Revistanchikta leeqkunam tapukunku

¿Llapan cheqap cristianokunachu hanaq pachaman rinku?

▪ Achka runakunam Jesuspa kayna nisqanta leerqaku: “Diosqa ancha-anchatam kuyarqa runakunata, chaymi sapallan Churinta qomurqa pipas paypi iñiqqa manaña puchukaspa wiñaypaqña kawsananpaq” (Juan 3:16). ¿Nichkarqachu Jesusqa Diosta lliw serviqkuna hanaq pachaman rispanku wiñay kawsaypi kusisqa kawsakunankuta?

Reparay Jesuspa nisqanpi: “Manam pipas rirqachu hanaq pachataqa, ichaqa hanaq pachamanta uraykamuq Diosmanta Hamuq Runallam” (Juan 3:13). Kaywanmi nichwan Diosta serviq Noey, Abraham, Moises hinaspa Davidpas manam hanaq pachamanqa rirqakuchu (Hechos 2:35). Hinaptinqa, ¿maymantaq rirqaku? Paykunaqa sepulturapim puñuchkaq hina kachkanku kawsarimuy punchawkama (Eclesiastes 9:5, 6; Hechos 24:15).

Wañukuspa hanaq pachaman riymantaqa Jesusmi puntata rimarqa. Hanaq pachapi kawsanankupaqmi apostolninkunaman nirqa (Juan 14:2, 3). Chay yachachikuyqa mosoqmi karqa qatiqninkunapaqqa. Tiempopa risqanman hinam apostol Pablopas nirqa Jesusqa wañusqanmanta kawsarimuspan cieloman kutispan ‘kawsachkaq mosoq ñanta [qatiqninkunapaq] kichasqanmanta’, chay ñannintaqa manaraqmi pipas rirqachu (Hebreos 10:19, 20).

¿Chaymantapachachu cristianokunaqa hanaq pachaman rinanku karqa? Manam, chayqa wakin runakunallapaqmi, huk rurayta ruranankupaqmi rinqaku. Huk tutallaña wañukunanpaq faltachkaptinmi apostolninkunaman nirqa Gobiernonpi ‘tiyaykuspanku [. . .] juzganankupaq’ akllasqa kasqankumanta (Lucas 22:28-30).

Manam apostolkunallachu chaypaqqa akllasqa karqaku. Revelacionninpim apostol Juan rikurqa hanaq pachapi kawsarimuq runakunawan Cristo kasqanta, Biblia nin: “Sacerdotekunataña rurarurqanki. Kay pachapi gobiernanankupaqmi chaynataqa rurarurqanki”, nispa (Apocalipsis 3:21; 5:10). ¿Haykatam rikurqa? Mayqen nacionpipas wakin runakunallam gobiernanku. Chaynam Diospa Gobiernopipas, 144.000 reykunallam Cristowanqa gobiernanqaku, ‘paykunaqa [. . .] runakuna ukumanta rantisqam kanku’ (Apocalipsis14:1, 4, 5).

Ñawpaqpi chaynataq kay tiempopi tukuy sonqonwan Dios serviqkunamantaqa 144.000 kaqkunaqa asllam kanku. Paykunaqa hanaq pachapi gobiernanankupaqmi akllasqa kanku. Tupanachisun: Wasi ruranaykipaq tanteawaq. ¿Llaqtaykipi llapallan wasi ruray yachaqkunatachu contratawaq? Manachá. Wasikita rurananpaq kaqkunallatachá. Chaynam Diospas, manam lliw payman sonqo kaqkunatachu Cristowan gobiernamunankupaqqa akllan.

Chay gobiernoqa runakunapaq Diospa munasqantam cumplinqa. Jesusmi 144.000 kaqkunawan enteron Pachata tikranqaku suma-sumaq huertaman, chaypim Diosta serviqkunaqa wiñaypaq kusisqa kawsakunqaku (Isaias 45:18; Apocalipsis 21:3, 4). Kawsarimunqakutaqmi Diospa yuyasqan runakuna, Cristopi iñispaqa wiñaypaqmi kawsanqaku (Juan 5:28, 29).

Ñawpa tiempopipas hinaspa kay tiempopipas Jehová Diosta tukuy sonqonwan serviqkunaqa chaskinqakum kusikuypaq wiñay kawsayta (Romanos 6:23). Diosta tukuy sonqonwan serviq runakunaqa kay pachapim suma-sumaq huertapi kawsanqaku, wakillanmi hanaq pachamanqa rinqaku Diospa tanteasqanta ruranankupaq.