Diosqa runapa allin kaynintam maskan
Diosman asuykuychik
Diosqa runapa allin kaynintam maskan
“DIOSQARIKI qawachkanmi llapa runakunapa concienciantaqa, reqsintaqmi runapa imam munasqantapas chaynataq tanteasqantapas” (1 Cronicas 28:9). Kay textota leespam, anchata agradecekunchik Dios ñoqanchikpi interesakusqanmanta. Huchayoq kaptinchikpas Diosqa allin kayninchiktam ñoqanchikpi maskan. Chaytam 1 Reyes 14:13 nisqan qawachin, Abias sutiyoq mozochamanta willakuspan.
Paypa familianmi Diosta mana kasukuq karqa. Taytan rey Jeroboanmi Diosta qepanchaq reykunamanta punta kaq karqa. * Chaymi Diosqa lliw familianta chinkachinanpaq tantearurqa, nirqam: “Miraynikikunatam tukunankama kañarusaq wanuta kañachkaq hina”, nispa (1 Reyes 14:10). Abiastam ichaqa Dios favoreceykurqa, pay llumpayta onqoptinmi kamachirqa lliw familianmanta paylla allin pampasqa kananpaq. * ¿Imanasqam favoreceykurqa? Diosmi ‘Jeroboampa castankunamanta payllata allin kasqanpaq tarirurqa’ (1 Reyes 14:1, 12, 13). Hinaptinqa, ¿imatam Abiasmanta yachachwan?
Bibliaqa manam ninchu Abiasqa Diospa serviqnin kasqantaqa. Ichaqa ninmi sonqonpi ‘allin kaqta tarirusqanta’ otaq Diospaq imallatapas rurasqanta. Hebreo rimaypi huk qellqakunapa nisqanman hinaqa, yaqapaschá Abiasqa Jerusalen temploman rirqa otaq israelitakuna Jerusalen temploman mana rinankupaq taytanpa churachisqan guardiakunata horqorurqa.
Imayna kaptinpas, Jehová Diosqa allin kaqtam Abiaspi tarirqa. ¿Imanasqataq chaynata ninchik? Puntataqa, payqa munarqam Dios yupaychayta. Chaymi Bibliaqa nin ‘paypi’, otaq sonqonpi Dios yupaychay munasqanta. Chaymantapas, Abiasqa Dios yupaychay munasqantam qawachirqa ‘Jeroboampa castankunawan’ kachkaspanpas. Huk yachaysapa runam nin: “Ancha allinmi pipas sumaq kayninkunata waqaychayninqa, familian otaq hukkuna mana yanapachkaptinpas”, nispa. Huk runapa nisqanman hinapas, Abiaspa imayna kasqanqa “sutillam qawakurqa [. . .], imaynam cielopi lucerokunapas astawan tutapi kancharisqanman hina, chaynataq cedro sachapas mana llaqeyoq sachakunapa chawpinpi sumaqta qawakusqanman hina”.
Ichaqa, 1 Reyes 14:13 nisqanqa astawanmi yachachiwanchik Jehová Diospa sumaq kayninmanta hinaspa ñoqanchikpa allin kayninchikta maskasqanmantapas. Kay textoqa ninmi Abiaspi allin kaqta ‘tarirusqanmanta’. Jehová Diosqa Abiaspa sonqonta qawaspanchá sumaq kayninta tarirurqa. Huk runapa nisqanman hinaqa, Abiasqa ‘rumikunapa chawpinpi perlas hinam’ familianpiqa karqa. Jehová Diosqa chanincharqam Abiaspa sumaq kaynintaqa, chayraykum llakipayaspan allin pampasqa kananpaq nirqa.
Anchatam kusikunchik Jehová Dios pantasqanchikta qawananmantaqa sumaq kayninchikkunata qawasqanmanta (Salmo 130:3). Arí, chayna kasqanpi piensayqa kallpanchawanchikmi Jehová Diosman astawan asuykunapaq.
[Willakuy]
^ par. 5 Jeroboanmi Israel nacionpa norte lawninpi qallarichirqa toro taytachakuna yupaychayta, chaytaqa rurarqa Jerusalen temploman Diosta yupaychaq mana rinankupaqmi.
^ par. 5 Mana pampasqa kayqa qawachirqam, Dios mana favorecesqanta (Jeremias 25:32, 33).