4 YANAPAKUY

Allinta akllasun amistadninchikkunata

BIBLIAM NIN: “Yachayniyoq runakunawan juntanakuspaykiqa yachayniyoqmi kanki”, nispa (Proverbios 13:20).

¿IMAM SASACHAWANCHIK? Amistadninchikpa imayna kasqanku hinaspa imayna rimasqankum vidanchikpi allin kawsakuyninchikta yanqachanman (1 Corintios 15:33).

Qawasun 12 wateqaq israelitakuna Canaan llaqtamanta kutimuptinku ima pasasqanta. Bibliam willakun 10 wateqaqkuna Israelpa mirayninkunaman allpa wateqamusqankupa contranpi rimasqankuta. Iskayñataqmi nirqaku chay ‘allpaqa alli-allin allpa kasqanmanta’. Llakikunapaqmi, yaqa lliw israelitakuna 10 wateqaqkunapa nisqankuta creerurqaku. Chaymi ‘Israelpa mirayninkuna qapariyta qallarispanku’ mana allinta rimapakurqaku (Numeros 13:30–14:9).

Kunan tiempopipas kanmi runakuna ‘pipapas qepanpi rimaspanku quejallapi puriqkuna’ munasqankuman hina (Judas 16). Cheqaptapunim sasa allin rurayqa, sichu amistadninchikkuna mana allinllata imamantapas piensaptinkuqa.

¿IMATAM RURACHWAN? Amistadninchikkuna imamanta rimasqankutam cuentata qokunanchik, imayna kasqankuta yachananchikpaq. Piensariy, ¿kapuqllankumantachu rimanku? ¿Sapa kutichu mana kapuqninkumanta rimapakunku? Ñoqanchikpas, ¿alabakunchikchu imapas kapuqninchikmanta rimaspa, icha kapuqllankuwan contentakunankupaqchu yanapanchik?

David hinaspa Jonatanmi sumaq ejemplo kanku amistadpura imayna kanapaq. Jonatanqa rey Saulpa churinmi karqa, chaymi paypa rantinpi rey kanan karqa. Ichaqa Diosmi prometerqa Saulpa rantinpi Davidña rey kananpaq. Hinaptinmi Davidqa chunniqmanña ayqekunan karqa Saul mana wañurachinanpaq. ¿Imatam Jonatan rurarqa? Davidta cheqninanmantaqa, Jehová Diospa tantearusqanta allinpaq hapispanmi amigon Davidta yanaparqa (1 Samuel 19:1, 2; 20:30-33; 23:14-18).

Allin amistadkunaqa munankum allin kananchikta, hinaspapas manam envidiakunkuchu (Proverbios 17:17). Arí, chayna allin amistadniyoq kanapaqqa, ñoqanchikpas chaynam kananchik (Filipenses 2:3, 4).

[7 kaq paginapi dibujo]

¿Allinninchikpaqchu amistadninchikkuna?