Chuya espirituqa: vidanchikpi necesitasqanchik kallpam

DAVIDMI huchallikuruspan Diosta kaynata mañakurqa: “Amayá wischurullawaychu qampa qayllaykimantaqa. Amayá qechurullawaychu Chuya Espirituykitaqa”, nispa (Salmo 51:11).

¿Imanasqataq Davidqa munarqa Diospa espiritun paypi hinalla kananta? Payqa yacharqamá Diospa espiritun ancha yanapasqanta. Mozollaraq kachkaptinmi chay espiritu yanaparqa hatunkaray Goliat runata vencenanpaq (1 Samuel 17:45-50). Yanaparqataqmi salmos libropa wakin sumaqllaña qellqasqa kaqkunata rurananpaq. Nirqam: “Diospa Espiritunmi ñoqantakama rimarirqa. Tayta Diospa palabrallanmi simillaypipas tarikurqa”, nispa (2 Samuel 23:2).

Chayna kasqanmantam Jesucristopas qawachirqa kaynata nispan: “Kikin Davidmi Chuya Espiritupa sonqochasqan nirqa: ‘[Jehová] Diosmi Señorniyta nirqa: “Enemigoykikunata vencenaykamayá alleqniypi tiyaykuy”’”, nispa (Marcos 12:36; Salmo 110:1). Hinaptinqa, Jesusqa yacharqam Diospa chuya espiritunwan David wakin salmosta qellqasqanmanta. Chaynaqa, ¿ñoqanchiktapas chay espiritu yanapawanchikmanchu?

“Mañakuptikichikqa Diosqa qosunkichikmi”

Manachá haykapipas David hinaqa salmosta qellqasunchu. Chayna kaptinpas,  atichwanmi hatunkaray Goliat hina sasachakuykunata atipaytaqa. Qawasunchik Isabelta ima pasasqanmanta. * Paytam qosan saqerurqa sipas warmiwan pasakuspan. Qalaypaq manuta saqechkaspanpas, manam qollqetaqa qorqachu iskaynin warmachankunata uywananpaqqa. Nirqam: “Qalaypaqmi karqani engañaruwaspan saqeruwaptin. Ichaqa qawarqanim chuya espiritunwan Dios yanapawasqanta”, nispa.

Qawasqanchikman hinaqa, Isabelqa Diospa chuya espirituntam necesitarqa. Payqa yacharqam Diospa kallpallanwan sasachakuyninta atipananmanta, wawankuna uywananmanta hinaspa allin sientekunanmantapas. Chaymi chuya espirituta Diosmanta sapa punchaw mañakurqa Jesuspa kayna nisqanman hina: “Mañakuptikichikqa Diosmi qosunkichik. Maskaychik, tarinkichikmi, qayaychik, kichasunkichikmi”, nispa (Mateo 7:7).

Robertopas necesitarqam Diospa chuya espiritunta sasachakuyninta atipananpaq. Payqa pasaypaq cigarro pitaqmi karqa, iskay watañam kallpanchakurqa saqenanpaq. Ichaqa manam saqeyta atirqachu. Robertom nin: “Chay viciota saqenaykipaq kallpanchakusqaykipiqa manam hawkachu tarikunki. Cuerpoykim sapa punchaw mañasunki, manamá imatapas ruraytaqa atinkichu”, nispa.

Nirqataqmi: “Ichaqa Diostam munasqanman hina serviyta munarqani, chaypaqmi vidayta cambianay karqa. Kallpanchakurqanim Bibliapa nisqanman hina piensanaypaq. Sapa punchawmi Diosta mañakurqani kallpata qowananpaq chaynapi chay viciota saqenaypaq. Musyakurqanim sapallay mana atinaymanta. Hinaspam chaylla musyakurqani mañakusqayta Dios uyarisqanta, aswanraqmi kaqllamanta cigarro pitayman wichiykuspay hukmanta sientekuptiy. Diospa espiritunmá yanapawarqa hinalla kallpanchakunaypaq. Mana yanapawaptinqa manam cigarro pitaytaqa saqeymanchu karqa”, nispa (Filipenses 4:6-8).

‘Anka hinaraqmi pawarinqaku’

Manam Isabeltawan Robertollatachu Diospa chuya espiritunqa vidankupi yanaparqa. Jehová Diospa millonnintin testigonkunapas chay yanapakuytaqa chaskinkum. ¿Qampas chaskiwaqchu? Chaskiwaqmá. Tukuy sonqowan mañakuptinchikqa, Diosqa qowasunmi tukuy ima unanchananpaq servichikusqan kallpantaqa. Chay yanapakuyta chaskinapaqqa, Diosmantam cheqaptapuni yachananchik hinaspa kallpanchakunanchikmi munayninta ruranapaq (Isaias 55:6; Hebreos 11:6).

Arí, Diospa munasqanman hina servinaykipaqmi chuya espiritunqa yanapasunki chaynataq ima sasachakuykunata atipanaykipaqpas. Ama qonqaychu, Bibliapa nisqanman hinaqa Jehová Diosmi ‘kallpata qon desmayaqkunaman. Kallpantam masyachin mana kallpayoqkunaman’. Chayraykum ‘Diospi confiakuqkunaqa mosoqmanta kallpanchakunqaku [. . .], anka hinaraqmi pawarinqaku. Kallpaspankupas manam pisipanqakuchu. Maynata purispankupas manam desmayanqakuchu’ (Isaias 40:28-31).

[Willakuy]

[24 kaq paginapi suti rikuylla kaq willakuy]

“Sapa punchawmi Diosta mañakurqani kallpata qowananpaq [. . .]. Musyakurqanim sapallay mana atinaymanta. Hinaspam chaylla musyakurqani mañakusqayta Dios uyarisqanta”

 [23 kaq paginapi dibujokuna hinaspa recuadro]

¿IMAPAQTAQ DIOSQA CHUYA ESPIRITUNTA SERVICHIKURQA?

Kay Pachatawan hanaq pachapi kaqkunata unanchananpaq. Salmistam nirqa: “Dios Taytalláy, mana yupay atinam qampa rurasqaykikunaqa. Yachaywanmi rurarqanki tukuy chaykunataqa. Unanchasqaykikunawanmi huntarun kay pachaqa”. “Espirituykita kachaspaykim kaqllamanta unanchanki”, nispa (Salmo 104:24, 30; Genesis 1:2; Job 33:4).

Biblia qellqaqkunata yuyaychananpaq. Apostol Pablom qellqarqa: “Bibliapi llapallan qellqasqa kaqkunaqa Diospa Espiritunpa qosqanmi”, nispa (2 Timoteo 3:16). Griego rimaymanta “qosqanmi” niq tikrasqa palabraqa, ninantaqmi “Diospa pukusqan” nispa. Chay pukusqanwanmi otaq espiritunwanmi Jehová Diosqa Biblia qellqaqkunata yanaparqa “cheqap palabranta” qellqanankupaq (1 Tesalonicenses 2:13).

Serviqninkuna hamuq tiempomanta allintapuni willakunankupaq. Apostol Pedrom nirqa: ‘Diosmanta willakuqkunaqa qellqarqa manam kikinkupa entiendesqanman hinallachu. Paykunaqa qellqarqa manataqmi runapa munasqanman hinallachu, aswanqa Chuya Espiritupa guiasqanman hinam Diosmanta rimarqaku’, nispa (2 Pedro 1:20, 21; Joel 2:28).

Jesuspas chaynataq qatiqninkunapas Diospa Gobiernonmanta willakunankupaq hinaspa milagrokunata ruranankupaqpas. Jesusmi nirqa: “Diospa Espiritunmi ñoqapi kachkan. Paymi aceitewan talliwaspan sapaqchawarqa. Wakchakunaman allin noticiata willanaypaqmi sapaqchawarqa. Presochasqa kaqkunaman willaspay libranaypaqmi kachamuwarqa. Ñawsakunata qawarichinaypaqmi kachamuwarqa”, nispa (Lucas 4:18; Mateo 12:28).

 [25 kaq paginapi dibujokuna hinaspa recuadro]

IMAYNATAM CHUYA ESPIRITU YANAPAWANCHIK

Yanapawanchikmi tentacionkunata atipanapaq hinaspa mana allinkunata saqenapaqpas. Apostol Pablom nirqa: “Diosmi confiakuna kasqanrayku mana munanqachu mana aguantay atinaykichikkama tentasqa kanaykichiktaqa. Tentacionkuna hamuptinqa Diosmi vencenaykichikpaq kaqta qosunkichik chaynapi aguantanaykichikpaq”, nispa (1 Corintios 10:13).

Yanapawanchikmi sumaq kayniyoqkuna kanapaq. “Chuya Espirituñataqmi kawsachiwanchik: kuyakuqta, kusisqallata, hawkallata, pacienciakuqta, sumaq sonqollata, kuyapayakuqta, [iñiyniyoqta], llampu sonqollata hinaspa imapipas controlakuqta.” (Galatas 5:22, 23.)

Kallpanchawanchikmi sasachakuykunata atipanapaq. “Tukuy imataqa rurani [Dios] kallpanchawaptillanmi.” (Filipenses 4:13.)