Revistanchikta Leeqkunam Tapukunku

¿Haykapim Dios rikurirqa?

▪ Bibliaqa yachachinmi Jehová Diospa qallariynin mana kasqanta, payqa wiña-wiñaymantam karqaña. ¿Sasachakunkichu kayta entiendenaykipaq? Yaqapaschá. Ichaqa manaraq imatapas nichkaspa Bibliapa ima nisqanta qawasunchik.

Qallarinapaq, runakunaqa manam alli-allintaqa yachayta atichwanchu Dios imayna kasqanmantaqa. Apostol Pablo hinam sientekunchik, paymi nirqa: “¡Mayna allinmi Diosninchikqa! ¡Payqa tukuy yachayniyoq kaspanmi tukuy imata reqsin! ¡Pitaq yachanman imam munasqantawan imam ruranantaqa!”, nispa (Romanos 11:33). Arí, imaynam warmachapas taytanpa imayna kasqanta mana llapantaqa entiendeyta atinchu, chaynam ñoqanchikpas Diospa yachayninmantawan tukuy reqsisqantaqa mana llapantaqa entiendeyta atichwanchu. Diospa yachayninmantawan kuyapayakuq kayninmanta Pablo kaypi rimaspanpas, qawachiwanchikmi Unanchawaqninchikmanta mana lliwta entiendey atisqanchikta. Hukninmi Diospa wiña-wiñaymanta kasqan. Chayna kaptinpas, Diosmanta Bibliapi nisqantaqa creechwanmi, Jesusmi mañakuspan nirqa: ‘Palabraykiqa cheqapmi’, nispa (Juan 17:17).

Hinaptinqa, ¿imatam Biblia yachachin Diospa rikurimusqanmanta? Moisesmi mañakuspan nirqa: “Tukuy imata manaraqpas rikuriykachichkaspaykim wiña-wiñaypaq qamqariki Diosllapuni kallachkanki”, nispa (Salmo 90:2). Qawasqanchikman hinaqa, Bibliaqa niwanchikmi Diosqa wiña-wiñaymanta wiña-wiñaypaq kasqanta (Apocalipsis 4:10). Chaynaqa, wiñaymanta wiñaykamam Diosqa kanqa. Huk rimaypiqa, Diosqa manam haykapipas unanchasqachu karqa. Manam qallariyninqa kanchu, aswanqa wiñaymantam hinalla kawsachkan.

Chaymi Diosllata nichwan ‘wiña-wiñaypaq munaychakuq’ kasqanta (1 Timoteo 1:17). Jesustawan millonnintin angelkunata, hinaspa runakunatapas Diosmi unancharqa. Chaynaqa llapallankupam qallariyninqa kan (Colosenses 1:15, 16). Jehová Diospam ichaqa mana. Sichu nisun, Diospas unanchasqam karqa nispaqa, tapukusunraqchá Diospa unanchaqninta pitaq unancharqa nispa, hinaspaqa manamá haykapipas tukuchwanchu. Arí, Jehová Diosqa “wiñaypaq takyaq Diosmi” (Daniel 6:26). Otaq “wiña-wiñaymanta hinaspa kunanmanta wiñaykama” Diosmi (Judas 25).

Chaymantapas, wiñaypaq Dios kasqanta yachayqa vidanchikpim yanapawanchikman. Yachamusqanchikman hina Moisespa mañakusqanpiqa, qawanchikmi Jehová Dios wiñay kawsay prometewasqanchikta cumplinanmanta. Kunan pisi tiempollata kawsaptinchikpas, Diosqa ‘yachananchik wiñaypaq wasi hinam’. ¿Manachu kusikunchik hanaq pachapi Taytanchik ñawpaqtapas, kunanpas serviqninkunawan kasqanmanta hinaspa hamuq tiempopi kananmantapas yachaspanchik? (Salmo 90:1.)