Bibliam vidankuta cambiarurqa

¿IMATAQ guerrillero, suwa runata kallpancharqa vidanta cambiananpaq? ¿Imanasqataq karatecapi sapa kuti ganaq warmi munasqankunata saqerqa? ¿Imaynatam taytapa iñiynin churinta yanaparqa? Qatiqnin willakuykunapim kaymanta yachasun.

“Ñawpaqpi mana allinta ruraspaypas, kunanqa kusisqañam kani” (GARRY P. AMBROCIO)

WATANMI: 47

NACIONNINMI: FILIPINAS

HUK WILLAKUYKUNA: ÑAWPAQTAM GUERRILLERO KARQA

ÑAWPAQ VIDAY: Vintar sutiyoq llaqtapim wiñarqani, chay llaqtapiqa yunkapi hinam sachakuna kan, yakupas chuyay-chuyaymi hinaspa wayrapas limpiom. Chay llaqtaqa hawkallam, ichaqa llumpay sasachakuymi karqa. Runakunam animalniykuta apakuqku hinaspapas wasiykutam suwawaqku.

Mozoyasqaymantapacham amigoykunawan llumpayta tomaq hinaspa cigarrota pitaq kani, hinaspapas suwakuqtaqmi kani chaykunata rantinaypaq. Abuelaypa alhajankunatapas suwakurqanim. Nuevo Ejército Popular sutichasqa guerrillawan chaqrukusqayta piensaspankum militarkunapas llumpayta maqaparuwaq. Chaynawaptinkum guerrillerokunaman hukllawakururqani. Montekunapim paykunawan yacharqaniku pichqa watapuni, ichaqa manam allintaqa kawsarqanikuchu. Sapa kutim militarkunamanta kayman-wakman ayqeq kaniku. Pakakuspa puriyta amiruspaymi Ilocos Norte sutiyoq llaqtapi gobernadorman entregakururqani. Chay runaqa allintam chaskiykuwarqa hinaspapas allin llamkayta tarinaypaqmi yanapawarqa. Ichaqa hinallam mana allin vidapi karqani, wasikunata suwakuspa chaynataq runakunata amenazaspa.

BIBLIAM VIDAYTA CAMBIARURQA: Loida sutiyoqmi llamkaqmasiy karqa, payqa Jehová Diospa testigonmi. Paymi Jovenciota reqsichiwarqa Bibliamanta yachachiwananpaq. Ichaqa manam saqeyta atirqanichu ñawpaq vidayta. Bibliamanta yachachiwananpaq manaraq Jovencio chayamuchkaptinmi cigarrota pitaq kani, hinaspapas mana allinkunatam hinalla ruraq kani. Chaymi huk punchaw mana allinkunata rurachkaptiy policia hapiruwarqa hinaptinmi chunka hukniyoq killa carcelpi tiyarqani. Chaypi kaspaymi Jehová Diosta mañakurqani yanapawananpaq, pampachawananpaq hinaspa chuya espiritunwan kallpanchawananpaqpas.

Jehová Diospa testigonmi carcelman watukamuwaspan Bibliata saqeykuwarqa. Leespaymi musyarqani Jehová Diosqa llakipayakuspa kuyakuyninpi huchakuna pampachaq kasqanta. Musyakurqanitaqmi llakipayawasqanmanta hinaspa reqsinay munasqantapas. Chaymi mana allin rurasqaykunata saqenaypaq  mañakurqani kallpata qowananpaq. Proverbios 27:11 nisqanmi sonqoykama chayarurqa. Jehová Dios ñoqatapuni kaynata niwachkanmanpas hinam: “Churilláy yachayniyoq kaspayá kusiriykachiy sonqoyta. Chayna kaptikiqa contestasaqmi insultaqniy runata”, nispa.

Carcelmanta lloqsiruspayqa hinallam Testigokunawan Bibliata estudiarqani, hinaspam huñunakuykunaman riyta qallaykurqani. Pisi-pisimantam Diospa kamachikuyninta rurayman churarqani, chaymi Diospa yanapakuyninwan mana allin rurasqaykunata saqeruspay. Tantearurqani Diosman qokunaypaq.

BENDICIONKUNA TARISQAYMANTA: Ñawpaqta mana allin viday kaptinpas, kunanqa kusisqañam kawsakuni. Mosoq runa hinañam kani chay viciokunata saqeruspay (Colosenses 3:9, 10). Anchatam kusikuni Jehová Diosta yupaychaqkunawan kuska tarikuspay, hinaspa paymanta runakunaman yachachispay.

“Munarqanim Brasil nacionpa sutinpi peleayta” (JULIANA APARECIDA SANTANA ESCUDEIRO)

WATANMI: 31

NACIONNINMI: BRASIL

HUK WILLAKUYKUNA: KARATEPI PELEAQ WARMI

ÑAWPAQ VIDAY: Londrina sutiyoq llaqtamantam kani. Chay llaqtapi runakunaqa lliwmi wakcha karqaku, ichaqa limpio hinaspa hawkallam yachaqku. 10 wataypi kaptiymi, mayor kaq turiy kallpanchawarqa paywan rispayku taekwondo nisqa karateta yachanaykupaq, kayqa “chakipawan makipa ñannin” ninanmi. Taytayqa manam munaqchu chay ruranaykutaqa, ichaqa cambiarurqam.

Anchata ensayaspaymi Paraná llaqtapi ganarqani achka campeonatokunapi. Nacionniypipas ganarqanitaqmi, hinaspam 1993 watapi Brasilpi titulota qowarqaku taekwondo nisqa peleopi ganaptiy. Munarqanim huklaw nacionkunapipas peleayta, ichaqa familiay wakcha kasqanraykum mana atirqanichu viajayta.

Anchatam munarqani kay taekwondo nisqa maqanakuyta Juegos Olímpicos nisqapi hukllawanankuta, chaynamá karqa. Chay hatun pukllaykunaman Brasilpa sutinpi riyta munaspaymi anchata ensayarqani, hinaptinmi estado yanapawarqa Francia, Vietnam, Corea del Sur, Japón chaynataq Juegos Sudamericanos nisqa pukllaykunapi kanaypaq. Chaymantañataqmi munarqani Juegos Panamericanos nisqapi peleayta, chaymi allin peleasqayrayku akllawarqaku 2003 watapi Santo Domingo (República Dominicana) llaqtapi peleanaypaq.

BIBLIAM VIDAYTA CAMBIARURQA: Casarakunaypaq mozowanmi 2001 watapi reqsirqani Jehová Diospa testigonta hinaspam Biblia estudiayta qallaykurqaniku. Puntataqa manam anchatachu estudiayta munarqani. Pisipasqa kaspaymi hukmanyasqa tarikurqani hinaspam puñuywan aysachikuq kani. Chayna kaptinpas yachasqaykunam sonqoyman chayarurqa, chaytam qawachirqani kaqmanta peleaq risqaypi.

Juegos panamericanos nisqapi pukllanaypaqmi akllasqa karqani, chaymi manaraq chayman richkaptiy profesorniy peleachiwaq  huk peleaykunallapiraq. Peleanaypaq hora chayaramuptinmi yaykuruspay qonqayllata mana kuyurispa qasilla sayarurqani. Chayllam cuentata qokururqani cristianokunaqa pukllaspallapas mana peleanankumanta. Yuyarirurqanim Bibliapa kayna nisqanta: ‘Kuyankim runamasikita kikikita hina’ (Mateo 19:19). Qonqayllatam mana iskayrayaspa kutikurqani. Chaymi llapallanku qawawarqaku admirasqa.

Wasiyman chayaruspayñataqmi yuyaymanarqani viday imayna kananmanta. Jehová Diospa testigonkunapa rurasqan huk folletotam leerqani, chaymi rimasqa ñoqanchikmanta Dios ima munasqanmanta. Chaypim qawarqani Salmo 11:5 Diosmanta kayna nisqanta: “Cheqnillanmi payqa daño ruraqkunatapas”, nispa. Chay leesqaymi anchata yanapawarqa, hinaptinmi manaña peleanaypaq tantearurqani.

Profesorniykunaqa manam allinpaqchu qawarqaku. Hinaspam Brasil nacionpi pimantapas aswan allin pukllaq kasqayta hinaspa Juegos Olímpicos nisqamanpas rinayta niwaspa allinta tanteakunaypaq niwarqa. Ichaqa tantearurqaniñam imam ruranayta.

Chaykamaqa ñam casarakururqaniña. Qosayqa predicaqpas lloqsirqañam. Kusisqam wasiman kutimuq hinaspam willawaq runakunawan rimamusqanmanta. Ñoqapas chayna kusisqa kayta munaspayqa imayna kasqaytam cambianay karqa. Chaymi religionniyta saqeruspay kallpanchakurqani Jehová Diospa testigonña kanaypaq.

BENDICIONKUNA TARISQAYMANTA: Qosaywanmi ancha kusisqa kaniku casado vidaykupi Diospa kamachikuyninta kasukunaykupaq iskayniyku kallpanchakusqaykurayku. Kusisqam yanapani congregacionpi ima ruraykunapipas yanapakunanpaq. Pukllasqaykunapi qorimanta premio ganayta hinaspa ancha reqsisqa kaytaqa atiymanmi karqa. Ichaqa segurom kachkani, kay pachapi kaqkunamantaqa, Diosta serviyqa ancha valorniyoq kasqanta.

“Taytayqa manam qonqaruwarqachu” (INGO ZIMMERMANN)

WATANMI: 44

NACIONNINMI: ALEMANIA

HUK WILLAKUYKUNA: DISCOTECA CUIDAQMI KARQA

ÑAWPAQ VIDAY: Nacerqanim Gelsenkirchen llaqtapi, chay llaqtaqa reqsisqam karqa carbon minayoq kasqanrayku. Tayta-mamaypas, iskaynin paniykunapas, wawqeypas hinaspa ñoqapas sapakamam religionniyoq karqaniku. Taytayqa Diospa testigonmi karqa, mamaymi ichaqa mana munaqchu Bibliamanta yachachiwanankuta. Taytayqa camionta manejaspanmi 10 horata otaq mastapas sapa punchaw llamkaq, qallariqmi chawpi tuta pasayta (2 ó 3 a.m.). Chaywanpas sapa kutim interesakuq Dioswan allin kanaykupaq. Ichaqa manam kaqpaqpas hapirqanichu.

Religionninpi huñunakuykunamanmi taytay pusawaq ichaqa manam gustawaqchu, chaymi 15 wataypiqa manaña riqchu kani. Huk wata pasaruptinmi yaykurqani boxeopi peleaq. Qatiqnin 2 watañataqmi mana allinta portakuspay taytayta piñachiq kani. Chaymantañataqmi 18 wataypi wasiymanta ripukurqani.

 Pukllay gustawaptinmi semanapi ensayarqani 6 kutita, puntatam boxeopi chaymantañataqmi llasaqkunata hoqariypi. Amigoykunawanmi sapa semana tukuyta discotecaman riq kaniku. Huk punchawmi manchakuypaq runawan pelearqani ichaqa chayllam vencerurqani. Chay discotecapa dueñonmi peleasqayta rikuruwaspan niwarqa discotecanta cuidanaypaq. Allinta pagasqanraykum chaylla chaskirqani.

Sapa semana tukuytam discotecapa punkunpi sayaspay tanteaq kani pim yaykunanta otaq manapas. Yaykuqkum 1.000 runakuna hinaspam huntay-huntay kaqku, chaymi tiempoypas mana haypawaqchu. Peleopas kakuqmi. Amenazawaqmi armawan hinaspa pakisqa botellakunawan. Hukkunatañataqmi hawapi suyawaqku mana yaykuchisqaymanta otaq qarqosqaymanta vengakunankupaq. 20 watallaypim mana vencey atina sientikurqani. Ichaqa, mana controlakuqmi karqani, insultakuq, hatuntukuq, kikillaypaq munaq hinaspa mana kasukuq.

BIBLIAM VIDAYTA CAMBIARURQA: Taytayqa manam qonqaruwarqachu. Llaqta Cuidaq hinaspa ¡Despertad! * revistakunatam apachimuwaq. Chaskiruspaymi ichaqa mana leespay cuartoypi montonaruq kani. Huk punchawmi leeruspay tarirqani kay tiemponchikpi politicokuna, religiosokuna hinaspa hukkunapas chinkachisqa kananmanta, chaymi paniyta qayarqani, payqa qosanpiwanmi Jehová Diospa testigon karqaku. Chaymi Bibliamanta yachachiwanankupaq niwaptinku estudiayta qallaykurqani.

Galatas 6:7 nisqanpi Diospa kamachisqanmi kallpanchawarqa vidayta cambianaypaq. Ñoqaqa yacharqanim imapas rurasqayman hina viday imayna kananmanta. Chaymantapas Isaias 1:18 nisqanmi anchata kallpanchawarqa. Chaypim nin: “Ñoqa Tayta Diosmi nini: Kunanyá ñoqaman hamuychik. Kunanyá ñoqawan tanteanakusunchik. Cochinilla hina guindoña huchaykichik kaptinpas ritita hinam yuraqyachisaq”, nispa. Kayna nisqanmi Biblia estudiasqaymantapacha yanapawarqa mana hukman tarikunaypaq hinaspa Diosman asuykunaypaq.

Anchata kallpanchakuspaymi 6 killapi vidayta cambiarurqani. Saqerqanim mana allin amistadniykunata hinaspa mana allin ruraykunatapas. Chaymi amistadniykunaman nirqani Biblia estudiasqayta hinaspa yachasqaykunatapas willarqani. Paykunam suticharuwarqaku “cura” nispanku, hinaspam karunchakuruqku ñoqamanta. Llamkanaypaqpas paniypa yanapayninwanmi tarirurqani aswan allin llamkayta.

Paniypa hinaspa qosanpa huñunakusqan Salonman riytam qallaykurqani karupi (30 km.) kachkaptinpas. Karqataqmi wasiypa hichpanpi huk salonpas, ichaqa manchakurqanim warma tiempoypi reqsiwaqniykunawan tupayta. Manchakurqanitaqmi vecinoykunaman wasin-wasin predicaytapas. Manam munarqanichu discotecamanta qarqosqay otaq drogakuna rantikusqay runakunawan tuparuyta. Ichaqa ñawpaqtam yacharurqani sasa ruray ejerciciokuna aswan allin kasqanta. Chaymi predicanapaq ima necesitakusqanta ruraruspay chaylla predicaq lloqsirqani.

Ichaqa manam chayllachu, karqataqmi huk sasachakuypas: manam gustaqchu kani leeyta, aswanmi estudiaytaqa. Yacharqanim iñiyniypi allin takyayta munaspayqa, Bibliapa yachachikuyninta estudianaypuni kasqanta. Yaqa chaynam llasaqkunata hoqarinanpaqpas, kallpayoq kanapaqqa anchatam kallpanchakuna.

BENDICIONKUNA TARISQAYMANTA: Kunankamam kawsakuchkaniraq. Reqsikunim ñawpa imayna kasqay mana atiparuwananpaq cuidakunay kasqanta, ichaqa kusisqam kachkani sumaq kayniyoq cristianawan casado kasqaymanta. Jehová Diospa llaqtanpim confianapaq hina cheqap amistadkunata tariruni. Taytaypa wañukusqanmantam pichqa wataña pasarun, ichaqa manaraq wañukuchkaspanmi ancha llakichiqnin churinta kusisqa chaskiykuwarqa.

[Willakuy]