Bibliata entiendenapaq yanapakuykuna

2. Runapa nisqanta mana kasuspam leena

¿Haykapipas mana reqsisqayki runamanta mana allinkunata pipas nisurqankichu? Hinaptinqa, chayllaraq tuparuspaykiqa sasachakurqankichá sumaq kayninkunata qawanaykipaq. Yaqa chaynam Bibliawanpas pasan.

APOSTOL Pabloqa yacharqam Bibliamanta mana allinta piensaspa leeyqa mana allin kasqanta. Paypa tiemponpim wakin judiokuna chayna karqaku, ‘tukuy sonqonkuwan Dios serviyta munaspankupas’ manam Jehová Diospa yachachisqanman hinachu paykunaqa rurarqaku (Romanos 10:2).

Chayna kasqankuraykum prometesqa Mesiasta mana chaskirqakuchu. Bibliapa lliw willakusqankunata señorninchik Jesucristo cumplichkaptinpas judiokunaqa Bibliapa nisqanpiqa manam creerqakuchu runakunapa rimasqankuwan intuchikusqankurayku.

¿Imatam yachachwan judiokuna chayna kasqankumanta? Yachachwanmi yanapawananchikpaq kasqanta piensaspa Bibliata leenanchikpaq. Mana chaynata ruraspanchikqa Diospa yachachikuynintam mana entiendechwanchu.

Estados Unidos lawpi religionkunamanta estudiaq profesormi rimarqa, Bibliaqa runakunallapa piensasqanman hina rurasqa kasqanmanta, chaymantapas nirqataqmi yachachikuyninpas mana tupasqanta chaynataq consejonkunapas mana ancha yanapakuq kasqanmanta. Chaynaqa, ñoqanchikpas Bibliata runakunallapa rurasqanta hina qawaspanchikqa, munasqallanchiktachá kasukusunchik.

Bibliam ichaqa niwanchik, apostol Pablopa tiemponpi Berea llaqtayoq judiokuna hina Bibliata allintapuni estudiananchikpaq. “Paykunam gustollawanña Diospa palabranta uyarispanku sapa punchaw Bibliata estudiarqaku”  (Hechos 17:11). Ñoqanchikpas Bibliata allinta entiendeyta munaspanchikqa, Berea llaqtapi judiokuna hinam Bibliamanta runakunapa nisqankuta mana kasuspa leenanchik. Chaynaqa kallpanchakuyá yanapasunaykipaq hina piensaspa Bibliata leenaykipaq, chaynapi qellqachiq Jehová Diosta astawan reqsinaykipaq.