Diosman asuykuychik

Diospa favornintam tarirqa

“MANACHUSMI Diosqa pampachawanmanchu.” Chaynatam huk runa nirqa Dios mana kasukusqan qepata, payqa warma kasqanmantam yacharqa Diospa kamachikuyninmanta. Vidanta cambiananpaq kallpanchakuspanpas piensarqam Dios mana pampachasqanta. Ichaqa rey Manasespa vidanmanta 2 Cronicas 33:1-17 leesqanmi yanaparqa. Sichum qampas huchallikusqaykiwan hukmanyasqa kaspaykiqa allinmi kanman rey Manasesmanta yachayniki.

Juda nacionta allin kamachiq taytan rey Ezequiasta Jehová Dios milagrowan sanoyachisqanmanta 3 wata qepatam Manasesqa nacerqa (2 Reyes 20:1-11). Diosman sonqo Ezequiasqa piensarqachá churin Manasesqa kuyapayakuq Diospa regalo qosqan kasqanta. Ezequiasqa kallpanchakurqachá Jehová Diospa kamachikuyninkunata churin chaninchananpaq yachachiypi. Ichaqa reqsikunanchikmi wakin churikunaqa tayta-mamanpa ejemplon mana qatipakusqanta. Chaynam Manasespas karqa.

Ezequiasmi wañukurqa Manases 12 watachanpi kachkaptin. Chaymantapacham Jehová ‘Diospa qayllanpi mana allinkunata rurayta’ qallaykurqa (1, 2 versiculokuna). ¿Diosta mana kasukuqkunapa consejasqanwanchu mana allin ruraq rikurirurqa? Bibliaqa manam imatapas ninchu. Ichaqa ninmi taytacha-mamacha yupaychaq hinaspa runamasin wañuchiq kasqanmanta. Altarkunata taytacha-mamachapaq rurachirqa hinaspam churinkunata chaypi kañarqa, layqakunapa rurasqantam rurarqa chaymantapas millakuypaq rurachisqan taytachatam Diospa templonpi churachirqa. Corregikunanpaq achka kutita Dios willachiptinpas manam kasukurqachu (3-10 versiculokuna).

Chaymi Jehová Diosqa saqerqa Babiloniaman cadenawan wataspa preso apanankupaq. Chaypichá Manasesqa yuyaymanarqa vidan imayna kasqanmanta. Cuentatachá qokurqa taytachamamacha rurachisqanqa mana amparaqnin yanqa kasqanmanta. Yaqapaschá yuyarirqa warma kaptin taytanpa yachachisqanmanta. Chaymi imayna kawsasqanta qalaypaq cambiarqa. Bibliapa willakusqanman hinam Manasesqa Jehová Diosta “mañakurqa” hinaspam paypa ‘qayllanpi pasaypaqta humillakurqa’ (12, 13 versiculokuna). Ichaqa ¿Jehová Diosqa pampachanmanchu karqa pasaypaq mana allin ruraq runata?

Jehová Diosqa Manasestam llakipayarqa sonqonmanta wanakusqanta qawaspan. Chaymi sonqonmanta orakusqanta uyarispan ‘Jerusalen llaqtapi gobiernonman kutichimurqa’ (13 versiculo). Wanakusqanta qawachinanpaqmi Manasesqa anchata kallpanchakurqa taytacha-mamachata hinaspa altarkuna rurachisqanta purmachinanpaq hinaspam llaqtanpi runakunata kallpancharqa Jehová Diosta servinankupaq (15-17 versiculokuna).

Sichum huchaykita Dios mana pampachananta piensaspaqa Manasespa vidanta yuyariy. Jehová Diosmi kay willakuyta Bibliapi qellqachirqa kallpanchawananchikpaq hinaspa “hucha pampachaykuq” kasqanta qawachiwananchikpaq (Salmo 86:5; Romanos 15:4). Diosqa reparan manam runapa huchallikusqanpichu aswanqa sonqonmanta wanakusqanpim. Sichum tukuy sonqoykimanta wanakuspa Dios pampachasunaykipaq mañakuspa vidayki cambianaykipaq kallpanchakuspaqa Manases hinam Diospa favorninta tarinki (Isaias 1:18; 55:6, 7).