¿Haykapikamataq ñakarisaq?

Jaynem cáncer onqoywan astawan peorchakuspan, aswan nanaywan ñakarirqa. Hinaspam qaparispan nirqa: “¡Manañam aguantayta atiniñachu! ¡Ama hina kaspayá, kay nanayta qechurullawaychik!”, nispa. Mana ima rurayta atispankum familianwan amistadninkuna Diosta mañakurqaku yanapaykunanpaq. ¿Diosqa uyarinmanchu karqa?

DIOSQA yachanmi runakuna llumpay ñakarisqankuta. Bibliam nin: “Tukuy ima unanchasqankuna[m] ñakarichkan”, nispa (Romanos 8:22). Payqa yachanmi, Jayne hina millonnintin runakuna sapa punchaw imawanpas ñakarisqankuta. Qawachkantaqmi 800 millonnintin runakunapa sapa punchaw mana mikuspanku puñuykusqankuta, hinaspa achkallaña familiapi ñakariqkunatawan wawa-churinku imayna kanankumanta llakillawanña kaq tayta-mamakunatapas. ¿Diosqa imatapas ruranqachu kaykunata allichananpaq? Llapallanchikmi kuyasqanchikkunataqa yanapayta munanchik, hinaptinqa ¿manachu Diospas chaynata ruranman?

Arí, manam ñoqallanchikchu chaynataqa tapukunchik. Yaqa 2.600 wata ñawpaqtaraqmi Diosmanta willakuq Habacucpas imayna sientekusqanmanta Diosman nirqa: “Taytalláy ¿haykapikamataq mana uyariykuwankichu qayakamusqaytaqa? ¿Haykapikamataq mana salvaykuwankikuchu daño ruraymanta qaparimuchkaptiyqa? ¿Imanasqataq qawachiwachkanki mana allin ruraykunataqa? ¿Imanasqataq rikuchiwachkanki sasachakuykunataqa? Ñoqapa ñawpaqniypiqa tukuy imam [. . .] dañaypaq dañanakuchkan. Quejanakuyllam hatarichkan”, nispa (Habacuc 1:2, 3). Kay tiempopipas ñakariywan maqanakuyqa sapa punchawmi kachkan.

Hinaptinqa, ¿Diosqa uyarirqachu Habacucpa mañakusqanta? Arí uyarirqam. Iñiyninta kallpanchaspanmi prometerqa ñakariykunata chinkachinanpaq. Ñoqanchiktapas kallpanchawanchikmi hamuq tiempopi Diospa ima rurananmanta yachasqanchik. Chaykunam kallpancharqa Jayneta hinaspa familiantapas, qamtapas kallpanchasunkimanmi. Chaymi kallpanchaykiku qatiqnin yachachikuykunata leenaykipaq, chaypim kayna tapukuykunata kutichisun: ¿Imanasqataq seguro kachwan ñoqanchikpi Dios interesakusqanmanta? ¿Imaynatam ñakariykunata chinkachinqa, hinaspa haykapi?