Diosman asuykuychik

Diosqa justicianman hinam imatapas ruran

Numeros 20:2-13

UYARINCHIKMI wakin juezkuna justiciaman hina mana sentenciasqankumanta. Ichaqa manam chaynachu Jehová Diosqa, payqa kuyanmi justiciataqa (Salmo 37:28). Pacienciakuq kaspanpas manam imatapas saqeyllachu-saqen. Payqa hapipakunmi justicianman. Chaypaq qawasunchik Numeros libropa 20 capitulonpa willakuyninpi imayna juzgasqanmanta.

Israelitakunam, yaqa 40 wata chunniqpi kasqankumanta Prometesqa Allpaman yaykunankupaqña kachkarqaku. * Chaypim mana yaku kaptin Moisespa chaynataq Aaronpa contranpi rimayta qallaykurqaku: “¿Imapaqtaq Tayta Diospa runankunataqa kay chunniqman pusamuwarqankiku? ¿Ñoqaykupas chaynataq animalniykupas kaypi wañunaykutachu munankichik?”, nispa (4 versiculo). Nirqakum chay chunniqpi yakupas, higospas, uvaspas nitaq granadapas mana kasqanmanta, chaykunatam ñawpa watakunapi wateqaq israelitakuna Prometesqa Allpamanta apamurqaku (5 versiculo; Numeros 13:23). ¡Admirakunapaqmi! Moisestawan Aarontam tumparqaku chunniqpi kasqankumanta, hinaspa qepanchasqanku sumaq allpapi mana kasqankumantapas.

Diosqa manam chayllachu paykunataqa wañurachirqa. Aswanmi Moisesta nirqa tawnanta hapispan chaynataq runakunata huñuspan ‘qaqata rimapayaptin yaku pawamunanpaq’ (8 versiculo). Moisesqa qallariyninpi iskay kamachikuytaqa kasukurqam, ichaqa manamá kimsa kaqtaqa. Qaqata rimapayananpaq Diospa nisqanta kasukunanmantaqa, israelitakunatam qaqcharqa: ‘Uyariychik llapa mana kasukuqkuna: ¿Yaqachum kay qaqamanta tomanaykichikpaq yakuta pawarachimuymanku?’, nispa (10 versiculo; Salmo 106:32, 33). Chaymi iskaykama qaqata waqtaruptin, ‘achka yaku pawaramurqa’ (11 versiculo).

Chaynatam Moiseswan Aaronqa huchallikururqaku. Diosmi nirqa: ‘Manam kasuwarqankichikchu’, nispa (Numeros 20:24). Qawasun, qallariypim paykunaqa runakunata nirqaku mana kasukuq kasqankumanta, kunanñataq kikinku mana kasukurqakuchu. Chaymi Dios nirqa Prometesqa Allpaman israelitakunata manaña pusanankupaq. ¿Chaywanqa llumpaytachu castigarurqa? Manamá, ¿imanasqa?

Diosqa manamá Moisestaqa kamachirqachu israelitakunata imatapas ninanpaqqa, manam ninanpaschu karqa, mana kasukuqkuna nispaqa. Manataqmi Moiseswan Aaronqa Diostaqa hatuncharqakuchu. Chaymi Diosqa castigarurqa (12 versiculo). ‘Yakuta pawarachimuymanku’ nispanqa Moisesqa nichkarqam, paykuna yakuta horqonankumanta. Chaymantapas, Diospa chayna castigasqanqa tuparqam wakin chayna castigasqanwan. Yuyarisuntaq, ñawpaqpipas Canaan llaqtaman mana yaykunankupaqmi wakinkuta castigarqa (Numeros 14:22, 23). Chaynataq punta apaqkuna kasqankuraykum, Diosqa paykunamanta suyarqa aswan allinta ruranankuta (Lucas 12:48).

Justiciata kuyasqanraykum, Jehová Diosqa mana sayapakuspan imatapas allintapuni ruran. Arí, payqa confianapaq hinaspa respetanapaq Juezmi.

[Willakuy]