Jesuspa yachachisqankuna

Imaynatam kusisqa kachwan

¿Imatam necesitanchik kusisqa kanapaq?

▪ Orqopi yachachispanmi Jesusqa rimayta qallaykurqa kaynata nispan: “Mayna kusisqam ‘Diostam necesitani’ niqkunaqa”, nispa (Mateo 5:3). ¿Imatam chaywan niyta munarqa?

Kawsanapaqqa llapallanchikmi wayrata, yakuta hinaspa mikuyta necesitanchik. Chaytaqa animalkunapas necesitankumá. Ñoqanchikmi ichaqa kusisqa kanapaqqa necesitanchik imarayku kawsasqanchikmanta yachayta. Chaytaqa Unanchawaqllanchikmi qowanchikman. Chaymi Jesus nirqa: “Runaqa kawsanqa manam mikuyllawanchu aswanqa Diospa llapa rimasqankunawanmi”, nispa (Mateo 4:4). Chaynaqa, kusisqa kanapaqqa reqsikunanchikmi chay necesitasqanchikta, chaymi Jehová Diosman asuykunchik, payqa ‘kusisqa’ Diosmi (Salmo 104:31). Churintakamam Diosqa sumaq suyakuyta kusisqa kanapaq qowarqanchik.

¿Imaynatam Jesus suyakuyta qorqa?

▪ Jesusmi nirqa: “Mayna kusisqam llampu sonqoyoqkunaqa, paykunaqariki herenciapaqmi kay pachata chaskinqa”, nispa (Mateo 5:5). Onqoqkunata sanoyachispan, wañuqkunatapas kawsarichispam sumaq suyakuyta runakunaman qorqa. Willakusqanpas sumaq suyakuytamá qorqa, nirqam: “Diosqa ancha-anchatam kuyarqa runakunata, chaymi sapallan Churinta qomurqa pipas paypi iñiqqa manaña puchukaspa wiñaypaqña kawsananpaq”, nispa (Juan 3:16). Kay Pachapi wiñaypaq kawsanapaqqa Diostam kasukuna. Mayna sumaqchá kanqa hawka runakunawan kuska mana yuyaqyaspa kawsayqa. Chaymi Biblia nin: “Confianzawan suyasqaykichikmantayá kusikuspa kawsaychik”, nispa (Romanos 12:12). Jesusqa nirqataqmi imakunata ruraspa kunan kusisqa kanamanta.

 ¿Ima consejokunatam Jesus qorqa kusisqa kawsanapaq?

▪ Jesusqa rimarqam hukkunawan imayna kanamanta, casado vidamanta, kapuqniyoq kaymanta hinaspa humilde kaymantawan hukkunamantapas (Mateo 5:21-32; 6:1-5, 19-34). Arí, consejonkunaqa allinninchikpaqmi.

Qawasun qokuykuq kanamanta yachachisqanta (Hechos 20:35). Huk kutipim nirqa: “Convidota ruraspaykiqa qayaykuy wakchakunatawan suchukunatayá hinaspa wistukunatawan ñawsakunatayá. [. . .] Chaymi ancha kusisqa kanki”, nispa (Lucas 14:13, 14). Hinaptinqa kusikuytam tarisun hukkunata kusichispa, manam kikillanchiktachu.

¿Imataq astawan kusichiwasun?

▪ Cheqaptamá hukkunapaq imapas rurayqa anchatam kusichiwanchik. Ichaqa aswan ancha kusisqam tarikunchik Jehová Diosta servispa. Jesuspa nisqanman hinaqa, manam tupachiyta atichwanchu wawa-churinkupa imapas rurasqankumanta tayta-mamakunapa kusikusqankuwanqa. Huk kutipim, “runakuna ukumanta huk warmi qaparimurqa: ¡Mayna kusisqaraq wachakusuqniki hinaspa ñuñusuqniki warmiqa! nispa. Chaymi Jesusñataq nirqa: Aswan kusisqaraqmi Diospa palabranta uyarispa kasukuqkunaqa”, nispa (Lucas 11:27, 28).

Arí, Jesusqa ancha kusisqam tarikurqa Taytanpa munasqanta ruraspan, hinaspa wiñay kawsaymanta runakunaman willaspanpas. Chaymi kay suyakuymanta huk warmiman willaspan Jesus nirqa: “Chaytaqa rurachkani kachamuwaqniypa munasqanta ruraspaymi”, nispa (Juan 4:13, 14, 34). Ñoqanchikpas kusisqam kasunchik Diospa munayninta ruraspa chaynataq runamasinchikman Bibliamanta yachachispapas.

Astawan yachayta munaspaqa ¿Imatapunim Bibliaqa yachachin? niq libropa 1 kaq yachachikuyninta qaway. Kayqa Jehová Diospa testigonkunapa rurasqanmi.

[31 kaq paginapi dibujo]

Cheqaptapuni kusisqa kanapaqqa entiendenanchikmi imarayku kawsasqanchikmanta