¿Imaynatam atipachwan mana valeqpaq hapikusqanchikta?

¿PITAQ haykapipas mana hukmanyasqa tarikurqa? Kay tiempopiqa sasachakuykunapi hinaspa llakikuykunapim tarikunchik. Chaymi achka runakuna llakisqa, culpayoq kawsanku otaq mana kuyakunkuchu. ¿Qampas chaynachu tarikunki?

Chayna kaptinqa, yachankichá chaykuna llumpay hukmanyanapaq kasqanta. Kaykunawan atipachikuspaqa manam allinchu tarikuchwan hinaspapas manañam kikinchikpi confiachwanchu nitaq kusisqachu kawsachwan. Bibliam nin: “Sasachakusqayki punchawpi hukmanyaruspaqa pisi kallpayoqñam rikurirunki”, nispa (Proverbios 24:10). Arí, kay pachapi tukuy sasachakuykunata atipanapaqqa, tukuy kallpanchiktam necesitanchik. Chaymi mana valesqanchikta piensaspaqa, kallpanchakunanchikmi atipanapaq. *

Kay sasachakuyta atipanapaqmi Biblia kapuwanchik. Ama qonqasunchu, Jehová Diosqa manam munanchu llumpay hukmanyasqallaña kananchiktaqa (Salmo 36:9). Chaynaqa qawasunchikyá Bibliapi 3 yanapakuykunata.

Diosqa interesakunmi qanmanta

Achka runakunam piensanku imayna tarikusqanchikpi Dios interesakunanmantaqa huk ruraykunapi aswan piensasqanta. Bibliam ichaqa kaynata niwanchik: “Jehová Diosqa llakisqa sonqoyoqkunapa qayllanpim kachkan, payqa llakipa ñitisqan sonqoyoqkunatam salvaykun”, nispa (Salmo 34:18, NM). ¿Manachu kusikuchwan llumpay sasachakuypi kaptinchik llapallan kamachiq Jehová Dios yanapawananchikpaq hichpallanchikpi kaptin?

Seguropunim kachwan ñakariptinchik Jehová Dios ñoqanchikpi interesakusqanta, Bibliam nin ‘Diosqa kuyakuqllaña’ kasqanta (1 Juan 4:8). Arí, payqa kuyawaspanchikmi interesakun allinninchikta munaspan, astawanmi ñakariptinchikqa. Israelitakuna Egiptopi sirviente kaptinkum yaqa 3500 wata qepata, kikin Dios nirqa: “Qawachkanim Egipto nacionpi runaykunapa ñakarisqanta, uyarichkanitaqmi llamkachiqninkunarayku waqasqankutapas. Yachanitaqmi nanaypi kallasqankutapas. Chaymi uraykamuni [. . .] libranaypaq”, nispa (Exodo 3:7, 8).

Ichaqa manam chayllachu. Jehová Diosqa allintapunim yachan imayna tarikusqanchikta “paymi unanchaykullawarqanchik” manam kikinchikchu (Salmo 100:3). Hinaptinqa wakinpi qanmanta pipas mana interesakusqanta piensaspaykiqa, segurom kawaq qanmanta Dios interesakusqanta. ¿Imanasqa? ‘Runaqa qawan manam Diospa qawasqanman hinachu. Runaqa qawan hawallantam, Diosmi ichaqa qawan sonqonta’ (1 Samuel 16:7). Diosqa yachanmi ima piensasqanchikta hinaspa imayna tarikusqanchiktapas.

Arí, pantasqanchiktawan mana allin rurasqanchikkunatapas payqa rikunmi. Ichaqa ama llakikuychu: payqa entiendenmi hinaspapas kuyakuqmi. Rey Davidmi chuya espiritupa yanapakuyninwan nirqa: “Imaynam tayta churinkunata llakipayan, chaynam Tayta Diospas respetaqninkunata llakipayan. Payqa yachanmi imamanta rurasqa kasqanchikta. Payqa yuyanmi allpamanta rurasqa kasqanchikta”,  nispa (Salmo 103:13, 14). Wakinpiqa kikillanchikmi mana allinta juzgakunchik. Jehová Diosmi ichaqa mana chaynachu: payqa sumaq kayninchikkunatam qawan hinaspam sonqomanta wanakuptinchikqa huchanchikkunatapas pampachawanchik (Salmo 139:1-3, 23, 24).

Huk rimaypiqa, mana valeqpaq hina hapikusqaykitaqa atiwaqmi atipayta, Jehová Dios kuyakuywan qawawasqanchikpi yuyaymanaspa (1 Juan 3:20).

Dioswan allin amistadta ruray

Jehová Dios ñoqanchikpi interesakusqanmanta yachaymi yanapawasun mana valeqpaq hina hapikusqanchikta atipanapaq chaynapi Dioswan allin amistadta ruranapaq. Ichaqa, ¿cheqaptachu atikunman?

Arí atikunmanmi. Chaymantapas hanaq pachapi kuyakuq Taytanchikqa munachkanmi amistadnin kananchikta. Chaynatam Biblia nin: “Diosman asuykuptikichikqa paypas asuykusunkichikmi”, nispa (Santiago 4:8). ¿Manachu admirakunapaq? Pantaq hinaspa huchallikuq runa kaspapas lliwmi atichwan tukuy atiyniyoq Diospa amistadnin kaytaqa.

Chaypaqqa Bibliapa yanapakuynintam maskananchik, chaypim kikin Dios qawachiwanchik imayna kasqanta. Sapa kuti Bibliata leespataqmi yachasunchik sumaq kayninkunamantapas. * Leespa yuyaymananapaq tiempochakuspaqa sapa kutim payman asuykusun. Chaynapim qawasunchik kuyakuq hinaspa llakipayakuq Taytata hina.

Ichaqa, Diospa yachachikuyninkunata sonqonchikpi waqaychayqa yanapawanchikmi piensasqanchikta correginapaq, pusawananchikpaq hinaspa consuelawananchikpaqpas. Chaymi imapas llakichiwaptinchikqa allinpuni yuyaymananapaq tiempochakuyqa. Salmos qellqaqpas nirqam: “Pensamientokunapa intusqan kaptiymi qamqa consuelawaspayki kusichiwanki”, nispa (Salmo 94:19). Diospa Palabranqa hawkayachiwanchikmi. Cheqap yachachikuyninta kasukuptinchikqa, llakinchikkunam pisi-pisimanta chinkanqa hinaptinmi Diospa qowasqanchik hawkayayta tarisunchik. Imaynam kuyakuq tayta churinkunata qawan chaynam Jehová Diospas necesitasqanchikpi yanapawananchikpaq hinaspa consuelawananchikpaq listo kachkan.

Chaynaqa, Dioswan allin amistad kananchikpaqqa paywanmi sapa kuti rimananchik. Bibliam nin: “Paypa munasqanman hina [imatapas] mañakuptinchikqa uyariwanchikmi”, nispa (1 Juan 5:14). Imawanpas preocupakuspaqa haykapipas Diospa yanapakuynintam mañakuchwan. Payman willakuspaqa hawkayaytam tarisun. Apostol Pablom nirqa: “Orakuspaykichikyá lliwta Diosman willaychik hinaspayá payman graciasta qoychik. Hinaptinqa  Diosninchikmi hawkayachisunkichik runakunapa mana entiendey atinan hawkayaywan”, nispa (Filipenses 4:6, 7).

Yuyariy: sichu kallpanchakunki sapa punchaw Bibliata leenaykipaq, yachasqaykipi yuyaymananaykipaq chaynataq sapa kuti Diosta mañakunaykipaq hinaspaqa Dioswanmi allin amistad kanki. Chay amistad rurasqaykim amparasunki hukmanyasqa tarikusqaykita atipanaykipaq. Kunanñataq qawasun 3 kaq yanapakuyta.

Cheqap suyakuypiyá hapipakuy

Llumpay sasachakuypi kaspapas atichwanmi mana hukmanyasqa kaytaqa. ¿Imanasqa? Diosmi prometewanchik allin tiempokuna chayamunanta. Apostol Pedrom kay suyakuymanta qellqarqa: “Ñoqanchikmi ichaqa suyachkanchik Diospa prometewasqanchik mosoq cielokunatawan mosoq allpata, chaypim ichaqa tukuy imapas allin arregloman hina rurasqa kanqa”, nispa (2 Pedro 3:13). Ichaqa ¿ima ninantaq kay promesaqa?

‘Mosoq cielokuna’ nispanqa hanaq pachapi Diospa Gobiernonmantam rimachkan, Jesucristom chaypi kamachinqa. ‘Mosoq allpa’ nispanñataqmi rimachkan mosoq Pachapi kawsaq allin runakunamanta, Diosmi paykunata bendecinqa. “Mosoq cielokuna” “mosoq allpata” gobiernaptinmi allin runakunaqa manaña haykapipas hukmanyanqakuñachu. Chay tiempopi kawsaq allin runakunamanta rimaspanmi, Biblia nin: “Diosmi pichanqa paykunapa weqenta, manañam kanqachu wañuypas, lutokuypas, waqaypas nitaq nanaypas”, nispa (Apocalipsis 21:4).

Kaykunapi piensayqa pitapas kallpanchanmi, ¿aw? Chaymi Bibliaqa nin hamuq tiempopaq sumaq ‘suyakuy’ kasqanta, chaytam Jehová Dios prometen serviqninkunaman (Tito 2:13). Chaykunapi piensaspaqa librakunkim  hukmanyasqa hinaspa llakisqa tarikusqaykimantaqa (Filipenses 4:8).

Admirakuypaqmi Bibliaqa suyakuyninchikta rikchanachin soldadopa casconwan (1 Tesalonicenses 5:8). Ñawpaq tiempopiqa manam pi soldadopas mana cascoyoqqa guerramanqa riqchu. ¿Imanasqa? Chaywanmi umankuta harkachikuqku imapas mana hapirunanpaq, imaynam casco umanchikta harkan, chaynam suyakuyninchikpas pensamientonchikta cuidan. Diospa qowasqanchik suyakuypi astawan yuyaymanaspaqa manchakuytawan mana valeqpaq hina hapikusqanchiktam atipasun.

Hinaptinqa, hinallam kallpanchakunanchik hukmanyachiwaqninchik pensamientokunata atipananchikpaq. Ama qonqaychu, Diosqa interesakunmi qanmanta, paywan allin amistadta ruray hinaspa hapipakuy sumaq suyakuy qosusqaykipi. Ñam llakikuyqa, sasachakuywan hukmanyaypas wiñaypaq chinkachisqaña kanqa. Chaynaqa ¡hinallayá kallpanchakuy! (Salmo 37:29.)

[Willakuykuna]

[19 kaq paginapi suti rikuylla kaq willakuy]

‘Yachanim nanaypi kallasqankuta.’ EXODO 3:7, 8

[20 kaq paginapi suti rikuylla kaq willakuy]

“Pensamientokunapa intusqan kaptiymi qamqa consuelawaspayki kusichiwanki.” SALMO 94:19

[21 kaq paginapi suti rikuylla kaq willakuy]

“Diosninchikmi hawkayachisunkichik runakunapa mana entiendey atinan hawkayaywan.” FILIPENSES 4:7

[20 hinaspa 21 kaq paginakunapi dibujo hinaspa recuadro]

Jehová Diosqa consuelakuqmi: yuyaymananapaq textokuna

“Ñoqaqa sumaq sonqo Diosmi kani, ñoqaqa anaq piñakuq sinchi cheqap kuyapayakuq Diosmi kani.” (EXODO 34:6)

“Diosqa qawamuchkanmi llapallan kay pachapi pasaqkunata chaynapi paypa qayllanpi allin sonqoyoqkunaman atiyninta qawachinanpaq.” (2 CRONICAS 16:9)

“Huchanmanta llakiq runapa hichpallanpim sayaykun. Huchayoqpas wanakuptinqa Tayta Diosmi salvaykun.” (SALMO 34:18)

“[Jehová Diosllay] hucha pampachaykuq allin sonqom qamqa kanki.” (SALMO 86:5)

“Diosqa ancha allinmi llapallanpaqpas. Llakipayarikunmi llapallan rurasqankunamantapas.” (SALMO 145:9)

“Ñoqa Tayta Diosmi alleq makikichikmanta hapiqnikichik kani. ‘Ama manchakuychikchu, ñoqam yanapasqaykichik’ niqnikichikmi kani.” (ISAIAS 41:13)

“Alabasunchikyá [. . .] Diosninchikta, payqa llakipayakuq Taytam hinaspa sinchi kallpanchaqninchik Diosmi.” (2 CORINTIOS 1:3)

“Diospa ñawpaqninpiqa mana manchakusunchu sonqonchik imamantapas acusawaptinchikqa. Diosqa aswanraqmi sonqonchikmantaqa, payqa lliwtam yachan.” (1 JUAN 3:19, 20, NM)

[22 kaq paginapi dibujokuna hinaspa recuadro]

Mana valeqpaq hapikusqankutam atiparqaku

“Taytaymi tragoman qokuruspan anchata ñakarichiwarqa. Cuenta qokuq kasqaymantapacham mana valeq kasqaypaq hapikurqani. Ichaqa huk punchawmi Jehová Diospa testigonkunawan Biblia estudiayta qallaykuspay yacharurqani kay Pachapi wiñay kawsananchikta Dios munasqanta. Chay suyakuymi anchata kusirichiwarqa. Chaymantapacham sapa punchaw Biblia leeyta qallaykurqani. Bibliaqa maypipas kapuwanmi mana allin sientikuspay kallpanchaqniy textokunata leenaypaq. Diospa sumaq kayninkunapi yuyaymanasqaymi yuyarichiwan Dios kuyawaspan chaninchawasqanta.” (33 watayoq Katia) *

“Ñoqaqa tragomanmi qokururqani, drogakurqanim terocalwan, marihuana, cocaina hinaspa crack nisqawan. Qalaypaq wakchayaruspaymi limosnakurqaniña. Ichaqa Jehová Diospa testigonkunawanmi Biblia estudiayta qallaykurqani, hinaptinmi viday cambiarurqa. Diosmi ñoqapaq cheqap rikurirurqa. Kunanpas hinallam mana valeqpaq hapikusqayta atipanaypaq kallpanchakuni, ichaqa Jehová Dios kuyakuq hinaspa llakipayakuq kasqanta yachasqaymi yanapawan. Payqa hinallamá kallpanchawanqa chayna sientekusqayta atipanaypaq. Bibliamanta cheqap yachasqaymi allinpuni vidaypi karqa.” (37 watayoq Renato)

“Warmacha kasqaymantam mayorniy turiywan tupachikuq kani, chaymi mana valeqpaq sientechiwaq. Arí, kunanpas iskayrayanim, hinaspa imatapas mana ruray atisqaytam piensani. Ichaqa manam atipachikusaqchu. Sapa kutim Diosta mañakuni kallpanchawananpaq, Payqa manam saqewarqachu. ¡Anchatam kusichiwan Dios kuyawasqanmanta hinaspa interesakusqanta yachasqay! (45 watayoq Roberta)

[Willakuy]