¿Pitaq kallpanchan mana allinkuna kananpaq?

RUANDA nacionpi wañuchinakusqankuta ONU nisqa organización 1994 watapi mana yanapay atisqankumanta yuyarispanmi chay organizacionpa tropankuna kamachiq nirqa: “Diablotapas yanapachkayman hinam chaypi yanaparqani”, nispa. Chay wañuchinakusqankumantam huk runapas yaqa chaynata nirqa: “Ruanda nacionpi wañusqakunata huk uchkullapi pampasqankuta pipas qawaqqa manach iskayrayanmanchu Diablo kawsasqanmantaqa”, nispa. Hinaptinqa, ¿Diablochu chayna wañuchinakuykuna kananpaq tanqachkan?

Diablo, chayna llumpay ñakariykuna kananpaq mana kallpanchasqantam achka runakuna piensanku. Wakinmi piensanku pantaq kasqanchikrayku mana allin ruraykuna kasqanta. Wakinñataqmi tumpaykunku atiyniyoq apu runakunaman allpantinpi munaychakunankupaq unayña imatapas tanteasqankurayku. Chaymantapas, gobiernokunamanmi hukkunaqa tumpanku tukuy ima ñakariykunamanta.

Qamqa, ¿ima ninkitaq? ¿Imanasqam yapakun llumpay mana allinkuna hinaspa wañuchinakuykuna chinkachiyta munaptinkupas? ¿Imanasqam runakunaqa mana kasukuspanku hinalla kallpanchakuchkanku wañuchinakunankupaq? ¿Pitaq chayna kawsanankupaqqa kallpanchan? ¿Pitaq kay pachapi munaychakuchkan? Admirakunkichá chaymanta yachaspaqa.