Desgraciakuna manaña kaptin

MANAÑAM hatun desgraciakuna kanqañachu nispan pipas nisuptikiqa, ¿ima niwaqtaq? Yaqapaschá contestawaq yanqam chayqa, hatun desgraciakunaqa hinallam kanqa nispa. Otaq piensawaqpaschá burlakususqaykipaq.

Hatun desgraciakuna mana tukunanpaq hina kaptinpas kanmi razonkuna chaykuna tukunanpi confianapaq. Ichaqa manam runakunapa imapas rurasqanwanchu chayqa kanqa. Runakunaqa manam allintaqa entiendenkuchu Allpa pacha imayna unanchasqa kasqantaqa, allichaytaqa astawanchá mana atinmankuchu. Ñawpa tiempopi Israelta kamachiq yachayniyoq hinaspa cuentata qokuq ancha reqsisqa rey Salomonmi kaynata qellqarqa: “Runaqa manam entiendeyta atinmanchu kay pachapi rurasqa kaqkunamanta, entiendenanpaq maynataña maskaspanpas manam runaqa tarinqachu. Ichapas yachayniyoq runa ninman: ‘Ñoqam ichaqa yachaniña’ nispa. Ichaqa manam cheqaptachu entienderun”, nispa (Eclesiastes 8:17).

Runakunaqa manam chaykuna controlayta atinkuchu nitaq allichaytapas, ¿pitaq atinman? Bibliam willawanchik Unanchawaqninchik chaykuna allichananmanta. Diosmi unancharqa yakutawan wayrata mana haykapipas tukuqta (Eclesiastes 1:7). Runamantaqa Diosmi tukuy atiyniyoqqa. Chaymi Diosmanta willakuq Jeremias nirqa: “Señor Diosnilláy, qamqa hatu-hatun atiynikiwanmi cielokunatawan kay pachata unancharqanki. Qampaqqa manam kanchu imapas mana ruray atinaykipaq hinaqa”, nispa (Jeremias 32:17). Diosqa, Allpa pachata chaynataq chaypi kaqkunata unanchasqanraykum yachan runakuna hawka kawsananpaq imayna allichayta (Salmo 37:11; 115:16).

Chaynaqa, ¿imaynatam Dios allichanqa tukuy imata? Iskay kaq yachachikuypi yachamusqanchikman hina kay manchakuypaq desgraciakuna pasasqanqa sutillatam qawachin kay pachapi mana allin ruraykuna puchukananpaq hichpallaña kasqanta. Jesusmi nirqa: ‘Nisqaykuna sucedekuptinqa yachankichikmi Diospa [Gobiernonqa] hichpamusqantaña’, nispa (Mateo 24:3; Lucas 21:31). Chay Gobiernoqa, Diospa hanaq pachamanta gobiernonmi, chay gobiernom kay Pachapi tukuy imata allichanqa manañam kanqachu hatun desgraciakunaqa. Jehová Dios tukuyta allichananpaq atiyniyoq kaspanpas Churin Jesustam nombrarqa chayta rurananpaq, paymantam profeta Daniel nirqa: ‘[Jesusmanmi] qorqa atiyniyoq kananpaq. [. . .] qorqataqmi yupaychasqa kananpaq.  Llapallan runakuna, nacionkuna, [. . .] huk rikchaq rimayniyoqkunapas payta servinankupaq’, nispa (Daniel 7:14).

Diospa Churin Jesucristom atiyta chaskirun Allpa pachata sumaqta allichaptin imatapas mana manchakuspa kawsanapaq. 2.000 wata ñawpaqta kay Allpa pachapi kaspanmi qawachirqa sinchi wayratapas sayachinanpaq atiyniyoq kasqanta. Huk kutipim Jesuswan discipulonkuna Galilea law lamar qochapi tarikurqaku hinaptinmi ‘sinchillataña wayramuptin yakupas nisyu-nisyuta hoqarikururqa chaymi botemanpas yaqaña huntarurqa’. Hinaptinmi discipulonkuna mancharikuspan vidanku peligropi kaptin Jesusta qayakurqaku. ¿Imatataq payqa rurarqa? Jesusñataqmi ‘wayrata qaqcharqa. Qochatañataqmi hawkayayña nirqa. Chaymi wayra pasaruptin tukuy imapas hawkayarurqa’. Hinaptinmi discipulonkuna admirasqallaña nirqaku: “¿Pimá kay runaqa wayrapas yakupas kasunanpaqqa?”, nispa (Marcos 4:37-41).

Tiempo pasaytañataqmi Jesusqa hanaq pachaman kutirqa hinaspam gobiernananpaq astawan atiyta chaskirqa. Kunanqa Diospa Gobiernonpi gobiernananpaqmi nombrasqa kachkan, chaymi Allpa pachata sumaqta allichanqa runakuna hawkayaypi kusisqa kawsanankupaq.

Ichaqa yachamurqanchikmi kikillanpaq munaq mana allin runakunapa rurasqankuwan hatun desgraciakuna pasasqanta. ¿Imatam Diospa Gobiernon ruranqa chayna runakunawan? Bibliam nin: ‘Señor Jesucristom hanaq pachamanta atiyniyoq angelninkunapiwan rupachkaq ninapi hina rikurimunqa. [. . .] Dios mana reqsiqkunatawan Señorninchik Jesusmanta allin noticia mana kasukuqkunatam vengakunqa’, nispa. Chaynapunim kanqa, Jesucristom ‘kay pacha [purmachiqkunata] chinkachinqa’ (2 Tesalonicenses 1:7, 8; Apocalipsis 11:18).

Chaymantam “reykunapapas Reynin” Jesucristoqa Allpa pachapi desgraciakuna kananpaq kaqkunata controlanqa (Apocalipsis 19:16). Gobiernasqan runakuna manaña ima desgraciawanpas ñakarinankupaqmi yanapanqa. Atiyninwanmi parapas, rupaypas, chiripas, wayrapas allichasqa kanqa, chaykunaqa runakunapa allinninpaqmi kanqa. Chaywanmi llaqtanman Jehová Diospa kayna prometesqan cumplikunqa: “Ñoqam parachimusaq tiempollanpi hinaptinmi chakraykichikpi kawsaynikichikpas qespinqa, rurunqataqmi fruta sachaykichikkunapas” (Levitico 26:4). Runakunam wasinkuta ruranqaku, ichaqa manañam kanqachu wasinkuta tuñichiq ima desgraciapas. Bibliam nin: “Wasikunatam hatarichinqaku hinaspam chaypi yachanqaku. Uvas huertakunatam plantanqaku hinaspam rurunta mikunqaku”, nispa (Isaias 65:21).

¿Imatataq ruranayki?

Hamuq tiempopiqa manañam kanqachu hatun desgraciakunaqa, qampas wakin runakuna hinachá hawkayaypi kawsakuyta munanki. ¿Imatam rurawaq chaypi kanaykipaq? Diosmi tantearun payta ‘mana reqsiqkunaqa’ hinaspa ‘allin noticiata mana kasukuqkunaqa’ chay hawkayay tiempopi mana kanankupaq. Chaymi chaylla yachananchik Diospa imam munasqanta chaynataq kay Allpa pachata kamachinanpaq tanteasqankunatapas kasukunanchik. Diosqa munanmi payta reqsinanchikta chaynataq Gobiernonmanta allin noticiakunata uyarispa kasukunanchiktapas.

Chaypaqmi Bibliata allinta estudiana, chaypim tarinchik Diospa Gobiernon ukupi hawka kawsanapaq kamachikuykunata. Jehová Diospa testigonkunata niy Bibliapa ima nisqanmanta yachachisunaykipaq. Paykunaqa kusikuywanmi yachachisunki. Sichum kallpanchakunki Diosta reqsinaykipaq chaynataq kasukunaykipaq hinaptinqa Bibliapa kayna nisqanmi qampi cumplikunqa: ‘Segurom kawsakunqa pipas uyariwaqniyqa. Mana allintapas manam manchakunqachu pipas uyariwaqniyqa’ (Proverbios 1:33).