¿Imanasqam Jesusqa mana chaqrukurqachu politicapi?

HUK punchawmi cristianokunapa tiemponpi 32 watapi, tardeykuqta waranqantin runakuna Jesusta uyarispanku huñunasqa kachkarqaku, paytam reqsirqaku onqoqkuna sanoyachisqanrayku hinaspa wañuqkunatapas kawsarichiyta atisqanrayku. Arí, chay ñawpaqllanta milagrokuna rurasqanmi hinaspa Jehová Diosmanta yachachisqanmi lliw runakunata admirachirqa. Hinaptinmi runakunata tiyaykachispan Diosta mañakurqa, hinaspam milagrota ruraspan mikuchirqa. Kamachirqataqmi puchusqanta hoqarinankupaqpas. ¿Imatam runakuna rurarqaku? (Juan 6:1-13.)

Milagrokuna rurasqanta hinaspa runakunata allin pusaq kasqantawan interesakusqanta qawaspankum, reyninku kananpaq churaruyta munarqaku (Juan 6:14). Paykunapa nacionninku mana allin nacionwan gobiernasqa kasqanraykum, anchata munarqaku pipas libraykunanta. Chaymi Jesusta hikutarqaku politicapi chaqrukunanpaq. ¿Imatam pay rurarqa?

Bibliam nin: ‘Musyarurqam rey kananpaq hapiruspa churaruy munasqankuta chaymi sapallan kutikurqa orqoman’, nispa (Juan 6:15). Chay rurasqanmi sutillata qawachirqa politicapi chaqrukuyta mana munasqanta. Manamá imawanpas imayna piensasqantaqa cambiarqachu. Qawachirqataqmi qatiqninkunapas chayna kanankupaq (Juan 17:16). Ichaqa, ¿imanasqataq manapuni munarqachu?

¿Imanasqataq Jesusqa politicapi mana chaqrukurqachu?

Qawasunchikyá Bibliapa iskay yachachikuyninkunata, kaykunam qawachiwasun imanasqa Jesus politicapi mana chaqrukusqanmanta.

‘[Runaqa] runamasintam munaychakun ñakarichinanpaq’ (Eclesiastes 8:9). Kay versiculom pisi rimayllapi qawachin runakunapa kamachikuynin ñawpaqmantaraq imayna kasqanta. Jesusqa yacharqam Bibliapa chayna nisqan cheqap kasqanta. Payqa manaraq kay Pachaman hamuspanqa unayñam hanaq pachapi yacharqa (Juan 17:5). Allintam yacharqa, runakuna allin kamachiyta munaspankupas millonnintin runakunata mana yanapay atinankuta, Diosqa manamá chaypaqchu unancharqa (Jeremias 10:23). Yacharqataqmi runakunapa gobiernon kay pachapi sasachakuykunata mana haykapipas allichananta.

‘Kay pachapi mana allin kaqkunaqa Diablopa makinpim kachkan’ (1 Juan 5:19). Arí, achka runakunam qaripas warmipas munarqaku gobiernokunawan imapas sasachakuykuna allichayta. Ichaqa maynataña kallpanchakuspankupas, kamachikuq runakunaqa ‘kay pachapi kamachiq Diablopa’ makinpim kachkanku (Juan 12:31; 14:30). Chaymi Jesusqa huk kaqnin kamachikuqta nirqa: “Munaychakuyniyqa manam kay pachamantachu”, nispa (Juan 18:36). Jesusqa yacharqam hamuq tiempopi Diospa gobiernonpi Rey kananmanta. Hinaptinqa politicapi chaqrukuruspanqa Taytanpa gobiernontam qepancharunman karqa.

Ichaqa, ¿chayraykuchu cristianokunaqa gobiernokunata mana kasukunankuchu? Manamá. Jesusmi yachachirqa gobiernokunata kasukunapaq chaynataq Diospa nisqanta kasukunapaqpas.

Jesusqa respetarqam autoridadkunata

Huk kutipim templopi Jesus yachachichkaptin enemigonkuna pantarachiyta munaspanku  tapurqaku, sichu impuesto pagay allin kasqanta. Manam nispanqa, yaqapaschá Jesusqa kallpanchanman karqa Roma nacionpa contranpi hatarinankupaq, judiokunaqa munarqakumá paykunamanta librakuyta. Arí niptinñataqmi, runakunaqa piensanmanku karqa paykunapa contranpi Jesus kasqanta. Sumaq yachaywan kutichispanmi nirqa: “Rey Cesarpa kaqtaqa paymanyá qoychik, Diosmanñataq paypa kaqta”, nispa (Lucas 20:21-25). ¿Imatam kay yachachiwanchik? Cristianokunaqa respetananchikmi Diospa chaynataq “Cesarpa” otaq autoridadkunapa kamachikuyninta.

Chaypaqqa achka razonkunam kan. Qawasun, gobiernokunam maypipas hawka kawsanapaq controlanku. Chaymantapas munankum runakuna impuesto paganankuta hinaspa leykunata kasukunankutapas. Jesuspas allin ejemplota qospanmi ‘rey Cesarpa kaqta’ pagarqa. Paytaqa tayta-mamanmi yachachirqa munasqanman hina mana kaptinpas leykunata kasukunanpaq. Huk kutipim, padronachikunankupaq Roma nacion kamachiptin, Maria wiksayoq kachkaptinpas Joseyqa Mariawan karu-karuta (150 km.), Belenkama illarqaku (Lucas 2:1-5). Chaynam Jesuspas leeykunata respetarqa, hinaspam impuestotapas pagarqa mana paganan kachkaptinpas (Mateo 17:24-27). Chaynallataqmi cuidakurqa runakunapa sasachakuyninkunata autoridad hina allichaypi mana chapukunanpaq (Lucas 12:13, 14). Huk rimaypiqa: Jesusqa respetarqam gobiernotaqa, ichaqa manam chaqrukuytaqa munarqachu. Chaynaqa, ¿ima niytam munarqa ‘Diosman paypa kaqta’ paganankupaq qatiqninkunata nispan?

 “Diosmanñataq paypa kaqta”

Huk kutipim Jesusta tapurqaku Diospa kamachikuyninkunamanta mayqan aswan hatun kasqanta. Payñataqmi nirqa: “‘Diosnikitam kuyanki tukuy sonqoykiwan, tukuy vidaykiwan hinaspa tukuy yuyaynikiwan’ nispa. Kaymi punta kaq hatun kamachikuy. Qatiqninñataqmi nin: ‘Kuyankim runamasikita kikikita hina’”, nispa (Mateo 22:37-39). Hinaptinqa, paganapaq ‘Diospa kaqkunaqa’ payman sonqo kaspa ancha kuyayninchikmi.

Ichaqa chayna kayninchikqa manam rakinasqaqa kanmanchu. Jehová Diostawan gobiernonta servispaqa, manam atichwanchu runakunapa gobiernonta serviytaqa. ¿Imanasqa? Jesusmi nirqa: ‘Manam pipas servinmanchu iskay patrontaqa, huknintach cheqninman, huknintañataqchá kuyanman, hukninman ratakuruspachá huknintañataq desprecianman’, nispa (Mateo 6:24). Kay textopi apu kaymanta Jesus rimaptinpas, chay nisqankunaqa yanapawanchikmanmi politicapi mana chaqrukunapaq. Chaynatam entienderqaku punta cristianokunapas.

Ñawpaq tiempopi qellqakunapas qawachinmi punta cristianokuna politicapi mana haykapipas chaqrukusqankuta. Jesuspa yupaychasqan Diosllatam paykunaqa puntapi churarqaku. Chaymi Roma nacionmanqa mana sayapakurqakuchu, manataqmi tropankunapipas servirqakuchu nitaq ima autoridadpas karqakuchu. Chayraykum paykunaqa llumpay cheqnisqa karqaku. Wakin cheqniqninkunaqa nirqakuraqmi runamasin cheqnisqankuta. ¿Cheqapchu karqa chay nisqanku?

Cheqap cristianokuna hinaspa runamasin kuyayninku

Yachamusqanchikman hinaqa, Jesusmi nirqa iskay kaq hatun kamachikuyqa kayna  kasqanta: “Kuyankim runamasikita kikikita hina”. Chaymi pipas runamasinta cheqnispanqa, manam sutichakunmanchu “cristiano” nispaqa. Jesusqa runakunataqa kuyarqam, paykunata yachachinanpaqmi tiempochakurqa hinaspapas yanaparqataqmi sapaq rurayninkupipas (Marcos 5:25-34; Juan 2:1-10).

Chaywanpas payqa manam ancha reqsisqachu karqa onqoq runakunata sanoyachisqanwanqa, mikuy qosqanwanqa nitaq wañuqkunata kawsarichisqanwanpas. Aswanmi runakunaqa suticharqaku, “Yachachikuq” nispa (Juan 1:38; 13:13). Paypa nisqanman hinapas, Jehová Diospa gobiernonmanta yachachinanpaqmi kay Pachamanqa hamurqa (Lucas 4:43).

Chaynamá cheqap cristianokunapas, Jesuspa kamachisqanman hinam kallpanchakunku enteron pachapi Diospa Gobiernonmanta sumaq noticiata willakunankupaq (Mateo 24:14; 28:19, 20). Chay willakusqanku Gobiernoqa hanaq pachapim kachkan mana chinkachiy atina, hinaspam kuyakuywan kamachimunqa. Diospa munaynintam ruranqa, chaymi wañuytawan ñakariyta chinkachinqa (Mateo 6:9, 10; Apocalipsis 21:3, 4). Arí, Jesuspa willakusqanqa sumaq noticiakunam karqa (Lucas 8:1).

Hinaptinqa Jesusqa manam haykapipas chaqrukurqachu politicapiqa. Kaymi yanapawachwan kunan tiempopi pikuna cheqap cristianokuna kasqankuta reqsinapaq, paykunaqa manamá politicapiqa chaqrukunkuchu, aswanmi Jesusta qatipakuspanku Diospa Gobiernonmanta yachachinankupaq kallpanchakunku.

Chay gobiernomanta astawan yachayta munaptikiqa, kallpanchaykikum Jehová Diospa testigonkunata maskanaykipaq otaq internet nisqapipas kay direcciontam maskawaq: www.watchtower.org.

[16 hinaspa 17 kaq paginakunapi dibujokuna hinaspa recuadro]

Runamasinkupim anchata interesakunku

Jehová Diospa testigonkunaqa manam chaqrukunkuchu gobiernokunawanqa, chaywanpas interesakunkum runamasinkupiqa. Arí, kallpanchakunkum pi runatapas yanapanankupaq. Qatiqninpi willakuykunam chayta qawachin:

▪ Sapa watam enteron pachapi 7 millon masnin Testigokuna gratislla tiemponkuta servichikunku (1.500 horata), Bibliamanta runakunaman yachachinankupaq. Chayraykum achka runakuna allintaña kawsanku, viciokunata saqerunku chaynataq familiankuwanpas kusisqaña kachkanku.

▪ Bibliamanta qellqakunatam 500 masnin rimaykunapi ruraspa mana qollqellapaq runakunaman saqenku, wakin runakunapaqqa manam ima qellqankupas kanchu.

▪ Huk runakunapa qayllanpi clarota hinaspa respetowan rimanankupaqpas yachachinkum. Kunanpunim millonnintin runakuna chayta yachachkanku.

▪ Enteron pachapim waranqantin runakunata leeytawan qellqayta yachachinku.

▪ Enteron pachapim paykunapa kan 400 masnin comités Regionales de Construcción nisqa, chaypim mana qollqellapaq yachachinku huñunakunapaq wasikuna rurayta. Kay 10 watakuna pasaqpim 20.000 masnin huñunakunapaq wasikunata otaq Salonkunata rurarunku.

▪ Hatun desgraciakuna pasakuptinqa yanapakunkum. Maylawpipas chay hatun desgraciakuna pasakuptinqa iñiqmasinkunatam yanapanku hinaspa mana Testigo kaqkunatapas. Ejemplopaq, Estados Unidos lawpi llumpa-llumpay wayra-parakuna pasarusqanmanta iskay wata qepallatam, achkallaña testigokuna mana qollqellapaq 90 masnin Salonkunata hinaspa 5.500 wasikunatapas rurarurqakuña.

[15 kaq paginapi dibujo]

Runakuna Jesusta rey kananpaq churaruyta munaptinkum, payqa “sapallan kutikurqa orqoman”