Manañam manchakunkuchu

PUCHUKAY tiempo chayamunantaña piensaspankum yaqa 1978 watakunapi Gary hinaspa señoran Karen chakrapi yachanankupaq astakurqaku. Piensarqakum tukuy ima rurayta yachaspanku mana wañunankuta.

Chaypaqmi librokunata rantirqaku, yachachikuykunata chaskirqaku, runakunatapas tapukurqaku. Huertankuta ruraspankum fruta ruruq 50 taksalla sachakunata tarpurqaku, achka muhukunatawan herramientakunatam huñurqaku, hinaspam chakrapi tarpuytawan hukkunatapas yacharqaku... Amistadninkum yachachirqa animalkunata nakaspa charki ruraytapas. Mana ima mikunayoq qeparunankuta piensaspam, Karenqa yacharurqa mayqan sachakunapa sapin mikunapaq kasqanta. Garypas yacharurqam saramanta alcohol ruraytawan tullpa ruraytapas. Lliw ima necesitasqantapas wasinpim armakurqa manaña huklawmanta rantinankupaq.

Karenmi nin: “Kay pachapi tukuy imakuna pasakusqanwanmi, sutilla karqa runakunapa puchukaynin hichpallaña kasqanqa”, nispa. Garypas kaynatam nin: “Wakin mozokuna hinam ñoqapas Vietnam guerrapa, cheqninakuypa chaynataq suwakunapa contranpi karqani. Ichaqa chayllam hukmanyarurqani. Piensarqanim wañuchinakuchkaspa runakuna tukurunanchikta.

Hinaspam nin: “Huk tutam tiempoy kaptin, Bibliapi Mosoq Testamentota lliwta leerurqani. Qatiqnin tawa  tutakunapim astawan entiendestin yapamanta leerurqani. Achikyaqtam Karenta nirqani: ‘Tukupay tiempopim kachkanchik. Hichpaykamuchkanñam kay pachamanta mana allinkunata Diospa puchukachinan tiempo, chaymi kallpanchakunanchik salvakunankupaq kaqkunata tarispa hukllawakunapaq’”, nispa. Chayllam religionkunapi maskayta qallaykurqaku.

Pisi tiempollamantam Jehová Diospa testigonkuna punkunta takaykamurqa, hinaptinmi Biblia estudiayta qallaykurqaku. Karenmi willakun: “Anchatam kusikurqani Bibliamanta yachachiwaptinku. Unay tiempoñam yachayta munarqani kay pacha puchukananmanta, kunanmi ichaqa cheqap yachachikuyta tarirurqani. Yacharurqanitaqmi hamuq tiempopaq suyakuy kasqanmanta. Chaymantapas tukuy ima Unanchaq Jehová Diospa aswan amistadninmi sientikurqani”, nispa.

Garypas ninmi: “Hawkañam kawsakurqani. Biblia estudiaytaqa manapunim saqerqanichu. Bibliapa willakuyninkunata leespa chaynataq cumplikusqanta qawaspam, musyakurqani pisi tiempollamantaña Diosqa mana allinkunata chinkachinanta. Piensarurqanim: ‘Salvakunapaqqa manam tukuy ima rurayta yachaychu, aswanqa Diospa munasqanman hina kawsaymi’”, nispa. Hamuq tiempopi kay Pacha sumaq huertaman tikrakunanta yacharuspankum, manaña manchakurqakuñachu puchukay tiempomantaqa. Musyakurqakum runakunapa tukuy ima sasachakuyninta Dios chinkachinanta, hinaspa kay Pachata paraisoman tikrananmantapas.

Kunan 25 wataña pasaruptin, ¿imaynatam piensanku? Karenmi nin: “Diosta kuyayniywan iñiyniyqa aswanmi yapakurun. Kallpanchakunim hukkuna reqsispanku kuyanankupaqpas. Qosaywanmi yanapanakuniku kallpanchasqa kanaykupaq hinaspa huk sonqolla Diosta servinaykupaqpas. Kallpanchakunikutaqmi allinta tiempoykuta servichikuspa kapuqllaykuwan hawka kanaykupaq. Chaymi astawan runakuna yanapayta atiniku”, nispa.

Garypas ninmi: “Sapa punchawmi Diosta mañakuni Gobiernon hamuspan sasachakuymanta millonnintin runata librananpaq. Sapa kuti kay allin noticiamanta vecinoykunaman willanaypaqmi, Diosta mañakuni hukllatapas Bibliawan yanapanaypaq. Payqa 25 watañam chayna mañakusqayman hina bendeciwan. Pisi tiempollamantaña tukuy imakuna pasananta yachaspaykupas, manañam manchakunikuchu puchukay chayamunantaqa”, nispa (Mateo 6:9, 10; 2 Pedro 3:11, 12).

[9 kaq paginapi dibujo]

Garywan Karenmi predicaspanku runakunaman sumaq suyakuyta qonku