¿Entiendeyta atichwanchu Bibliapa yachachikuyninta?

“Sapa domingom wasiypiqa Bibliata leerqaniku. Diospa Palabran kasqanta yachaspaypas, mana entiendesqayraykum leeyta mana gustarqanichu.” (Gran Bretañamanta, Steven)

“Bibliatam leeyta qallaykurqani 17 wataypi, ichaqa mana entiendespaymi saqerurqani.” (Españamanta, Valvanera)

“Catolica kaspaymi yacharqani huk kutillatapas enteron Biblia leenayta. Kimsa watapim leeyta tukururqani, ichaqa manam imatapas entienderqanichu.” (Australiamanta, Jo-Anne)

ARÍ, enteron pachapiqa manam ima libropas Biblia hinaqa kanchu. Bibliaqa ancha rantikusqam hinaspa imaymana idiomakunapim rurasqa kachkan, kachkantaqmi uyarinapaq kaqkunapipas. Chaywanpas achka runakunam sasachakunku entiendenankupaq. ¿Qampas sasachakunkichu entiendenaykipaq?

¿Diosqa munanchu Biblia entiendenanchikta?

Manaraq kay tapukuyta kutichichkaspam puntataraq yachananchik Bibliata pi qellqachisqanmanta. 2 Timoteo 3:16 nin: “Bibliapi llapallan qellqasqa kaqkunaqa Diospa Espiritunpa qosqanmi”, nispa. Chaynaqa, ¿Diosqa munarqachu Bibliata llapallanchik entiendenanchikta? ¿Icha akllasqa runakunallapaqchu qellqachinman karqa?

Kay tapukuykunatam qatiqnin textokuna kutichin:

“Kay kamachikuykuna [qosqayqa] manam llumpay sasachu nitaqmi qamkunamanta karupichu kachkan.” (Deuteronomio 30:11.)

‘Achkiy hinaraqmi palabraykiqa [. . .]. Pisi experienciayoqkunatapas entiendeykachinmi.’ (Salmo 119:130.)

‘Chay ratollapim Chuya Espiritupa yanapakuyninwan kusikuspan Jesus nirqa: “Hanaq pachapipas, kay pachapipas munaychakuq Taytáy, kay yachaykunatam pakaykurqanki yachayniyoqkunamantawan entiendeqkunamanta hinaspam qawaykachinki pisi yachayniyoqkunamanña, chayraykum alabayki”.’ (Lucas 10:21.)

Arí, Diosqa munanmi Bibliapa yachachikuyninta entiendenanchikta. Ichaqa achka runakunam kallpanchakuspankupas manaraq entiendenkuchu. Hinaptinqa, ¿entiendeyta atinmankuchu? Arí. Qatiqninpim kimsa yanapakuykunamanta yachasunchik.