Jesucristopa: yachachikuyninqa lliwpaqmi

“Capernaum * lawmanta yachayniyoq [Jesus] runa hinaqa manam pipas kanchu, kunankama yachachikuyninkuna runakunapa yuyayninpi hinaspa sonqonkupipas allin takyasqa kasqanrayku.” (GREGG EASTERBROOK, QELLQAQ.)

ANCHA atiyniyoqmi rimasqanchik palabrakunaqa. Sumaq kaspanqa kallpanchanmanmi, suyakuytapas qonmanmi hinaspa runapa vidantapas tikranmanmi. Señorninchik Jesucristom pimantapas allintapuni servichikurqa. Chayna kasqantam qawachin Jesucristopa sumaq yachachisqanta uyariq runapa willakusqan. Nirqam: “Rimayta Jesus tukuruptinmi runakuna admirasqallaña karqaku yachachikuyninkunawan”, nispa (Mateo 7:28).

Kunanpas, enteron pachapim runakunaqa Jesuspa wakin yachachisqankunata reqsinku. Wakintayá qawasunchik:

“Manam serviwaqchikchu Diostawan qollqetaqa.” (Mateo 6:24.)

“Runamasikichik qamkunapaq allin kaqkuna rurananta munaspaqa qamkunapas paykunapaqyá allin kaqkunata ruraychik.” (Mateo 7:12.)

“Rey Cesarpa kaqtaqa paymanyá qoychik, Diosmanñataq paypa kaqta.” (Mateo 22:21.)

“Ima chaskiqmantapas aswan kusisqaqa imapas qoqmi.” (Hechos 20:35.)

Jesus sumaqta yachachispanpas rimasqankunaqa atiyniyoqmi karqa Diosmanta cheqapta yachachisqanrayku, allinta kawsanapaq yanapakusqanrayku hinaspa tukuy ñakariykunata Diospa gobiernollan allichananmanta rimasqanraykupas. Qatiqninpim chaykunamanta yachasunchik. Chaynatam entiendesun imanasqam ‘kunankama yachachisqankuna runakunapa yuyayninpi hinaspa sonqonkupipas allin takyasqa kasqanmanta’.

[Willakuy]