¿Imamantam yachachinanku?

“Bibliapi llapallan qellqasqa kaqkunaqa Diospa Espiritunpa qosqanmi, allinmi yachachiwananchikpaq, faltanchikkuna qawachiwananchikpaq, pantaypi puriptinchikpas allin ñanman kutirichiwananchikpaq hinaspa imaynam allin kawsakuy yachachiwananchikpaq” (2 TIMOTEO 3:16).

WARMAKUNAQA Diosmantam imam kaqta yachananku. ¿Maypitaq yachanmanku? Diosmanta yachachiq ancha reqsisqa qellqapim, chayqa Bibliam.

Bibliaqa Diospa apachimuwasqanchik carta hinam, chaypim willawanchik Dios imayna kasqanmanta, yachachiwanchiktaqmi yuyayniyoqpas chaynataq warmapas imayna kawsanapaq. Qawasunyá wakin yachachikuyninkunata, kayqa yanapanmanmi uña warmakunatapas.

¿Imatam Diosqa munan paymanta yachananchikta?

▪ Bibliapa yachachisqan: ‘Sutikiqa [Jehová] Dios kasqantayá yachachunku. Kay pachapa altonpiqa qamlla kasqaykitayá yachachunku’ (Salmo 83:18).

Imatam yachachiwanchik: Diosqa kawsanmi chaymi sutinpas kan.

▪ Bibliapa yachachisqan: “Diosqariki qawachkanmi llapa runakunapa concienciantaqa, reqsintaqmi runapa imam munasqantapas chaynataq tanteasqantapas. Chaynaqa payta maskaptikiqa tariykachikunqam” (1 Cronicas 28:9).

Imatam yachachiwanchik: Jehová Diosqa llapallanchiktam yuyawanchik wawakunatapas manam qonqanchu (Salmo 10:14; 146:9). Payqa reqsinanchiktam munan.

▪ Bibliapa yachachisqan: “Amam [. . .] mana tayta-mamayoqtaqa ñakarichinkichu. Ñakarichisqaykirayku pay mañakuwaptinqa uyarisaqpunim” (Exodo 22:22-24).

Imatam yachachiwanchik: Jehová Diosqa warmachakunapa mañakusqantapas uyarinmi. Paymanqa imamantapas sonqonchikmantam willakuchwan.

▪ Bibliapa yachachisqan: ‘[Sapa kutim] Diosta piñachirqaku. Israelpa chuya Diosnintam llakichirqaku’ (Salmo 78:41).

Imatam yachachiwanchik: Rimasqanchikwan rurasqanchikqa Jehová Diostam kusichinman otaq llakichinmanpas, chaymi manaraq imatapas rurachkaspa otaq rimachkaspa allinta tanteananchik.

 ¿Imaynatam qawananchik llapallan runamasinchikta?

▪ Bibliapa yachachisqan: “Diosqa manam pimanpas sayapakunchu, payqa chaskinmi lliw nacionkunapi payta kuyaspa manchakuywan allin ruraq runakunataqa” (Hechos 10:34, 35).

Imatam yachachiwanchik: Diosninchik lliw runata allinpaq qawaptinqa ñoqanchikpas lliw runamasinchiktam respetananchik.

▪ Bibliapa yachachisqan: ‘Tukuy tiempoyá listolla kaychik imam creesqaykichikmanta tapusuptikichik cIarota contestakunaykichikpaq, chaytaqa ruraychik humillakuspayá hinaspa respetowanyá’ (1 Pedro 3:15).

Imatam yachachiwanchik: Imapi creesqanchiktam willananchik ichaqa sumaqllatam. Chaymantapas respetananchikmi iñisqanchikpi mana iñiqkunatapas.

¿Imaynatam familiapi kawsananchik?

▪ Bibliapa yachachisqan: “Churikuna, tayta-mamaykichikta [. . .] kasukuychik, chayqa Señorpa agradonpaqmi” (Colosenses 3:20).

Imatam yachachiwanchik: Kasukuq warmakunaqa manam tayta-maman kuyasqallantachu qawachinku, qawachinkutaqmi Diospa agradonpaq kawsay munasqankutapas.

▪ Bibliapa yachachisqan: “Pipapas quejan kaptinqa aguantanakuspayá pampachanakuykuychik, chaynataqa rurankichik qamkunatapas [Dios] pampachaykususqaykichikman hinam” (Colosenses 3:13).

Imatam yachachiwanchik: Familianchikpas otaq pipas hukmanyachiwanchikmanmi. Ichaqa Dios pampachawananchikta munaspaqa pampachananchikmi (Mateo 6:14, 15).

 ¿Imanasqataq mana llullakuspa llampu simiwan rimana?

▪ Bibliapa yachachisqan: ‘Ama llullakuspayá cheqaptapuni rimaychik’ (Efesios 4:25).

Imatam yachachiwanchik: Cheqapta rimaspaqa Diostam qatipakunchik hinaspa payta kusirichinchik. Llullakuspaqa Diablotam qatipakunchik, payqa ‘llullakuqkunapa taytanmi’ (Juan 8:44; Tito 1:2).

▪ Bibliapa yachachisqan: “Runamasikichik qamkunapaq allin kaqkuna rurananta munaspaqa qamkunapas paykunapaqyá allin kaqkunata ruraychik” (Mateo 7:12).

Imatam yachachiwanchik: Familianchikpa hinaspa amistadninchikpa imayna sientekusqanpi, piensasqanpi chaynataq ima necesitasqanpim reparana. Llakipayaspa rimaptinchikqa hukkunapas llakipayawasunmi (1 Pedro 3:8; Lucas 6:38).

Qawasqanchikman hinam Bibliaqa warmakunata yanapan yuyayniyoq kaspanku agradecekuq, respetakuq chaynataq entiendeq kanankupaq. Ichaqa, ¿pitaq chaykunamanta yachachinan?