1 YANAPAKUY

Runamasinchiktam kuyana, manam qollqetachu

BIBLIAM NIN: “Qollqella kuyayqa tukuy mana allin ruraykunapa mamanmi”, nispa (1 Timoteo 6:10).

¿IMAM SASACHAWANCHIK? Televisionpiwan radiopi willakuykunam sapa kuti piensachiwanchik tukuyta necesitasqanchikta. Munankum imaynatapas chayllaraq lloqsimuqta, allinnin otaq hatunnin kaqta rantinanchikta. Chayllam qollqella kuyaq rikuriruchwan. Ichaqa Bibliam niwanchik pipas qollqe kuyaqqa imawanpas mana contentakusqanta. Rey Salomonpas nirqam: “Qollqe kuyaq runaqa maynaña qollqewanpas manam contentakunmanchu”, nispa (Eclesiastes 5:10).

¿IMATAM RURACHWAN? Jesustam qatipakuna, paymi runakunata astawan kuyarqa qollqemantaqa. Chaymi munasqankunata qepanchaspan vidantapas qorqa (Juan 15:13). Nirqam: “Ima chaskiqmantapas aswan kusisqaqa imapas qoqmi”, nispa (Hechos 20:35). Tiemponchiktawan kapuqninchikta runamasinchikrayku servichikuptinchikqa, paykunapas chaytam ruranqaku. Jesusmi nirqa: “Qoychikyá runamasikichikman chaynapi Dios qosunaykichikpaq”, nispa (Lucas 6:38). Arí, qollqe kuyaqkunaqa manam haykapipas contentakunkuchu hinaspam anchata ñakarinku (1 Timoteo 6:9, 10). Runamasinchikta kuyaymi ichaqa kusichiwanchik.

Chaynaqa, imayna tarikusqanchikmanta tapukusun: “¿Atiymanchu kapuqllaywan kawsayta? ¿Mayqan kapuqniytapas saqeruymanchu? ¿Cheqaptachu necesitani rantiy munasqayta?”, nispa. Tiemponchiktawan kallpanchikta allinta servichikuspaqa, atisunmi imamantapas aswan allin kaq rurayta: runamasinchik yanapayta hinaspa Dios serviytapas (Mateo 6:24; Hechos 17:28).

[4 kaq paginapi dibujo]

“Qoychikyá runamasikichikman chaynapi Dios qosunaykichikpaq”