Diosqa uyarichkarqam mana tayta-mamayoqkunapa qayakusqanta hinaspam yanapananpaq listolla kachkarqa (Salmo 10:14; Proverbios 23:10, 11).
Chaynaqa, ¿imataq pasanman karqa mana piyniyoq warmachata pipas ñakarichiptin, payñataq Diosta qayakuptin? Jehová Diosmi nin: “Chaynata ruraptikichikqa sinchita piñakuspaymi [. . .] wañuchisqaykichik”, nispa (24 versiculopi). Kay textomanta rimaq huk librom nin: “chayqa llumpay piñakuy kasqanta”, tikrakunmantaqmi “senqaymi ruparichkan”, nispa. Chayna ñakarichiqtaqa manam Israel nacionpi juezchu juzganan karqa, aswanmi kikin Jehová Dios (Deuteronomio 10:17, 18).
Jehová Diosqa “haykapipas hina kaqllam” (Malaquias 3:6). Kunanpas hinallam Jehová Diosqa mana piyniyoqkunata llakipayan (Santiago 1:27). Hinaptinqa, amayá qonqasunchu: wakcha warmachakunata ñakarichiyqa Jehová Diostam llumpayta piñachin. Wakcha warmachakunata ñakarichiqqa manam ‘Diospa piñakuyninmantaqa’ lluptinqachu (Sofonias 2:2). Paykunaqa yachanqakumá ‘mayna manchakuypaq kawsachkaq Diospa makinman wichiykuy’ kasqanta (Hebreos 10:31).
[Willakuy]
^ par. 4 Kay rimayqa Bibliapim 40 kutikama rikurin. Hebreo rimaypi ‘mana taytayoq’ nispaqa rimachkanmi, warmi warmamantawan qari warmamantapas (Numeros 27:1-8).