Revistanchikta leeqkunam tapukunku

¿Angelkunata kamachiq Miguelqa Jesuschu kanman?

▪ Arí, chaynam. Achka llaqtakunapim runakunaqa achka sutikunawan reqsichikunku. Ñawpaq tiempopipas chaynam karqa. Ejemplopaq, Diosta serviq Jacobpas Israelwan sutichasqam karqa (Genesis 35:10). Apostol Pedropapas achkam sutinkunaqa karqa: Simon, Cefas, Pedro hinaspa Simon Pedro (Mateo 10:2; 16:16; Juan 1:42; Hechos 15:7). Hinaptinqa, ¿imaynatam seguro kachwan Jesuspa huknin sutin Miguel kasqanta? Chaypaq qatiqninpi Bibliapa yachachisqanta qawasun.

Miguel sutiqa pichqa kutitam Bibliapi rikurin. Daniel libropim kimsa kutita. Daniel 10:13, 21 nisqanpim nin Miguelqa ‘angelkunamanta kamachikuq’ kasqanta, hinaspa “Israel nacion nanachikuq” kasqantapas, paymi huk angelta Diospa munayninta rurasqanpi sasachakuptin yanaparqa. Daniel 12:1 nisqanpipas willawanchikmi tukupay tiempopi “Miguel sutiyoq hatun kamachikuq angel” rikurimunanmanta.

Apocalipsis 12:7 versiculopipas yapatawanmi Miguelmanta riman, chaypim nin hatu-hatun guerrapi ‘Miguel angelninkunapiwan peleasqanta’, hinaspa hanaq pachamanta demoniokunawan Satanas wischumusqa kasqanmantapas.

Yachamusqanchikman hinaqa Migueltam Bibliaqa tupachin peleaq angelwan, paymi Diospa llaqtanta defienden hinaspa waqaychan Diospa contranpi kaq Satanasmantapas.

Judas libropipas 9 versiculonpim nin Miguelqa “angelkunata kamachiq” kasqanta. Bibliaqa “angelkunata kamachiq” nispa rimaspanqa manam haykapipas achkamantaqa rimanchu. 1 Tesalonicenses 4:16 nisqanpipas rikurintaqmi chayna rimayqa, chaypim apostol Pablo kawsariramuq Jesusmanta kaynata nin: “Kikin [Jesuspunim] uraykamunqa hanaq pachamanta kamachikuy qapariyninwan, angelkunata kamachiqpa qayakuyninwan hinaspa Diospa cornetillanpa qapariyninwan”, nispa. Kaypi qawasqanchikman hinaqa Jesucristom reqsichikun angelkunata kamachiq kasqanwan.

Hinaptinqa ¿imatam kay yachasqanchikmanta nichwan? Jesucristoqa angelkunata kamachiq Miguelmi. Kay iskay sutikunam qawachin Diospa llapallan kamachiq kasqanta pay puntata defiendesqanta; Miguelqa “¿Pitaq Dios hinaqa?” ninanmi, Jesusñataq “Jehová Diosmi salvaq” ninan. Filipenses 2:9 versiculom nin: “[Jesustam] Dios llumpa-llumpayta hatuncharuspan llapallanmanta suma-sumaq sutiwan sutichaykurqa”, nispa.

Yachananchiktaqmi, Jesuspa kawsakuyninqa manam kay pachapi nacesqanmantachu qallarirqa. Chuya espirituntakama wawayoq kananpaq Mariata willaq angelqa, nirqam wawanta Jesuswan sutichananpaq (Lucas 1:31). Kay pachapi kaspanpas Jesusqa nirqam hanaq pachamanta hamusqanta (Juan 3:13; 8:23, 58).

Chaynaqa, Miguelqa kay Pachaman manaraq hamuchkaspa Jesusmi. Wañusqanmanta kawsariruspan hanaq pachaman kutispanqa, kaqllamantam angelkunata kamachiq Miguel hina Diosta servichkan, chaynapi Jehová Dios hatunchasqa kananpaq (Filipenses 2:11).