¿Imatataq rurana hatun desgraciakuna pasaptin?

Astawanña sapa kuti desgraciakuna pasasqanrayku, ¿imatataq rurachwan? Qawasunyá imakuna rurananchikmanta.

Peligromantam asurikuna. Bibliam nin: ‘Tanteoyoq runaqa desgracia sucedenanta qawarispanmi asurikun. Pisi experienciayoq runañataqmi chaykunawan ñakarin’, nispa (Proverbios 22:3). Chayna nisqanman hinam desgraciakuna manaraq pasachkaptin asurikunanchik. Volcan toqyamunanmanta, mayu lloqsimunanmanta otaq sinchi wayra chayamunanmanta willakuptinkuqa allinmi kanman seguro sitiokunaman asurikuyqa. Vidanchikmi astawan valen wasinchikmanta otaq ima kapuqninchikmantapas.

Desgraciakunawan mana sasachakunankupaqmi wakin runakunaqa tanteanmanku huk law sitiokunapi yachanankupaq. Huk autoridadmi nin: “Desgraciakuna pasananpaq sitiokunaqa sutillam. Chay sitiokunapim hatun desgraciakunaqa astawan pasanqa”, nispa. Chaykunaqa pasanmanmi lamar qochapa hichpanpi kaq llaqtakunapi otaq volcankunapa hichpankunapipas. Chay sitiokunapi mana yachanaykipaq tanteaspaqa otaq chaymanta huk law sitioman astakuspaqa manam llumpaytaqa sasachakunkichu ima desgracia pasaptinpas.

Preparasqam kana. Imayna preparasqaña kaspaykipas qonqayllamantam ima desgraciawanpas ñakariwaq. Ichaqa atiwaqmi cuidakuyta chay peligro kaptin ima ruranaykimanta allinta tanteaspaqa. Chay rurayqa tupanmi Proverbios 22:3 nisqanmanta rimamusqanchikwan. Mochilaykipim listo kanan ima desgraciapas pasaptin servichikunaykipaq kaqkuna. Huk qellqam consejan mochilanchikpi necesitasqanchik hampikunata, botellapi yakuta, chaylla mana ismuruq mikuykunata hinaspa servichikunanchikpaq kaq documentokunata tiempowan alistanapaq. Chaymantapas familianchikwanmi rimana ima desgraciakuna pasananpi chayman hina mayqenpas pasaptinqa ima rurananchikpaq.

Dioswan amistadninchikmi allin kanan. Chayqa anchatam yanapawanchik ima sasachakuypiña kaptinchikpas. Bibliam Diosmanta nin: “Payqa llakipayakuq Taytam hinaspa sinchi kallpanchaqninchik Diosmi. Paymi kallpanchawanchik tukuy sasachakuyninchikpi” nintaqmi ‘llakisqakunatam kallpanchan’, nispa (2 Corintios 1:3, 4; 7:6).

Diosqa yachanmi paypi iñiqkuna imawan sasachakusqankuta. Payqa kuyakuq kasqanraykum imaymanata kallpanchawanchik (1 Juan 4:8). Yanapawanchikmi oracionpi payman asuykuptinchik. Manam milagro rurapuwananchikpaqchu mañakusun, aswanqa chuya espiritunwan yanapawananchikpaqmi, chaywanmi Bibliapi textokunata yuyarisun hinaspa ima sasachakuypipas  kallpanchasqa tarikusun. Ñawpa tiempopi Israelpa reynin David hinam Diosman sonqo kaqkunaqa sientekusun, paymi nirqa: ‘Tutay-tutay wayqopi purispaypas manam manchakunichu. Ñoqawanqa kikiki kasqaykiraykum mana manchakunichu. Qamqariki ñoqatam kallpanchawanki varaykiwan tawnaykiwan’, nispa (Salmo 23:4).

Iñiqmasinchikkunapa yanapaynin. Apostolkunapa tiemponpim Agabo sutiyoq cristiano willakurqa: “Tukuy kay pachapim hatun yarqay kanqa”, nispa. Chayqa cheqaptapunim pasarqa “Claudio sutiyoq reypa tiemponpi”, hinaptinmi chay tiempopi cristianokuna llumpayta sasachakurqaku Judea llaqtapi. ¿Imatataq huk llaqtakunapi kaq cristianokunaqa rurarqaku iñiqmasinkuna sasachakusqankumanta yacharuspanku? Bibliam nin: ‘Hinaptinmi Antioquiapi iñiqkunaqa rimanakurqaku Judeapi iñiqkunaman atisqankuman hina yanapakuy apachinankupaq’, nispa (Hechos 11:28, 29). Qawasqanchikman hinaqa kuyakuyninkum kallpancharqa yanapakunankupaq.

Kay tiempopipas Diosta serviqkunaqa chayna kuyakuyninkutam qawachinku ima desgraciakunapas kaptinqa. Jehová Diospa testigonkunataqa chayna yanapanakusqankuwanmi reqsinku. Chile nacionpi 2010 watapi 27 febreropi manchakuypaq terremotowan desgracia kaptinmi chaylla yanapakuq kasqankuta qawachirqaku. Lamar qochamanta yaku lloqsiramuspanmi Karlapa wasinta aparurqa, paymi willakun: “¡Anchatam kusikurqani qatiqnin punchawkunallapi huk lawkunamanta Testigokuna chayamuspan yanapawasqankumanta. Jehová Diosqa sutillatam servichikun tukuy sonqonkuwan yanapakuq iñiqmasinchikkunata. Chaymi Jehová Diospa kuyawasqanta hinaspa amparawasqanta musyarqani!”, nispa. Chayna yanapasqankuta reparaspanmi abuelon nirqa: “Manam haykapipas rikurqanichu chayna yanapakuytaqa iglesiaypiqa”, nispa. Payqa manam Testigochu karqa, chaymi Bibliamanta estudiota chaskinanpaq Testigokunata mañakurqa.

Diosta kuyaqkunam anchata kallpanchawanchik desgraciakunawan sasachakuptinchik. Ichaqa, ¿chayamunqachu tiempo allpantinpi hatun desgraciakuna manaña kananpaq? Qawasunyá Biblia chaymanta ima nisqanta.

[6 kaq paginapi dibujo]

Mochilaykipim listo kanan servichikunaykipaq kaqkuna

[7 kaq paginapi foto]

Oracionpim Diosta mañakuna chuya espiritunwan yanapawananchikpaq manam milagrotachu

[7 kaq paginapi foto]

Cristianokunaqa yanapanakunchikmi ima desgraciapas pasaptin

[7 kaq paginapi foto]

“Jehová Diospa kuyawasqanta hinaspa amparawasqanta musyarqani”