¿Imatam runakuna manchakunku?
¿Imatam runakuna manchakunku?
“Manam religionniyoq runaraqchu kana, kay pacha puchukananmanta piensanapaqqa.” (STEPHEN O’LEARY, CALIFORNIA LAW UNIVERSIDADMANTA PROFESOR) *
¿KAY profesor hinachu qampas piensanki? Kay yachachikuywan qatiqninkunapas qawachiwasunmi imanasqa runakuna hamuq tiempopi imapas pasananmanta manchakusqankuta. Qawasuntaqmi imanasqa kusisqa kanamanta hinaspa confiachwantaqmi kay Pacha mana chinkananmanta. Qawasunyá imanasqa runakuna manchakusqankuta.
Hatun bombakunawan guerra kananmanta. Huk revistam 2007 watapi nirqa: “Hiroshima hinaspa Nagasaki llaqtakunaman hatun bombakunata wischuykuptinkum, chaymantapacha runakunaqa llumpay mancharisqallaña tarikunku”, nispa (Bulletin of the Atomic Scientists). ¿Imanasqa? Nisqankuman hinaqa 2007 watapaqmi karqaraq 27.000 hatun bombakuna, chaykunamantam 2.000 bombakunata “iskay-kimsa minutollapi toqyarachinmanku”. Kay bombakunamanta wakillantapas toqyarachiptinkuqa mana allinpich tukuruchwan.
Chaykunarayku, ¿saqerunkuchu 2007 watamantapacha chay bombakuna rurayta? SIPRI * nisqanman hinaqa 2009 watapim 5 reqsisqa nacionkuna, China, Estados Unidos, Francia, Reino Unido hinaspa Rusia “aswan wañuchikuq bombakuna ruray munasqankumanta willakurqaku” (SIPRI Yearbook 2009. Castellanopi pisi rimayllapi). * Ninkutaqmi huk nacionkunapas chayna bombayoqkuna kasqankuta. Chaykunamanta estudiaq runakunam ninku Israel, India hinaspa Pakistán nacionkunapa 60 hinaspa 80 hatun bombanku sapakamapa kasqanta. Chaymantapas yaqachusmi enteron pachapi 8.392 hatun bombakuna listollaña kachkan toqyachinankupaq.
Llumpay chiriwan rupay kasqanmanta. Chay qawamusqanchik revistaqa nintaqmi: “Hatun bombakunawan guerra kananmanta hinam, runakunaqa mancharisqallaña kachkanku llumpay chiriwan rupay kasqanmantapas”, nispa. Yachaysapa runakunapas chaynatam piensanku. Qawasun Cambridge Universidadpi Stephen Hawking profesormanta, hinaspa sir Martin Rees directormantapas. Paykunapa nisqankuman hinaqa, runakuna tukuy imata mana allinta servichikusqanku hinaspa tukuy imawan kay pachata qachachasqankum tiempota cambiachkan hinaspa chinkarachinmanmi runakunatapas.
Manchakuypaq willakuykuna. Achka runakunam ninku 2012 watapi kay pacha tukunanmanta. Internetpipas “fin del mundo” hinaspa “2012” niqta qellqaspallam waranqantin willakuykunata tarichwan. ¿Imanasqam anchata rimanku? Ñawpaq tiempomantaraq maya runakunapa calendarionku chay watapi tukusqanrayku, chaymi achka piensanku chay watapi lliw runakuna puchukanankuta.
Wakin religionkunapas ninkum kay Allpa pacha puchukananmanta Biblia yachachisqanta. Wakinñataqmi piensanku allin runakuna hanaq pachaman hoqarisqa kanankuta, mana allin runakunañataq infiernoman wischusqa kanankuta otaq kay pachapi hinalla ñakarinankuta.
¿Chaynatachu Diospa Palabran yachachin? Apostol Juanmi nirqa: “Amayá ‘Diospa yachachisqanmi kani’ niqkunataqa llapallantachu creeychik, aswanqa allintayá pruebaychik Diospa otaq Satanaspa yachachisqan kasqanta yachanaykichikpaq”, nispa (1 Juan 4:1). Chaynaqa hukkunapa nisqanta ñawsa hina creenaykimantaqa, kallpanchaykikum kikikipuni chay yachachikuymanta Bibliapa ima nisqanta yachanaykipaq. Qatiqninpim Bibliapa ima yachachisqanta qawasun. Leespaykiqa yaqapaschá mana yachasqaykikunata yachawaq.
[Willakuykuna]
^ par. 2 Kayqa horqosqam kachkan “Los desastres naturales desatan las predicciones catastrofistas”, nisqa yachachikuymanta; lloqsimurqam internetpi 2005 wata 19 octubre killapi cadena MSNBC nisqapa direccionninpi.
^ par. 5 Castellanopiqa, Instituto Internacional de Estocolmo de Investigación para la Paz, ninanmi.
^ par. 5 Informe firmado por Shannon N. Kile, investigadora jefe y directora del proyecto sobre armamento nuclear del Programa del SIPRI para la Limitación y No Proliferación de Armas; Vitaly Fedchenko, investigador en ese mismo programa, y Hans M. Kristensen, director de un proyecto de la Federación de Científicos Americanos sobre armamento nuclear.
[4 kaq paginapi reqsikusqanchikmanta]
Nube atómica: U.S. National Archives photo; huracán: WHO/League of Red Cross and U.S. National Archives photo