Diosqa munanmi kusisqa kawsakunanchikta
Diosman asuykuychik
Diosqa munanmi kusisqa kawsakunanchikta
LLIW tayta-mamakunam wawa-churinku allin kawsakunankuta munanku. Jehová Diosqa taytanchik kasqanraykum kuyakuywan cuidawanchik, yachachiwanchiktaqmi kusisqa kawsanapaq. Chaypaqmi Bibliapi niwanchik ima rurananchikmanta. Chaynaqa qawasunyá Josuey 1:6-9 nisqanpi ima yachachiwasqanchikmanta.
Alleq lawpi dibujom piensarichiwasun chay textopa nisqanpi. Moises wañukuptinmi, Josueyña Israel nacionta kamachiyta qallaykurqa. Diospa Prometesqan Allpaman wara-waranqantin israelitakuna yaykunankupaqña kachkaptinkum, Jehová Diosqa achka consejokunata Josueyman qorqa. Kasukuptinqa ima rurasqanpas allinpim tukunan karqa. Chaynallataqmi ñoqanchikwanpas pasanman (Romanos 15:4).
Kimsa kutitam Diosqa Josueyta nirqa kallpanchakuspa qarinchakunanpaq (6, 7, 9 versiculokuna). Arí, Diospa Prometesqan Allpaman israelitakunata pusananpaqqa, Josueyqa anchatam kallpanchakunan karqa. ¿Atinmanchu karqa?
Chaypaqmi Jehová Dios kaynata consejarqa: ‘Serviqniy Moisespa kamachisusqayki yachachikuyniykunata kasukuy’, nispa (7 versiculo). Arí, Josueypa tiemponpiqa karqañam Diospa Palabranqa, chaywanmi kallpanchasqa tarikunman karqa. * Chaypaqqa manam hapiyllachu-hapinan karqa, cheqaptapuni yanapachikunanpaqqa kaytapas rurananmi karqa.
Puntataqa Diospa Palabranmantam sapa punchaw yachanan karqa. Chaymi Dios nirqa: ‘Tuta-punchawmi yuyaymananki’, nispa (8 versiculo). ¿Imaynatam ‘yuyaymananman’ karqa? Huk libropa nisqanman hinaqa, “Diosmi Josueyta kamachirqa Leyninpi upallalla piensananpaq, chaynapi mana qonqananpaq”. Sapa punchaw chayta ruraspanmi Josueyqa ima sasachakuytapas atipanan karqa.
Chaymantapas Josueyqa yachasqanman hinam kasukunan karqa. Jehová Diosmi nirqa: ‘Kay libropi qellqasqaman hina ruraptikiqa [. . .] tukuy rurasqaykipas allinmi kanqa’, nispa (8 versiculo). Qawasqanchikman hinaqa Josueypa rurasqan allinpi tukunanpaqqa Diospa kamachisqantam kasukunan karqa. Arí, Diospa kamachisqanta kasukuyqa allinpipunim tukun (Isaias 55:10, 11).
¿Kasukurqachu Josueyqa Jehová Diospa nisqanta? Arí kasukurqam; chaymi kusisqa kawsakurqa tukuy sonqonwan Diosta servispan (Josuey 23:14; 24:15).
Jehová Diosqa munanmi qampas kusisqa kawsakunaykita. Ichaqa ama qonqaychu, manam Bibliayoq kayllachu allinqa. Unayña Diosta serviq huk cristianom nirqa: “Bibliapa nisqantaqa sonqonchikpim takyachina”, nispa. Chaynaqa ‘tukuy rurasqanchikmi allin kanqa’ Josuey hina sapa punchaw Diospa Palabranpi yuyaymanaspa yachasqanchikta kasukuptinchikqa.
[Willakuy]
^ par. 7 Josueypa tiemponpiqa yaqapaschá Moisespa qellqasqan 5 librokunalla karqa: Genesis, Exodo, Levitico, Numeros, Deuteronomio; karqataqmi Job librowan huk otaq iskay salmokunapas.