Puchukay tiempomanta tawa tapukuykuna

JESUCRISTOM hamuq tiempopi puchukay kananmanta rimaspan kaynata nirqa: “Llumpa-llumpay ñakariy punchawkunam kanqa, manam chaynaqa Dios kay pachata unanchasqanmantapunipas kunankama karqachu, manataqmi chaynaqa kanqachu qepa punchawkunapipas”, nispa (Mateo 24:14, 21).

Kay willakuymi hinaspa Bibliapi kayman rikchakuq huk willakuykunam, achka tapukuykunata rikurirachin. Qawasun kaymanta 4 tapukuykunata Biblia imayna kutichisqanta. Munaspaykiqa Bibliaykipim maskawaq kaypi rikuriq textokunata.

1 ¿Imataq puchukachisqa kanqa?

Bibliaqa manam yachachinchu kay Allpa pacha puchukananmantaqa, aswanmi nin hinalla takyananmanta. Salmo 104:5 nin, Dios ‘kay pachata maypi tiyananpaq unanchasqanta’ hinaspa ‘mana haykapipas suchurinanpaq chayna takyachisqanta’. Manataqmi yachachinchu kay pachapi tukuy ima kawsaqkuna hatun guerrapi chinkarunantaqa (Isaias 45:18). Jesucristom nirqa puchukay tiempopi wakin runakuna salvakunankuta (Mateo 24:21, 22). Chaynaqa, ¿imataq Bibliapa nisqanman hina puchukachisqa kanqa?

Runakunapa mana allin gobiernonkuna. Diospa yanapayninwanmi Daniel kaynata qellqarqa: ‘Diosmi hatarichinqa mana tuñichiy atina gobiernota, chay gobiernoqa huk runamanqa manam qosqachu kanqa [. . .]. Chay gobiernom llapallan wakin gobiernokunata ñutupaspan chinkachinqa hinaptinmi chay puchuruq gobiernollaña takyanqa wiñaypaq’, nispa (Daniel 2:44).

Kay pacha qachachaqkuna hinaspa guerrakuna. Diospa rurananmanta rimaspanmi Salmo qellqaq nirqa: “Guerrakunatam payqa tanirachin. Kay pachapa cantonkamam tanirachin. Flechana arcokunatam pakiparun. Peleana lanzakunatam pakiparun. Guerrapaq carretakunatam kañarun”, nispa (Salmo 46:9). Chaymantapas Diosqa ninmi ‘kay pacha chinkachiqkunata chinkachinanpaq’ (Apocalipsis 11:18).

 Wañuchinakuy hinaspa mana allin ruraykuna. Bibliam kaynata nin: “Diospa munasqanman hina kawsaqkunaqa kay pachapim yachanqaku. Mana culpayoq kaq runakunaqa kay pachapim hinalla takyanqaku. Mana allin ruraqkunam ichaqa kay pachamanta chinkachisqa kanqaku. Traicionaqkunam ichaqa qora pilarusqa hina kay pachamanta qechusqa kanqaku”, nispa (Proverbios 2:21, 22).

2 ¿Haykapitaq puchukay chayamunqa?

Diosqa yachanmi “haykapi” mana allin runakunata puchukachinanta hinaspa kay Pachata haykapi gobiernay qallarinantapas (Marcos 13:33). Ichaqa manam pipas yachayta atinmanchu haykapi chaykuna kanantaqa. Jesusmi nirqa: “Manam pipas yachanchu ima punchawmi otaq imay horam kutimunaytaqa, hanaq pachapi angelkunapas manam yachanchu nitaqmi Diospa Churinpas yachanichu aswanqa Taytallaymi”, nispa (Mateo 24:36). Chaywanpas Jesuswan wakin qatiqninkunam nirqaku manaraq puchukay chayamuchkaptin imakuna kay Pachapi pasakunanmanta. Hinaptinmi chay willakusqankuna huk tiempollapi hinaspa enteron Pachapi pasakuptin, yachasun puchukay chayamunantaña. ¿Imakunam pasanan karqa?

Desgraciakuna hinaspa runakuna imayna kanankumanta. Huk kutipim Jesusta qatiqninkuna tapurqaku puchukay tiempo chayamunanta imayna yachanankupaq. Payñataqmi nirqa: “Huk nacionmi peleanqa huklaw nacionwan, kanqataqmi kaypi-wakpi terremotokunapas chaynataq muchuykunapas, kaykunaqa ñakariykunapa qallariyllanraqmi”, nispa (Marcos 13:8). Apostol Pablopas nirqataqmi: “Yachanaykim tukupay tiempokunaqa sasallaña kananmanta. Runakunam kanqaku kikillanpaq munaqkuna, qollqella kuyaqkuna, hatun tukuspa alabakuqkuna, Dios insultaqkuna, mama-taytanku mana kasuqkuna, mana reqsikuqkuna, huchallapi purikuqkuna, mana kuyakuqkuna, mana pampachay munaqkuna, runakunapa contranpi rimaqkuna, mana controlakuqkuna, mana llakipayakuqkuna, allin kaqkunapa contranpi kaqkuna, runamasin traicionaqkuna, loco hina ruraqkuna, hatun tukuqkuna hinaspa Dios yupaychayta qepaman churaspanku kikinkupa munasqallanpi purikuqkuna”, nispa (2 Timoteo 3:1-5).

Allpantinpi imaymana rimaykunapi predicaymanta. Jesusmi nirqa: “Diospa munaychakusqanmanta kay allin noticiam willakusqa kanqa enterollan kay pachapi chaynapi llapallan nacionpi runakuna yachananpaq, chayñam kay tiempoqa tukunqa”, nisqa (Mateo 24:14).

3 ¿Imataq chaymanta pasanqa?

Bibliaqa manam yachachinchu lliw allin runakuna cieloman hoqarisqa kaspanku chaypi wiñaypaq kawsanankumantaqa. Aswanmi Diosqa runakunata unancharqa kay Pachapi wiñaypaq kawsanankupaq, Jesuspas chay cumplikunantam nirqa: “Mayna kusisqam llampu sonqoyoqkunaqa, paykunaqariki herenciapaqmi kay pachata chaskinqa”, nispa (Mateo 5:5; 6:9, 10). ¿Imataq pasanqa manaraq puchukay chayamuchkaptin wañuqkunawanqa? Bibliaqa ninmi kawsarinankumanta (Job 14:14, 15; Juan 5:28, 29). Hinaptin, ¿imataq pasanqa?

Diospa gobiernonpim Jesusqa hanaq pachamanta kamachimunqa. Danielmi kaynata willakurqa: “Revelacionniypi tuta hinalla qawachkaptiymi qonqaymanta puyukunawan kuska alto cielonta runapa churinman rikchakuq [kawsariruq Jesus] hamuchkasqa. Payqa Wiñaypaq Kawsakuqpa [Jehová Dios] kasqanmanmi hamuchkasqa. Wiñaypaq Kawsakuqpa qayllanmanmi asuykachirqaku paytaqa. Runapa churinman rikchakuqmanmi qorqa atiyniyoq kananpaq. Runapa churinman  rikchakuqmanmi qorqa yupaychasqa kananpaq. Llapallan runakuna, nacionkunam payta servinqaku. Huk rikchaq rimayniyoqkunapas paytam servinqaku. Paypa munaychakuyninqa wiñaypaq mana tukuqmi kanqa. Paypa gobiernonqa mana haykapipas chinkaqmi kanqa”, nispa (Daniel 7:13, 14; Lucas 1:31, 32; Juan 3:13-16).

Runakunam mana onqospa, hawkalla hinaspa wiñaypaq kawsanqaku. Isaiaspa willakusqanman hinaqa, “wasikunatam hatarichinqaku hinaspam chaypi yachanqaku. Uvas huertakunatam plantanqaku hinaspam rurunta mikunqaku. Wasikunatam hatarichinqaku ichaqa manam sapaq runakuna yachananpaqñachu” (Isaias 65:21-23). Chay tiempomantam apostol Juan nirqa: “Diosqa runakunawanñam yachachkan. Paykunam kanqa runankuna, Diosñataqmi kanqa paykunapa Diosnin. Diosmi pichanqa paykunapa weqenta, manañam kanqachu wañuypas [. . .], waqaypas nitaq nanaypas. Ñawpaq kaqkunaqa pasarunñam”, nispa (Apocalipsis 21:3, 4).

4 ¿Imatam rurananchik salvakunapaq?

Apostol Pedrom nirqa tukupay tiempokunapi yachaq wakin runakuna, kay Pachapi mana allinkunata Dios chinkachinanmanta burlakunankuta (2 Pedro 3:3, 4). Chaymi kallpancharqa kayta ruranankupaq:

 Ñawpaqpi pasakusqanmanta yachay. Pedropa nisqanman hinaqa, “Diosqa manataqmi pampacharqachu ñawpaq runakunatapas, sinchi paratam kachaykamurqa Dios mana adoraq runakunaman hinaspam salvacionmanta willakuq Noeytawan qanchis runakunallata salvarqa” (2 Pedro 2:5). Burlakuqkunamantapas nirqam: “Paykunaqa manam yachayta munankuchu cielokunaqa ñawpaq tiempomantaraq kasqantapas [. . .]. Sinchi parawanmi kay pachaqa chinkachisqa karqa. Kunan kaq cielokunatawan kay pachataqa * Diospa rimarisqanmi waqaychachkan ninapaq”, nispa (2 Pedro 3:5-7).

Diospa kamachikuyninkunata kasukuy. Pedrom nirqa pipas salvakuyta munaspaqa ‘chuya sonqo Diosta servispa kawsananmanta’ (2 Pedro 3:11). Salvakunapaqqa manam iñiyllachu iñinanchik nitaq chay horallañachu kallpanchakuna, aswanqa Pedropa nisqanman hinam ‘chuya sonqo’ kaspa ‘Diosta servina’.

Chaywanqa, ¿ima niytam Pedroqa munachkarqa? ¿Munawaqchu Bibliaykita servichikuspa chaymanta yachayta? Jehová Diospa testigonkunam yanapasunki. Chaynapim mana manchakuspa hamuq tiempota suyanki.

[Willakuy]

[7 kaq paginapi suti rikuylla kaq willakuy]

Diosqa manam kay Allpatachu puchukachinqa, aswanqa mana allin runakunatam